1-2. Tuuvi ori mukhalelo waphaama wa omwaalakhanya ni omuhuserya Piipiliya? Mphwanaphwanihe.

 MWAANYIHERYE wi moolakelela othuma empa. Tiheeni mwaahaalaanyu osiveliwa woona muhaakumve othuma? Apwanne pahiru woona eruku ya ohoolo wa empa? Moohikhwa minikwa, nyuwaano mwaahaala osiveliwa woona akaneene anyu empa eyo wi nwerye wiirukuryeryamo, ni ovolowa wi mvarerye esaala ni ikwartu vamoha ni mannuwelo aya oothene. Ophiyerya wi munahaala osiveliwa waalikhela marehereryo ni mukhalelo wa empa wi musuwele mukhalelo eyo etekiwaaya. Mweeparipari, mwaahaala osiveliwa woona empa anyu ya omwaahiyu mmikhalelo soothene.

² Nnanwerya opaka echu yoolikana vaavaa nnamwaalakhanyaahu ni omuhuserya Piipiliya. Mulipa oorepa mmoha oolikanyiha michaka sa Mpiipiliyani ni “epereetiyu etokweene, yoorakama nave erino mathipelo awiixeela ni oolipa.” Vano tiheeni nnaphwanelaahu weera wi nimwiiwexexe phaama Piipiliya? Wakhala wi pahiru munamwaalakhanya mwawaakuveya, munahaala ohuserya pahiru mahusiheryo ari mathipelo a mu soorempwa, seiho siri “ichu soopacerya sa masu aweela a Muluku.” (Ahe. 5:12) Ohiya yeeyo, ntoko eneereyaaya ni empa, mvolowe “mpuwa” wi mwaalikhele mikhalelo soothene. Mukhalelo mmoha waphaama wa omuhuserya Piipiliya ori woona mukhalelo makupa makina a michaka sawe iniiwananaaya. Mwiilipixerye wi mwiiwexexe ohiya pahiru iparipari seiho muneemereryaanyu, nyenya tho ntakhara heeni muneemereryaanyu seiho.

3. Tiheeni murummwa Paulo olonceiye wa Akristu, nave ntakhara heeni? (Aefesu 3:14-19)

³ Wi niiwexexe moomalela Masu a Muluku mmathipelo aya oothene, nnaphwanela ohuserya iparipari sa Mpiipiliyani sawiixeela. Murummwa Paulo aahaalopola anna ni arokora awe Eekristu wi ehuserye masu a Muluku mwamvai wi ewerye “wiiwexexa  mwawaakhwanela tuuvi ori oruku, orekama, weemela ni wiixa” wa eparipari. Mwawiihiiha, awo yaatitelela okhala ‘oothipeleya ni ootikitheryeya’ munroromelo naya. (Mwaalakhanye Aefesu 3:14-19.) Nnaphwanela weerano emohamoha. Vano hankooni noone mukhalelo wa okumihavo mphurelo Masu a Muluku wi nikhaleno wiiwexexa woomalela wa yootaphulela aya.

4. Tiheeni nnaphwanelaahu weera wi nimwaacamele Yehova? Mvahe sootakiherya.

⁴ Ntoko Akristu, hiyaano hannaphwanela pahiru wiiwexexa iparipari sa vasulusulu sa Piipiliya. Nnikhaviheryo na munepa waweela wa Yehova hiyaano nri oolekecheya ohuserya “ophiyerya ichu sawiixeela sa Muluku.” (1 Ako. 2:9, 10) Munoona hai opacerya marehereryo a yoohuserya ya muchu mukhateiye wi mmwaacamele vancipale Yehova? Ntoko yootakiherya, munanwerya otholathola vancipale vooloca sa mukhalelo Yehova oonihenryeiye osivela wa alapeli awe khalai ni mukhalelo owo onooniheryeiye wi onnoosivelaani. Munanwerya tho otholathola mukhalelo malapelo a Yehova yaarehereryiwaaya mu elukuluku ya Aisarayeli ni mukhalelo Yehova onachuneiye wi nimulapele mmahiku ahu yaala. Naari munanwerya ohuserya sooleeliherya sa sooloherya sa Yesu seiyo saakhwanenle mu elukuluku yeeyo Yesu aareiye veelaponi yavathi.

5. Apwanne sookhalavo miyaha seiho mwaahaalaanyu osiveliwa ohuserya mwawiiseelaxa?

⁵ Anna akina anasiveliwa omuhuserya Piipiliya, aathariha ichu seiyo anasiveliwaaya ohuserya mwawiiseela. Munanwerya woona ichu ikina awo aloncaaya mu ekaaxa “ Sooleeliherya Ntakhara Yoohuserya Yawiiseela ya Muchu Mukhateiye.” Nyuwaano munanwerya ompharihela Índice das Publicações da Torre de Vigia naari Yoohoolela ya Otholathola ya Anamoona a Yehova mu otholathola wanyu. Munahaala woona wi opharihela ikaruma seiya sinahaala weeriha yoohuserya anyu okhala yoohakalalihaxa. Opaka yoohuserya ya Piipiliya yawiiseela enanwerya wookhaviheryaani olipiha nroromelo nanyu nave ‘munarwa mmusuwela Muluku.’ (Mas. 2:4, 5, PMM) Vano hankooni noone iparipari sawiixeela sa Mpiipiliyani seiho munahaalaanyu ophwanya.

6. (1) Ohiyana taani orivovo variyari va marehereryo ni yookhwela? (2) Ntakhara heeni nnanwerya oloca wi yookhwela ya Yehova ntakhara achu ni elapo ti “yoohimala”? (Aefesu 3:11)

⁶ Ntoko yootakiherya, moone yeeyo Piipiliya onaloceiye vooloca sa yookhwela ya Muluku. Wookhalavo ohiyana otokweene variyari va marehereryo ni yookhwela. Mwaanyiherye wi munachuna opaka mukwaha. Hiyaano nnanwerya olikanyiha marehereryo ni mphiro yoowo munahaalaanyu opharihela wi mphiye weiwo munachunaanyu ophiyawo. Nyenya marehereryo anyu ananwerya ohesa, nthowa nawi mphiro owo onanwerya ociiwa ni nthowa vyakala. Mmakupa makina, Yookhwela nnanwerya olikanyiha nnipuro nenlo munachunaanyu ophiyawo. Moosuwela phaameene mpuro munachunaanyu ophiyawo, nyenya munanwerya opharihela miphiro soohiyana wi mphiye mu nipuro nenlo. Munanwerya opaka matorokelo ntoko onachuneleyaayavo. Ninnamuthamalela vancipale Yehova onuupulela vakhaani-vakhaani “yookhwela yoohimala” Mpiipiliyani. (Aef. 3:11) Ilukuluku soothene Yehova onnawerya weera yeeyo onachuneiye, nthowa nawi ‘echu ti echu opankeiye, yookhala opakenleiye.’ (Mas. 16:4, BNM) Nave soothene Yehova onapakeiye sinnakhala okhala wookhala. Vano teevi eri yookhwela ya Yehova nave matorokelo taani opankeiye wi aakhwaniherye yookhwela awe?

7. Atamu ni Eva emanle ohiiwelela, matorokelo taani Yehova aapankeiye mu yoolakelela awe? (Mateyu 25:34)

⁷ Muluku aaloca wa mutheli oopacerya yookhwela awe ntakhara yaawo. Muluku aaloca wa yaawo: “Murelanesha, musareye elapo ya vathi nave muhooleleke . . . soopatushiwa soothene ineeca veelaponi ya vathi.” (Map. 1:28, PMM) Wanthowa na ohiiwelela wa Atamu ni Eva achu oothene aacheka, Nyenya eyo hetoronke yookhwela ya Yehova. Owo pahiru otoronke mukhalelo yoochuna awe yaahaalaaya waakhwanela. Mwawaakuveya, Yehova aahilakelela otikitherya Omwene wirimu wi aakhwaniherye yookhwela awe yoopacerya ntakhara achu ni elapo yavathi. (Mwaalakhanye Mateyu 25:34.) Wanthowa na osivela, Yehova aahimurumiha veelaponi ya vathi Mwanawe ooyariwa meekheiye mu elukuluku yeeyo owo aalakelenleiye. Mmukhalelo yoola, Yesu aanwerya waahusiha achu vooloca sa Omwene ni ovaha okumi awe wi anoopole wa yoocheka ni okhwa. Ohoolo waya, Yehova aahimviiha Yesu mookhwani wi akookele wirimu wi alamulele ntoko Mwene a Omwene wa Muluku. Nyenya sookhalavo ichu sincipale munaphwanelaanyu wuupuwelela vooloca sa yookhwela ya Muluku.

8. (1) Tuuvi ori muru wa Mpiipiliya? (2) Mwawiiwanana ni Aefesu 1:8-11, teevi eri yookhwela etokweene ya Yehova? (Moone eruku ya ekaapa.)

⁸ Mwaha ori muru wa Mpiipiliyani ti yawi nsina na Yehova nnahaala weelihiwa. Eyo enahaala weereya vaavaa owo onahaaleiye waakhwaniherya yoolakelela awe ntakhara elapo ya vathi moorweela wa Omwene awe, olamuleliwaka ni Kristu. Yookhwela ya Yehova herwa etorokiwa. Yehova oororomeliha wi ichu soothene inahaala weereya hiiheene ntoko olonceiye. (Yes. 46:10, 11, Ahe. 6:17, 18) Mu elukuluku yoophwanelela, elapo enahaala otatuxiwa okhala parataiso mummo muyareriwo woophaameya ni wawookololowa wa Atamu ni Eva onahaalaaya ‘opuha okumi okhala wookhala.’ (Sal. 22:26, TNM) Nyenya Yehova ookhalano ichu sincipale mmuupuweloni mwawe ntakhara hiyaano. Yookhwela awe etokweene ori wi alapeli awe oothene, wirimu ni veelaponi yavathi emulapeleke yoowo mwawiiwanana. Mmukhalelo yoola, oothene enahaala okhala oororomeleya ni omwiiwelela Yehova ntoko Muluku a Owerya Woothene. (Mwaalakhanye Aefesu 1:8-11.) Nyuwaano hamunatikhiniheya vaavaa munoonaanyu mukhalelo Yehova onaakhwaniheryeiye yoolakelela awe?

9. Moorweela wa omwaalakhanya Piipiliya, elukuluku taani ya omwaahiyu nnaweryaahu woona?

⁹ Moone yooloherya yeeyo Yehova aapankeiye mu emaca ya Eteni, ntoko enooniheryiwaaya mu Mapacereryo 3:15. b Eyo yaaloca sa saweereya saahaala okhwaaniherya yookhwela ya Muluku, nave wi saahaala opacerya weereya mu iyaakha macikhweene muhoolo. Ntoko yootakiherya, Yehova aahimuleela Aparahamu wi muhoolo, mmoha wa muyareriwo awe aahaala okhala Mesiya. (Map. 22:15-18) Ohoolo waya, mu 33 E.K., Yesu aahiphoreihiwa nchica hiiha ntoko yooloherya yaaloncaaya. (Saw. 3:13-15) Makupa ookuchula a yooloherya yeela, enaloca sa onyaanyiwa muru wa Satana, pahiru onahaala weereya mu okuchuwa wa iyaakha 1.000 sa Olamulelo wa Kristu. (Wup. 20:7-10) Nave Piipiliya onnaloca vancipale sa yeeyo enahaala weereya vaavaa enahaalaaya otitelela okhalavo wiicana variyari va mukhalelo wa Satana ni marehereryo a Yehova.

10. (1) Tiheeni enahaala weereya moohilekela? (2) Ti mwawiihai nneeraahu nrehererye muupuwelo ahu ni murima ahu? (Moone enoota.)

¹⁰ Muupuwele saweereya soohakalaliha seiho Piipiliya onaloceiye. Voopacerya, maloko anahaala olokoha “murecele ni okhapeleleya!” (1 Ate. 5:2, 3) ‘Mootutuxa’ yoohooxa etokotoko enahaala opacerya vaavaa maloko enahaalaaya ohiphela malapelo oothene atheru. (Wup. 17:16) Ohoolo waya, vaavaa ‘Mwaana a muchu oneereiye arwe mu ncicimiho nawe’, akhweya nnahaala woona owerya wa ikuru sa wirimu. (Mat. 24:30) Mwawiihiiha, Yesu onahaala waathoriha achu aavalaanyaka ntoko ipucepuche ni ipuri. (Mat. 25:31-33, 46) Naamwiihiiha, Satana havelavela. Ni wiica otokotoko, owo onahaala weeriha wi maloko awiiwanana, yaawo Piipiliya onaaloceiye ntoko Koki a elapo ya Makoki, aahiphele achu a Muluku. (Ese. 38:2, 10, 11) Mu elukuluku yoophwanelela, oohalela oothanliwa ari veelaponi yavathi anahaala okuxiwa wi eye wirimu. Weiwo, vamoha ni Yesu Kristu ni anakhoco awe, awo anahaala owaniha ekhoco ya Armaketo, mmakupa ookuchula a  yoohooxa etokotoko. c (Mat. 24:31; Wup. 16:14, 16) Emanle yeela, Olamulelo wa Iyaakha Ncikhwi wa Kristu onahaala opacerya olamulela elapo.—Wup. 20:6.

11. Muniisoona hai vaavaa munuupuwelaanyu wi munahaala opuha okumi okhala wookhala? (Moone tho eruku.)

¹¹ Vano, mweere cuu nave muupuwelele mukhalelo onahaalaaya okhala emanle ovira Iyaakha Ncikhwi. Piipiliya onnaloca wi Mpatuxa ahu ookuha tho ‘mmurimani mwahu elukuluku yoohimala’. (Ekl. 3:11, PMM) Apwanne mohuupuwela tiheeni ela enataphulelaaya wa nyuwo ni onthamwene anyu ni Yehova? Liivuru Achegue-se a Jeová mu epaaxina 319, onnathariha vooloca sa nchuno nahu alocaka: “Nimanle okhala mu iyaakha masana masaneene, Macikhwi macikhweene, nnahaala osuwela vancipale vooloca sa Yehova Muluku opwaha yeeyo nsuwenlaahu olelo. Nlelo sinahaala okhalawo ichu soohaalakhanyeya ni sootikhiniha wi nihuserye. . . . Ekumi yoohimala enahaala okhala yootikhiniha, yaphaamaxa ni yoohiyana, nave makupa a mareeliho aya ilukuluku soothene oni okhale omwaacamela Yehova.” Ophiyerya vaavaa eyo enahaalaaya weereya tiheeni nnahaalaahu ophwanya mu omuhuserya Piipiliya?

12. Nni niwerye hai oweha wirimu? Mvahe yootakiherya.

¹² Piipiliya onnanivahererya sooleeliherya ikina vooloca sa mukhalelo oryaaya okhala vakhiviru va Yehova naari ‘okhala wirimu.’ (Yes. 33:5, PMM) Piipiliya onnuupulula ichu sootikhiniha vooloca sa Yehova ni marehereryo awe a wirimu. (Yes. 6:1-4; Tan. 7:9, 10; Wup. 4:1-6) Ntoko yootakiherya, hiyaano nnanwerya waalakhanya vooloca sa ichu sootikhiniha seiyo mulipa a miririmu Esekiyeli oonneiye vaavaa ‘wirimu waahuleen’yaayawo nave owo apacerya woona ichu sa wa Muluku.’—Ese. 1:1.

13. Muniisoona hai orweela wa osuwela yeeyo Yesu onapakeiye orweela wirimu? (Ahepri 4:14-16)

 ¹³ Muupuwele tho vooloca sa yeeyo Yesu onapakeiye wirimu ntoko Mwene ahu ni Mulipa a Mukucho Mutokweene, owo onniiwexexa phaama mukhalelo nniisoonaahu. Orweela wa yoowo, nnanwerya waacamela “munyukhu wa mahala matokweene” a Muluku mu nivekelo ni oveka nikhurumuwelo ntakhara soocheka sahu ni ‘okhaviherya mu elukuluku yoophwanelela.’ (Mwaalakhanye Ahepri 4:14-16.) Muhihiye ovira nihiku muhuupuwelenle ichu soothene Yehova ni Yesu apankaaya ni anapakaaya ntakhara mphurelo ahu ovinyerya wirimu. Osivela waya ntakhara hiyaano onaphwanela otannya murima ahu ni oniceenyerya opaka owetha wahu mmuteko wa Yehova.—2 Ako. 5:14, 15.

14. Tuuvi ori mukhalelo waphaama wa wooniherya othamalela wahu wa Yehova vamoha ni Yesu wa soothene awo ananeerelaaya? (Moone tho eruku )

¹⁴ Mukhalelo mmoha waphaama yoowo nnahaalaahu wooniherya othamalela wahu yeeyo Yehova ni Yesu anapakaaya ntakhara hiyaano, ori opaka yeeyo nnaweryaahu wi naakhaviherye akina okhala Anamoona a Yehova ni oohuserya a Yesu. (Mat. 28:19, 20) Yaari yeeyo ene murummwa Paulo aapankeiye wi ooniherye othamalela wawe wa Yehova ni Yesu. Owo aahisuwela wi yookhwela ya Yehova ti yawi “achu a mukhalelo woothene evuluxiwe ni ophiyerya okhalano masuwelelo awaakhwanela eeparipari.” (1 Tim. 2:3, 4) Owo aahiilipixerya vancipale mmuteko woolaleerya wi aakhaviherye achu awaaca ‘wi wakhala wooweryeya mmikhalelo soothene aavuluxe akina.’—1 Ako. 9:22, 23.

15. Mwawiiwanana ni Salmu 1:2, tiheeni enahaala oneeriha okhala oohakalala?

¹⁵ Mulipa oomurepa Salmu oomuthariha phaameene muchu onahuserya masu a Muluku. Owo olonce wi owo “onahakalala mmalamulo a Apwiya” nave “onnuupuwelela othana ni ohiyu.” (Sal. 1:1-3; PMM.) Vooloca sa yoorepa yeela, mulipa oomutaphulela Piipiliya, Joseph Rotherham, aahirepa mu liivuru awe Soohuserya sa Salmu mu Enklesi wi muchu onaphwanela “osiveliwakano ni sooleeliherya soomuluku nave onaphwanela waavya, ohuserya ni omaliha elukuluku uupuwelelaka seiho.” Owo nlelo ooloca wi muchu onanwerya “oyeleela nihiku noothene ahimwaalakhannye Piipiliya nave ahiphwannye miruku sawe.” Nyuwaano munanwerya osiveliwa omuhuserya Piipiliya moorweela wa waalikhela miyaha mincipale onavahereryeiye ni woona mukhalelo iniiwananaaya. Echu enanivaha ohakalala ori okumiha mphurelo wa Masu a Muluku!

16. Tiheeni nnahaalaahu othokororya mmwaha onacharela?

¹⁶ Iparipari soochuneya seiyo Yehova onanihusiheiye Mmasu awe tahi oovila wiiwexexa. Mu yoohuserya enacharela, nnahaala ohuserya iparipari ikina sawiixeela—empa etokweene yoomunepani ya Yehova, yeeyo murummwa Paulo aathariheiye mu ekaarata awe wa Ahepri. Nyuwaano munahaala osiveliwa vancipale ohuserya mwaha yoowo.