Apwanne ikwaha ikina onnakhala woovila wa nyuwaano wuupuwelela yeeyo muhusenryaanyu? Eyo enneereya wa oothene ahu elukuluku ti elukuluku. Tiheeni enahaala onikhaviherya? Wuupuwelela ipontu soochuneya.

Vaavaa munahuseryaanyu mmaaleke vakhaani vakhaani wi muupuwelele yeeyo mmanlaanyu ohuserya. Moone mukhalelo murummwa Paulo aakhavihenryeiye yaale yaathokororya sa ekaarata awe yeerakano yeeyo vaavaa owo aarempeiye wi: ‘Ola mwaha woochuneyaxa.’ (Ahe. 8:1) Mmukhalelo yoola, owo aahaakhaviherya wiiwexexa yeeyo owo aachuneiye oloca ni mukhalelo soothene owo aaloceiye saaryaaya sawiiwanana.

Nyuwaano munanwerya okhapelela elukuluku, akhweya aminutu khumi wookuchulani wa yoohuserya anyu wi muupuwelele vooloca sa ipontu soochuneya seiho muhusenryaanyu. Wakhala wi hanwenrye wuupuwelela phaama ipontu sene, mvarerye phaama wanaawiili miru mikhaani naari mwaalakhanye masu oopacerya a eparakrafu ti eparakrafu wi yookhaviheryeeni wuupuwelela. Wakhala wi moohuseryavo echu evyaani mweererye othariha ni masu anyu. Vaavaa munuupuwelelaanyu ipontu soochuneya, ohiya pahiru okhaviherya muupuwelo anyu, nyenya tho munahaala woona mookwakwaleya mukhalelo mwaha owo onavolowelaaya okumi anyu.