1. Ntakhara heeni ninnaphwanela omulapela pahiru Yehova?

NNAPHWANELA omulapela pahiru Yehova woona wi tonipatunxe nave tonivanhe ekumi. (Wup. 4:11) Nyenya yookhalavo yawoopiha. Naamwi nimusivelaka nave nimucicimihaka Yehova, ichu ikina inamukhala sookhweleyasa mu okumi ahu ophiyerya onihiiha omusivela ni omulapela pahiru Yehova ntoko nnaphwanelaahu. Nnachuna osuwela mukhalelo eyo eneeraaya yeereye. Yoopacerya, nnahaala othokororya yeeyo enataphulela omulapela pahiru Yehova.

2. Mwawiiwanana ni Mukwaha 34:14, tiheeni nnahaalaahu opaka wakhala wi ninnamusivela mwawiiseela Yehova?

² Mpiipiliya, omusivela mwawiiseela Yehova oniiwanana ni omulapela yooworu pahi. Hiyo hinnahaala omweemererya muchu naari echu okhalano nipuro mmurimani mwahu.—Mwaalakhanye Mukwaha 34:14.

3. Ntakhara heeni nookhalano mathowa aphaama a omusivela Yehova?

³ Nookhalano mathowa aphaama a omusivela Yehova. Ntakhara heeni? Nthowa nawi omusivela wahu onathipeleya mu sawooniherya seiyo nihusenryaahu vooloca sa yoowo. Hiyaano noosivela mikhalelo sawe. Hiyo noosuwela nave ninneemererya yeeyo onasiveleiye ni ohinasiveleiye. Ninniiwexexa nave ninnakhaviherya yookhwelaawe ntakhara hiyo. Ninnacicimiheya nthowa na oneemererya okhalano ekari ya okhala asinthamwene awe. (Sal. 25:14) Echu yoothene nihusenryaahu vooloca sa Mpatuxa ahu, yoonaacameliha wa yoowo.—Tiy. 4:8.

4. (1) Tiheeni Musaserya onaphariheleiye wi aceecheihe omusivela wahu Yehova? (2) Tiheeni nnahaalaahu othokororya mmwaha yoola?

⁴ Musaserya tonalamulela elapo yeela, nave onnapharihela eyo wi eerihe ichu seiyo achu anachunaaya okhala sookhweleyasa mu ikumi sahu ni weeriha soochuna soonanara okhala soovila ovootha. (Éfe. 2:1-3; 1 Yoh. 5:19) Owo onachuna wi nsivele moopwaha ichu wi nihiwerye omusivela pahiru Yehova. Mukhalelo woopacerya ori oneeriha osivela ikhorowa, nave wanawiili ori  oneeriha opaka soothanla soonanara vooloca sa mathatelo.

5. Ntakhara heeni ninnaphwanela wiikhapelela wi nihinnuwihe osivela ikhorowa?

⁵ Oothene ahu ninnachuna yoolya, yoowara ni nipuro noophwanelela wi nikhalevo. Nyenya, nnaphwanela wiikhapelela vooloca sa wunnuwiha osivela ikhorowa. Ancipale anapaka makupa a elapo ya Satana ari “oochunasha ikhorowa” ni ichu seiyo ikhorowa inaweryaaya othuma. (2 Tim. 3:2) Yesu aahisuwela wi oomuchara awe yaahaala weereryiwa wunnuwiha osivela yoola. “Kapuro hanawerya waalapa asaapwiya eeli,” Yesu aahiloca, “tiwi onammwiica mmoha nave anammukhwela mukina; hooye onii anammuchuna mmoha, anamunyemula mukina. Nyuwo hamunawerya omulapa Muluku ni olapa muhakhu.” (Mat. 6:24) Muchu yoowo onamurumeela Yehova aniihatho amalihaka elukuluku nave iilipiheryaka wi akhaleno muhakhu, owo oneererya waalapa asipwiya eeli. Owo hanahaala omulapela pahiru Yehova.

6. Tiheeni nnahuseryaahu orweela wa masu a Yesu vooloca sa muloko wo Lawotikeya?

⁶ Waacamela omakuchuwelo wa nsana noopacerya E.K., achu a muloko wa epooma yo Lawotikeya yaaniirumiha: “Kooreela, kookhalano muhakhu, hayiivo echu kinahaawelaaka.” Nyenya mmoonelo wa Yehova ni Yesu, awo yaari “ootakhaliwa, oohasuwa, oohaawa, oohoona ni oothaaleliwa.” Yesu aahaavaha ekano, ohiya nthowa nawi yaari ooreela, nyenya nthowa nawi osivela waya muhakhu waananariha onthamwene aya ni Yehova. (Wup. 3:14-17) Wakhala wi nohoona wi nchuno na okhalano muhakhu ninnannuwa mmurimani mwahu, nnaphwanela okwatelela muupuwelo yoowo mwawaakuveya. (1 Tim. 6:7, 8) Wakhala wi hineenreno, murima ahu onahaala okawanyeya nave Yehova harwa eemererya malapelo ahu. Owo “tahace.” (Malam. 4:24) Nni n’yeleele hai moonelo ahu vooloca sa ikhorowa?

7-9. Tiheeni muhusenryaanyu orweela wa yaweereya ya mutokweene oniichaniwa Tavite?

 ⁷ Muthokororye yootakiherya ya Tavite, mutokweene onalapa mwakuru yoowo onakhala o Estatu Unitu. Owo olonce wi aanatepa oolapa mwakuru. Empresa aalapeiye yaahimvaha muteko waphaama ni ikhorowa sincipale, nave ooniwa ntoko muchu aphaama aapanke muteko mu epooma yeele. Tavite ooloca: “Mu elukuluku, kuupuwela wi phatamari ole yaari yawooniherya ya mareeliho a Yehova.” Apwanne okhumelela wawe phaama chiryene waarweela wa Yehova?

⁸ Vakhaani vakhaani Tavite aahipacerya osuwela wi muteko awe waanananariha onthamwene awe ni Yehova. Owo ooloca: “Mmithukumano sa muloko ni mmuteko woolaleerya, miyaano kuupuwela sa makacamiho oomutekoni. Kaanaakhela ikhorowa sincipale, nyenya kaari awuukhuwa, nave miyaano ni mwaaraka naahipacerya okhalano makacamiho mu othela.”

⁹ Tavite aahisuwela wi aanaphwanela opaka yoolakelela wa yeeyo yaari yookhweleyasa wa yoowo. Owo ooloca: “Kaahipaka yoolakelela wi kookolole mukhalelo aka.” Tavite aachuna otoroka marehereryo awe, nave aahimuleela pwiyawe yeeyo aachuneiye opaka. Teevi yaari yookhumelela? Tavite aahiyeleela muteko awe! Tiheeni aapankeiye? Owo ooloca: “Mu nihiku noocharela, kaahirepela epetisau ya opiyoneero wookhaviherya wootitelela.” Wi iikhaviheryeke, Tavite ni mwaariye yaahipacerya opaka muteko wa ovela. Evinrevo elukuluku vakhaani, aahipacerya opiyoneero wookilaatheya, nave mwaariye tho aahipacerya opiyoneero. Mutheli ola oothanla muteko yoowo onooniwa ni ancipale ohikhala echu, nyenya muteko yoowo anapakaaya tahi echu yookhweleyasa wa yaawo. Naamwi ehirino ikhorowa sincipale ntoko  khalai, mweeri ti mweeri annakhalano ikhorowa wi ekhwaaniherye yeeyo anachunaaya. Awo anachuna omuhela Yehova vanipuro noopacerya, nave ahoona wi onnakhapelela soothowa sa yaale anahela Omwene mu nipuro noopacerya.—Mat. 6:31-33.

10. Nni nikhapelele hai murima ahu?

¹⁰ Moohiphwacha naarino muhakhu muncipale naari hooye, nnaphwanela okhapelela murima ahu. Mwawiihai? Muhunnuwihe osivela ikhorowa. Nave muheemererye wi muteko anyu weelapo okhale mu nipuro noopacerya opwaha omulapela wanyu Yehova. Muni musuwele hai waakhanle wi eyo enneereya ni nyuwo? Makoho makina munaphwanelaanyu wiipakela ti: ‘Apwanne wiiliwiili kinnuupuwela vooloca sa muteko aka weelapo naamwi kiri mmithukumano naari mmuteko woolaleerya? Mano, elukuluku yoothene kinnoova waakhanle wi kinahaala okhalano ikhorowa soophwanelela muhoolo? Apwanne ikhorowa ni ichu soomwiilini sinnatannya makacamiho mu othela waka? Mano, kinahaala weemererya olapa muteko yoowo onooniwa ohikhala echu, okhalaka wi onamukeemererya omaliha elukuluku yincipale kimurumeelaka Yehova?’ (1 Tim. 6:9-12) Vaavaa nnathokororyaahu makoho yaala, hankooni nuupuwele wi Yehova onnanisivela nave oopaka yoororomeliha ela wa yaale iivelenle wa yene: “Nkirwa koohiya naari woonyanyala mano.” Ti nthowa nene murummwa Paulo aarempeiye: “Muhikhale oosivela ikhorowa.”—Ahe. 13:5, 6.

11. Tiheeni eni yeereye ni muchu vooloca sa mathatelo othanlileiye?

¹¹ Yehova onachuna wi nipuhe ekumi, nave mathatelo ananwerya onikhaviherya weerano yeeyo. Mweeparipari, Masu a Muluku analoca wi “echu yooreera wa muchu, olya, owurya, ni opuha mmitekoni mwawe.” (Ekle. 2:24) Nyenya, mathatelo mancipale mu elapo ananwerya okhalano ovolowele woonanara wa hiyo. Awo annananariha meecelo aachu, yaaceenyeryaka weemererya—naari osivela ichu seiyo Muluku oniiceiye.

12. Mwawiiwanana ni 1 Korinto 10:21, 22, ntakhara heeni ninnaphwanela othanla mweephoole mathatelo ahu?

¹² Hiyaano nnachuna omulapela pahiru Yehova, mwa yeeyo nihirwe nlye “va emeesa ya Apwiya ni ya minepa soonanara.” (Mwaalakhanye 1 Korinto 10:21, 22.) Olya yoolya ni muchu enakhala eneneeryo ya onthamwene. Wakhala wi noothanla mathatelo yaawo anavuwiha nlala, onamulosiwe, ocapaheya, naari soochuna ikina soomwiilini ni miyoonelo, hiyo mweeparipari, nnuuka yoolya yeeyo erehereryiwe ni amwiicani a Muluku. Ntoko yookhumelela, tahi wi  pahiru nniipahula yeehuru nyenyatho nnapahula onthamwene ahu ni Yehova.

13-14. Ntakhara heeni ninnaphwanela okhalano ephoole vooloca sa mathatelo yaawo nnathanlaahu? Mvahe yootakiherya.

¹³ Muthokororye mikhalelo sooluluwanya vooloca sa mathatelo aryaaya ntoko yoolya yeeparipari. Vaavaa nnalyaahu, ninnavareryela yeeyo nnahelaahu mwaano mwahu. Nyenya nimanle omirya yoolya, hinnawerya othanla mukhalelo yoolya enahaalaaya ovolowela mwiili ahu. Yoolya yaphaama enamunivaha okumi waphaama; yoolya yoonanara enamunanariha okumi ahu. Yookhumelela heni yooneye mwawaakuveya, nyenya enahaala wooneya moovira wa elukuluku.

¹⁴ Moolikana, vaavaa nnathanlaahu mathatelo, nnaphwanela ovareryela yeeyo nnahelaahu mmuupuweloni mwahu. Ovinyerya vaava, onnapacerya mukhalelo mukina, nave muupuwelo ni murima ahu onnavoloweliwa. Mathatelo aphaama anamunikhaviherya; mathatelo oonanara anahaala onipahula. (Mwaalakhanye Tiyako 1:14, 15.) Ovolowela wa mathatelo oonanara honi wooneye mwawaakuveya, nyenya onahaala wooneya moovira wa elukuluku. Ti nthowa nene Piipiliya onanlopoleiye: “Muhihuwelihiwe, Muluku hanthatiwano. Yeeyo muchu onamiseiye, yeeyo tho toneereiye ahephe. Tiwi, onamisa enahakalaliha mwiili, wa mwiili onarwa ahepha eyuuce.” (Gal. 6:7, 8) Ela ti yookhweleya wa hiyo okhooca mathatelo oothene anavuwiha ichu seiyo Yehova oniiceiye!—Sal. 97:10.

15. Yoovaha taani Yehova onivanheiye wi nipuhe?

¹⁵ Achu ancipale a Yehova annapuha omoona JW Broadcasting^®, televisau ahu a mu Interneti. Murokora oniichaniwa Marilyn ooloca: “JW Broadcasting ookikhaviherya okhala muchu oohakalala, nave kinnawerya woona echu eri yoothene mwemmo, nthowa nawi soothene ti saphaama wa miyo. Elukuluku kiniisoonaaka omeekha naari ooceecheya, kinnoona mwaha naari marehereryo a Malapelo a Woosiiselo. eyo ennakeeriha okhala vakhiviru va Yehova ni wa marehereryo awe. Yoovaha ya JW Broadcasting yootoroka moomalela okumi aka.” Apwanne munnakumihavo mphurelo mu yoovaha ya Yehova? Mwawaaceererya ni marehereryo yaala mavyaani, JW Broadcasting ookhalano marehereryo mavyaani mweeri ti mweeri, nave sookhalamo ixilema ni miyaha sooruma ni macipo oolipiha yaawo muchu onooneiye ni owiriyana mu elukuluku vyakala.

16-17. Ntakhara heeni ninnaphwanela ovareryela mweephoole waaca wa elukuluku nnamalihaahu mmathatelo, nave nni neereno hai?

¹⁶ Nnaphwanela okhalano ephoole ohiya pahiru mukhalelo wa mathatelo nnapuhaahu nyenyatho waaca wa elukuluku nnamalihaahu mu yaawo. Wakhala wi hinaano ephoole, nnahaala omaliha elukuluku yincipale noonaka mathatelo opwaha omaliha nimurumeelaka Yehova. Ancipale annoona okhala yoovila ovareryela elukuluku anamalihaaya mmathatelo. Murokora a iyaakha khumi nathanu nararu oniichaniwa Apikayeli ooloca: “Omoona Televisau ennakiichuuwiha omakuchuwelo wa nihiku na muteko wakuru. Nyenya wakhala wi nkiniikasoopa, kinammaliha iwora sincipale kiwehaka nikalaase.” Munna mmiravo oniichaniwa Samuwele ooloca: “Ikwaha ikina kaanoona ixilema sincipale sookhuveya mu interneti. Kaapacerya koonaka pahiru emoha, nave nkaawerya osuwela wi kaanamaliha iwora chaaru naari sese koonaka ixilema.”

¹⁷ Muni muwerye hai ovarerya elukuluku munamalihaanyu ni mathatelo? Mukhalelo woopacerya ori osuwela waaca wa elukuluku munamalihaanyu ni mathatelo. Ntakhara heeni oheererya orepela variyari va esumana emoha? Murepele mu kalentaariyu iwora kavi mmalinhaanyu mmoonaka televisau, mvareryaka ichu mu interneti, naari mwaavonyaka axooku mu telefone anyu. Wakhala wi mohoona wi munnamaliha  elukuluku yincipale, mweererye opaka yoochariha. Woopaceryani mwiivahe elukuluku ntakhara ichu sookhweleyasa, nave voocharela mwiivahe elukuluku ntakhara mathatelo. Voocharela, mumveke Yehova wi ookhaviheryeeni wi mucharihe yeeyo murepenlaanyu. Mweerano yeeyo munahaala okhalano elukuluku yoophwanelela ni ikuru munachunaanyu wi mpake Yoohuserya anyu ya Piipiliya, malapelo eechoko, mithukumano sa muloko, nave omurumeela Yehova moorweela wa olaleerya ni ohusiha. Nyuwotho munahaala opuha vancipale elukuluku munamalihaanyu mmathatelo nthowa nawi munnamuhela Yehova mu nipuro noopacerya.

18-19. Nni nooniherye hai wi nnamulapela pahiru Yehova?

¹⁸ Amanle orepa vooloca sa makuchuwelo a elapo ya Satana ni elapo yahiihaano enarwa, murummwa Paulo aahiloca: “Oosiveliwa nyu, wanthowa nenla, niwehereryaka ichu seiya, mwiilipisheryeke wi yoowo oophwanyeeni muri mmureceleni.” (2 Ped. 3:14) Elukuluku nniiwelelaahu ekano yeela nave nipaka owetha wahu wi ntitelele okhala aweela mmeecelo ni mmunepani, ninnooniherya wi nnamulapela pahiru Yehova.

¹⁹ Satana ni elapo awe onahaala otitelela oneererya wi nihele ichu ikina vanipuro noopacerya mu ikumi sahu ohiya Yehova. (Luka 4:13) Nyenya moohiphwacha makacamiho nnahoolelaahu, hinnahaala omweemererya muchu naari echu wi ikhaleno nipuro mmurimani mwahu. Hiyaano nri oolakelela omvaha Yehova yeeyo enamphwanela—omulapela yooworu pahi!