1-2. (1) Tiheeni alamuleli akina anapakaaya ntakhara Anamoona a Yehova, nave ti mwawiihai awo anaakhulelaaya? (2) Nni niwerye hai okhala oohakalala naamwi niikariwaka? (Mwaakhule tho mwawiiwanana ni eruku va ekaapa.)

 MU ELUKULUKU yeela, muteko wa Anamoona a Yehova onnakhwatiihiwa mu ilapo opwaha 30. Mu ilapo ikina sa seiho, anna ni arokora ancipale aawaleliwa. Yoonanara taani awo apankaaya? Vamiithoni va Yehova, awo hapanke echu yoonanara. Echu awo apankaaya ori omwaalakhanya ni omuhuserya Piipiliya, waalaleerya akina ni oya mmithukumanoni ni annaya. Awo tho annatitelela ohipaka makupa a elapo. Naamwi ehoolelaka wiica woothene yoola, alapeli yaala oororomeleya a Muluku annatitelela okhala oororomeleya—yooniheryaka wi, moohipwacha yeeyo enahaala weereya, awo anahaala otitelela okhala oororomeleya wa Yehova. Moorweela wa weerano yeela, awo annahakalala vancipale!

² Nyuwaano akhweya mohoona iruku ikina sa anna yaala oolipa murima anahoolela wiikariwa nave munnoona wi ithoi saya ti soohakalala. Awo annatheya woona wi aasuwela wi Yehova onnahakalala nthowa na ororomeleya waya. (1 Math. 29:17a) Yesu ooloca: “Ooreeriwa [oohakalala, TNM] ti yaawo anahooshiwa nthowa na wookololowa . . . Hakalalani nave chapani, vawi ochuweliwa wanyu onii okhale otokotoko.”—Mat. 5:10-12.

3. Mwawiiwanana ni Saweriwa T’arummwa 4:19, 20, arummwa yaakhulenle hai wiikariwa, nave ntakhara heeni awo yaakhulenlaaya hiiha?

³ Yeeyo eneereya ni anna ni arokora ahu ennalikana ni yeeyo arummwa yaahoolenlaaya vaavaa yiikariwaaya nthowa na olaleerya vooloca sa Yesu. Ikwaha sincipale, athoriha a nipuro ntokweene na othoriha o Yuteya “yaahaalamulela wi ehiloce tho nari ohusiha mu nsina na Yeesu.” (Saw. 4:18; 5:27, 28, 40)  Arummwa yaakhulenle hai? (Mwaalakhanye Saweriwa T’arummwa 4:19, 20.) Eweemelelaka arummwa oothene, Petru ni Yohani moolipa murima yaaloca wi awo yaahaala omwiiwelela Muluku ohiya athoriha yaale nave yaahiya mookwakwaleya wi awo hiyaahaala ohiya oloca wa akina vooloca sa Yesu. Yaakhala ntoko wi arummwa yaaloca wa athoriha eriki: ‘Nyuwaano munuupuwela wi malamulo anyu annapwaha malamulo a Muluku?’ Awo yaaheerano yeela nthowa nawi Muluku ooweryaxa waapwaha achu yaale ‘aahaaruma olaleerya wa maloko ni ovaha onamoona’ otokweene vooloca sa Kristu.—Saw. 10:42, NN.

4. Mwawiiwanana ni Saweriwa T’arummwa 5:27-29, yootakiherya taani arummwa atikithenryaaya wi hiyaano nchariheke?

⁴ Arummwa aatikitherya yootakiherya yaphaama wi Akristu oothene echarihe: “Omwiiwelela Muluku ntoko mulamuleli waapwaha achu.” (Mwaalakhanye Saweriwa T’arummwa 5:27-29, TNM.) Eparipari wi nthowa na ororomeleya waya, arummwa yaamaniwa, nyenya vaavaa yaakhummaaya o nipuro ntokweene na othoriha na Ayuta awo yaari ‘oohakalala, vawi yaacicimiheya voonyemuliwa wa nthowa na nsina na Yesu’ nave yaatitelela oyano vahoolo muteko woolaleerya!—Saw. 5:40-42.

5. Makoho taani nnahaalaahu waakhula?

⁵ Mukhalelo arummwa yaahoolenlaaya akhweya onamuniruuhela makoho makina. Ntoko yootakiherya, ti mwawiihai arummwa yaahaalaaya omwiiwelela Muluku ntoko mulamuleli waapwaha achu nave naamwi hiiha ewiiwelele “asitokweene anlamula?” (Aro. 13:1) Ti mwawiihai nneeraahu niwerye “owiiwelela alipa oolamula ni mamwene” ntoko murummwa Paulo olonceiye nave naamwi hiiha nikhale oororomeleya wa Mulamuleli ahu Oowerya, Yehova?—Tito 3:1.

6. (1) Taani ari “asitokweene anlamula” analociwa mu Aroma 13:1, nave ti mwawiihai nnaphwanelaahu waakhalihaka? (2) Owerya taani alamuleli oothene a achu aryaayano?

⁶ Mwaalakhanye Aroma 13:1. Mu eversikulu yeela masu awi “asitokweene anlamula” anataphulela alamuleli a achu yaawo arino owerya ntakhara achu akina. Akristu  anaphwanela owiiwelela alamuleli yaala a elapo. Mweeparipari, alamuleli yaala annatikitherya malamulo ni otikitherya murecele nave ikwaha ikina annaphiyerya tho owaakiha achu a Yehova. (Wup. 12:16) Nthowa na yeela, hiyaano nnaphwanela oliva misokho ni waavaha ncicimiho nenlo alamuleli yaala anavekaaya. (Aro. 13:7) Nyenya, alamuleli a elapo pahiru analamulela nthowa nawi Yehova onneemererya yeeyo. Yesu oohiya ela mookwakwaleya vaavaa aapakeliweiye makoho ni mulamuleli o Roma Pontiyu Pilato. Vaavaa Pilato aalonceiye wi aakhalano owerya wa omwaakiha Yesu naari olamulela wiiphiwa, Yesu aaloca: “Hamukakhanleno owerya wa miyo, mwahaavahiwe orweela wirimu.” (Yoh. 19:11) Hiiha ntoko Pilato, owerya wa alamuleli oothene ni asitokweene a ipoliitika a elapo wookhalano mphimo.

7. Mmikhalelo taani nihinaphwanelaahu owiiwelela alamuleli a elapo nave tiheeni alamuleli a elapo anaphwanelaaya wuupuwela?

⁷ Akristu ilukuluku soothene anaphwanela owiiwelela alamuleli a elapo wakhala wi malamulo aya hanavuhana ni malamulo a Muluku. Nyenya hiyaano hannaphwanela owiiwelela achu vaavaa ananirumaaya weera echu yeeyo Muluku onakhwatiiheiye naari vaavaa ananikhwatiiheryaaya weera echu yeeyo Muluku onanivekeiye. Ntoko yootakiherya, akhweya awo ananwerya waakhinyererya alopwana okhala anakhoco. b Naari akhweya awo ananwerya omukhwatiiha Piipiliya, soolaleeryiwa sahu, muteko ahu woolaleerya, ophiyerya tho mithukumano sahu. Vaavaa alamuleli anapharihelaaya moonanara olamulelo yoowo avahiwaaya ni Muluku, moorweela wa owiikara Akristu, anahaala waakhula vamiithoni va Muluku. Yehova onnoona soothene!—Ekle. 5:8.

8. Ohiyana taani orivovo wa masu “olamula” ni “Awirimurimu,” nave ntakhara heeni ela eryaaya yoochuneyaxa?

⁸ Masu awi “olamula” anataphulela “ophwanelela, otokweene, ni olamulelo wawaaca.” Nyenya honataphulela “ophwanelelaxa, otokweene woopwahaxa, ni owerya woothene.” Mweeparipari, ela yootaphulela ya masu makina—“Awirimurimu.” Naamwi alamuleli a elapo yiichaniwaka “asitokweene anlamula,” ookhalavo orino owerya woothene yoowo ori awiirimurimu. Mpiipiliyani, Yehova oniichaniwa “Awirimurimu” mu ikwaha xexe.—Dan. 7:18, 22, 25, 27.

9. Yawoona taani mulipa a miririmu Taniyeli aareiyeno?

⁹ Mulipa a miririmu Taniyeli aahikhalano sawoona soohiyanahiyana seiho soonihenrye mookwakwaleya wi owerya wa Yehova ti woopwahaxa wa muchu vyakala. Voopaceryani, Taniyeli aahiwoona axinama axexe atokotoko yaawo yeemelela olamulelo weelapo wakhalai—Papulo, Meto Persiya, Kresiya, Roma ni wa mmahiku ahu, olamulelo wa Ankolo-Amerikana. (Dan. 7:1-3, 17) Voocharela Taniyeli aamoona Yehova akiranthi vamunyukhuni woothoriha wirimu. (Dan. 7:9, 10) Yeeyo mulipa a miririmu yoole oonneiye voocharela, mweeparipari yoolopola wa alamuleli a mmahiku ahu.

10. Mwawiiwanana ni Daniyeli 7:13, 14, 27, taani Yehova onamvaheiye owerya ntakhara elapo, nave eyo enooniherya eheeni vooloca sa Yene?

¹⁰ Mwaalakhanye Daniyeli 7:13, 14, 27. Muluku onnawaakha alamuleli a elapo owerya woothene aryaayano nave onnaavahererya achu anaphwanelela, yaawo arino oweryaxa. Taani onaavahereryeiye? Owerya yoola onnavahiwa wa “mmoha ntoko mwaana a  muchu,” Yesu Kristu, ni “muloko waweela wa Awirimurimu,” a 144.000 yaawo anahaala olamulela “okhala wookhala.” (Dan. 7:18) Tiyawooneya wi Yehova ta “Awirimurimu,” nthowa nawi owo pahiru torino owerya wa weerano yeela.

11. Tiheeni Taniyeli orempeiye enooniherya wi Yehova ta Awiirimurimu?

¹¹ Sawoona seiho Taniyeli aareiyeno sinniiwanana ni yeeyo owo aalonceiye. Owo olonce wi Yehova, “Muluku awirimu,” “tonaaviihavo mamwene nave tonaahelavo.” Owo tho oorepa: “Awirimurimu tonalamulela omwene wa achu, nave onnamunnya olamulelo wa yoowo onamukhweleiye.” (Dan. 2:19-21; 4:17) Nyenya apwanne yohintoko weereya Yehova omviihavo mulamuleli nave amvaha omwene muchu mukina? Mweeparipari aai!

12. Taani Yehova aawaankheiye omwene khalai? (Moone eruku.)

¹² Yehova ohooniherya mookwakwaleya wi ta Awiirimurimu waapwaha “asitokweene anlamula.” Hankooni noone sootakiherya raru. Farawo aahaapaka akapuro alapeli a Yehova o Yikuputu, nave mu ikwaha sincipale aakhooca waataphula. Nyenya Yehova aahaataphula alapeli awe nave aaheeriha wi Farawo akhwe mu Eniya Yooxeerya. (Muk. 14:26-28; Sal. 136:15) Mwene o Papulu, Pelsasare, aahipaka efesta ‘iirumiha, apaka mapokha ni Pwiya a wirimu’ nave ‘aacicimiha amuluku a eparata ni a ewooro’ ohiya omucicimiha Yehova. (Dan. 5:22, 23) Nyenya Muluku aamuuliha muru mulopwana yoole awiirumiha. Mu “ohiyu ene yoole,” Pelsasare aahikhwa nave omwene awe waavahiwa Ameeto ni Apersiya. (Dan. 5:28, 30, 31) Mwene Heroti Akripa I o Palestina, aamwiipha murummwa Tiyako nave aawerya onwalela mukariposo murummwa Pedro ni yoolakelela ya omwiipha tho yoowo. Nyenya Yehova heemerenrye wi Heroti eereno yeela. “Munkeelo a Yehova amphoreiha” Heroti, nave owo aakhwa.—Saw. 12:1-5, 21-23, TNM.

13. Mvahe yootakiherya ya mukhalelo Yehova aavoontheiye makhuuru a maloko awiiwanana.

¹³ Yehova tho ohooniherya wi ta Wiirimurimu ophiyerya wa makhuuru naari maloko awiiwanana. Owo aawaniha ntakhara Aisarayeli nave aaheeriha wi achu awe etoloxe nikhuuru na mamwene awaakhwana 31 a Akanani nave ekuxa nikupa ntokweene na  Elapo ya Nlakano. (Yos. 11:4-6, 20; 12:1, 7, 24) Yehova tho aahimvootha mwawuuliha muru mwene Ben-Hatate ni alamuleli akina awaakhwana 32 a Asiiriya yaawo yaawanne ni Aisarayeli.—1 Mam. 20:1, 26-29.

14-15. (1) Tiheeni mwene Napukotonosori ni mwene Tariyu yaaloncaaya sa ophwanelela wa Yehova ntoko mulamuleli? (2) Tiheeni mulipa a masalumu olonceiye vooloca sa Yehova ni sa achu awe?

¹⁴ Yehova ohooniherya mu ikwaha sincipale wi ta Wiirimurimu! Vaavaa mwene o Papulu Napukotonosori, aareiye awiirumiha nave aloca sa ikuru, owerya, ncicimiho ni otokweene awe, ohiya weemererya wi Yehova tonaphwanela olampwa, Yehova aaheeriha wi owo akhale naanepa. Vaavaa aapenunweiye, Napukotonosori aamucicimiha Awiirimurimu nave aaheemererya wi olamulelo wa Yehova ti woohimala. Owo aaloca: ‘Haavo onamuhiiha.’ (Dan. 4:30, 33-35) Ororomeleya wa Taniyeli ntakhara Muluku omanle weehiwa nave Yehova amvulunxe mu nlici na amwaco, mwene Tariyu aahilamulela: “Achu oothene a omwene aka emooveke ni omucicimiha Muluku a Taniyele. Tiwi, yoowo Muluku ookumi, orimukhalaru mahiku oothene. Omwene awe horwa omala, nave olamula wawe honakuchuwa.”—Dan. 6:7-10, 19-22, 26, 27.

¹⁵ Mulipa a masalumu oorepa: “Apwiya ahaakanyerya ovaanela wa amalapo, ehiiha wuupuwela waya wi oheereye.” Owo aahaaceererya: “Nooreeriwa [noohakalala TNM] nloko nenlo Apwiya [Yehova] aryaaya Muluku aya. Nooreeriwa nloko nenlo Apwiya iithanlenlaaya.” (Sal. 33:10, 12) Mweeparipari nla nthowa naphaama na okhala oororomeleya wa Yehova.

16. Tiheeni nnaphwanelaahu ororomela moomalela wi Yehova onahaala weera variyari va “ekoi etokotoko,” nave ntakhara heeni? (Moone eruku.)

¹⁶ Hiyaano nohaalakhanya vooloca sa yeeyo Yehova aapankeiye khalai, nyenya tiheeni  nnaweheryaahu wi Yehova onahaala weera omwaahiyu? Nnanwerya ororomela moomalela wi Yehova onahaala waavuluxa alapeli awe oororomeleya variyari va “ekoi etokotoko” yeeyo enaacamela. (Mat. 24:21, BNM; Dan. 12:1) Owo onahaala weerano yeeyo vaavaa nikhuuru na maloko, nenlo Mpiipiliyani nniichaniwa Koki a Makoki, nneeraaya naahiphele moowali achu a Muluku mu elapo yoothene. Naamwi nikhuuru nenla na maloko nihaalaka ophitaanyerya ilapo 193 sa Maloko Awiiwanana, awo hekhala echweenevo elikanyihiwaka ni Awiirimurimu ni anakhoco awe a wirimu! Yehova oororomeliha: “Kinamvuwihiwa, koonihe weela waka, kiisooneihaka vamiithoni wa maloko mancipale. Anamusuwela wi miyo ka Apwiya [Yehova]”.—Ezek. 38:14-16, 23; Sal. 46:10.

17. Tiheeni Piipiliya onaloceiye wi enahaala weereya ni mamwene a elapo yavathi nave tho ni yaawo ari oororomeleya wa Yehova?

¹⁷ Ohiphela wa Koki onahaala okumiherya ekhoco yookuchula ya Armaketo, vaavaa Yehova onahaaleiye waatoloxa “mamwene a elapo yoothene.” (Wup. 16:14, 16; 19:19-21) Mmukhalelo mukina, pahiru “achu awookololowa murima anarwa emaka mweelapo ya vathi nave yaawo oororomeleya anamwiikhalelaru mwemmo.”—Masi. 2:21

18. Tiheeni Akristu ancipale eeparipari ilukuluku soothene anakhalaaya ooreheryeya opaka, nave ntakhara heeni? (Daniyeli 3:28)

¹⁸ Moovira wa elukuluku, Akristu ancipale eeparipari aakuha va yawoopiha otaphuwa waya, ophiyerya tho okumi aya nthowa na omusivela Yehova, Mulamuleli aya Mutokweene. Awo ari oororomeleya, hiihaa ntoko Ahepri araru yaawo yaavonyeryiwe mu nlici na mooro noovihaxa nave evuluxiwa nthowa na okhala oororomeleya wa Awirimurimu.—Mwaalakhanye Daniyeli 3:28.

19. Mwawiiwanana ni Salumu 7:8, ti mwawiihai Yehova onahaaleiye waathoriha achu awe nave tiheeni nnaphwanelaahu weera hiihaano?

¹⁹ Tavite aarepa vooloca sa ochuneya waya okhala oororomeleya wa Muluku: ‘Apwiya anamuthoriha maloko. Apwiya mukithorihe miyo ntoko onakiphwanelelaaya, nave ntoko ophaameya waka.’ (Sal. 7:8) Owo tho oorepa: “Ororomeleya ni wookololowa murima ikikhapelele.” (Sal. 25:21) Mukhalelo waphaama wa okumi ori otitelela okhala oororomeleya wa Yehova, moohipwacha yeeyo eni yeereye! Wakhala wi noheerano yeela, nnahaala wiisoona ntoko mulipa a masalmu yoowo aarempe: “Óréla [oohakalala, TNM] tophameya m’mechelo aya, Awecha m’malamulo a Yehova.”—Sal. 119:1, NN.