Vaavaa achu ancipale yaalaleeryiwaaya, anna ni arokora yaanachuna soolaleeryiwa sincipale. Anna o Peteli yo Brooklyn yaanapaka irevista, nyenya naamwi hiihaa, awo yaapharihela impresa sikina wi epake ikaapa sa aliivuru. Ohoolo waya, mu miyeeri mincipale, empresa hiyaawerya waapaka aliivuru awaakhwanela wi ephariheliweke mmuteko woolaleerya. Mwawiihiiha munna Rutherford aamukoha Robert Martin, munna yoowo aari mutokweene a efaaprika, waakhanle wi awo yaahaala owerya waapakaka aliivuru mukhataaya.

Munna Martin aahaakhula: “Iho miruku saphaamaxa, woona wi enahaala otaphulela opaceryiha efaaprika yeeyo eni yaapakeke aliivuru.” Anna yaahaalukaari nipuro makupa a Mphiro Concord 18 o Brooklyn nave yaakhalano ikaruma yaachunaaya.

Tahi wi oothene yaahihakalala ni oya vahoolo yoola. Mutokweene a empresa yeela yaapaka aliivuru ahu aahixekurya efaaprika ahu evyaani. Owo aaloca: “Nyuwaano mookhalano ikaruma saphaamaxa sa waapakano aliivuru, nyenya haavo a nyuwo osuwenle opharihela. Mu miyeeri mithanu nammoha, munahaala onanariha ikaruma sanyu soothene.”

Munna Martin aahaakhula: “Eyo enniiwexexeya, nyenya hiyaano noosuwela wi Yehova onahaala onikhaviherya, hiihaa ntoko oneereiye.” Munna Martin aaloca eparipari. Moohilekela, makina yaale yaanaapaka aliivuru 2.000 vanihikuni.

Mwawaaceererya mu waapaka aliivuru aya, yaapacerya opharihela meerelo mavyaani a omwaramwaxa michaka saphaama moorweela wa ompharihela raatiyu. Othana wa nihiku na 26 a Fevereru a 1922, Munna Rutherford aaloca mu raatiyu mu ekwaha yoopacerya. Owo aaloca mwaha waarino muru “Amilyawu a Achu Yaawo  Akhanle Hiihaano Herwa Ekhwa” mu raatiyu KOG o Los Angeles, California, E.U.A.

Achu waacamela 25.000 yaahiwiriyana mwaha yoola. Akina a yaawo yahirumiha ikaarata yooniheryaka othamalela waya ntakhara mwaha. Emoha ya ikaarata seiha yaari ya Willard Ashford yoowo aakhala o Santa Ana, California. Owo aahimuthamalela Munna Rutherford ntakhara mwaha “woohakalaliha ni wamphurelo.” Owo aahaaceererya: “Vaate vaka aakhalavo achu araru aniiceliwa yaawo yahaahaala owerya ovinya vaate. Mwawiihiiha hinaahaala owerya owiriyana mwaha anyu, naamwi waakhanle wi munaloca nipuro nawaacamela vaate vahu.”

Mu isumana soocharela saanalociwa miyaha sincipale. Omakuchuwelo wa eyaakha ya 1922, Mulipeleli aaloca wi “achu opwaha 300.000 yaahiwa michaka moorweela wa raatiyu.”

Eceenyeryeyaka ni ikaarata vamoha ni masu a achu, Oohuserya a Piipiliya yaalakelela otikitherya nipuro naya na raatiyu o Staten Island, waacamela o Peteli yo Brooklyn. Iyaakha soocharela, Oohuserya a Piipiliya yaanampharihela raatiyu yoola, WBBR, wi emwaramwaxe michaka sa Omwene mmapuro mancipale ni wa achu ancipale.

Mulipeleli a 15 a Yunyu a 1922, aalokoha wi muthukumano wa muceche waahaala okhala o Cedar Point, Ohio, opacerya 5 ophiyerya 13 a Setempuru a 1922. Oohuserya a Piipiliya yaahakalala vancipale vaavaa yaaphin’yaaya o Cedar Point.

Mmwaha awe woopacerya, Munna Rutherford aaloca wa oowiriyana: “Kinnaroromela moomalela wi Apwiya anahaala . . . oreeliha muthukumano yoola ni weeriha wi ovahe onamoona otokweene yoowo ohintoko ovahiwa veelaponi.” Anamaloca miyaha va muthukumano yoole mwawuuluulela yaahaaceenyerya anna ni arokora wi elaleeryeke.

Voocharela Naneethanu 8 a Setempuru, achu 8.000 yaaphiya va muthukumano, nave moohakalala awo yaanaweherya wi ewiriyane mwaha wa Munna Rutherford yoowo waalokohiwe. Awo yaanaweherya wi owo aahaala othariha yootaphulela ya ileetra “ADV,” seiho saaphwanyeya va nwopelo aya. Vaavaa yaakiraanthaaya mmipaco saya, ancipale yaanawerya woona ekartaaxe etokweene yeeyo yaamakeleliwe vasulu va etripuna. Arthur Claus yoowo aapanke mukwaha ovinya o Tulsa, Oklahoma, E.U.A., ayaaka o muthukumano aaphwanya nipuro naphaama nenlo aaweryeiye  owiriyana phaama miyaha. Ela yaari yoovila woona wi mu elukuluku yeela hisaariwo mikrofoni naari ikuluna seiho saaceererya ovuwa wa masu.

Wi ohikhalevo waakanyeryana, muhooleli a muthukumano aalokoha wi haavo aahaala weemereryiwa ovolowa variyari va mwaha wa Munna Rutherford. Elukuluku ya 9:30 wooxiixelo Munna Rutherford aapacerya mwaha awe moorweela wa oloca masu a Yesu anaphwanyeya mu Mateu 4:17: “Omwene wa wirimu wohaacamela.” Vaavaa owo aaloceiye mukhalelo achu yaahaalaaya wiiwa muchaka yoola wa Omwene, owo aahi: “Yesu mwaneene aaloca wi mu elukuluku ya ophiya wawe, aahaala waahoolela anamahaca a achu awe, vaavaa aahaaleiye waathukumanyaka achu oororomeleya.”

Munna Claus yoowo aari va muthukumano yoole, onnuupuwela: “Naanawerya wiiwa masu oothene.” Nyenya mootutuxa, owo aapacerya wiiceliwa nave aakhumela vaate. Arthur aakhumela vaate naamwi ahaachuna okhuma, woona wi aanasuwela wi haahaala weemereryiwa ovolowa wanawiili variyari va mwaha wa Munna Rutherford.

Mu aminutu vakhaani owo aapacerya openuwa. Owo ooloca wi vaavaa eeceiye akookelaka mmuthukumano, aahiwiiwa achu yoopaka makuphi. Vaavaa iiwaleiye yeeyo murima wammalamo! Wi awerye owiriyana makupa yaahalenle a mwaha yoole wootikhiniha, owo aalakelela owela vasulu va empa. Munna Claus, yoowo aarino iyaakha 23 elukuluku yeele, aaphwanya mukhalelo wa owela vasulu va empa. Vaavaa aaphin’yeiye vasulu, aaphwanya nipuro nenno naamukhaviherya wiiwa nave vaavaa aacamenleiyevo aahoona wi aanawerya “wiiwa phaama.”

Nyenya Arthur haarivo mukhateiye. Akina a asinthamwene awe yaari tho vaavale. Mmoha a yaawo, Frank Johnson aamukoha: “Wookhalano kaniveti aweetha?”

Arthur aahaakhula: “Aai, kookhalano.”

Frank aaloca: “Weyaano wa naakhulo na mavekelo ahu. Onnoona ekartaaxe yeela etokweene? Eyo erimmakeleliwa. Onwiriyaneke phaama  Muthoriha. a Vaavaa owo onahaaleiye oloca, ‘nave nyuwo munaphwanela olaleya, olaleya,’ okwate mikoyi seiya misese.”

Arthur apharenle mwaalo, vamoha ni asinthamwene awe yaanaweherya wi Munna Rutherford aloce masu yaawo yaahaala okhala eneneeryo wi awo ekwate mikoyi seihe. Moohilekela, Munna Rutherford aaphiya makupa oochuneyaxa a mwaha awe. Munna Rutherford aari oohakalala ni awaakuveya nave mwawooneya owo aaloca ni masu oovuwa ariki: “Mukhale anamoona oororomela ni eparipari a Apwiya. Rowani vahoolo nwanihaka ophiyerya vaavaa malapelo atheru anahaalaaya otoloxiwa moomalela. Mulaleerye michaka mapuro oothene. Elapo enaphwanela osuwela wi Yehova ti Muluku ni wi Yesu Kristu ti Mwene a mamwene ni Pwiya a asaapwiya. Ela elukuluku yoochuneyaxa ehintonko okhala. Onani, Mwene onnalamula! Nyuwaano mookhalano murici wa waaleela oothene vooloca sa yeela. Mwawiihiiha, mulaleye, mulaleye, mulaleye sa Mwene ni Omwene awe!”

Arthur olonce wi owo ni anna akina yaakwata mikoyi nave ekartaaxe yaatapuruseya. Mwawiiwanana ni ileetra “ADV,” inataphulela olaleya mu Enklesi, ekartaaxe yaanaloca: “Mulaleye sa Mwene ni Omwene.”

Muthukumano wa muceche o Cedar Point waahaakhaviherya anna okhala ootikitheryeya mmuteko woochuneya wa olaleerya Omwene, nave achu yaarino munepa wawiiveleela yaahakalala opaka makupa mmuteko yoola. Kolpoltore mmoha (hihaano osuweliwe ntoko piyoneero) a Oklahoma, E.U.A., oorepa: “Naalaleerya mmapuro yaawo achu ancipale yaalapa mmiinani nave yaari oohaawaxa.” Owo aaloca wi vaavaa achu yiiwaaya wiiliwiili michaka inaphwanyeya mu erevista Idade de Ouro, “awo yaanapacerya winla.” Owo aahaaceererya: “Naanahakalala vancipale nthowa nawi naanaalipiha yaawo.”

Oohuserya yaala a Piipiliya yaahoona waakuveya wa masu a Yesu anaphwanyeya mu Luka 10:2: “Muteko woohepha wohinnuwa, nto anamuteko ari vakhaani.” Vaavaa eyaakha yaaphiyaaya omakuchuwelo, awo yaari oolakelela olaleya michaka sa Omwene mmapuro oothene.