1. Teevi eri “yoothowa ahu yoomunepani,” nave ti mwawiihai eyo eniiwananaaya ni ohakalala?

 OHAKALALA weeparipari tahi pahiru moonelo woohakalaliha yoowo onarwa nave ocakanela. Ohakalala onanwerya wiikhalelaru mookumini wa muchu. Mwawiihai? Yesu aathariha va Mwaha awe wa Vamwaakoni ariki: “Oohakalala taale anasuwela soothowa saya soomunepani.” (Mat. 5:3, TNM) Yesu aanasuwela wi achu epakiwe ni nchuno na omusuwela ni omulapela Mpatuxa aya, Yehova Muluku. Ela ‘yoothowa ahu yoomunepani.’ Nave woona wi Yehova “Muluku oohakalala,” yaale anamulapela yoowo ananwerya tho okhala oohakalala.—1 Tim. 1:11, TNM.

2-3. (1) Mwawiiwanana ni masu a Yesu, taani tho oni awerye okhala oohakalala? (2) Tiheeni nnahaalaahu othokororya mmwaha yoola nave ntakhara heeni eyo ti yoochuneya?

² Apwanne nnaphwanela okhala oohakalala pahiru wakhala wi hinaanono makacamiho? Hooye. Mmwaha awe, Yesu aaloca echu yootikhiniha. Owo aaloca wi naamwi ‘yaale anathanana,’ akhweya nthowa na wiiphwanyerya mathowa wa soocheka saya naari okhalano makacamiho matokweene, ananwerya okhala oohakalala. Yesu tho aaloca emohamoha wa ‘yaale anahooxiwa nthowa na wookololowa’ ni yaale ‘anaruwaniwa’ nthowa na okhala oomuchara a Kristu. (Mat. 5:4, 10, 11, TNM) Nyenya onaweryeya hai okhalano ohakalala weeparipari mmikhalelo ntoko seiha?

³ Yesu aanihusiha wi ohakalala honarweela wa ohikhalano makacamiho mookumini, nyenya moorweela wa waakhwaniherya soothowa sahu soomunepani ni omwaacamela Muluku. (Tiy. 4:8) Nni neereno hai yeela? Mmwaha yoola, nnahaala  othokororya ichu raru seiho inahaala onikhaviherya wi nikhaleno ohakalala weeparipari.

4. Echu taani yoopacerya nnaphwanelaahu opaka wi nikhaleno ohakalala weeparipari? (Salumu 1:1-3)

⁴ ECHU 1: Wi nikhale oohakalala chiryene, nnaphwanela wiilyihaka mmakupa oomunepani. Achu vamoha ni axinama annaphwanela olya wi ekhale. Nyenya pahiru achu tanawerya wiilyiha omunepani. Nave hiyaano ninnachuna yoolya yoomunepani. Ti nthowa nene Yesu aalonceiye: “Tahi yoolyaru enamvaha muchu okumi, nto masu oothene anakhuma mwaano wa Muluku.” (Mat. 4:4) Mwawiihiiha, hannaphwanela omaliha nihiku naari mano nimoha nihilyile yoolya yoomunepani yoorweela Mmasu oochuneyaxa a Muluku, Piipiliya. Mulipa oomurepa salmu ooloca: ‘Ooreeriwa muchu yoowo onahakalala mmalamulo a Apwiya, onnuupuwelela othana ni ohiyu.’—Mwaalakhanye Salumu 1:1-3.

5-6. (1) Tiheeni nnahuseryaahu orweela Mpiipiliyani? (2) Mmikhalelo taani omwaalakhanya Piipiliya oneeraaya onikhaviherye?

⁵ Moosivela, Yehova oonivaha sooleeliherya Mpiipiliyani vooloca sa mukhalelo wa okhalano okumi woohakalala. Noohuserya ntakhara heeni owo onipatunxeiye, mukhalelo wa omwaacamela yoowo ni mukhalelo wa okhurumuweliwa soocheka sahu. Noohuserya tho vooloca sa ewehereryo yootikhiniha yeeyo owo oniroromelinheiye ntakhara omwaahiyu. (Yer. 29:11) Iparipari seiha nnahuseryaahu orweela Mpiipiliyani, sinnanihakalaliha vancipale!

⁶ Noosuwela tho wi Mpiipiliyani sookhalamo ikano sincipale soophara muteko ntakhara okumi wa nihiku ti nihiku. Wakhala wi ninnachariha ikano seiha, nnanwerya okhala  oohakalala. Ilukuluku soothene munakhalaanyu awuukhuwa nthowa na makacamiho, mmalihe elukuluku mwaalakhanyaka Masu a Yehova ni wuupuwelela yaawo. Yesu ooloca: “Ooreeriwasha [oohakalala, TNM] ti yaawo aniiwa masu a Muluku, enachariha.”—Luka 11:28.

7. Muni nwerye hai ophura elukuluku munamalihaanyu mmwaalakhanyaka Piipiliya?

⁷ Vaava munaalakhanyaanyu Masu a Muluku, mwaavye elukuluku wi mpuhe yeeyo mwaalakhannyaanyu. Muupuwele niphwanaphwaniho nna: Mwaanyiherye wi muchu oorehererya yoolya yeeyo enoosivelaani. Nyenya nthowa na waakuveya naari wuukhuwa, nyuwaano munamoona omirya muhipunhe mwawiichaalela yoolya eyo. Mmanle olya, munnoona wi mulyile mwawaakuveya nave munnakhalano ekeerelani nthowa na ohilya moomaaleleya ni ohipuha phaama elukuluku yeele. Apwanne mohintoko omwaalakhanya Piipiliya mwawaakuveya nave muhiwerya opuha yoolya yoomunepani ya Yehova? Mmalihe elukuluku wi mwaalakhanye Masu a Muluku, waanyiherya saweereya vamoha ni masu nave muupuwelele yeeyo munaalakhanyaanyu. Weerano yeeyo onahaala waaceererya ohakalala wanyu.

8. Ti mwawiihai “namuteko oororomeleya ni a miruku” onaakhwaniheryeiye murici awe? (Moone tho enoota.)

⁸ Yesu oomuthanla “namuteko oororomeleya ni a miruku” wi avahereryeke yoolya mu elukuluku yoophwanelela, nave hiyaano ninnalyihiwa phaama mmakupa oomunepani. b (Mat. 24:45) Piipiliya echu yoochuneyaxa wa ichu soothene seiho namuteko oororomeleya onarehereryeiye. (1 Tes. 2:13) Mwawiihiiha, yoolya yeela yoomunepani ennanikhaviherya osuwela muupuwelo wa Yehova yoowo uupulunleiye Mpiipiliyani. Ti nthowa nene ninnaalakhanya irevista sa Mulipeleli ni Vinyani! vamoha ni miyaha sa mu jw.org. Hiyaano ninnarehererya mithukumano sa muloko sa veeri va esumana ni omakuchuwelo wa esumana. Nave ninnamoona JW Broadcasting^® mweeri ti mweeri. Vaavaa nniilyihaahu phaama mmakupa oomunepani, eyo ennanikhaviherya weera echu ekina yeeyo enaneeriha okhalano ohakalala weeparipari.

9. Echu taani yanaawiili enahaala oneeriha okhalano ohakalala weeparipari?

⁹ ECHU 2: Wi nikhale oohakalala chiryene, nnaphwanela okhala mwawiiwanana ni malakiheryo a Yehova. Mulipa a masalmo oorepa: “Óréla [oohakalala TNM] mutchu yowo anamova Yehova, Awecha mwiphiro sawe.” (Sal. 128:1, NN) Omoova Yehova onataphulela wi nnaphwanela omucicimiha vancipale ni osepa weera echu yeeyo yaahaala omuhiciha yoowo. (Masi. 16:6) Mwawiihiiha, ilukuluku soothene ninniilipixerya wi niiwelele malakiheryo a Yehova vooloca sa yeeyo eri yaphaama ni yoonanara, yeeyo owo olonceiye Mpiipiliyani. (2 Kor. 7:1) Nnamukhala oohakalala wakhala wi ninnapaka ichu seiho Yehova onasiveliweiyeno ni okhooca ichu seiho owo oniiceiye.—Sal. 37:27; 97:10; Aro. 12:9.

10. Mwawiiwanana ni Aroma 12:2, murici taani nryaahuno?

¹⁰ Mwaalakhanye Aroma 12:2. Muchu onanwerya osuwela wi Yehova ookhalano ophwanelela wa olakelela yeeyo eri yaphaama ni yoonanara, nyenya owo tho onaphwanela okhala ooreheryeya wiiwelela malakiheryo a Muluku. Ntoko yootakiherya, muchu onanwerya osuwela wi alamuleli aakhalano ophwanelela wa oloca mukhalelo muchu onaphwaneleiye  weeca muramphani. Nyenya akhweya owo onamulakelela ohiwiiwelela yaawo. Ntoko yookhumela, owo onanwerya ovavihaka opwaha vaavaa aaphwaneleiye. Moorweela wa meecelo ahu ninnooniherya wi ninnaroromela chiryene wi wiiwelela malakiheryo a Yehova mukhalelo waphaamaxa wa okhala. (Masi. 12:28) Tavite tho oona hiihaa. Owo aaloca sa Yehova ariki: “Munarwa mukithoonyerya ephiro yookumi, mukivonihe ni ohakalala vamiithoni vanyu, nave murecele woohimala ontatani wanyu.”—Sal. 16:11.

11-12. (1) Vaavaa nnakhalaahuno makacamiho naari okhala awuukhuwa, echu taani nnaphwanelaahu okhalano ekaasoope? (2) Ti mwawiihai Filipi 4:8 oneereiye anikhaviherye othanla mathatelo?

¹¹ Oothene ahu ninnakhalano makacamiho naari okhala awuukhuwa ilukuluku ikina. Vaavaa ela eneereyaaya, akhweya nnamuchuna weera echu yeeyo yaahaala weeriha wi ncuwale. Eyo enniiwexexeya, nyenya nnaphwanela okhalano ephoole wi niheere echu yeeyo Yehova oniiceiye.—Éfe. 5:10-12, 15-17.

¹² Mu ekaarata awe wa Afilipi, murummwa Paulo aahaaceenyerya Akristu wi etitelele wuupuwela ichu seiho siri ‘sawookololowa, . . . sooreera, . . . sookhweleya ni sivunwe mooreera.’ (Mwaalakahanye Filipi 4:8.) Eparipari wi Paulo haarempe xaxaxa vooloca sa mathatelo, nyenya yeeyo owo orempeiye enaphwanela ovolowela mathatelo yaawo nnathanlaahu. Mweererye weera ela: Muhaakumve othanla ncipo, efilime, liivuru naari axooku a mukhankoonya, moone waakhanle wi iho sinniiwanana ni ‘ichu’ seiho sinalociwa mu Filipi 4:8. Weerano yeela onahaala wookhaviheryaani osuwela waakhanle wi mathatelo muthanlilaanyu annamuhakalaliha Muluku naari hooye. Nnachuna wi okumi ahu okhaleke mwawiiwanana ni malakiheryo avasulu a Yehova. (Sal. 119:1-3) Wakhala wi noheerano yeeyo, nnamukhalano yawuupuxerya-ya-murima yaphaama wi niwerye weera echu enacharela yeeyo enahaala weeriha wi nikhaleno ohakalala weeparipari.—Saw. 23:1.

13. Echu taani yaneeraru enahaala oneeriha okhalano ohakalala weeparipari? (Yohani 4:23, 24)

¹³ ECHU 3: Mwiisaalikhele wi moone waakhanle wi omulapela wanyu Yehova ori mu nipuro noopacerya mu okumi anyu. Yehova Mpatuxa ahu nave ninnaphwanela omulapela yoowo. (Wup. 4:11; 14:6, 7) Mwawiihiiha, echu yoochuneyaxa mu okumi ahu enaphwanela okhala omulapela Yehova mmukhalelo owo oneemereryeiye, “mwa Munepa ni mwa eparipari.” (Mwaalakhanye Yohani 4:23, 24.) Eyo enataphulela wi malapelo ahu aanaphwanela ohooleliwaka ni munepa waweela wa Muluku ni okhala mwawiiwanana ni iparipari inaphwanyeya Mpiipiliyani. Omulapela wahu Yehova onaphwanela okhala mu nipuro noopacerya mu okumi ahu, naamwi nikhalaka mu elapo yeeyo muteko ahu onahiihiwaaya. Hiihaano, anna ni arokora opwaha 100 ari mu kariposo pahiru nthowa na okhala Anamoona a Yehova. c Naamwi hiiha, awo annahakalala opaka owetha waya wi evekele, ohuserya ni waaleela akina vooloca sa Muluku ni Omwene awe. Vaavaa nnaruwaniwaahu naari wiikariwa, ninnahakalala osuwela wi Yehova onahaala onikhaviherya ni onichuwela.—Tiy. 1:12; 1 Ped. 4:14.

14. Tiheeni yeeren’ye ni munna mmoha ori mmiravo o Tadjiquistão, nave ntakhara heeni?

¹⁴ Saweereya sa okumi sinnooniherya wi ichu raru nihusenryaahu sinnanikhaviherya  okhalano ohakalala weeparipari, moohipwacha mukhalelo ahu. Moone yeeyo yeeren’ye ni Jovidon Bobojonov a iyaakha 19 yoowo onakhala o Tadjiquistão. Owo aahikhooca okhala mukhoco, mwa yeeyo mu 4 a Otupuru a 2019 aawaaleliwa mu miyeeri mincipale nave aanakhalihiwa ntoko mpava. Ohookololowa yoola waanalokohiwa mu ilapo sincipale. Owo aahimaniwa ni anakhoco yaawo yaamukhinyererya onwara uniforme akhoco ni olipela wi aahaala okhala mukhoco. Ohoolo waya, owo aathorihiwa nave aarumihiwa o nipuro nenlo alipa oophariwa yaalapihiwaayawo miteko soowalamela, ophiyerya vaavaa presitenti a elapo yeele aamukhurumuwenleiye nave alamulela wi ataphuliwe. Variyari va soothene seiha, Jovidon aatitelela okhala oororomeleya nave haayeleenle ohakalala wawe. Owo aawenrye hai? Owo haantonko ocuwala waakhwaniherya soothowa sawe soomunepani.

15. Ti mwawiihai Jovidon iilyiheiye omunepani vaavaa aareiye mu karipooso?

¹⁵ Vaavaa aareiye mu kariposo, Jovidon aaniilyiha mmakupa oomunepani, naamwi ahaarino Piipiliya naari soolaleeryiwa sahu. Owo aawerya hai weerano yeela? Anna ni arokora a vanipuroni yaanamukerihela yoolya nave yaanarepa yoorepa ya nihiku va murupa wa soolya. Mwawiihiiha, owo aanawerya omwaalakhanya Piipiliya ni wuupuwelela yeeyo aalakhanyeiye  nihiku nnihiku. Amanle ohuleliwa mu karipooso, owo aavaha ekano wa yaale ehintonko ohoolela saweeha itokweene sa nroromelo: “Ela elukuluku ya opharihela phaama otaphuwa wanyu wi mwaaceererye masuwelelo anyu vooloca sa Yehova, mwaalakhanyaka Masu a Muluku ni soolaleeryiwa sahu.”

16. Jovidon aalakelenle otikitheryeya mu ichu taani?

¹⁶ Munnihu aahiilipixerya wi akhaleke mwawiiwanana ni malakiheryo a Yehova. Ohiya otikitheryeya mu soochunachuna soohiphwanelela naari wiivoliiherya mmeecelo oonanara, owo aatikitheryeya mwa Yehova ni ichu seiho Owo oneemereryeiye. Jovidon aanatikhiniheya ni oreera wa soopatuxiwa sa Muluku. Wooxiixelo ori woothene avinya, aaniiwa wiipa wa ipalame. Ohiyu, owo aanatikhiniheya ni mweeri nave tho itheneeri. Owo ooloca: “Samahala seiha soorweela wa Yehova saanakeeriha okhala oohakalala ni oolipiheya.” Vaavaa nnathamalelaahu soovaha soomwiilini ni soomunepani sa Yehova, ninnahakalala, nave ohakalala yoowo onanwerya onikhaviherya ovilela.

17. Ti mwawiihai 1 Pedro 1:6, 7 oneereiye awerye omukhaviherya muchu yoowo onahoolela nikacamiho nnalikana nna Jovidon?

¹⁷ Jovidon tho aakuha malapelo a Yehova mu nipuro noopacerya. Owo aahisuwela ochuneya waya okhala oororomeleya wa Muluku eeparipari. Yesu aaloca: “Waalapeke Apwiya Muluku aa, nave yaaworu oneeraa waakokhoreleke.” (Luka 4:8) Mapilisa ni anakhoco yaachuna wi Jovidon ahiye malapelo awe. Nyenya ohiya yeeyo, owo aanavekela ni murima woothene wa Yehova othana ni ohiyu, amvekaka wi amukhaviherye ohivelavela ni ohiya nroromelo nawe. Moohipwacha ohookololowa aahoolenleiye, Jovidon aatitelela okhala oororomeleya. Eparipari wi aaphariwa, amaniwa ni owaleliwa, nyenya vano owo ookhalano echu yeeyo aahaareiyeno khalai—nroromelo neehinwe.—Mwaalakhanye 1 Pedro 1:6, 7.

18. Tiheeni nnaphwanelaahu weera wi nikhaleno ohakalala weeparipari?

¹⁸ Yehova oosuwela yeeyo nnachunaahu wi nikhaleno ohakalala weeparipari. Wakhala wi munnachariha ichu raru seiho ineeriha okhalano ohakalala weeparipari, nyuwaano tho munanwerya okhala oohakalala naamwi muhoolelaka makacamiho oovila. Mweerano hiiha, nyuwaano tho munanwerya oloca: “Wooreeriwa [woohakalala, TNM] muloko yoowo Muluku aya ori Apwiya [Yehova].”—Sal. 144:15.