1. Mareeliho taani makina a samahala nnaakhelaahu wa Yesu?

 HAAVO muchu ori amahalaxa ompwaha Yesu. Vaavaa aaryeiye veelaponi yavathi, owo aahipharihela mootaphuwa owerya wawe woothikiniha wi aakhaviherye akina. (Luka 9:​12-17) Owo aavaha yamahala etokweene wa soothene, avahaka okumi awe ntakhara hiyaano. (Yoh. 15:13) Amanle oviihiwa mookhwani, Yesu aahititelela okhala amahala. Ntoko ororomelinheiye, aahimveka Yehova munepa waweela wi onihusihe ni onihakararya. (Yoh. 14:​16, 17, moone enoota; 16:13) Nave moorweela wa mithukumano sahu sa muloko, Yesu onnatitelela onirehererya wi naapake oohuserya veelaponi yoothene yavathi.—Mat. 28:​18-20.

2. Taani ari variyari va “samahala sa alopwana” analociwa mu Aefesu 4:​7, 8?

² Muthokororye samahala ikina sa Yesu. Murummwa Paulo oorepa wi Yesu amanle owela wirimu, owo ‘aahaavaha alopwana ntoko samahala.’ (Mwaalakhanye Aefesu 4:​7, 8.) Paulo oothariha wi Yesu oovaha samahala seiya wi ikhaviherye muloko mmikhalelo soohiyanahiyana. (Aef. 1:​22, 23; 4:​11-13) Olelo, ‘samahala seiyo sa alopwana’ ennaphitaanyerya arummwa oorumeela, atokweene a muloko ni ooweherya a ikulucu. a Eparipari wi alopwana yaala toohiphaameya, mwa yeeyo annapaka soohesa. (Tiy. 3:2) Nyenya Apwiya ahu Yesu Kristu onnaapharihela wi enikhaviherye; awo samahala sawe ntakhara hiyaano.

3. Mphwanaphwanihe mukhalelo oothene ahu nneeraahu nikhaviherye muteko wa “samahala sa alopwana.”

³ Yesu oothanla ‘samahala seiya sa alopwana’. (Aef. 4:12) Nyenya wa hiyaano nnanwerya waakhaviherya waakhwaniherya murici yoowo woochuneya. Wi niphwanaphwanihe: Nnanwerya olikanyiha ni otekiwa wa Empa ya Omwene. Akina annakhaviherya  muteko evahereryaka soolya, oteexa ichu ni miteko mikina. Mmukhalelo mmohamoha, oothene ahu nnanwerya okhaviherya wiilipixerya wa arummwa oorumeela, atokweene a muloko ni wa ooweherya a ikulucu moorweela wa yeeyo nnalocaahu ni wa yeyo nnapakaahu. Nthokororye mukhalelo nnaphuraahu wa muteko aya wakuru ni mukhalelo nnahaalaahu wooniherya othamalela wahu wa yaawo ni wa Yesu yoowo onivanhe ‘alopwana yaawo ntoko samahala.’

ARUMMWA OORUMEELA ANNAPAKA “MITEKO SA OKHAVIHERYA”

4. Tisivi saari “miteko sa okhaviherya” seiho arummwa oorumeela yaapankaaya munsana noopacerya?

⁴ Mu nsana noopacerya, anna akina yaahithanliwa ntoko arummwa oorumeela. (1 Tim. 3:8) Enooneya ntoko wi yaari yaawo yaapanke “miteko sa okhaviherya” wa seiyo Paulo orempeiye. (1 Ako. 12:28) Arummwa oorumeela mwawooneya yaanakhapelela miteko mikina soochuneya wi atokweene eweryeke otikitheryeya mu ohusiha ni muteko wa okukhula. Ntoko yootakiherya, akhweya yaari arummwa oorumeela yaakhavihenrye opaka ikoopiya naari othuma ikaruma wi ipakiweno ikoopiya.

5. Miteko taani mikina soochuneya arummwa oorumeela anapakaaya olelo?

⁵ Muthokororye miteko mikina soochuneya arummwa oorumeela anapakaaya mmulokoni mwanyu. (1 Pet. 4:10) Awo ananwerya othanliwa wi ekhapeleleke ikhorowa sa muloko naari ikulucu, wiichaniha soolaleeryiwa ni okawela wa alaleeryi, opharihela muteko ikhankoonya ni wooniha ixilema, okhaviherya ntoko athoonyeryi, naari wi ekhaviherye weeliha Empa ya Omwene. Miteko soothene seiya ti soochuneya wi muloko otitelele oya vahoolo moophwanelela. (1 Ako. 14:40) Ohiya yeeyoru, arummwa oorumeela akina anneeciha makupa a Okumi ni Muteko Ahu Weekristu nave annaperekha miyaha sa vanlakani. Murummwa oorumeela onanwerya othanliwa wi amukhaviheryeke muhooleli a nikhuuru. Ikwaha ikina, arummwa oorumeela amavyakelo ananwerya okhala vamoha ni atokweene a muloko ntakhara okukhula.

6. Mikhalelo taani mikina inaneeriha othamalela miteko arummwa oorumeela analapaaya?

⁶ Ti mwawiihai muteko wa arummwa oorumeela onaphurihaaya muloko? Murokora mmoha onakhala o Bolivia awiichaniwa Beberly, b ooloca: “Nthowa na arummwa oorumeela, olelo kinnasiveliwa vancipale ni mithukumano. Nthowa na muteko aya, kinanwerya wiipa, ovaha maakhulo aka, owiriyana mwaha ni ohuserya ni ixilema, ni ixilema sa iruku. Awo annuukhuwa ni okhapeleleya ni wa yaale anawiriyana mithukumano orweela wa vitiyukonferensiya. Samala mithukumano, awo annahoolela muteko wa limpeesa, nave annakhaviherya ocokocela ikhorowa ni ovareryela waakhanle wi nookhalano soolaleeryiwa seiyo nnachunaahu. Kinnathamalela nthowa na yaawo!” Leslie, yoowo onakhala o Colombia, yoowo aiyawe enarumeela ntoko mutokweene ooloca: “Aiyaka ennawerya waakwaniherya mirici soohiyanahiyana nthowa na nikhaviheryo na arummwa oorumeela. Awo ehirivo, yaahaala okhalaka ooweiwaxa, mwa yeeyo kinnathamalela moorweela wa mvai aya ni nikhviheryo naya na wiiveleela.” Oothene hiyo ninnathamalela vancipale wa yeeyo arummwa oorumeela anapakaaya.—1 Tim. 3:13.

7. Nni nooniherye hai othamalela wahu wa arummwa oorumeela? (Moone tho eruku.)

⁷ Naamwi nooniheryaka othamalela wa arummwa oorumeela, Piipiliya onnaniceenyerya: “Mooniherye okhala oothamalela.” (Ako. 3:15) Krzysztof, mutokweene mmoha yoowo onakhala o Finland, onnooniherya othamalela wawe mmukhalelo ola: “Kinnarumiha ekaarata naari michaka mu telefone, mwemmo kinnahelamo yoorepa nave kinnathariha mooluluwanya mukhalelo murummwa oorumeela okilipinheiye naari ntakhara heeni kinathamalelaaka  muteko awe.” Pascal ni Jael, yaawo anakhala o Nova Caledonia, annavekela mooluluwanya ntakhara arummwa oorumeela. Pascal onnathariha: “Hiihaanoru, ninnavekela vancipale wa arummwa ahu oorumeela, nimuthamalelaka Yehova wa nthowa na yaawo nave tho ninvekaka wi owo akhale niyaawo nave wi aakhaviherye.” Yehova onniiwa mavekelo ntoko yaawo, nave muloko onnaphura.—2 Ako. 1:11.

ATOKWEENE A MULOKO “ANALAPA MOOWETHA VARIYARI VANYU”

8. Ntakhara heeni murummwa Paulo anweerya orepa wi asitokweene ammulokoni a munsana noopacerya ‘yaanalapa moowetha’? (1 Atesalonika 5:​12, 13)

⁸ Atokweene a mu nsana noopacerya yaahilapa mwakuru ntakhara muloko. (Mwaalakhanye 1 Atesalonika 5:​12, 13; 1 Tim. 5:17) Awo “yaanahoolela” muloko—weeciha mithukumano ni opaka soolakelela ntoko nikhuuru na atokweene. Awo “yaanaalopola” anna ni arokora aya—yaavahaka ikano sooluluwanya, nyenya moosivela, ni yoolakelela ya okhapelela muloko. (1 Ate. 2:​11, 12; 2 Tim. 4:2) Timwawooneya wi alopwana yaala tho yaanalapa moowetha wi evakulele imusi saya ni otitelela okhala oolipa omunepani.—1 Tim. 3:​2, 4; Titu 1:​6-9.

9. Tisivi iri mirici mikina inakhapeleliwa ni atokweene ammulokoni?

⁹ Atokweene a muloko olelo tawaaceliwa. Awo anamalaleya. (2 Tim. 4:5) Awo mwa mvai annalaleerya, annahoolela marehereryo a muteko woolaleerya mu ekulucu ya vanipuroni nave annanivyakiha wi nlaleeryeke ni ohusiha mmukhalelo woophwanelela. Awo tho annarumeela ntoko athoriha a ikharari ni oohikhalano nthalu. Vaavaa Mukristu onapakeiye yoocheka etokweene, atokweene a muloko enniilipixerya wi emukhaviherye orehererya onthamwene awe ni Yehova. Mu elukuluku emohamoha awo aakhalano murici wa okhapelela muloko otitelela okhala waweela. (1 Ako. 5:​12, 13; Aka. 6:1) Voopacerya, atokweene a muloko asuweliwe ntoko akukhula. (1 Pet. 5:​1-3) Awo annaperekha miyaha sooreheryiwa phaama inathipeleya mu soorempwa, nave anniilipixerya wi yaasuwele oothene mmulokoni ni opaka oxekurya wa okukhula. Atokweene tho akina annakhaviherya oteka ni orehererya Empa ya Omwene, orehererya muthukumano wa muceche, ni muteko wa Nikhuuru Nniiwanana ni Exipitale ni Makhuuru a Waaxekurya Areca, ni miteko mikina. Atokweene a muloko annalapa moowetha ntakhara hiyo!

10. Mikhalelo taani mikina inaneeriha othamalela miteko atokweene ammulokoni anapaaya?

¹⁰ Yehova aahiloherya wi akukhula yaahaala onikhapelelaka phaama nave wi ‘hinrwa noova naari woopopihiwa.’ (Yer. 23:4) Johanna, murokora yoowo onakhala o Finland, oheerela onamoona eparipari ya masu yaala vaavaa amamaawe yahoolenlaaya ereca etokweene. Owo ooloca: “Naamwi koonaka okhala woovila oloca miyooneelo saka ni akina, mutokweene mmoha yoowo kihimusuwenlaaka phaama aahikhala oopixa mirima ni miyaano, aavekela ni miyo nave aahikiroromeliha osivela wa Yehova. Nkinuupuwelela phaama yeeyo owo alonceeiye, nyenya kinnuupuwela wi kaahikhala ookhapeleleya. Kinnaroromela wi Yehova aahimurumiha wi akikhaviherye mu elukuluku yoophwanelela.” Ti mwawiihai atokweene a muloko anyu eneeraaya yookhaviheryeeni?

11. Ti mwawiihai nneeryaahu niwerye waakhaviherya asiitokweene ammulokoni? (Moone tho eruku.)

¹¹ Yehova onachuna wi nooniheryeke othamalela weeparipari wa atokweene “wanthowa na muteko aya.” (1 Ate. 5:​12, 13) Henrietta, yoowo tho onakhala o Finland, ooloca: “Atokweene ennaakhaviherya akina mwa wiivaha, nyenya eyo henataphulela wi awo aakhalano elukuluku yincipale ni ikuru sa vameekhaaya naari wi henakhalano makacamiho mu okumi aya. Ikwaha ikina pahiru kinaloca wa yaawo wi: ‘Moosuwela echu emoha? Nyuwaano mwa mutokweene  aphaama. Kinnaweherya wi nyuwaano moosuwela sa yeeyo.’” Murokora mmoha o Türkiye c awiichaniwa Sera oriye: “Atokweene annachuna nlipiho wi ewerye otitelela opaka muteko aya. Hiiha, nnanwerya waarepela ekarata, waawopa yaawo wi nlye vamoha ni okhuma vamoha mmuteko woolaleerya.” Apwanne ookhala mutokweene mmoha yoowo munamuthamalelaanyu nthowa na wiilipixerya wawe? Mwaavye mikhalelo sa wooniherya othamalela wanyu wa yoowo.—1 Ako. 16:18.

OOWEHERYA A IKULUCU WI ELIPIHE

12. Marehereryo taani yaapakiwe ni muloko mu nsana noopacerya? (1 Atesalonika 2:​7, 8)

¹² Yesu Kristu oovaha muloko ‘samahala sa alopwana’ yaawo anarumeela mmukhalelo mukina. Ehooleliwaka ni yoowo, atokweene o Yerusalemu yaahimurumiha Paulo, Parnape, ni akina ntoko ooweherya a ekulucu. (Saw. 11:22) Ntakhara heeni? Ni yoolakelela emohamoha yeeyo atokweene ni arummwa oorumeela yaathanleliwaaya: wi elipihe miloko. (Saw. 15:​40, 41) Atokweene yaala aapaka wiilipixerya otokweene ophiyerya wi aakuha ikumi saya va yawoopiha wi ehusihe ni waalipiha achu akina.—Mwaalakhanye 1 Atesalonika 2:​7, 8.

13. Mirici taani mikina ooweherya a ekulucu araayano?

¹³ Ooweherya a ikulucu ilukuluku sincipale enneeca. Akina ennapaka mikwaha mu ikilomertu sincipale eyaaka mmilokoni. Esumana ti esumana, ooweherya a ekulucu annaperekha miyaha soohiyanahiyana, ennapaka oxekura wa okukhula nave ennapaka muthukumano wa mapiyoneeru, wa atokweene a muloko ni muthukumano ntakhara muteko woolaleerya. Ennarehererya miyaha sa mithukumano sa ekulucu ni sa muceche. Awo annahusiha exikola ya mapiyoneeru, annarehererya muthukumano  wavamekhaaya wa mapiyoneeru muekulucu, nave annapaka ichu ikina—vakina vaya sootutuxa—miyaha sinavahereriwa wa awo orweela ofiliyale.

14. Ichu taani ikina inaneeriha waathamalela ooweherya a ekulucu yaawo analapa moowetha?

¹⁴ Ti mwawiihai miloko inaphuraaya ni yamahala ya ooweherya a ikulucu? Alocaka sa oxekurya wa ooweherya a ekulucu, munna mmoha o Türkiye oloca: “Oxekurya ori woothene, kinnaceenyereya omaliha elukuluku kaakhaviheryaka anna ni arokora. Kohaasuwela ooweherya a ikulucu ancipale; nyenya, haavo mmoha a yaawo intoko wooniherya wa miyo wi aakhala oohaacameleya naari aanatepa waaceliwa.” Johanna, yoowo oromoliwe wuupaceryani, aahikhuma vamoha ni ooweherya a ekulucu mmuteko woolaleerya, nyenya hiyampwannyevo vaate muchu. “Namwiihiiha,” owo oriye, “kinnuupuwelela nihiku nenle. Arokoraka eeli yiiha eriki muthaamaru, nave miyaano kaanatepa winkheliwa ni yaawo. Ooweherya a ekulucu aahikilipiha mwaphaama nave aahikikhaviherya woona wi omurumeela Yehova woorakamelana ti wa elukuluku vakhaani, nyenya mu elapo evyaani nnahaala okhalano ekari ya okhalaka vamoha.” Ooweherya a ekulucu annaakhoveleliha mmukhalelo woolipa yaawo anaalapa.—Saw. 20:37–21:1.

15. (1) Mwawiiwanana ni 3 Yohani 5-8, nni nooniherye hai othamalela wahu wa ooweherya a ekulucu? (Moone tho eruku.) (2) Ntakhara heeni nnaphwanelaahu wooniherya opwacha wa asaara a alopwana yaawo athanliwe nave nni neereno hai? (Moone ekaaxa “ Nwuupuweleke Asaaraya.”)

¹⁵ Murummwa Yohani aahimulipiha Gaius wooniherya owaakhela aleco wa anna ooweherya a ekulucu ni “waahoola aakhaviheryaka vamukwahani vaya mmukhalelo woocicimiheya ntoko Muluku onakhweleiye.” (Mwaalakhanye 3 Yohani 5-8.) Mukhalelo mmoha wa weerano yeeyo ori onwopa ooweherya a ekulucu wi nlye vamoha. Mukhalelo mukina ori okhaviherya marehereryo ntakhara muteko woolaleerya variyari  va oxekurya wawe. Leslie, yoowo oromoliwe wuupaceryani, onnooniherya othamalela wawe mmikhalelo tho mikina. Ooloca yoowo: “Kinnavekela wi Yehova akhapelele soothowa saya. Aiyaka ni miyaano ninnarepa ikarata ntakhara yaawo, nlocaka mukhalelo oxekurya waya onlipinhaaya.” Muupuwele wi, ooweherya a ekulucu tahi awaapwaha achu. Ikwaha ikina, ennahooxeya ni ireca, wuukhuwa nave tho ophiyerya oceecheya. Akhweya masu anyu oophara murima naari yamahala yawiiyeviha enahaala okhala naakhulo wa ooweherya anyu a ekulucu!—Mas. 12:25.

NINNACHUNA ‘SAMAHALA SA ALOPWANA’

16. Mwawiiwanana ni Masiposipo 3:​27, makoho taani anna enapwanelaaya wiipakela?

¹⁶ Orukurerya elapo yoothene, ninnaachuna anna wi erumeele ntoko ‘samahala sa alopwana.’ Waakhanle wi nyuwaano mwa munna oopatisiwa, ‘muri ooreheryeya wi mukhaviherye’? (Mwaalakhanye Masiposipo 3:27.) Nyuwaano muri oorehereya othanliwa ntoko murummwa oorumeela? Apwanne muri ooreheryeya wi mukhapelele soothowa sa anna ntoko mutokweene a mmulokoni? d Nyuwaano muri oolakelela orehererya mikhalelo sanyu wi mwiiveleele ntakhara Exikola ya Alaleeryi a Omwene? Exikola yeela enahaala wooreheryeryaani wi mphariheliwe moopwahaxa ni Yesu. Wakhala wi nyuwaano munniisoona okhala oohipwanelela, mvekele wa Yehova. Mveke nikhaviheryo na munepa awe waweela wi mvilele moomalela mu etisikinasawu vyakala yeeyo munahaalaanyu waakhela.—Luka 11:13; Saw. 20:28.

17. Tiheeni “samahala sa alopwana” sinooniheryaaya vooloca sa Mwene, Kristu Yesu?

¹⁷ Anna yaawo Yesu aathanlileeiye ntoko “samahala sa alopwana” yawooniherya wi owo onnaneeciha mmahiku yaala ookuchula. (Mat. 28:20) Nyuwaano hamuthamalela nthowa na okhalano Mwene oosivela, oovaha, oopwacha ni yoowo onaanthanla anna oopwanelela wi ekhapeleneke soothowa sanyu? Voocharela, mwaavye ikari wi mooniherye othamalela wanyu wa alopwana yaala analapa moowetha. Nave muhirwe muhiye omuthamalela Yehova, yoowo ori ehime wa “yamahala yoothene yaphaama ni yoovaha yoothene yoophaameya.”—Tiy. 1:17.