1. Achu ancipale a mmahiku ahu anaakhulela hai miruku sa Mpiipiliyani? (Masiposipo 1:20, 21)

 MU ILAPO sincipale, ti yawunlaana owoona alaleeryi eri oohakalala yeecaka muramphani yaavahaka achu soolaleeryiwa. Apwanne mohintoko olaleerya mmukhalelo yoowo? Waakhanle wi mohintoko, nyuwaano akhweya mwaahuupuwela sa yeeyo enaphwanyeya mu liivuru a Masiposipo—wi miruku sinnakhuwela muramphani wi achu yiiwe. (Mwaalakhanye Masiposipo 1:20, 21.) Mpiipiliyani ni mu soolaleeryiwa sahu ninnaphwanyamo “Maayi Miruku [miruku seeparipari TNM],” seiho iri miruku sa Yehova. Nave ti yeeyo achu anachunaaya wi ewerye okhalano okumi woohimala. Ninnakhala oohakalala vaavaa muchu oneemereryeiye emoha ya soolaleeryiwa sahu. Nyenya tahi wi oothene anneemererya. Akina hanachuna osuwela yeeyo Piipiliya onaloceiye. Akina annanitheya. Awo anuupuwela wi Piipiliya oovireliwa. Ophiyerya tho wi akina annaakaaha mahusiheryo a Mpiipiliyani vooloca sa meecelo, elocaka wi yaale anachariha mahusiheryo yaawo haanono osivela nave aniisoona okhala aphaamaxa waapwaha akina. Naamwi hiihaa, moosivela Yehova onnatitelela ovaha miruku sawe wa oothene nave onneerano yeela moosivela. Mmikhalelo taani?

2. Ti woowi nneeraahu niphwanyewo miruku seeparipari olelo, nyenya tiheeni achu ancipale analakelelaaya weera?

² Mukhalelo mmoha Yehova onaphariheleiye wi avahererye miruku seeparipari olelo, ori moorweela wa Masu awe, Piipiliya. Achu ancipale aakhalano Piipiliya. Hanka vooloca sa soolaleeryiwa sahu sinathipeleya Mpiipiliyani? Nthowa na mareeliho a Yehova, iho sinnaphwanyeya mu ilocelo opwaha 1.000. Yaale anawiriyana, eyo tiwi, anaalakhanya ni opharihela yeeyo anaalakhanyaaya, annaphura. Nyenya achu ancipale annalakelela ohiwiriyana masu a miruku seeparipari. Vaavaa anapakaaya  soolakelela, anathanla wiiroromela naari waaroromela achu akina. Ophiyerya tho wi achu ancipale annanoona ohikhala echweenevo nthowa na olakelela ochariha yeeyo Piipiliya onaloceiye. Mmwaha yoola, nnahaala woona ntakhara heeni achu anuupuwelaaya hiihaa. Woopaceryani, hankooni nthokororye mukhalelo nneeraahu niwerye okhala ni miruku inarweela wa Yehova.

3. Ti mwawiihai nnooniheryaahu miruku seeparipari?

³ Piipiliya oni: “Owoova Apwiya ti mapacereryo a miruku; omusuwela Muluku Aweela ori osuwelasha.” (Masi. 9:10) Okhalano miruku onavolowela opharihela yeeyo nsuwenlaahu wi nipake soolakelela saphaama, nyenya ninnooniherya wi nookhalano miruku seeparipari vaavaa ‘nnamusuwelaahu Muluku Aweela,’ eyo tiwi, vaavaa nnaavyaavyaahu osuwela mukhalelo Yehova onuupuweleiye nihaakumve opaka yoolakelela yoochuneya. Nnanwerya weerano yeeyo moorweela wa woona yeeyo Piipiliya ni soolaleeryiwa sahu inalocaaya. Vaavaa nneeraahuno yeela, ninnooniherya wi nookhalano miruku seeparipari.—Masi. 2:5-7.

4. Ntakhara heeni pahiru Yehova torino owerya wa onivaha miruku seeparipari?

⁴ Pahiru Yehova torino owerya wa onivaha miruku seeparipari. (Aro. 16:27) Ntakhara heeni? Noopacerya, nthowa nawi Yehova ti Mpatuxa nave owo oosuwela soothene vooloca sa ichu opatunxeiye. (Sal. 104:24) Nanaawiili, soothene Yehova onapakeiye sinnooniherya wi owo ta miruku. (Aro. 11:33) Naneeraru, yoole onapharihela ikano sa miruku sa Yehova, ilukuluku soothene onnaphura. (Masi. 2:10-12) Wakhala wi ninnachuna okhalano miruku seeparipari, nnaphwanela weemererya iparipari seiha soochuneya ni weeriha wi iho ihooleleke soolakelela ni saweera sahu.

5. Yookhumelela taani achu anakhalaayano vaavaa anakhoocaaya masuwelelo a Yehova yaawo eri Ehime ya miruku yeeparipari?

⁵ Ancipale nnaaphwanyaahu mmuteko woolaleerya annasuwela wi ichu inirukurenrye ti sootikhiniha, nyenya haneemererya wi ookhalawo Mpatuxa nave anuupuwela wi soothene irimuthatuwa. Nave akina analoca wi annamweemererya Muluku, nyenya anuupuwela wi malakiheryo a Mpiipiliyani aavireliwa nave annathanla okhala mmukhalelo yoowo anoonaaya wi ti waphaama. Nto ni yookhumelela taani? Apwanne elapo nipuro naphaama nthowa nawi achu anaroromela miruku saya ohiya sa Muluku? Apwanne awo annakhalano ohakalala weeparipari naari ewehereryo yeeparipari ntakhara omwaahiyu? Naawehaka ichu sinirukurenrye ninnalekecheya ni eparipari ela: “Hayiivo miruku, hawiivo osuwelasha, haavo muupuwelo oovaanyiha yookhwela ya Apwiya [Yehova].” (Masi. 21:30) Ela ennanceenyerya otitelela waavya miruku sa Yehova! Moothananiha, achu ancipale hanuupuwela hiihaa. Ntakhara heeni?

6. Mwawiiwanana ni Masiposipo 1:22-25, taani ahinawiriyana miruku seeparipari?

⁶ Achu ancipale hanawiriyana miruku seeparipari vaavaa iho ‘inakhuwelaaya muramphani.’ Mwawiiwanana ni Piipiliya, aakhalavo makhuuru mararu a achu yaawo anakhooca miruku: “Oohisuwela,” “oonyemula” ni “alolo.” (Mwaalakhanye Masiposipo 1:22-25.) Hankooni naalikhele mikhalelo inaweeriha achu yaawo okhooca miruku sa Muluku, nave hankooni tho nthokororye yeeyo nnaphwanelaahu weera wi nihikhale ntoko yaawo.

7. Ntakhara heeni achu akina annathanla otitelela okhala “oohisuwela?”

 ⁷ Nikhuuru noopacerya ti na “oohisuwela,” yaale aneemererya echu eri yoothene naari anawokeya mookhweya. (Masi. 14:15) Ikwaha sincipale ninnaaphwanya achu si yaawo mmuteko woolaleerya. Ntoko yootakiherya, nwuupuwele mamilyawu a achu yaawo anawokiwa ni ahooleli a ikerexa ni a ipoliitika. Akina annanyeenyeya vaavaa anasuwelaaya wi aawokiwa ni ahooleli yaawo. Nyenya achu analociwa mu Masiposipo 1:22 annathanla otitelela ohikhalano mavyakelo naari wi ohisuwela eparipari. (Yer. 5:31) Awo annasiveliwa opaka yeeyo anachunaaya nave haano nchuno na ohuserya yeeyo Piipiliya onaloceiye naari wiiwelela malamulo awe. Achu ancipale anuupuwela ntoko muthiyana mmoha o Kepeki, Kanata, oovekelaxa, yoowo aalonce wa Namoona mmoha a Yehova: “Waakhanle wi phaatiri ahu onnaniwoka, nikacamiho ti nawawe, ohiya nawihu!” Mweeparipari, hannachuna okhala ntoko yaale anathanla otitelela okhala oohipwacha!—Masi. 1:32; 27:12.

8. Tiheeni enahaala onikhaviherya okhala awiichwelavo omunepani?

⁸ Ni mathowa aphaama, Piipiliya onnanceenyerya ohititelela okhala achu oohisuwela nyenya ‘okhala atokweene mu wuupuwela wahu.’ (1 Kor. 14:20) Hiyaano ninnakhala awiichwelavo mmukhalelo woomunepani vaavaa nnapharihelaahu malakiheryo a Mpiipiliyani mu okumi ahu. Vakhaani-vakhaani, ninnoona mukhatiihu mukhalelo malakiheryo yaala ananikhaviheryaaya osepa makacamiho ni opaka soolakelela sa miruku. Nnaphwanela waalikhela phaama oya wahu vahoolo mmukhalelo yoowo. Waakhanle wi nipacenrye omuhuserya Piipiliya ni oya mmithukumanoni khalai, yaahaala okhala yaphaama wiikoha ntakhara heeni nlelo hinipanke matorokelo oophwanelela wi niiveleele wa Yehova ni opatisiwa. Waakhanle wi noopatisiwa, apwanne ninnaya vahoolo ntoko alaleeryi ni ahusiha a michaka saphaama? Apwanne soolakelela sahu sinnooniherya wi nnahooleliwa ni malakiheryo a Mpiipiliyani? Ninnooniherya mikhalelo Seekristu vaavaa nnaakhalihaahu akina? Noona wi aakhalavo makupa nnaphwanelaahu orehererya, nnaphwanela otikitheryeya mmahusiheryo a Yehova, yaawo ‘anaavaha oolosowa [naari oohisuwela] miruku.’—Sal. 19:7

9. Ti mwawiihai “oonyemula” anooniheryaaya wi annakhooca miruku?

⁹ Nikhuuru nanaawiili na achu anakhooca miruku sa Muluku ti na “oonyemula.” Ikwaha ikina, ninnaaphwanya achu si yaawo mmuteko woolaleerya. Onnaasivela waanyemula akina. (Sal. 123:4) Piipiliya aahilopola wi mmahiku ookuchula, yaahaala okhalavo achu ancipale oonyemula. (2 Ped. 3:3, 4) Hiihaa ntoko asikamwene a mulopwana oororomeleya Loti, achu akina a mmahiku ahu hanawiriyana olopola wa Muluku. (Map. 19:14) Ancipale annaanyemula yaale anakhala mwawiiwanana ni malakiheryo a Mpiipiliyani. Awo anneerano yeela nthowa nawi anaceenyeryiwa ni “minkhela aya” yoonanara naari ichu sihiri sa Muluku. (Yuda 7, 17, 18) Yeeyo Piipiliya onathariheiye vooloca sa achu oonyemula enniiwanana phaameene ni alipa oomwaryeya ni akina yaawo amukhoonce Yehova!

10. Mwawiiwanana ni Salumu 1:1, nni nsepe hai okhala ntoko achu oonyemula?

¹⁰ Tiheeni nnaphwanelaahu opaka wi nihikhale achu oonyemula? Mukhalelo mmoha wa weerano yeela ori moorweela wa ohaataana ni yaale anaceenya ni echu eri yoothene. (Mwaalakhanye Salumu 1:1.) Ela enataphulela wi hannawiriyana naari waalakhanya  echu vyakala enarweela wa alipa oomwaryeya. Apwanne mohintoko wuupuwela yeeyo yaahaala weereya waakhanle wi noopacerya okhwa minikwa sa ohoolela yoowo nnaakhelaahu wa Yehova ni marehereryo awe? Wi eyo eheereye, nnaphwanela wiikoha: ‘Apwanne ilukuluku soothene kinnaceenya vaavaa nnaakhelaahu ohoolela naari wiiwexexa ovyaani? Apwanne kinneererya ophwanya soohesa wa yaale anahoolela?’ Wakhala wi noorehererya miyoonelo seiha mwawaakuveya, eyo enahaala omuhakalaliha Yehova.—Masi. 3:34, 35.

11. “Alolo” anoona hai malakiheryo a Yehova?

¹¹ Nikhuuru naneeraru na achu anakhooca miruku ti na “alolo.” Awo alolo nthowa nawi annakhooca okhala mwawiiwanana ni malamulo a Muluku. Anathanla opaka yeeyo anoonaaya okhala yaphaama vamiithoni vaya. (Masi. 12:15) Mmukhalelo yoola, awo annamukhooca Yehova, Ehime ya miruku. (Sal. 53:1) Ikwaha sincipale mmuteko woolaleerya, awo annaakaaha nthowa na ocicimiha malakiheryo a Mpiipiliyani. Nyenya awo hiyaano echu yaphaama wi enivahe. Piipiliya oni: “Mulolo, miruku sinnamurakamela; vamulacuni hanawerya oloca echu.” (Masi. 24:7) Yoorepa ela ennooniherya wi alolo hanawerya ovaha ikano saphaama. Ti nthowa nene Yehova onnanlopola wi ‘nimurapele mulolo!’—Masi. 14:7.

12. Tiheeni enahaala onikhaviherya ohikhala ntoko alolo?

¹² Moohiyana ni yaale aniica ikano sa Muluku, hiyaano ninnasivela mukhalelo Muluku onuupuweleiye, ophitaanyerya malakiheryo awe avasulu. Ninnalipiha osivela yoola vaavaa nnoonaahu ohiyana orivovo variyari va yaale anamwiiwelela Yehova ni ahinamwiiwelela. Moone makacamiho oohiyanahiyana yaawo achu anakhalaayano nthowa na okhooca miruku sa Muluku. Voocharela, muupuwele mukhalelo okumi anyu oryaaya waphaama nthowa na omwiiwelela Yehova.—Sal. 32:8, 10.

13. Apwanne Yehova onnanikhinyererya weemererya miruku sawe?

¹³ Yehova onnavaha miruku sawe wa achu oothene, nyenya owo hanamukhinyererya muchu weemererya. Nyenya owo onnaloca sookhumelela sa ohiiwelela miruku. (Masi. 1:29-32, BNM) Yaale analakelela ohimwiiwelela Yehova, ‘anamwaakhela yeeyo enaaphwanela.’ Mweelukuluku aya, mukhalelo wa okumi aya onamwaaruuhela wiicela, ohooxeya nave omakuchuwelo anahaala otoloxiwa. Mmukhalelo mukina, yaale anawiriyana miruku sa Yehova nave enachariha, owo onnaaroromeliha: “Yoowo anakiwiriyana, onarwa akhala mmureceleni, iichaala ahoovakaru yoonanara.”—Masi. 1:33.

14-15. Tiheeni nnahuseryaahu orweela mu Masiposipo 4:23?

¹⁴ Opharihela miruku sa Muluku ilukuluku soothene onnanruuhela miphurelo. Ntoko  nonnaahu, Yehova onnavaha miruku sawe wa oothene. Ntoko yootakiherya, mu liivuru a Masiposipo, Yehova onnavaha ikano soophara muteko. Hankooni noone sootakiherya xexe.

¹⁵ Mukhapelele murima anyu woosiphela. Piipiliya oni: “Voopwahasha, okhapelele murima aa; tiwi mwa yoowo tonaphacuwavo anaacuucu a okumi.” (Masi. 4:23) Muupuwele yeeyo nnaphwanelaahu weera wi nikhapelele murima ahu woomwiilini. Nnaphwanela olyaaka yoolya yaphaama, ovyakiha mwiili ni osepa sookhovelela inananariha ekumi. Nnaphwanela tho weera emohamoha ni murima ahu woosiphela. Mahiku oothene ninniilyiha ni Masu a Muluku. Ninnaya mmithukumanoni nave ninniirehererya wi nivahe maakhulo. Ninnatitelela opaka makupa mwamvai mmuteko woolaleerya, nave ninnasepa okhalano sookhovelela saahaala onanariha okumi ahu woomunepani, nikhalaka ocai wa echu vyakala yaahaala ovolowela mukhalelo ahu wa wuupuwela, ntoko mathatelo oohiphwanelela ni asinthamwene oonanara.

16. Ntakhara heeni Masiposipo 23:4, 5 toophara muteko wa hiyo olelo?

¹⁶ Mwaakhwaneliweke ni yeeyo muryaanyuno. Piipiliya onnavaha ekano ela: “Muhakhu ohoovelavelihe; . . . Miitho aa yaavareryaka, muhakhu ene onnavava, ocakanele ntoko enaka enavava musulu.” (Masi. 23:4, 5) Achu ananwerya oyeleela ikhorowa ni sookhalano saya mookhweya. Naamwi hiihaa, olelo ninnawoona achu ooreela ni oohaawa eri ooweiwaxa yaavyaka ikhorowa. Ti nthowa nene ikwaha sincipale anapakaaya ichu inananariha mukhalelo aya, onthamwene aya, ophiyerya tho okumi aya. (Masi. 28:20; 1 Tim. 6:9, 10) Moohiyana, miruku sinnanikhaviherya okhalano moonelo woophimelela vooloca sa ikhorowa. Ela ennanikhaviherya ohikhala a nrima nave tho ennaneeriha okhala oohakalala ni awaakhwaneliwa ni yeeyo nryaahuno.—Ekle. 7:12.

17. Nni niwerye hai okhalano “nlumi na achu a miruku” nenlo nnalociwa mu Masiposipo 12:18?

¹⁷ Muupuweleke muhaakumve oloca. Wakhala wi hinaano ephoole, nnanwerya otannya makacamiho matokweene ni masu ahu. Piipiliya oni: “Masu analociwa moohuupuwelela,  ari ntoko ophoreiha wa nlema, nto nlumi na achu a miruku, openuxa.” (Masi. 12:18, TNM) Ninnatikitherya murecele vaavaa nihinavuwihaahu soohesa sa akina. (Masi. 20:19) Wi masu ahu ekhale oopenuxa ohiya oophoreiha, murima ahu onaphwanela osareya ni masuwelelo a Masu a Muluku. (Luka 6:45) Wakhala wi ninnuupuwelela yeeyo Piipiliya onaloceiye, masu ahu ananwerya okhala ntoko “naacuucu a miruku” anaahakalaliha akina.—Masi. 18:4.

18. Ti mwawiihai Masiposipo 24:6 onanikhaviheryeiye okhumelela phaama mmuteko woolaleerya?

¹⁸ Muchariheke ohoolela. Wi nikhumelele phaama mookumini, Piipiliya onnanivaha ekano ela: “Ohiwanne ekhocho, opacerye wuupuwelela; tiwi ovootha onawereya ni alipa amiruku ancipale.” (Masi. 24:6) Moone mukhalelo opharihela nlakiheryo nenla oneeraaya wookhaviheryeeni okhumelela phaama mmuteko woolaleerya ni ohusiha. Ohiya opaka muteko woolaleerya mmukhalelo anyu, munoona hai ochariha ohoolela munaakhelaanyu mmithukumanoni? Ninnavyakihiwa orweela wa miyaha ni makupa yaawo anapakiwa ni anna a mavyakelo. Ohiya yeeyoru, marehereryo a Yehova annanivaha ikaruma soophara muteko, ntoko soolaleeryiwa ni ixilema hiiho inawerya waakhaviherya achu omwiiwexexa Piipiliya. Apwanne munnahuserya opharihela phaama ikaruma seiho

19. Ti mwawiihai muniisoonaanyu vooloca sa miruku Yehova onoovaheiyeeni? (Masiposipo 3:13-18)

¹⁹ Mwaalakhanye Masiposipo 3:13-18. Ninnathamalela vancipale ikano sa miruku nnaphwanyaahu Mmasu a Muluku! Sahaari miruku seiho, ti mwawiihai okumi ahu waahaalaaya okhala? Mmwaha yoola, nohoona sootakiherya sa miruku soophara muteko inaphwanyeya mu liivuru a Masiposipo. Eparipari wi ikano sa miruku sa Yehova sinnaphwanyeya Mpiipiliyani oothene. Nri oolakelela opharihela ikano sawe mmikhalelo soothene sa okumi ahu. Achu ancipale hanavaha esisapo miruku sa Muluku, nyenya hiyaano ninnaroromela wi “tooreeriwa yaale aniipharerelano [miruku].”