1. Ewehereryo taani Yehova onivanheiye?

 YEHOVA oonivaha ewehereryo yootikhiniha ya okumi woohimala. Akina anahaala okhalano okumi ohinakhwa ntoko soopatuxiwa soomunepani wirimu. (1 Kor. 15:50, 53) Nyenya achu ancipale arino ewehereryo ya okhala wookhala veelaponi yavathi ni ekumi yoophaameya ni yoohakalala. (Wup. 21:3, 4) Ewehereryo ahu ti yasisapoxa moohipwacha waakhanle wi nnawehererya okhala wookhala wirimu naari veelaponi.

2. Taavi ari mathipelo a ewehereryo ahu nave ntakhara heeni nnanwerya oloca yeela?

² Mpiipiliyani, masu awi ‘ewehereryo’ ananwerya otaphulela “owehererya wi ichu saphaama inahaala weereya.” Nave hiyaano nnanwerya ororomela wi yeeyo nnawehereryaahu ntakhara omwaahiyu enahaala weereya woona wi enarweela wa Yehova. (Aro. 15:13) Hiyaano noosuwela yeeyo owo ororomelinheiye nave noosuwela wi owo ilukuluku soothene onnaakhwaniherya yeeyo ororomelinheiye. (Nam. 23:19) Nri oolekecheya wi Yehova ookhalano nchuno ni owerya wa okhwaaniherya soothene olonceiye wi onahaala weerano. Ewehereryo ahu henarweela mu ichu nnaamwaanyiheryaahu naari ichu nnachunaahu wi seereye, nyenya enathipeleya mu ichu seiho nsuwenlaahu wi ti seeparipari.

3. Tiheeni nnahaalaahu ohuserya mmwaha yoola? (Salumu 27:14)

³ Tiithi ahu a wirimu onnanisivela nave onachuna wi nimuroromeleke yoowo. (Mwaalakhanye Salumu 27:14, BNM.) Vaavaa ewehereryo ahu mwa Yehova enakhalaaya yoolipa, ninnawerya ovilela makacamiho moolipa murima nave ninnakhala oohakalala moohipwacha yeeyo enahaala weereya. Hankooni noone ti mwawiihai ewehereryo enanikhapelelaaya. Woopaceryani, nnahaala woona mukhalelo ewehereryo eryaaya ntoko ankora ni kapaseti. Voocharela, nnahaala othokororya mukhalelo nneeraahu nlipihe ewehereryo ahu.

4. Mmukhalelo taani ewehereryo eryaaya ntoko ankora? (Ahe. 6:19)

⁴ Mu ekaarata awe wa Ahepri, murummwa Paulo aahilikanyiha  ewehereryo ahu ni ankora. (Mwaalakhanye Ahebri 6:19.) Owo wiiliwiili aanapaka mikwaha ni pophoro nave aanasuwela wi a ankora yaanaphariheliwa wi pophoro ahikuxiwe ni echeku. Ekwaha emoha owo ari mpophoroni echeku yawoopiha yaapacerya; nave owo aahiwoona alipa oomweeciha pophoro yaavonyeryaka a ankora muniya wi emusempihe pophoro omana maluku. (Saw. 27:29, 39-41) Hiihaa ntoko ankora onamulipiheiye pophoro, ewehereryo ahu ennanilipiha nave ennanikhaviherya ohimuhiya Yehova ni ohikhala oohaleeliheya vaavaa nnahoolelaahu makacamiho oovila. Eweheryo ahu yoolipa ennanikhaviherya ovilela ni makacamiho a okumi nthowa nawi ninnaroromela wi moohilekela, ichu inahaala okhala phaama. Nnaphwanela wuupuwela wi Yesu aahiloca wi nnahaala wiikariwa. (Yoh. 15:20) Wuupuwelela ichu seiho Yehova ororomelinheiye onnanikhaviherya otitelela omurumeela yoowo.

5. Ti mwawiihai ewehereryo yaamvanhaaya ikuru Yesu wi ahoolele okhwa?

⁵ Moone mukhalelo ewehereryo yaamukhavihenryaaya Yesu otitelela okhala oororomeleya naamwi aasuwela wi okhwa wawe waahaala okhala wawiicelaxa. Mu nihiku na Pentekoste mu 33 E.K., murummwa Petru aaloca yooloherya ya Salumu yeeyo enathariha mukhalelo waphaamaxa Yesu aahaaleiye okhala oomaala ni oororomela: ‘Kinniichuwa kiwehereryaka. Tiwi, hamurwa muhiya okumi aka onihiyeni, hamurwa mweemererya aweela anyu wi uuce . . . Munamukivoniha ni ohakalala vamiithoni vanyu.’ (Saw. 2:25-28; Sal. 16:8-11) Naamwi aasuwela wi aahaala okhwa, Yesu aahikhalano ewehereryo yoolipa yawi Yehova aahaala omviiha nave wi aahaala okhala oohakalala nthowa na okhala wanaawiili ni Atiithi awe wirimu.—Ahe. 12:2, 3.

6. Tiheeni munna mmoha olonceiye vooloca sa ewehereryo?

⁶ Ewehereryo ahu ennaakhaviherya anna ni arokora ancipale ovilela. Moone yootakiherya ya Leonard Chinn, munna oororomeleya aakhala o Inklatera. Variyari va Ekhoco Yoopacerya ya Elapo Yoothene, owo aahiwaleliwa nthowa na okhooca okhala mukhoco. Mu miyeeri miili owo aawaleliwa mu ekateya ya mukhateiye nave voocharela aakhinyereryiwa ophara miteko soovila. Ohoolo waya owo aarepa: “Echu yeeren’ye ni miyo yookilekecha wi ti woochuneya okhalano ewehereryo wi nivilele. Mpiipiliyani, sookhalamo sootakiherya sa Yesu, arummwa, alipa miririmu ni soororomeliha soochuneyaxa. Soothesene seiha sinnanivaha ewehereryo etokweene ya omwaahiyu ni ikuru wi nivilele.” Ewehereryo yaari ntoko ankora wa Leonard nave enanwerya tho okhala hiihaa wa hiyaano.

7. Ti mwawiihai makacamiho eneeraaya yeerihe wi ewehereryo ahu ekhale yoolipaxa? (Aroma 5:3-5; Tiyako 1:12)

⁷ Vaavaa nnahoolelaahu makacamiho nave noona mukhalelo Yehova onanikhaviheryeiye, ninnawerya osuwela wi Yehova onnaneemererya nave eyo ennalipiha ewehereryo ahu. (Mwaalakhanye Aroma 5:3-5; Tiyako 1:12.) Mwawiihiiha, ewehereryo ahu ennakhala yoolipaxa opwaha nirikimpacerya ohuserya eparipari. Satana onachuna wi makacamiho ahu eniceecheiheke, nyenya nnikhaviheryo na Yehova nnanwerya ovootha makacamiho oothene.

8. Mmukhalelo taani ewehereryo eryaaya ntoko kapaseti? (1 Tesalónika 5:8)

⁸ Piipiliya tho onnalikanyiha ewehereryo ahu ni kapaseti. (Mwaalakhanye 1 Tesalónika 5:8.) Kapaseti onnakhapelela muru wa nakhoco wi ohiphoreihiwe ni amwiicani. Mmukhalelo woomunepani, nnaphwanela okhapelela muupuwelo ahu ntakhara ohiphela wa Satana. Owo onnapharihela ichu soohiyanahiyana wi aneehe ni onanariha mukhalelo ahu wa wuupuwela. Hiihaa ntoko kapaseti onakhapeleleiye muru wa nakhoco, ewehereryo ahu  ennakhapelela mukhalelo ahu wa wuupuwela wi niwerye otitelela okhala oororomeleya wa Yehova.

9. Tiheeni eneereya wakhala wi achu haanono ewehereryo?

⁹ Ewehereryo ahu ya okumi woohimala ennanikhaviherya opaka soothanla mwa miruku. Mmukhalelo mukina, wakhala wi noohiya wi ewehereryo ahu eceecheye nave nivoloweliwa ni muupuwelo wa elapo, nnahaala woonaka okumi woohimala okhala ocai. Moone yeeyo yeere’ye ni Akristu akina yaakhala mu epooma yakhalai yo Korinto. Awo yaayeleela nroromelo mu yoororomeliha yoochuneyaxa ya Muluku—ewehereryo ya ovinya mookhwani. (1 Kor. 15:12) Murummwa Paulo aarepa wi yaale ahineemererya ewehereryo ya ovinya mookhwani anakhala pahiru yaakhwaniheryaka soochuna saya. (1 Kor. 15:32) Olelo, ancipale yaawo ahinaroromela soororomeliha sa Muluku annapaka soothene anaweryaaya wi ekhale oohakalala vaavaa aryaaya akumi. Nyenya hiyaano naachu oohiyana. Ninnaroromela yeeyo Muluku ororomelinheiye ntakhara omwaahiyu. Ewehereryo ahu eri ntoko kapaseti nave ennakhapelela mukhalelo ahu wa wuupuwela ni onikhaviherya ohuupuwela pahiru sa hiyo mukhatiihu, yeeyo yaahaala onanariha onthamwene ahu ni Yehova.—1 Kor. 15:33, 34.

10. Ti mwawiihai ewehereryo enanikhapelelaaya ntakhara muupuwelo woowoka?

¹⁰ Ewehereryo ahu enanwerya tho onikhapelela wa muupuwelo wawi hinrwaru nimuhakalaliha Yehova. Ntoko yootakiherya, akina ananwerya wuupuwela: ‘Miyaano nkeechweenevo. Nkirwa kikhala ni yaale anahaala opuha okumi okhala wookhala. Miyaano nkirwa kiwerya opaka ichu seiho Yehova onachuneiye wi kipake.’ Apwanne munnamuupuwela taani aapharihenle muupuwelo si yoowo wa Yupu? Aari nthamwene oowoka, Elifase. Owo aaloca: “Muchu tisheeni, wi aniiseera aphaama?” Voocharela owo aahiloca vooloca sa Muluku: “Nari anamuteko awe aweela, Muluku hanaaroromela; yaale tho awirimu haari aphaama vamiithoni vawe.” (Yobi 15:14, 15) Ela yawootha etokweene! Muupuwelo ntoko yoola onarweela wa Satana. Owo oosuwela wi wakhala wi nyuwaano munnuupuwela mmukhalelo yoola, ewehereryo anyu onahaala oceecheya. Mwawiihiiha, mukhooce sawootha seiha nave mutikitheryeye mu soororomeliha sa Yehova. Muhirwe mukhwe minikwa wi owo onachuna wi nyuwo mpuhe okumi okhala wookhala nave wi onahaala wookhaviheryaani wi nwerye yeeyo.—1 Tim. 2:3, 4.

11. Ntakhara heeni nnaphwanelaahu okhala oopixa murima vaavaa nnawehereryaahu elukuluku yeeyo Muluku onahaaleiye waakhwaniherya soororomeliha sawe?

¹¹ Ilukuluku soothene tahi wookhweya okhalano ewehereryo yoolipa. Eyo enneereya nthowa nawi nnanwerya okoma onwehererya Muluku wi aakhwaniherye soororomeliha sawe. Nyenya nnaphwanela wuupuwela wi Yehova tookhala wookhala, nave ovira wa elukuluku wa yene ti woohiyana ni wawihu. (2 Ped. 3:8, 9) Owo onahaala waakhwaniherya yookhwela awe mmukhalelo waphaamaxa, nyenya akhweya onanwerya ohikhala mmukhalelo nnawehereryaahu. Tiheeni enahaala onikhaviherya otitelela okhalano ewehereryo yoolipa vaavaa nnawehereryaahu moopixa murima elukuluku Muluku onahaaleiye waakhwaniherya soororomeliha sawe?—Tiy. 5:7, 8.

12. Mwawiiwanana ni Ahebri 11:1, 6, ti mwawiihai ewehereryo eniiwananaaya ni nroromelo?

¹² Piipiliya onniiwananiha ewehereryo ni okhalano nroromelo nawi Yehova ookhala ni wi owo “onnaachuwela yaawo anamwaavya.” (Mwaalakhanye Ahebri 11:1, 6.) Vaavaa nnaroromelaahu wi Yehova teeparipari, nroromelo nahu nawi owo onahaala waakhwaniherya soothene ororomelinheiye ninnalipa. Mwawiihiiha,  nnahaala okhalano ewehereryo yoolipa wakhala wi nootitelela omwaacamela Yehova yoowo ororomelinhe waakhwaniherya yeeyo nnawehereryaahu. Vano hankooni noone mikhalelo mikina soophara muteko sa olipiha onthamwene ahu ni Yehova wi ntitelele okhalano ewehereryo yoolipa.

13. Nni niwerye hai omwaacamela Muluku?

¹³ Mvekeleke wa Yehova nave mmwaalakhanyeke Piipiliya. Eparipari wi hannawerya omoona Yehova, nyenya nnanwerya omwaacamela yoowo. Nnanwerya oloca ni yoowo mu nivekelo nroromelaka wi owo onnaniwiriyana. (Yer. 29:11, 12) Nave nnanwerya onwiriyana Muluku moorweela wa omwaalakhanya Piipiliya ni wuupuwelela yeeyo nnaalakhanyaahu. Vaavaa nnaalakhanyaahu vooloca sa mukhalelo Yehova aakhapelenleiye alapeli awe oororomeleya khalai, ewehereryo ahu ennalipa. Soothene iri Mpiipiliyani saarempwe “wi inihusiheke, wi niwehereryeke saphaama, nivahiwe ovilela, nlipihiwe ni soorempwa seiho.”—Aro. 15:4.

14. Ntakhara heeni ti yaphaama wuupuwelela soororomeliha seiho Yehova aakhwanihenryeiye?

¹⁴ Muupuweleleke mukhalelo Yehova aakhwanihenryeiye soororomeliha sawe. Muupuwele yeeyo Muluku eenreiye wa Aparahamu ni Sara. Awo yaahuuluvala nave hiwaahaala oweryeya okhalano anamwane. Naamwi hiihaa, Muluku aahaaroromeliha wi yaahaala okhalano mwaana. (Map. 18:10) Aparahamu aakhulenle hai? Piipiliya oni: ‘Aaparahamu aaroromela, aweheryaka okhala tiithi a maloko mancipale.’ (Aro. 4:18) Naamwi mmoonelo wa achu yaakhala ntoko wi eyo hiyaahaala oweryeya, Aparahamu aanaroromela wi Yehova aahaala waakhwaniherya yoororomeliha Awe. Nroromelo na mulopwana yoole oororomeleya hiwaari wasiiyo. (Aro. 4:19-21) Saweereya ntoko seiha sinnanihusiha wi Yehova ilukuluku soothene onnaakhwaniherya soororomeliha sawe, naamwi ekhalaka ntoko wi tahi wooweryeya mmiyoonelo sahu.

15. Ntakhara heeni nnaphwanelaahu wuupuwela yeeyo Yehova opankeiye wa hiyo?

 ¹⁵ Muupuwelele ichu seiho Yehova eenreiye wa nyuwaano. Ntoko yootakiherya, Yesu oororomeliha wi Atiithi awe yaahaala woovahaani yeeyo enoothowaani mookumini. (Mat. 6:32, 33) Yesu tho oororomeliha wi Yehova onahaala woovahaani munepa waweela vaavaa munamvekaanyu. (Luka 11:13) Nave Yehova onnaakhwaniherya soororomeliha seiha. Mwawooneya, nyuwaano munnawerya wuupuwela soororomeliha ikina seiho Yehova onaakhwaniheryeiye wa nyuwo. Ntoko yootakiherya, owo onnaroromeliha wookhurumuwelaani, woohakararyaani ni woolyihaani mmukhalelo woomunepani. (Mat. 6:14; 24:45; 2 Kor. 1:3) Wuupuwelela soothene Muluku opankeiye wa nyuwo onahaala olipiha ewehereryo anyu mwa yeeyo owo onahaaleiye opaka wa nyuwo omwaahiyu.

16. Ntakhara heeni ewehereryo ahu yamahala yoochuneyaxa?

¹⁶ Ewehereryo ahu ya okumi woohimala yamahala yoochuneyaxa enarweela wa Muluku. Ninnawehererya ni murima woothene wi omwaahiyu wootikhiniha yoowo nnaroromelaahu onahaala ophiya. Ewehereryo ahu eri ntoko ankora nave ennanikhaviherya okhala oolipa wi niwerye ohoolela makacamiho, ovilela wiikariwa naari tho ophiyerya okhwa. Eyo tho eri ntoko kapaseti nave ennakhapelela muupuwelo ahu wi niwerye okhooca yeeyo eri yoonanara ni otitelela opaka yeeyo eri yaphaama. Ewehereryo ahu enathipeleya Mpiipiliyani, ennanaacameliha wa Muluku nave ennooniherya mukhalelo osivela wawe ntakhara hiyo oryaaya otokweene. Nnahaala okhalano mareeliho mancipale mookumi ahu wakhala wi ewehereryo ahu ti yoolipa.

17. Ntakhara heeni nnanwerya ohakalala mu ewehereryo ahu?

¹⁷ Mu ekaarata awe wa Aroma murummwa Paulo ooloca ariki: ‘Hakalalani moowehererya.’ (Aro. 12:12) Paulo aanwerya okhala oohakalala nthowa nawi aanaroromela wi wakhala wi ootitelela okhala oororomeleya, aahaala okhalano okumi woohimala wirimu. Hiyaano tho nnanwerya okhala oohakalala mu ewehereryo nryaahuno nthowa nawi hinnakhwa minikwa wi Yehova onahaala waakhwaniherya soororomeliha sawe. Ntoko mulipa masalmo orempeiye, “ooreeriwa [oohakalala, TMN] muchu . . . yoowo onaawehererya Apwiya Muluku awe, . . . yaawo ari oororomeleya okhala wookhala.”—Sal. 146:5, 6.