1. Tiheeni Yehova onapakeiye wi akhwaaniherye yoolakelela awe?

YEHOVA ookhalano owerya wa okhala yeeyo onachuneiye okhala wi akhwaaniherye yookhwelaawe. Ntoko yootakiherya, Yehova onnakhala Muhusiha, mulipa Oohakararya, ni Namalaleya. Iha ti savakhaani wa sincipale seiyo owo onakhaleiye. (Isa. 48:17; 2 Kor. 7:6; Gal. 3:8) Nlelo, owo onnaapharihela muteko achu wi akhwaaniherye yoolakelelaawe. (Mat. 24:14; 28:19, 20; 2 Kor. 1:3, 4) Yehova onanweryatho onivaha miruku ni owerya nnachunaahu wi nikhale achu yaawo onaachuneiye wi ekhwaaniherye yookhwela awe. Eparakrafo ela ennathariha yeeyo Yehova onaweryeiye okhala naari weeriha wi akhale yeeyo onachuneiye wi akhwaaniherye yoolakelelaawe.

2. (1) Ntakhara heni ikwaha ikina nnamukhwa minikwa waakhanle wi Yehova onnanipharihela muteko? (2) Tiheeni nnahaalaahu othokororya mmwaha yoola?

² Oothene hiyo ninnachuna ophariheliwa ni Yehova, nyenya akina anamukhwa minikwa waakhanle wi annaphariheliwa muteko ni yoowo. Ntakhara heeni? Nthowa nawi awo anniisoona okhala ookotakota moorweela wa wuuluvala, mikhalelo saya naari mavyakelo aya. Akina anamuupuwela wi annapaka owetha waya nave wi hanaphwanela waacererya muteko aya. Mmwaha yoola, nnahaala othokororya ti mwawiihai Yehova onamuvyakiheiye mmoha ti mmoha a hiyo wi akhwaaniherye yoolakelela awe. Voocharela, nnahaala othokororya miyaha sinalociwa Mpiipiliyani seiyo sinathariha mukhalelo Yehova aavanheiye akapuro awe—alopwana ni athiyana, nchuno ni owerya wa opaka ichu. Vookuchula, nnahaala othokororya mukhalelo nneeraahu nimweemererye Yehova wi anipharihele muteko.

3. Mwawiiwanana ni moonelo ori mu Filipi 2:13, ti mwawiihai Yehova onanivaheiye nchuno na opaka echu?

³ Mwaalakhanye Filipi 2:13. * Yehova onanwerya onivaha nchuno na opaka echu. Owo oneerano hai eyo? Akhweya nnamusuwela yoothowa vyakala mmulokoni. Naari atokweene anamwaalakhanya ekaarata enarweela o eskritoriyu ya efiliyale ahu elocaka sa othowa orivovo mu ekulucu yoorakamelana ni muloko ahu. Wi naakhulele, ninniikoha, ‘Tiheeni kinaphwanelaaka opaka wi kikhaviherye?’ Naari akhweya nnahaala ovahiwa muteko woovilaxa, nyenya nnamwiikoha waakhanle wi nnahaala opaka phaama muteko owo. Naari nimanle waalakhanya makupa vyakala mu Masu a Muluku, nnamuupuwela: ‘Kini kipharihele hai makupa yaala wi kaakhaviherye akina?’ Yehova harwa anikhinyererya opaka echu vyakala. Nyenya vaavaa onooneiye wi ninniilipiserya mukhatiihu, Yehova onamunivaha nchuno na okhwaaniherya yeeyo nnuupuwelaahu.

4. Yehova oni anivahe hai owerya wa opaka echu?

⁴ Yehova tho onamunivaha owerya wa opaka echu. (Isa. 40:29) Mwawiihai? Owo onamunivaha munepa awe waweela wi nunnuwihe mavyakelo yaawo naaryaahuno khalai. (Muk. 35:30- 35) Orweela wa marehereryo awe, Yehova onamunihusiha mukhalelo wa opaka muteko vyakala. Waakhanle wi nyuwo munnakhwa minikwa vooloca sa mukhalelo muneeraanyu mpake muteko wammoori, mveke nikhaviheryo. Navetho mukhale ootaphuwa omveka Tiithi ahu oovaha awirimu “ikuru [ni] oweryawene woopwaha.” (2 Kor. 4:7; Luka 11:13) Piipiliya ookhalano sootakiherya sincipale sa alopwana ni athiyana yaawo Yehova aavanheiye nchuno ni owerya wa opaka echu. Vaavaa nnathokororyaahu saweereya seiya, mweererye wuupuwelela mikhalelo Yehova onahaaleiye opharihela mmukhalelo woolikana.

5. Tiheeni Nnahuseryaahu oorweela wa mukhalelo ni elukuluku Yehova aampharihenleiye Mose wi awoopole achu awe?

⁵ Yehova aahimweeriha Mose okhala moopoli a Aisarayeli. Nyenya ti liini Yehova aampharihenleiye muteko Mose? Apwanne yeeren’ye Mose amanle ‘ohusihiwa mmiruku yoothene ya Ayikuputu’? (Saw. 7:22-25) Hooye, Yehova ampharihenle Mose pahiru amanle omukhaviherya okhala muchu awiiyeviha ni awiichacala. (Saw. 7:30, 34-36) Yehova aahimvaha Mose olipa murima wi aloce ni mulamuleli oowerya o Yikuputu. (Muk. 9:13-19) Tiheeni nnahuseryaahu oorweela wa mukhalelo ni elukuluku Yehova aampharihenleiye Mose? Yehova onaapharihela yaale aneererya otakiherya mikhalelo sawe.—Fil. 4:13.

6. Tiheeni nnahuseryaahu orweela wa mukhalelo Yehova aampharihenleiye Persilai wi amukhaviherye Mwene Tavite?

⁶ Iyaakha masana ohoolo waya, Yehova aahimpharihela Persilai wi amukhaviherye mwene Tavite. Tavite ni achu ‘yaavoliwa etala, evelavela ni nthanana’ vaavaa yaamuchawaaya mwaana a Tavite, iichaniwa Apusalamu. Persilai, yoowo aari awuuluvala, vamoha ni akina yaahihela ikumi saya va yawoopiha wi emvakulele Tavite ni yaawo yaari ni yoowo. Persilai haaphiyenrye makuchuwelo wi nthowa na wuuluvala haki aphariheliwe ni Yehova. Ohiya yeeyo, ni murima woovaha, Persilai aahipharihela yeeyo aareiyeno wi aakhaviherye alapeli a Muluku ni yeeyo yaathowa. (2 Sam. 17:27-29) Tiheeni nnahuseryaahuvo? Moohipwacha iyaakha sahu, Yehova onamunipharihela wi nikhwaaniherye soothowa sa alapeli akhwiihu, moohipwacha waakhanle wi ta vanipuroni  naari a elapo ekina, yaawo anathoiwa ichu soomwiilini. (Masi. 3:27, 28; 19:17) Akhweya hinni niwerye waakhaviherya mooluluwanya, nyenya nnanwerya ovaha sooveleela sahu ntakhara muteko wa elapo yoothene, wi ikhalevo ikhorowa wi naakhaviherye anna ni arokora ahu wakhalavo othowa.—2 Kor. 8:14, 15; 9:11.

7. Tii mwawiihai Yehova aampharihenleiye Siimiyoni, nave osuwela yeela enanlipiha hai?

⁷ Yehova aahimuroromeliha Siimiyoni, mulopwana oororomeleya awuuluvala o Yerusalemu, wi haahaala okhwa ahimoonne Mesiya. Yoororomeliha eyo yaahimulipiha vancipale Siimiyoni, vaavaa aaweheryeiye mu iyaakha sincipale wi amoone Mesiya. Yehova aahireeliha nroromelo ni ovilela wawe. Nihiku nimoha, “ahooleliwe ti munepa [waweela],” aaya mu empa ya Yehova. Mwemmo aahimoona Yesu ari nikwiya, nave Yehova aahimpharihela Siimiyoni wi avahererye yooloherya vooloca sa mwaana yoowo aahaala okhala Kristu. (Luka 2:25-35) Naamwi ekhalaka wi Siimiyoni haakhanle mu elukuluku yincipale wi amoone Yesu apaceryaka muteko awe woolaleerya, owo aahihakalala Yehova ompharihela mmukhalelo yoola. Nave owo onahaala okhalano ichu sincipale saphaama muhoolo! Mu elapo evyaani, mulopwana yoola oororomeleya onahaala okhalano tho ekari ya woona mukhalelo olamulelo wa Yesu oneeraaya okhale mareeliho wa imusi soothene sa veelaponi yavathi. (Map. 22:18) Hiyaano tho ninnathamalela vancipale ekari vyakala Yehova onanivaheiye mmuteko awe.

8. Yehova oni anipharihele hai hiiha ntoko eenreiye ni Parnape?

⁸ Mu nsana noopacerya E.K., mulopwana mmoha a mahala iichaniwa Yosefe aahiivaha mukhateiye wi aphariheliwe ni Yehova. (Saw. 4:36, 37, BNM) Arummwa yaahimvaha nsina mulopwana owo okhala “mwana a nlipiseryo”, nthowa nawi aanakhumelela phaama mu waalipiha akina. Ntoko yootakiherya, Saulo amanle okhala Mukristu, anna ancipale yaanoova omwaacamela nthowa nawi aanawiikara Akristu. Nyenya Parnape aahimuhakararya, nave Saulo aahimuthamalela vancipale nthowa na oreera wawe murima. (Saw. 9:21, 26-28) Ohoolo waya, atokweene o Yerusalemu yaahoona ochuneya waya waavaha nlipiho anna oorakamela o Antiokeya o Siriya. Taani anna awo yaamurummaaya? Aari Parnape! Awo yaahipaka yoothanla yaphaama. Ninnaleeliwa wi Parnape, “aahaacicimiherya oothene wi elipe murima, [nave] etitelele okhala mwa Apwiya.” (Saw. 11:22-24) Moolikana tho olelo, Yehova onamunikhaviherya okhala “mwana a nlipiseryo” wa Akristu akhwiihu. Ntoko yootakiherya, owo onamunipharihela wi naahakararye yaale amuyeleenle oosiveliwa aya mookhwani. Owo onamuneeriha hiyo omuxekurya naari olocano mu telefone muchu yoowo oniiceliwa naari onathanana wi nloce masu avakhaani oohakararya. Apwanne munahaala omweemererya Yehova wi oophariheleeni hiiha nto eenreiye ni Parnape?—1 Tes. 5:14.

9. Tiheeni nnahuseryaahu orweela wa mukhalelo Yehova aampharihenleiye munna oniichaniwa Vasily wi akhale mukukhula aphaama oomunepani?

⁹ Yehova aahimukhaviherya munna oniichaniwa Vasily okhala mukukhula aphaama. Vaavaa Vasily aathanliweiye wi arumeele ntoko mutokweene a mmulokoni arino iyaakha 26, owo aanoova uupuwelaka wi haari oophwanelela okhaviherya muloko mmukhalelo woomunepani, xaxaxa wa anna yaale yaarino makacamiho. Nyenya, owo aahaakhela ovyakiha waphaama orweela wa atokweene yaawo yaarino mavyakelo nave tho moorweela wa Exikola ya Orummwa wa Omwene. Vasily aahiilipiserya wi aye vahoolo. Ntoko yootakiherya, owo aahirepela ichu ikhaani aachuneiye opaka. Vaava aaweryeiye opaka echu emoha, aanawerya ovootha woova wawe. Vano owo ooloca: “Yeeyo yaakeeriha okhala awoova, vano tenakiruuhela ohakalala otokotoko. Vaavaa Yehova onakikhaviheryeiye  ophwanya yoorepa yoophwanelela wi kimuhakararyeno munna naari murokora mmulokoni, eyo ennakiruuhela weeliwa murima.” Anna, waakhala wi mohiivaha hiiha ntoko Vasily wi mphariheliwe ni Yehova, owo onamoovahaani mavyakelo wi mpake sincipale mmulokoni.

10. Tiheeni Apikayeli aapankeiye, Nave tiheeni muhusenryaanyu orweela wa yootakiherya awe?

¹⁰ Tavite ni yaale yaamuroromela yoowo, yaaniikariwa ni Mwene Sawuli, nave awo yaanachuna nikhaviheryo. Alopwana yaawo yaari ni Tavite yaahimveka yoolya mulopwana mmoha ooreela iichaniwa Napali. Awo yaari ootaphuwa omveka nthowa nawi awo yaanakhapelela muhuwo wa Napali mutakhwani. Nave mulopwana anrima Napali, aahikhooca waavaha yoolya. Tavite aahitepa onyeenyeya ophiyerya wi aanachuna omwiipha Napali ni alopwana oothene aveemusini vawe (1 Sam. 25:3-13, 22) Mwawiihiiha, mwaara a Napali, Apikayeli yoowo aari oophwaneliwa aari oosuwela. Ooniheryaka olipa murima otokotoko, aahikokhora vamiithoni va Tavite nave aahimveka wi ahimukookiherye yoonanara Napali orweela mwa omwiipha vamoha ni alopwana awe. Mwa mavyakelo, Apikayeli aamvaha ekano Tavite wi ahiye mwaha owo mmatani mwa Yehova. Masu a wiiyeviha a Apikayeli ni meerelo awe amiruku, yaahitannya murima wa Tavite. Tavite aahiphiyerya makuchuwelo wi Yehova taamuruminhe Apikayeli. (1 Sam. 25:23-28, 32-34) Apikayeli aahooniherya makhalelo yaawo yaamweerinhe ophariheliwa ni Yehova. Mmukhalelo woolikana, arokora Eekristu yaawo anunnuwiha mavyakelo ni miruku ananwerya ophariheliwa ni Yehova wi elipihe imusi saya ni akina mmulokoni.—Masi. 24:3; Tito 2:3-5.

11. Tiheeni anamwane aasithiyana a Salome yaapankaaya, nave taani onaatakiherya olelo?

¹¹ Iyaakha masana ohoolo waya, anamwane aasithiyana a Salome yaari variyari va yaale Yehova aapharihenleiye orehererya ixiri so Yerusalemu. (Neh. 2:20; 3:12) Naamwi tiithi aya aari muhooleli, anamwane a Salome yaahiiveleela ni murima woothene ophara muteko woovila ni wawoopiha. (Neh. 4:15-18) Awo yaari oohiyana ni achu avasulu o Tekowa, woona wi awo “hiyaaphanreru muteko” ni achu yaawo yaalapa! (Neh. 3:5) Nkaanyiheryani ohakalala anamwane a Salome yaaryaayano vaavaa muteko wa oteka waakuchunwaaya pahiru mu mahiku makhumi mathanu nameeli! (Neh. 6:15) Mmahiku ahu, arokora ahu awiiveleela annahakalala vaavaa anapakaaya muteko vyakala woomuluku yoowo ori oteka ni orehererya wanaawiili ipa seiho sinaveleeliwa wa Yehova. Mavyakelo aya, ohakalala, ni ororomeleya ti sookhweleya wi muteko okhumelele phaama.

12. Yehova oni anipharihele hai hiiha ntoko eerenleiye ni Tapita?

¹² Yehova aahimuceenyerya Tapita wunnuwiha “miteko mincipale yaphaama,” xaxaxa mu waakhaviherya anaamukhwele. (Saw. 9:36) Wa nthowa mahala ni epewe awe, ancipale yaahinla elukuluku aakhwileiye. Nave awo yaahihakalala vaavaa murummwa Petro aamviihaleiye mookhwani. (Saw. 9:39-41) Tiheeni nnahuseryaahu orweela wa Tapita? Moohipwacha naari amiravo ni asimwali, alopwana awunnuwela naari athiyana, oothene ahu nnanwerya opaka ichu wi naakhaviherye anna ni arokora.—Ahe. 13:16.

13. Murokora oniichaniwa Rute aaphariheliwe hai ni Yehova, nave tiheeni owo olonceiye?

¹³ Murokora uuliwa muru nsina nawe Rute aanachuna okhala misiyonaariya. Elukuluku aareiye nahano, aanaya mu empa ni empa akawaka itrataato mwamvai ophiyerya aawereleiyevo. Owo ooloca: “Chiryene kaanasiveliwa ni muteko yoola.” Naamwiihiiha, oloca ni achu aaleelaka vooloca sa Omwene wa Muluku waari woovila wa yene. Moohipwacha wuuliwa wawe muru, Rute aahikhala piyoneera ookilaatheya  vaavaa areiyeno iyaakha khumi nathanu nararu. Mu 1946, owo aahivolowa mu Exikola ya Piipiliya ya Kiliyati ya Torre de Vigia nave voocharela aahirumeela o Havai ni o Xapau. Yehova aahimpharihela mmukhalelo wavameekhaaya wi amwaramwase michaka yaphaama mu ilapo seiya. Aacamelaka iyaakha makhumi mathanu namararu mu orummwa, Rute aahiloca: “Yehova onnakilipiha ilukuluku soothene. Owo ookikhaviherya ovootha wuuliwa waka muru. Ni murima aka woothene kinneemererya wi Yehova onanwerya ompharihela muchu vyakala yoowo onamuroromela.”

14. Mwawiiwanana ni Kolosi 1:29, tiheeni nnaphwanelaahu opaka wakhala wi ninnachuna ophariheliwa ni Yehova?

¹⁴ Ovinyerya khalai, Yehova onnaapharihela alapeli awe mmikhalelo sincipale soohiyanahiyana. Yehova onahaala oweerihaani okhale eheeni? Eyo enahaala orweela mu wiivaha wanyu olapa mwakuru. (Mwaalakhanye Kolosi 1:29.) Wakhala wi mohiivaha mukhatiinyu, Yehova onamookhaviheryaani okhala mulaleeryi amvai, muhusiha oophwanelela, mulipa oohakararya aphaama, namalapa a mavyakelo, nthamwene ookhaviherya, naari echu vyakala onachuneiye wi akhwaaniherye yookhwela awe.

15. Hiiha ntoko etharihiwaaya mu 1 Timóteo 4:12, 15, tiheeni anna ari amiravo anaphwanelaaya omveka Yehova wi aakhaviherya opaka?

¹⁵ Hanka vooloca sa nyuwo anna muri amiravo munaacamela okhala achu awunnuwelavo? Wookhalavo othowa wa alopwana yaawo arino ikuru wi ekhaviherye muloko ntoko arummwa oorumeela. Mu miloko mincipale aakhalamo atokweene a mulokoni awaaca opwaha arummwa oorumeela. Apwanne akina a nyuwo amiravo mwanwerya wunnuwiha nchuno wi mpake sincipale mmulokoni? Mu ikwaha ikina anna akina annaloca, “Kinnahakalala orumeela ntoko mulaleeryi.” Waakhanle wi munuupuwela mmukhalelo yoola, mumveke Yehova wi ookhaviheryeeni wunnuwiha nchuno wi mphwanelele orumeela ntoko murummwa oorumeela nave wi oovaheeni owerya wi mpake soothene munaweryaanyu wi mmurumeele yoowo. (Ekle. 12:1) Khwoo ninnachuna nikhaviheryo nanyu!—Mwaalakhanye 1 Timóteo 4:12, 15.

16. Tiheeni nnaphwanelaahu omveka Yehova, nave ntakhara heeni?

¹⁶ Yehova onamookhaviheryaani okhala echu vyakala yeeyo onachuneiye wi akhwaaniherye yookhwela awe. Mwawiihiiha, mumveke wi oovaheeni nchuno na opaka muteko awe, nave voocharela mumveke wi oovaheeni owerya yoowo munachunaanyu. Moohipwacha waakhanle wi mwa mmiravo naari awunnuwelavo, mpharihele elukuluku anyu, ikuru, ni ichu ikina muryaanyuno, hiiha ntoko mavyakelo ni sookhalano sanyu wi mmucicimihe Yehova hiihaano. (Ekle. 9:10) Vaavaa munavahiwaanyu ekari yasisapo wi mpake sincipale mmuteko wa Yehova, muhikhooce mwawaakuveya muupuwelaka wi hamuni nwerye weerano. Nookhalano ekari etokweene ya opaka soothene nnaweryaahu wi nimuruuhele Tiithi ahu ncicimihe nenlo onaphwaneleiye waakhela!