1. Ti mwawiihai Yehova onawooneiye alapeli awe?

 TIHEENI Yehova onooneiye vaavaa onaavaryeryeiye alapeli awe veelaponi yavathi? Owo onnasuwela seiyo sinanihakalaliha ni sinanuukhula. (Sal. 37:18) Vaavaa owo onooneiye wi ninnamurumeela mmukhalelo woophwanelela moohipwacha ohoolela makhwaca awiicela a mmuupuweloni, owo onnahakalala vancipale! Opwaha yeeyo, owo ori ooreheryeya onikhaviherya ni onihakararya.

2. Tiheeni Yehova oneereiye wa yaale arino murima woophweeya, nave ti mwawiihai nneeraahu niphure okhapelela wawe?

² Salmu 147:3 olonce wi Yehova ‘onnamaka makhwaca a yaale arino murima woophweeya.’ Iva, Yehova onatharihiwa okhala oopwacha mooreera murima wa yaawo aphoren’ye mmuupuweloni. Tiheeni nnaphwanelaahu weera wi niphure opwacha wa Yehova? Muthokororye niphwanaphwaniho nimoha. Meetiku yoowo ovyakihiwe phaama onanwerya omukhaviherya muchu yoowo ophoren’ye wi avole. Wi aphurevo, muchu yoowo ophoren’ye onaphwanela ochariha moopwacha sooleeliherya soothene sa meetiku. Mmwaha yoola, nnahaala othokororya yeeyo Yehova olonceiye Mmasu awe wa yaale anahooxeya mmuupuweloni nave tho nnahaala othokororya mukhalelo nnahaalaahu opharihela malakiheryo awe oosivela.

YEHOVA ONNANUUPUXERYA WI NA ACHU OOCHUNEYAXA WA YOOWO

3. Ntakhara heeni akina anniisoona ohikhala asisapo?

³ Nnakhala mu elapo yeeyo erino othowa wa osivela, nave moothananiha, achu ancipale anniisoona ohikhala asisapo. Murokora mmoha awiichaniwa Helen a ooloca: “Kinnunwe mu emusi yeeyo ehirino osivela. Apapa yaananimana mahiku oothene ntoko  achu oohichuneya.” Hiiha ntoko Helen, akhweya nyuwaano moohooxiwa, oruwaniwa mwawuuluulela naari opakeliwa echu yeeyo yaaweerin’heeni wiisoona ohikhala oochuneya. Waakhanle wi tihiihaa, nyuwaano munamoona okhala woovila weemererya wi ookhalavo muchu yoowo onoopwachaani mweeparipari.

4. Mwawiiwanana ni Salmu 34:​18, okhapelela taani Yehova onanivaheiye?

⁴ Naamwi akina yookhalihakaani moonanara, nyuwaano munanwerya ororomela wi Yehova onnoosivelaani nave wi onnoovahaani esisapo. Owo “ori vakhiviru va yaale arino murima woophweeya.” (Mwaalakhanye Salmu 34:18.) Wakhala wi munniisoona okhala a “murima woophweeya,” muupuwele wi Yehova ohoona ichu saphaama mmurimani mwanyu, nave owo mwaneene ohookerihaani wa yene. (Yoh. 6:44) Owo ori ooreheryeya wi ookhaviheryeeni nthowa nawi mwa asisapo wa yoowo.

5. Nnahuseryavo eheeni orweela wa Yesu vooloca sa mukhalelo aakhaliheiye achu yaawo yaakhalihiwa moonanara?

⁵ Nnanwerya ohuserya vooloca sa miyoonelo sa Yehova nthokororyaka yootakiherya ya Yesu. Variyari va muteko awe woolaleerya veelaponi yavathi, Yesu aanawoona achu yaawo yaakhalihiwa moonanara nave aanaamorela ikharari. (Mat. 9:​9-12) Vaavaa muthiyana aaweheryeiye openuxiwa wa ereca etokweene aahitannya yoowara ya Yesu, nave Yesu aahimuhakararya ni amuthamalela wa nthowa na nroromelo nawe. (Mar. 5:​25-34) Yesu onnooniherya phaama ene omuchu wa Atiithi awe. (Yoh. 14:9) Mwawiihiiha munanwerya ororomela wi Yehova onnoovahaani esisapo nave tho onnoona mikhalelo sanyu saphaama, ophitaanyerya nroromelo nanyu ni omusivela wanyu yoowo.

6. Ti mwawiihai muchu onahaaleiye owaniha ni miyoonelo sa wiisoona ohikhala echweenevo?

⁶ Tiheeni munaphwanelaanyu weera wakhala wi munnatitelela okhalano minikwa vooloca sa esisapo anyu? Mwaalakhanyeke soorepa sa  Mpiipiliyani seiyo sinooniherya wi mwa asisapo wa Yehova nave muupuweleleke seiyo. b (Sal. 94:19) Wakhala wi nyuwaano hanwenrye waakhwaniherya yoolakelela anyu, muhiceecheye nthowa na ohiwerya opaka sincipale hiiha ntoko akina aneeraaya, muhiithorihe moonanara. Yehova hanaweherya wi mpake yeeyo muhinaweryaanyu opaka. (Sal. 103:​13, 14) Wakhala wi nyuwaano khalai mwaahikhalihiwa moonanara, muhipwache yeeyo muchu owo oweerenleiyeeni. Nyuwaano hiimwaaphwanela okhalihiwa mmukhalelo yoowo! Muupuwele wi Yehova onahaala waathoriha yaale anaakhaliha akina moonanara, nyenya onnaakhaviherya yaale anakhalihiwa moonanara. (1 Pet. 3:12) Sandra, yoowo aakhalihiwe moonanara ari mwaana, oriye: “Kinnamveka Yehova moohihiyererya wi akikhaviherye wiisoonaka mmukhalelo woophimelela, ntoko mmukhalelo owo onakooneiye.’’

7. Nni nipharihele hai saweereya sahu sa okumi mmukhalelo wa phaama mmuteko wa Yehova?

⁷ Muhirwe mukhwe minikwa wi Yehova onanwerya woopharihelaani wi mwaakhaviherye akina. Owo ohoovahani ncicimiho na okhala nthamwene awe mmuteko woolaleerya. (1 Ako. 3:9) Wa nthowa na saweereya sanyu sa okumi soovila, munanwerya wiiwexexa mukhalelo wa yaale anahooxeya. Nyuwaano munanwerya opaka sincipale wi mwaakhaviherye. Helen, yoowo oromoliwe woopaceryani, aari ooreheryeya waakhaviherya akina. Owo ooloca: “Yehova oomweeriha muchu yoowo aahiri ‘echweenevo’ okhala echweenevo yoowo oniisoona okhala oochuneya ni oophariheleya.” Helen ari oohakalala arumeelaka ntoko piyooneera ookilaatheya.

YEHOVA ONACHUNA WI HIYAANO NEEMERERYE OKHURUMUWELA WAWE

8. Yoororomeliha taani nnaphwanyaahu mu Yesaya 1:18?

⁸ Alapeli akina a Yehova ari awuukhuwa wa nthowa na okhalano ekeerelani wa soocheka seiyo yaapankaaya khalai, naari yaapankaaya emanle opatisiwa. Nyenya ninneerano phaama wuupuwelela wi Yehova oovahererya mukucho wa hiyaano wa nthowa na osivela wawiiseela yoowo oryeiyeno wa hiyaano. Mweeparipari, owo onachuna wi hiyaano neemererye yamahala awe. Yehova onnaniroromeliha wi, nimanle ‘orehererya ichu’ c ni yoowo, owo onahaala onikhurumuwela moomalela soocheka sahu. (Mwaalakhanye Yesaya 1:18.) Ninnamuthamalela vancipale Tiithi ahu oosivela Yehova wa nthowa na ocuwala soocheka sahu! Mu elukuluku emohamoha, owo hanacuwalaru ichu soothene saphaama nnapakaahu.—Sal. 103:​9, 12; Ahe. 6:10.

9. Ntakhara heeni nnaphwanelaahu opaka owetha wahu wi ntikitheryeye wa yeeyo nnapakaahu hiihaano ni omwaahiyu ohiya sa muculi?

⁹ Waakhanle wi nyuwaano muri awuukhuwa wa nthowa na soocheka sanyu sakhalai, mpake owetha wanyu wi mutikitheryeye mu ichu sa hiihaano ni sa muhoolo, ohiya sa muculi. Muthokororye yootakiherya ya Paulo. Owo aahikhalano ekeerelani wa nthowa na owiikara moowali akristu, nyenya aanasuwela wi Yehova aahimulevelela. (1 Tim. 1:​12-15) Apwanne owo aanatitelela wuupuwelela soocheka seiho aapankeiye khalai? Moohikhwa minikwa owo aakhooca weerano yeeyo, hiiha ntoko aahimaliheiye elukuluku yincipale uupuwelelaka wa ichu seiyo aapankeiye wi akhale Mfarisi oocicimiheya. (Afi. 3:​4-8, 13-15) Ohiya yeeyoru, Paulo mwa mvai aahikhapelela muteko awe woolaleerya nave aanaweha omwaahiyu. Ntoko Paulo, nyuwaano hamuwerya otoroka wa yeeyo yeeren’ye muculi. Nyenya nyuwaano munanwerya omucicimiha Yehova mmikhalelo sanyu mivyaani ni oweha ntakhara omwaahiyu wootikhiniha yoowo Yehova oororomelinheiyeni.

10. Tiheeni nnaphwanelaahu weera wakhala wi saweera sahu sakhalai sohaahooxa akina?

 ¹⁰ Nyuwaano munanwerya okhala awuukhuwa wa nthowa na meerelo anyu akhalai yaawo yaahoonxe achu akina. Tiheeni enahaala wookhaviheryaani? Mpake yeeyo munaweryaanyu wi murehererye nikacamiho, ophitaanyerya oveka nikhurumuwelo neeparipari. (2 Ako. 7:11) Mumveke Yehova wi aakhaviherye achu yaawo nyuwaano mwaachekenlaanyu. Owo onanwerya wookhaviheryaani vamoha ni yoole mmuchekenlaanyu.

11. Tiheeni nnahuseryaahu ni yootakiherya ya mulipa a miririmu Yona? (Moone tho ekaapa.)

¹¹ Muhuseryevo echu ni soohesa sakhalai nave mukhale ooreheryeya omuhiya Yehova wi oophariheleeni mmukhalelo yoowo onahaaleiye othanla. Moone yootakiherya ya mulipa a miririmu Yona. Ohiya oya o Ninive ntoko Muluku aamulamulenleiye, owo aahicawa ayaaka makupa makina. Yehova aahimulaka Yona, nave owo aahihuseryavo echu ni yoohesa awe. (Yona 1:​1-4, 15-17; 2:​7-10) Yehova haamunyanyanle Yona. Muluku aahinvaha Yona ekari ekina ya oya o Ninive, nyeenya mu ekwaha yeela mwawaakuveya Yona aahiiwelela. Owo haaweemerenrye wi yoohesa awe yakhalai emweerihe okhooca murici wa Yehova.—Yona 3:​1-3.

YEHOVA ONNANILIPIHA MOORWEELA WA MUNEPA WAWEELA

12. Yehova onanivaha hai murecele vaavaa nnahoolelaahu saweeha soovila? (Afilipi 4:​6, 7)

¹² Moorweela wa munepa awe waweela, Yehova onnanihakararya vaavaa nnahooxeyaahu naari vaavaa nnamuyeleelaahu oosiveliwa ahu mookhwani. Muthokororye yaweereya ya Ron ni Carol. Moothananiha mwanaya aahiisiipha. Awo aaloca: “Naahihoolela saweeha sincipale khalai, nyeenya ela yaari yoovilaxa. Naanavekela mahiku mancipale ohiyu nihikonne, nave mweeparipari naahoona murecele yoowo onatharihiwa mu Afilipi 4:​6, 7.” (Mwaalakhanye.) Waakhanle wi munnahoolela saweeha soovila, nyuwaano munanwerya okhala ootaphuwa ohula murima anyu wa Yehova mu nivekelo ikwaha soothene ni elukuluku munachunaanyu. (Sal. 86:3; 88:1) Mumveke Yehova munepa awe waweela mwawuluulela. Owo harwa akhooca sooveka sanyu.—Luka 11:​9-13.

13. Timwawiihai munepa waweela onahaalaaya onikhaviherya otitelela omulapela Yehova moororomeleya? (Aefesu 3:16)

¹³ Apwanne moohoolela yaweeha yoovila nave vano munoona wi himwaano ikuru wi mpake echu vyakala? Munepa waweela onamookhaviheryaani otitelela omulapela Yehova moororomeleya. (Mwaalakhanye Aefesu 3:16.) Muthokororye yaweereya ya murokora mmoha awiichaniwa Flora. Owo ni aiyawe yaarumeela ntoko mamisiyoonaariyu vaavaa aiyawe yaaryaaya oohiroromeleya wa yoowo, awo yahimwalana. Owo ooloca: “Ohooxeya yoowo koonaka wa nthowa na ohiroromeleya waya waanakiwurya mwiili. Kaavekela wa Yehova kivekaka munepa awe waweela, wi kiwerye ovilela. Yehova aahikivaha yeeyo kaachunaaka wi kiwerye ovilela, ni echu yeeyo woopaceryani yaakhala ntoko wi tahi yooweryeya ovilela.” Flora onnoona wi Muluku oomukhaviherya winnuwa mu omuroromela ni wi owo onahaala omukhaviherya mu saaweeha sawe soothene. Owo onnaacererya: “Masu a mu Salmu 119:32 yaahiphariheleya wa miyaano: ‘Miyo kinahaala waakuvela ochariha ephiro ya malamulo anyu woona wi munnahula mpuro ntakhara yeeyo mmurimani mwaka.’”

14. Timwawiihai nneeraahu neemererye wi munepa waweela wa Muluku onivolowele?

¹⁴ Tiheeni munaphwanelaanyu weera wi mukhale mwawiiwanana ni sooveka sanyu sa munepa waweela? Mwiivoliherye mmiteko seiyo sinahaala oweemereryaani wi munepa wa Muluku woovoloweleeni nyuwo. Eyo enavolowela othukumana ni ophwanyeya mmuteko woolaleerya. Musareihe muupuwelo anyu ni miyuupuwelo sa Yehova mwaalakhanyaka Masu awe mahiku oothene. (Afi. 4:​8, 9) Vaavaa  munaalakhanyaanyu moone saweereya sa Mpiipiliyani sa achu yaawo yaahoolenle saweeha, nave muupuwelele vooloca sa mukhalelo Yehova aakhavihenryeiye ovilela. Sandra, yoowo oromoliwe woopaceryani, aahihoolela saweeha soohiyanahiyana sawoopiha. Owo ooloca: “Yaaweereya ya Yosefe, mweeparipari ennatannya murima aka. Owo haaweemerenrye wi saweeha ni ohookololowa yoowo aahoolenleiye, iceecheihe onthamwene awe ni Yehova.”—Map. 39:​21-23.

YEHOVA ONNANIHAKARARYA MOORWEELA WA ANNIHU A MUNROROMELONI

15. Nni naakhele nihakararyo wawani, nave ti mwawiihai awo eneeraaya enikhaviherye? (Moone tho eruku.)

¹⁵ Vaavaa nnahooxeyaahu, annihu a munroromeloni ananwerya okhala “ehime ya nihakararyo ntokweene.” (Ako. 4:11) Annihu ni arokora yawooniherya yeeparipari ya osivela wa Yehova ntakhara hiyo. Anna ananwerya onihakararya eniwiriyanaka mwa niphwanya, naari onikhaviherya pahiru ni ophiya waya. Awo ananwerya okawana ni hiyo yoorepa ya Mpiipiliyani yookurumuxa murima naari ovekela vamoha ni hiyo. d (Aro. 15:4) Ikwaha ikina munna naari murokora onanwerya onuupuxerya muupuwelo wa Yehova, mwa yeeyo anikhaviherye otitelela okhala oomaaleleya. Annihu yaawo tho ari Akristu ananwerya ovahererya nikhaviheryo noophara muteko, ntoko yootakiherya, evahereryaka yoolya vaavaa nnakhalaahu va yawoopiha.

16. Tiheeni nnaphwanelaahu weera wi naakhele nikhaviheryo wa akina?

 ¹⁶ Wi naakhele nikhaviheryo na achu akina, akhweya onamuchuneya waaleela. Annihu ni arokora annanisivela nave annachuna onikhaviherya. (Mas. 17:17) Nyenya awo ananwerya ohisuwela mukhalelo nniisoonaahu naari echu nnachunaahu. (Mas. 14:10) Wakhala wi munnahooxeya mmuupuweloni, mukhale ootaphuwa oloca miyoonelo sanyu wa asinthamwene anyu awiichwelavo. Mwaasuwelihe awo echu yeeyo anahaalaaya wookhaviheryaani. Munanwerya omuthanla mutokweene mmoha naari apiili yaawo munataphuwaanyuno. Arokora akina ahoona wi oloca ni murokora mmoha awunnuwa omunepani ti woolipiha.

17. Makacamiho taani makina yaawo anahaala onooceeliha waakhela nihakararyo nave nni nivoothe hai?

¹⁷ Mvoothe nchuno na wiivalaanya. Wa nthowa na makacamiho awiicela akhweya hamuchuna oloca ni akina. Ikwaha ikina anna ni arokora ananwerya owiiwexexaani mooheseya naari ohiwerya othanla masu aphaama. (Tiy. 3:2) Muheemererye wi ichu ntoko seiho iweeriheeni okhooca nikhaviheryo nenlo munachunaanyu. Mutokweene mmoha a muloko awiichaniwa Gavin yoowo onahooxeya ni ereca ya mmuupuweloni ooloca: “Olocihana ni asinthamwene ilukuluku sincipale echu emoha enakisivela weera.” Mwawiihiiha, Gavin hanaceecheya ni muupuwelo awe, nave onnaphura waataana wawe ni akina. Murokora mukina awiichaniwa Amy ooloca: “Wa nthowa na saweereya saka sakhalai, kookhalano nikacamiho na waaroromela achu. Nyenya kinnahuserya waasivela ni waaroromela annaka ni arokora hiiha ntoko Yehova oneereiye. Koosuwela wi eyo ennamuhakalaliha Yehova, nave ennakihakalaliha tho.”

MUHAKARARYEYE NI SOOROROMELIHA SA OPENUXA WA YEHOVA

18. Tiheeni nnaweheryaahu omwaahiyu, nave tiheeni nnaphwanelaahu opaka hiihaano?

¹⁸ Nnanwerya oweherya ni ororomela ntakhara omwaahiyu, nsuwelaka wi moohilekela Yehova onahaala onipenuxa moomalela wa sawiicela soothene sa mmwiilini ni sa mmuupuweloni. (Wup. 21:​3, 4) Mu elukuluku yeeyo, sawiicela soothene seiyo nihoolenlaahu “hisuupuweleliwa tho.” (Yes. 65:​17, PMM) Ntoko nihusenryaahu, Yehova ‘onnamaka makhwaca ahu.’ Mphurevo vancipale ni soovaha soosivela sa Yehova wi soovaheeni nihakararyo ni otaphuwa. Muhirweru mukhwe minikwa wi owo “onnookhapelelaani.”—1 Pet. 5:7.