Aisarayeeli Akhalai Yaanawaniha Ikhoco—Ntakhara Heeni Nihinawanihaahu?
MUTOKWEENE mmoha a nikhuuru na Nasista aahikhuwela wa nikhuuru na Anamoona a Yehova variyari va Ekhoco Yanawiili ya Elapo Yoothene: “Wakhala wi mmoha a nyuwo ookhooca owaniha ni Afransa naari a Inklatera, oothene anyu munahaala okhwa!” Naamwi anakhoco a Nasista yaawo yaarino akapuchi yaari vakhiviru ewehereryaka, haavoru mmoha mano a annihu eemerenrye. Ola waari olipa murima chiryene! Ela yootakiherya yaphaama vooloca sa mukhalelo Anamoona a Yehova anoonaaya ekhoco: Ninnakhooca owaniha mu ikhoco sa elapo yeela. Naamwi achu elocaka wi enahaala oniipha wakhala wi nookhooca owaniha, ninnakhooca opaka makupa mu owanawana wa elapo yeela yoonanara.
Nyenya tahi wi oothene analoca wi Akristu anneerano yeela. Ancipale analoca wi Mukristu onaphwanela waakiha elapo awe. Awo akhweya ananwerya wuupuwela, ‘Aisarayeli akhalai yaari achu a Muluku nave yaanawaniha ikhoco; mwawiihiiha, ntakhara heeni olelo Akristu hanaphwanela owaniha?’ Mwaahaala waakhula hai? Nyuwaano munanwerya othariha wi mukhalelo wa Aisarayeli akhalai waari woohiyana vancipale ni mukhalelo wa achu a Muluku olelo. Muthokororye ohiyana othanu.
1. ACHU A MULUKU OOTHENE YAARI A NLOKO NIMOHA
Khalai, Yehova aahaathukumanya achu awe mu nloko nimoha, nloko na Aisarayeli. Owo aahiwiichana Aisarayeli ‘achu awe enesha oothanleya wa achu oothene.’ (Muk. 19:5) Muluku tho aahaathanlela elapo aya. Mwawiihiiha vaavaa Muluku aalamuleleiye Aisarayeli oya owaniha ekhoco ni maloko makina, awo hiyaawana naari owiipha alapeli akhwaaya. a
Olelo, alapeli eeparipari anarweela wa “maloko oothene, a mahimo oothene, ni a ilocelo soothene.” (Wup. 7:9) Waakhala wi achu a Muluku annapaka makupa mu ikhoco awo yaahaala owanaka—ni owiiphaka—alapeli akhwaaya.
2. YEHOVA AANAALAMULELA AISARAYELI OYA OKHOCONI
Khalai, Yehova aanalakelela ti liini nave ntakhara heeni Aisarayeli yaaphwanelaaya oya okhoconi. Ntoko yootakiherya, Muluku aahaalamulela Aisarayeli wi ewanihe wi ewerye okhwaaniherya othoriha wawe ntakhara Akanani, yaawo yaasuweliwe phaama ntoko alapeli a masololo, alipa oocapaheyaxa ni awaapaha anamwane ntoko mukucho. Ohiya yeeyoru, Akanani yaakhala mu elapo yeeyo Yehova aaroromelinheiye achu awe. Ti nthowa nene Muluku aalamulenleiye Aisarayeli otoloxa nloko nenle, wi ichu sootakhala yaapakaaya ehaavolowele yaawo. (Onam. 18:24, 25) Aisarayeli emanle ovolowa mu Elapo ya Nlakano, mu ikwaha ikina, Muluku aaneemererya wi ewanihe wi ewerye wiisaakiha wa amwiicani aya. (2 Sam. 5:17-25) Nyenya, Yehova hantonko weemererya wi Aisarayeli elakelela meekhaaya oya okhoconi. Vaavaa yeeraayano eyo sookhumelela sene saakhala soowaawa.—Nam. 14:41-45; 2 Math. 35:20-24.
Olelo, Yehova haneemererya wi achu eyeeke okhoconi. Maloko anawana wi eyeno vahoolo soochuna saya, ohiya soochuna sa Muluku. Awo annawaniha nthowa nawi anachuna waacererya elapo aya wi ereele, naari waakiha moonelo aya wa epolitika. Nyenya hanka vooloca sa ale analoca wi anawaniha mu nsina na Muluku wi ekhapelela malapelo aya naari ewiiphe amwiicani a Muluku? Yehova onahaala owaakiha alapeli awe eeparipari ni waatolosa amwiicani awe omwaahiyu—mu ekhoco ya Haremaketooni. (Wup. 16:14, 16) Mu ekhoco yeeyo, anakhoco a Muluku pahiru anahaala okhala soopatusiwa soomunepani, ohiya achu anamulapela yoowo.—Wup. 19:11-15.
3. AISARAYELI HIYAATOLOXA YAALE YOONIHERYA NROROMELO MWA YEHOVA
Apwanne Muluku onnawaniha ntakhara nloko nammoori olelo hiihaa ntoko enreiye ni Aisarayeli o Yeriko?
Khalai, anakhoco a Aisarayeli wiiliwiili yaanawooniherya ikharari yaale yooniherya nroromelo mwa Muluku, nyenya yaawiipha pahiru yaale Yehova aalakelenleiye wi yaaphwanela okhwa. Moone sootakiherya piili. Naamwi Yehova aalamulenle wi Yeriko atoloxiwe, Aisarayeli hiyaamwiiphale Rahapi ni amusi awe nthowa nawi owo aahooniherya nroromelo. (Yos. 2:9-16; 6:16, 17) Ohoolo waya, epooma yoothene ya Kiteyoni hiyaatoloxiwe Akiteyoni emanle wooniherya wi yaanamucicimiha Muluku.—Yos. 9:3-9, 17-19.
Olelo, maloko anawaniha annawiipha yaale arino nroromelo. Nave mu ikwaha ikina, achu ahipanke yoonanara anniiphiwa mu owanawana wa maloko.
4. AISARAYELI YAAPHWANELA OCHARIHA MALAMULO A MULUKU VOOLOCA SA EKHOCO
Khalai, Yehova aaweherya wi anakhoco a Aisarayeli echariheke ohoolela wawe vaavaa yaayaaya owaniha mu ekhoco vyakala. Ntoko yootakiherya, mu ikwaha ikina, Muluku aanaloca wi awo yaaphwanela “oloca sa murecele” wa epooma ya amwiicani. (Malam. 20:10) Yehova aaweherya tho wi anakhoco a Aisarayeli ekhale aweela mmeecelo, awo ni mixakala saya. (Malam. 23:9-14) Ntoko yootakiherya, anakhoco a maloko makina ilukuluku sincipale yaanaakoniha athiyana a ilapo seiho yaavoothaaya, nyenya Yehova aahaawatiiha Aisarayeli weerano yeeyo. Mweeparipari, awo pahiru yaaphwanela omuthela muthiyana yoowo emphanraaya ovinrevo mweeri mmoha emanle okuxa epooma awe.—Malam. 21:10-13.
Olelo, ilapo sincipale soopaka malakano yaawo yoolakelela aya ori otikitherya malamulo vooloca sa ikhoco. Yoolakelela ya malamulo yaawo ori waakhapelela achu, nyenya moothananiha tahi wi ilukuluku soothene malamulo yaawo annacicimihiwa.
5. MULUKU AAHIWANIHA NTAKHARA ACHU AWE
Apwanne ikhoco sa mutano sinnaahiya achu yaale arino nroromelo, hiihaa ntoko Rahapi ni emusi awe yaahiiwalaaya mu ekhoco ya Yehova ni Yeriko?
Khalai, Yehova aahiwaniha ntakhara Aisarayeli, wiiliwiili owo aanaavaha ovootha mmikhalelo sootikhiniha. Ntoko yootakiherya, ti mwawiihai Yehova aakhavihenryeiye Aisarayeli wi ewerye otoloxa epooma yo Yeriko? Echarihaka ohoolela wa Yehova, vaavaa Aisarayeli ‘yakhuwenlaaya vatokotoko mukuso waakumuwa,’ nave eyo yaahaakhaviherya ovootha epooma. (Yos. 6:20) Nave ti mwawiihai yaawenryaaya ovootha ekhoco ni Amoori? “Apwiya [Yehova] yaahiwiipha ni maluku matokotoko a maralala yaamora wirimu. Yaari ancipale yaakhwile ni maluku a maralala, waapwaha yaawo aIsarayeli yaawiiphalaaya ni mavaka.”—Yos. 10:6-11.
Olelo, Yehova hanawaniha ntakhara makupa ammoori a elapo. Omwene wa Muluku, yoowo Mulamuleli ene ori Yesu, “honarweela weelapo yeela ya vathi.” (Yoh. 18:36) Moohiyana, Satana tonaalamulela alamuleli oothene aachu. Ichu soonanara seiho sineereya mu ikhoco sa mulaponi sinnooniherya mukhalelo owo oreiye ootakhala.—Luka 4:5, 6; 1 Yoh. 5:19.
AKRISTU EEPARIPARI ANNEERERYA OPAKA MURECELE NI AKINA
Ntoko nimanlaahu woona, mukhalelo ahu olelo onnahiyana vancipale ni mukhalelo wa Aisarayeli akhalai. Nyenya, ohiyana yoola tahi mathowa mamoharu ananeeriha ohiwaniha. Ntoko yootakiherya, Muluku aahilaiherya wi mmahiku ookuchula, yaale yii ehusihiwe ni yoowo ‘hiyahaala ohuserya meerelo a ekhotxo,’ naari mano opaka makupa. (Isa. 2:2-4 BNM) Mwawaaceererya, Yesu aaloca wi oohuserya awe hiyaahaala opaka makupa ‘a elapo ya vathi,’ naari wi yaahaala okhala awiivalaanya mu owanawana wa mulaponi.—Yoh. 15:19.
Nyenya Yesu aahaaceenyerya oomuchara awe opaka sincipale opwaha vaavaa. Owo ohaahusiha ohikhalano mikhalelo seiyo saahaala oweeriha okuha mathowa, okhala oonyeenyeya ni opaceryiha ekhoco. (Mat. 5:21, 22) Owo tho ohaahusiha oomuchara awe ‘weeteteela murecele,’ naari wi, weererya otikitherya murecele ni akina ni waasivela amwiicani aya.—Mat. 5:9, 44.
Nni neereno hai yeela? Ti yawooneya wi hinaano nchuno na owaniha, nyenya apwanne mmurimani mwahu naanwerya okhalano miyoonelo sa wiicana seiho saahaala opaceryiha owanawana naari okawanyeya mmulokoni? Nnaphwanela otitelela wiilipixerya wi niphole mmirimani mwahu miyoonelo ntoko seiho.—Tiy. 4:1, 11.
Hiyaano hinniivoliiherya mu ikhoco sa maloko, ohiya yeeyo, ninniilipixerya wi nikhale mmureceleni ni osivela variyari vahu. (Yoh. 13:34, 35) Nri oolakelela otitelela okhala awiivalaanya niweheryaka nihiku nenlo Yehova onahaaleiye omaliha ikhoco soothene okhala wookhala.—Sal. 46:9.
a Ikwaha ikina, mahimo a Aisarayeli yaanawana yaawo yaawo, nyenya ikhoco seiyo sa mahimo saanamuthananiha Yehova. (1 Mam. 12:24) Vakina vaya Yehova aaneemererya ikhoco seiyo nthowa nawi mahimo makina yaanakhala oohiroromeleya naari yaanapaka soocheka itokweene.—Amuth. 20:3-35; 2 Math. 13:3-18; 25:14-22; 28:1-8.
