Nipithela naakhaviherya ntoko mukhora waavolowa mu ekwaartu ya Empa ya Muluku yaweela. Mwawiiwanana ni Tradução do Novo Mundo da Bíblia Sagrada yoowo ovonyiwe ehaakumve eyaakha ya 2023, “nipithela na ohoolo wa empa okhuveya waya naarino ikoovatu 20, nave orakama waya naarino ikoovatu 120.” (2 Math. 3:4) Otaphuleliwa okina onaloca tho wi nipithela naarino “ikoovatu 120” sa orakama, naari ameetru 53!

Mwawiihiiha yoolaleeryiwa Tradução do Novo Mundo a 2023, yooloca vooloca sa nipithela na Empa ya Muluku ya Solomoni wi: “Orakama waya waari ikoovatu 20,” a waacamela ameetru 9 a orakama. Moone mathowa makina ntakhara opakiwa wa matorokelo yaala.

Orakama wa nipithela hannatharihiwa mu 1 Mamwene 6:3. Mu Eversikulu yeela, Yeremiya onathariha okhuveya ni orakama wa nipithela, nyenya ohiya orakama waya wa oya osulu. Nave, mu ekapitulu yoocharela onnaloca sincipale vooloca sa makupa makina a Empa ya Muluku, ophitaanyeryaavo nchela na maahi niichaniwa ephareya, maseko khumi ni apoco eeli a enyacu yaawo yaavathaanyiwe yaakhala makupa a vaate a nipithela. (1 Mam. 7:​15-37) Waakhanle wi nipithela chiryene naarino ameetru opwaha 50 nave naari nawunnuwaxa opwaha makupa makina a Empa ya Muluku, vano ntakhara heeni Yeremiya haalonce orakama waya oya osulu wa nipithela? Mu iyaakha masaneene, anamarepa a miyaha a Ayuta yaahithariha wi nipithela hinaari noorakamaxa oya osulu opwaha makupa makina a Empa ya Muluku.

Alipa ootholathola annakhwa minikwa waakhanle wi ixiri sa Empa ya Muluku saanwerya okhaviherya nipithela na ikoovatu 120. Mathipelo matokweene mu ilukuluku sakhalai, yaapakiwa ni maluku vamoha ni itixolu, yaakhalano mathipelo aphaama matokweene nave yaari ookhuveya oya waya osulu. Nyenya vooloca sa Empa ya Muluku ya Solomoni yaari yoohiyana. Alipa ootholathola aaloca wi ixiri sa Empa ya Muluku hisaavirela ikoovatu 6, naari ameetru 2.7 wunnuwa waya. Mulipa oorepa miyaha Theodor Busink ookuchula ariki: “Mwawiiwanana ni wunnuwa wa exiri ya mukhora ya Empa ya Muluku, nipithela hinaahaala okhalano ikoovatu 120 sa [orakama] waya oya osulu.”

Yoorepa ya 2 Matharihelo 3:4 akhweya hiyaakopiyaariwe mmukhalelo waphaama. Naamwi iroolu ikina sakhalai saalakhanyiwa wi “120” mu eversikulu yeela, Soorepa ikina soororomeleya, ntoko Códice Alexandrino a mu iyaakha masana mathanu ni Códice Ambrosiano a mu iyaakha masana mathanu nammoha, saalakhanyiwa wi ikoovatu “20.” Ntakhara heeni namarepa aanwerya orepa mooheseya “120”? Mu Ehepri “120” onarempwa “nsana ni makhumi meeli” ni “ikoovatu 20” ntoko “ikoovatu makhumi meeli”. Nave masu awi “nsana” ni “ikoovatu” mu Ehepri toolikana. Mwawiihiiha, mulipa oorepa aanwerya orepa masu awi “nsana” ohiya “ikoovatu, ti nthowa nene iroolu ikina sakhalai saalakhanyiwaaya “nsana ni makhumi meeli” naari “120”.

Naamwi neereryaka wiiwexexa phaama sooleeliherya seiha ni owerya oloca moolekecheya vooloca sa empa ya Muluku ya Solomoni, echu nnachunaahu ori otikitheryeya wa yeeyo empa eyo eneemelelaaya—empa etokweene ya Muluku yoomunepani. Nave hiyaano ninnamuthamalela vancipale Yehova, nthowa na waawopa alapeli awe oothene omulapelaka mu Empa ene yeela!—Ahe. 9:​11-14; Wup. 3:12; 7:​9-17.