1. Ntakhara heeni achu ancipale aryaaya awaakanyeryeya?

OLELO aakhalavo malapelo mancipale yaawo analoca wi Akristu nave tho analoca wi annamulapela Muluku mmukhalelo yoowo oneemereryeiye. Ti nthowa nene achu olelo aryaaya awaakanyeryeya! Awo anniikoha, “Apwanne arivovo malapelo mamoharu eeparipari, naari wi malapelo oothene annamuhakalaliha Muluku?” Apwanne ninnaroromela wi hiyo Anamoona a Yehova ninnahusiha eparipari nave mukhalelo nnamulapelaahu Yehova ti mmoharu pahiru onamuhakalaliha yoowo? Apwanne ti wooweryeya osuwela ni ororomela ichu seiho? Hankooni nthokororye emoha ya seiho.

2. Mwawiiwanana ni 1 Tesalónika 1:5, ntakhara heeni murummwa Paulo aalekecheya ni eparipari?

² Murummwa Paulo aahilekecheya ni eparipari. (Mwaalakhanye 1 Tesalónika 1:5.) Tahi wi pahiru owo aalekechen’ye nthowa nawi eyo yaanamweeriha okhala oohakalala. Ohiya yeeyo Paulo aanahuserya moopwacha Masu a Muluku. Owo aanaroromela wi “Soorempwa seiyo soothene iveereliwe ti Muluku.” (2 Tim. 3:16) Tiheeni owo aahusenryeiye? Mu Soorempwa, Paulo aahiphwanya sawooniherya seeparipari sawi Yesu aari Mesiya yoowo aalaiheryiwe, ni sawooniherya sawi ahooleli a malapelo a Ayuta yaathanla omukhooca yoowo. Malapelo yaala awiisootherya yaaloca wi yaamweemelela Muluku nyenya yaamukhooca yoowo moorweela mu saweera saya. (Tito 1:16) Moohiyana ni yaawo, Paulo haathanlile makupa makina a Masu a Muluku yaawo aaphwaneleiye ororomela ni ohiroromela makupa makina. Paulo aanapharihela ni waahusiha achu “okhwela woothene wa Muluku.”—Saw. 20:27.

3. Mpwanne nnaphwanela osuwela maakhulo a makoho ahu oothene wi nroromele wi noophwanya eparipari? (Moone ekaaxa “ Miteko sa Yehova ni Muupuwelo Awe—‘Ti Sincipale.’”)

 ³ Akina anuupuwela wi malapelo eeparipari anaphwanela waakhula makoho oothene, ophiyerya makoho yaawo ahinaakhuliwa Mpiipiliyani. Apwanne ela ti yooweryeya? Muthokororye yootakiherya ya murummwa Paulo. Paulo aahaaceenyerya oororomela akhwaawe wi ‘evareryeke soothene.’ Owo oorepa “osuwela wahu hiwakhwanenle,” (1 Tes. 5:21, BNM) Nave ohaaceererya: “Nnona itxhu ntoko vayisonani ni vohisuwanyeya.” (1 Kor. 13:9, 12) Paulo hiiwexexa ichu soothene; hiihaa ntoko hiyaano. Nyenya Paulo aahiiwexexa iparipari soopacerya vooloca sa Yehova. Seiho owo aasuwenleiye sahimulekeca wi seiho owo aaroromeleiye yaari eparipari!

4. Nni niwerye hai olipiha nroromelo nahu wi noophwanya eparipari, nave tiheeni nnahaalahu othokororya vooloca sa Akristu eeparipari?

⁴ Mukhalelo mmoha nneeraahu nlipihe nroromelo nahu wi noophwanya eparipari, ori moorweela wa ochariha malapelo yaawo etikitheryiwe ni Yesu nave yaawo Anamoona a Yehova aneeraayano olelo. Mmwaha yoola, nnahaala woona wi Akristu eeparipari (1) annakhooca olapela soophwaniherya, (2) annacicimiha nsina na Yehova, (3) annasivela eparipari, ni (4) annasivelana mukina ni mukhwaawe moopwahaxa.

5. Tiheeni nihusenryaahu orweela wa Yesu vooloca sa mukhalelo wa omulapela Muluku, nave nni nipharihele hayi yeeyo owo ohusin’heiye?

⁵ Woona wi Yesu aanamusivela vancipale Yehova, owo aamulapela yoowo pahiru, vaavaa aareiye wirimu naari tho aareiye veelaponi ya vathi. (Luka 4:8) Owo tho aahaahusiha oomuchara awe omulapela Yehova pahiru.  Yesu naari oohuserya awe oororomeleya hiyintonko opharihela yoophwaniherya mmalapelo. Muluku toohooneya, mwawiihiiha haavo aahaala opaka echu vyakala wi amulikanyihe ni yoowo! (Isa. 46:5) Hanka vooloca sa opacha iruku seiho achu aniichanaaya saweela ni ovekela wa seiho? Mu nlamulo noopacerya na malamulo khumi Yehova aaloca: “Ohiniipakela eruku yoopachiwa, nari yoophwanaphwaniha ekina ya ichu iri wirimu, nari eri veelaponi ya vathi . . . ohinakokhorela seiho.” (Muk. 20:4, 5) Masu yaala tookwakwaleya wa yaale anachuna omuhakalaliha Muluku.

6. Yootakiherya taani ya malapelo Anamoona a Yehova anacharihaaya olelo?

⁶ Wa achu yaawo anahuserya miyaha alonce wi mu elukuluku ya arummwa, Akristu oopacerya yaamulapela Muluku pahiru. Ntoko yootakiherya, liivuru mmoha a Miyaha sa Ikerexa Seekristu ooloca wi Akristu a mu nsana noopacerya hiyaachariha moonelo wa olapela soophwaniherya. Olelo, Anamoona a Yehova annachariha yootakiherya yeela etikitheryiwe ni Akristu a mu nsana noopacerya. Hiyaano hannavekela soophwaniherya naari iruku seiho achu aniichanaaya “aweela” naari ankeelo; nave tho hinnavekela Yesu. Nave tho hannalapela naari opaka echu vyakala yeeyo enahaala waacicimiha alamuleli a elapo. Moohipwacha muchu taani onahaala onikhinyererya opaka echu vyakala, nri oolakelela ochariha masu a Yesu: “Waalapeke apwiya Muluku aa, nave yaaworu oneeraa waakokhoreleke.”—Mat. 4:10.

7. Ohiyana taani orivovo wookwakwaleya vooloca sa Anamoona a Yehova ni malapelo makina?

⁷ Olelo, achu ancipale anaawiriyana anamalaleya atheru. Achu annatepa waacicimiha yaawo ophiyerya tho enaalapa. Achu ancipale annaya mu ikerexa saya, annaakula aliivuru aya, nave annaveleela ikhorowa sincipale wi ekhaviherye marehereryo aya. Achu anneemererya masu vyakala yaawo anamalaleya analocaaya. Ti yoothananiha woona wi achu yaala ari mu ikerexa seiha annahakalala ni ahusiha aya wi ntoko anamoona Yesu. Moohiyana, yaale anamulapela Yehova mwaweemereryeya hanaachariha achu. Naamwi naacicimihaka yaale anahoolela, hiyaano nohaakhela nihusiheryo nookwakwaleya: “Oothene mwa onnaanyuru.” (Mat. 23:8-10) Hiyaano hinnaalapela achu, moohipwacha yaari ahooleli a malapelo naari ahooleli a ipoliitika. Nave hinnakhaviherya malapelo aya naari ipoliitika. Moohiyana, hiyaano ninnatitelela ohipaka makupa ni wiivalaanya ni elapo. Mwawiihiiha, mmikhalelo soothene seiha, hiyaano ninnakhala oohiyana ni malapelo yaawo analoca wi Teekristu.—Yoh. 18:36.

8. Nnasuwela hai wi Yehova onnachuna wi nsina nawe ncicimihiwe ni osuwelihiwa wa achu akina?

⁸ Mu ekwaha emoha, Yesu aavekela: “Atiithi, cicimihani nsina nanyu.” Yehova mwaneene aahaakhula nivekelo nenla mu masu oovuwa orweela wirimu, aroromelihaka wi aahaala ocicimiha nsina nawe. (Yoh. 12:28) Variyari va orummwa awe, Yesu aacicimiha nsina na Atiithi awe. (Yoh. 17:26) Mwawiihiiha Akristu eeparipari annoona okhala ekari ya opharihela nsina na Muluku ni waasuweliha akina.

9. Akristu a mu nsana noopacerya yoonihenrye hai wi yaanacicimiha nsina na Muluku?

⁹ Mu nsana noopacerya mu elukuluku vakhaani muloko Weekristu omanle otikitheryiwa, Yehova ‘aathanla mwa amalapo muloko wa mu nsina nawe.’ (Saw. 15:14) Akristu  a mu nsana noopacerya yaaniirumiha opharihela nsina na Muluku ni waasuweliha akina. Arummwa ni oohuserya yaanapharihela nsina na Muluku vaavaa awo yaalaleeryaaya ni waarepa aliivuru a Mpiipiliyani. * Mmukhalelo yoola awo yaanooniherya wi yaari yaaworu yaalaleya nsina na Muluku.—Saw. 2:14, 21.

10. Nnasuwela hai wi pahiru Anamoona a Yehova tanapharihela nsina na Muluku?

¹⁰ Apwanne Anamoona a Yehova nloko nnacicimiha nsina na Yehova? Muthokororye sawooniherya inacharela. Olelo ahooleli ancipale annapaka owetha waya wi yiiphelele wi Muluku ookhalano nsina nawe. Awo aavihaamo nsina na Muluku mu a Piipiliya aya, nave haneemeererya wi nsina na Muluku niphariheliweke mmalapelo aya. * Ti yookwakwaleya wi pahiru Anamoona a Yehova ti yaaworu anacicimiha nsina na Muluku. Nninnaasuweliha achu nsina na Muluku opwaha nikhuuru vyakala na malapelo. Hiyaano na Anamoona a Yehova! Mwa yeeyo hiyaano ninniilipixerya wi nikhaleke mwawiiwanana ni nsina nahu, Anamoona a Yehova! (Isa. 43:10-12) Hiyaano ninnaapaka a Piipiliya opwaha mamilyawu 240 a Tradução do Novo Mundo da Bíblia Sagrada yoowo onapharihela nsina na Muluku mmakupa yaawo mu a Piipiliya akina niviihiwaayamo. Nave ninnapaka soolaleeryiwa  sinathipeleya Mpiipiliyani seiho inapharihela nsina na Yehova opwaha ilocelo 1.000!

11. Ti mwawiihai Akristu eeparipari yoonihenryaaya osivela eparipari?

¹¹ Yesu aanasivela eparipari, ela tiwi, eparipari vooloca sa Muluku ni yoolaiherya awe. Yesu aanasivela eparipari, nave tho aanaasuweliha akina. (Yoh. 18:37) Oohuserya a Yesu tho yaanasivela eparipari. (Yoh. 4:23, 24) Mwawooneya, murummwa Pedro aahaaloca Akristu ntoko “mphiro weeparipari.” (2 Ped. 2:2) Nthowa na osivela waya eparipari, Akristu a mu nsana noopacerya yaakhooca miruku sa ahooleli a malapelo atheru, sookhovelela, ni miyoonelo sa achu seiho sahiiniiwanana ni eparipari. (Kol. 2:8) Moolikana olelo, Akristu eeparipari anniilipixerya ‘weeca mu eparipari’ moorweela wa soororomela saya mukhalelo aya wa okumi ni moorweela wa Masu a Yehova.—3 Yoh. 3, 4.

12. Tiheeni yaale anahoolela aneeraaya vaavaa anoonaaya wi onnachuneya wiwexexa wahu ovyaani, nave ntakhara heeni awo anapakaaya matorokelo yaala?

¹² Anamoona a Yehova hanaloca wi mmikhalelo soothene awo anniiwexexa ichu soothene sa Mpiipiliyani. Mu ilukuluku ikina, awo annahesa mukhalelo aya wa othariha iparipari sa Mpiipiliyani ni mukhalelo wa ohoolela marehereryo. Ela henantikhiniha. Piipiliya onnaloca mookwakwaleya wi awo anniiwexexa iparipari voovira wa elukuluku. (Kol. 1:9, 10) Yehova onnuupulula iparipari vakhaani vakhaani, nave hiyaano nnaphwanela okhala oopisa murima wi niiwexexe phaama iparipari. (Masi. 4:18) Vaava Nikhuuru Noolamulela anoonaaya wi onnachuneya opaka matorokelo naari mukhalelo wa wiiwexexa naari opaka ichu, awo annapaka matorokelo mwawaakuveya. Ikerexa sincipale sinnatoroka mahusiho aya nthowa nawi sinachuna waahakalaliha achu aya naari achu a mweelaponi. Nyenya Anamoona a Yehova annapaka matorokelo nthowa nawi anachuna omwaacamela Muluku ni omulapela owo mmukhalelo Yesu eereiye. (Tiy. 4:4) Vaavaa nnapakaahu matorokelo, tahi moonelo wa achu onatorokeya, nyenya nthowa na omwiiwexexa wahu Piipiliya. Hiyaano ninnasivela eparipari!—1 Tes. 2:3, 4.

13. Mukhalelo taani woochuneyaxa yoowo wooniheryiwe ni Akristu eeparipari a mu nsana noopacerya, nave ti mwawiihai Anamoona a Yehova anooniheryaaya olelo?

¹³ Akristu a mu nsana noopacerya yaanasuwela mikhalelo mincipale saphaama, nyenya mukhalelo woochuneyaxa yoowo awo yaasuwenlaaya waari osivela. Yesu aaloca: “Mwakhalano osivela mukina ni mukhwaawe, achu oothene anarwa esuwela wi muri oohuserya aka chiri!” (Yoh. 13:34, 35) Olelo, Anamoona a Yehova annapuha wiiwanana woosivela mu elapo yoothene. Hiyaano nri oohiyana ni achu a malapelo oothene nthowa nawi nri ntoko emusi naamwi nrwenle mu ilapo, ni sookhovelela soohiyanahiyana. Hiyaano ninnoona osivela yoola mmithukumano sahu, mmithukumano sa ekulucu ni sa muceche. Ela ennaneeriha ororomela wi omulapela wahu Yehova onnamuhakalaliha yoowo.

14. Mwawiiwanana ni Kolose 3:12-14, mukhalelo taani woochuneyaxa nnaphwanelaahu wooniherya osivela woopwahaxa wa mukina ni mukhwaawe?

¹⁴ Soorepa sinnanceenyerya wi nnaphwanela ‘okhwelanaka vatokovene.’ (1 Ped. 4:8, BNM) Mukhalelo mmoha wa wooniherya osivela ori moorweela wa wooniheryana osivela mukina ni mukhwaawe ni ohitikitheryeya mu ohiphaameya wa akina. Hiyaano tho ninnaavya  ikari wi nooniherye mahala ni okhala oowaakhela oothene mmulokoni, naamwi awo eninyeenyeihaka. (Mwaalakhanye Kolose 3:12-14.) Vaavaa nnooniheryaahu osivela, ninnooniherya wi na Akristu eeparipari.

15. Mikhalelo taani mikina nnacharihaahu sa malapelo seiho itikitheryiwe ni Akristu a mu nsana noopacerya?

¹⁵ Ninnachariha yootakiherya ya malapelo etikitheryiwe ni Akristu a muloko a mu nsana noopacerya mmikhalelo mikina. Ntoko yootakiherya, hiyaano nri ooreheryeya mmikhalelo mikina ntoko Akristu yaale. Nookhalano ooweherya a ikulucu, Atokweene a mmulokoni, ni arummwa oorumeela hiihaa ntoko awo yeerelaaya. (Fil. 1:1; Tito 1:5) Moolikana ni yaawo, hiyaano ninnacicimiha malamulo a Yehova, vooloca sa okonihana ni othela, yeeyo Muluku olonceiye vooloca sa opharihela nikhami, ni okhapelela muloko wa yaale ahinachuna ochariha malamulo a Muluku.—Saw. 15:28, 29; 1 Kor. 5:11-13; 6:9, 10; Ahe. 13:4.

16. Tiheeni nnahuseryaahu orweela mu Éfeso 4:4-6?

¹⁶ Yesu aaloca wi ancipale yaahaala olocaka wi oohuserya, nyenya ehooniherya osivela weeparipari. (Mat. 7:21-23) Soorepa tho sinnanleela wi mmahiku ookuchula ancipale yaahaala wiisooneihaka pahiru ntoko ‘annavekela.’ (2 Tim. 3:1, 5) Nyenya, Piipiliya onnanleela wi nri “nroromelo nimoha” nenlo Muluku oneemereryeiye.—Mwaalakhanye Éfeso 4:4-6.

17. Taani olelo anamuchara Yesu ni opharihela nroromelo nimoha neeparipari?

¹⁷ Taani anapharihela nroromelo nimoha neeparipari olelo? Noothokororya sawooniherya. Nohoona yootakiherya ya malapelo etikitheryiwe ni Yesu ni malapelo yaawo Akristu a mu nsana noopacerya. Nrivo naakhulo nimoharu pahiru—Anamoona a Yehova. Ela ekari etokweene ya opaka makupa a achu a Yehova ni osuwela eparipari vooloca sa Yehova ni yoochuna awe! Nnaphwanela opaka echu eri yoothene yeeyo nnaweryaahu wi nlipihe nroromelo nahu nawi noophwanya eparipari.