1. Yoolakelela taani yoophwanelela muchu ti muchu onaphwaneleiye opaka?

WIILIWIILI, soolakelela seiho asitiithi anapakaaya sinnaavolowela anaaya mu elukuluku yincipale. Wakhala wi asitiithi hapanke soolakelela mwa miruku, inanwerya waaruuhela makacamiho anaaya. Nyenya wakhala wi aapaka soolakelela mwamiruku, anamwaavaha anaaya ekari ya okhalano ohakalala weeparipari mweekumini. Anamwane tho, anaphwanela opaka soolakelela saphaama. Yoolakelela yoophwanelela muchu ti muchu onaphwaneleiye opaka ori omurumeela tiithi ahu oosivela a wirimu, Yehova.—Sal. 73:28.

2. Soolakelela taani saphaama seiyo Yesu ni asitiithi awe yaapankaaya?

² Asitiithi a Yesu yaari oolakelela waakhaviherya anaaya omurumeela Yehova, nave soothanla yaapankaaya saanooniherya wi omurumeela Yehova yaari echu yoochuneya muukumini mwaya. (Luka 2:40, 41, 52) Moolikana, Yesu aahipaka soolakelela saphaama seiho saamukhavihenrye opaka yeeyo Yehova aachuneiye. (Mat. 4:1-10) Vaava Yesu aannuweiye owo aari ooreera murima, oororomeleya, ni oolipa murima. Asitiithi yaawo anamusivela Yehova anamukhala awiirumiha ni oohakalala okhalano mwaana ntoko yoola.

3. Makoho taani nnahaalaahu waakhula mmwaha yoola?

³ Mmwaha yoola, nnahaala othokororya makoho ala anacharela: Soolakelela taani saphaama Yehova aapankeiye ntakhara Yesu? Asitiithi Eekristu tiheeni anaphwanelaaya ohuserya orweela wa soothanla seiyo Yosefe ni Mariya yaapankaaya? Nave amiravo ni asimwali Eekristu tiheeni anaphwanelaaya ohuserya orweela wa soothanla seiho Yesu aapankeiye?

4. Yoothanla taani yoochuneya Yehova aapankeiye ntakhara mwanawe?

⁴ Yehova aahaathanla asitiithi oophwanelela ntakhara Yesu. (Mat. 1:18-23; Luka 1:26-38) Masu ookhumela vathi va murima a Mariya yaawo anaphwanyeya Mpiipiliyani annooniherya wi aanamusivela Yehova mwawiiseela vamoha ni Masu awe. (Luka 1:46-55) Nave mukhalelo Yosefe aakhulenleiye ohoolela wa Yehova ennooniherya wi owo aanamoova Muluku nave aanachuna omuhakalaliha.—Mat. 1:24.

5-6. Tiheeni Yehova eemerenryeiye wi Yesu ahoolele?

⁵ Moone wi Yehova haathanlile asitiithi ooreela ntakhara Yesu. Mukucho yoowo Yosefe ni Mariya yaavanhaaya amanle oyariwa Yesu ennooniherya wi awo yaari oohaawa. (Luka 2:24) Akhweya Yosefe aahikhalano empaawe ekhaani waacamela vaate vawe o Nasareti weiwo aapakeiyewo muteko wa okalipinteero. Woonaru awo hiyaarino ikhorowa ni ichu sincipale xaxaxa vaava emusi yaaceereryen’yaaya ni anamwane athanu napiili ohoolo waya.—Mat. 13:55, 56.

⁶ Yehova aahimukhapelela mwanawe mu sawoopiha ikina, nyenya haamukhapelenle Mwanawe mu makacamiho oothene. (Mat. 2:13-15) Ntoko yootakiherya, Yesu aahikhalano amusi yaawo yahaamuroromela. Nkaanyiheryani mukhalelo Yesu aariye awuukhuwa vaava aareiyeno achu a veemusini yahaamuroromela owo ntoko Mesiya. (Mar. 3:21; Yoh. 7:5) Yesu aahivilela ni wiicela vaavaa aamuyelenleiye muukhwani tiithi awe omphuwa, Yosefe. Akhweya vaavaa Yosefe aakhwileiye, Yesu aanalapa muteko yoowo tiithi awe aapakeiye, wi avakulele echoko. (Mar. 6:3) Vaavaa Yesu aannuweiye, owo aahihuserya mukhalelo wa okhapelela emusi awe. Woonaru owo aanalapa mwakuru wi akhaviherye. Owo aanakhala oovelavela omakuchuwelo wa nihiku amanle olapa.

7. (1) Makoho taani anahaala waakhaviherya atheli yaawo yahaala osiveliwa okhalano anamwane? (2) Masiposipo 2:1-6 oni aakhaviherye hai asitiithi waavyakiha anaaya?

⁷ Waakhanle wi mwa mutheli nave mwaamusiveliwa okhalano anamwane, mwiikohe: ‘Apwanne na achu awiiyeviha, anamusivela Yehova yaawo aahaaleiye waathanla wi emukhapelele mwaana onahaala oyariwa?’ (Sal. 127:3, 4) Waakhanle wi mwa tiithi, naari mai mwiikohe: ‘Apwanne kinnaahusiha anaaka ovaha esisapo olapa mwakuru?’ (Ekle. 3:12, 13) ‘Apwanne kinniilipixerya waakhapelela anaaka orweela wa sawoopiha seiho anahaalaaya okumanano mu elapo ya Satana?’ (Masi. 22:3) Nyuwo hamuni  nwerye waakhapelela aniinyu orweela wa makacamiho oothene anahaalaaya okumanano. Hamuni nwerye weerano yeeyo. Nyenya munanwerya waakhaviherya okhala ooreheryeya ntakhara makacamiho anahaala okhumelela mookumini mwaya moorweela wa otitelela waahusiha moosivela omuroromela Piipiliya. (Mwaalakhanye Masiposipo 2:1-6.) Ntoko yootakiherya, wakhala wi muchu a veemusini oohiya omurumeela Yehova, mwaahusihe aniinyu orweela Mpiipiliyani ntakhara heeni oryaaya woochuneya otitelele okhala oororomeleya wa Yehova. (Sal. 31:23) Naari wakhala wi moomuyeleela oosiveliwa anyu mookhwani nwooniherye aniinyu mukhalelo wa opharihela masu a Muluku wi evilele ni othanana ni ophwanya murecele.—2 Kor. 1:3, 4; 2 Tim. 3:16.

8. Mwawiiwanana ni Malamulo 6:6, 7, tiheeni Yosefe ni Mariya yaapankaaya?

⁸ Yosefe ni Mariya yaahimukhaviherya Yesu wunnuwa mwa mahala a Muluku; nthowa nawi yaahichariha ohoolela wa Yehova yoowo aavanheiye asitiithi. (Mwaalakhanye Malamulo 6:6, 7.) Yosefe ni Mariya yaanamusivela Yehova mwawiiseela, nave yoolakelela aya yoochuneya waari waakhaviherya anaaya wunnuwiha osivela omohamoha.

9. Soothanla taani soochuneya Yosefe ni mariya yaapankaaya?

⁹ Yosefe ni Mariya yaahithanla omurumeela Yehova moohihiyererya vamoha ni anaaya. Moohikhwa minikwa, awo yaanaya omithukumano sa esumana ti esumana o sinakooka o Nasareti, ophitaanyerya Paska a eyaakha ti eyaakha o Yerusalemu. (Luka 2:41; 4:16) Akhweya asitiithi a Yesu vaavaa yeecaaya eyaaka o Yerusalemu yaanamuhusiha Yesu vamoha ni asinnawe vooloca sa yeeyo yaaweerenle achu a Muluku khalai, akhweya vaavaa yeecaaya, yaanaxekurya mapuro yaawo analociwa Mpiipiliyani. Vaavaa emusi aya yinnuwaaya hiwaari wookhweya Yosefe ni Mariya otitelela omurumeela Yehova moohihiyererya. Nyenya awo yaahirelihiwa mu weerano eyo! Nthowa nawi yaanahela mu nipuro noopacerya omulapela Yehova, awo yaari ookhapeleleya omunepani.

10. Ichu taani asitiithi anaphwanelaaya ohuserya orweela ya Yosefe ni Mariya?

¹⁰ Asitiithi yaale anamoova Muluku tiheeni anahuseryaaya orweela wa yootakiherya ya Yosefe ni Mariya? Echu eri yoochuneya, ori waahusiha aniinyu orweela mu saweera ni malocelo  wi munnamusivela Yehova moopwahasa. Musuwele wi yamahala etokweene munaphwanelaanyu waavaha anamwane anyu ori waahusiha yaawo omusivela Yehova. Nave echu yoochuneya munaphwanelaanyu waahusiha anamwane anyu ori owooniherya mukhalelo wa omwaalakhanya Piipiliya nihiku ti nihiku, ovekela, ophiya mmithukumano ni olaleerya. (1 Tim. 6:6) Mweeparipari, nyuwo asitiithi munaphwanela waakhaviherya anamwanaanyu ni ichu soomwiilini seiho inaathowa. (1 Tim. 5:8) Nyenya munaphwanela wuupuwela wi onthamwene aya ni Yehova, ohiya ichu soomwiilini, tonahaala waakhaviherya omurumeela Yehova mmahiku yaala ookuchula ni ovolowa mu elapo evyaani. *—Ezek. 7:19; 1 Tim. 4:8.

11. (1) Ekano enaphwanyeya mu 1 Timoteo 6:17-19 eni yaakhaviherye hai asitiithi vaavaa anaaphuwaaya anaaya? (2) Soolakelela taani emusi anyu enaphwanelaaya otikitherya, nave mphurelo taani munahaalaanyu okhalano? (Moone ekaaxa “ Soolakelela taani munachunaanyu waakhwaniherya?”)

¹¹ Ti yoohakalaliha vancipale owoona asitiithi Eekristu epakaka soolakelela seiho sinahaala waakhaviherya anaaya omwaacamela Yehova! Awo moohihiyererya annamulapela Yehova vamoha. Awo annaphiya mmithukumanoni sa muloko ni sa muceche. Nave tho annalaleerya michaka saphaama sa Omwene. Ophiyerya wi imusi sintoko seiho sinnalaleerya mu ikulucu oriwo othowa wa alaleeryi. Akina annaxekurya Opeteli naari okhaviherya mmuteko wa oteka. Imusi sinathanla opaka miteko ntoko seiha sinnahiya ichu ikina muculi nave sinnahoolela makacamiho makina. Nyenya Yehova onahaala waareeliha nthowa na wiilipiserya waya. (Mwaalakhanye 1 Timoteo 6:17-19.) Anamwane yaawo anaphuwiwa mu imusi ntoko seiya vaavaa aninnuwaaya annatitelela opaka ichu saphaama, seiho yaahusenryaaya nave annahakalala nthowa nawi asitiithi aya aahaaphuwa phaama! *—Masi. 10:22.

12. Tiheeni Yesu aaphwaneleiye opaka vaavaa nnuweiye?

¹² Atiithi a wirimu a Yesu, ilukuluku soothene anapaka soolakelela saphaama, nave tho asitiithi awe a veelaponi awo yaanapaka soolakelela mwa miruku. Naamwi hiiha, vaavaa Yesu innunweiye, owo aanaphwanela opaka soolakelela sawe. (Gal. 6:5) Moolikana ni oothene ahu, owo anwerya othanla echu aachuneiye opaka. Owo aanwerya waavya othanla soochuna sawe, ohiya soochuna sa Muluku. Ohiya yeeyo owo aahithanla okhapelela onthamwene awe waphaama ni Yehova. (Yoh. 8:29) Yootakiherya awe eni yaakhaviherye hai amiravo ni asimwali olelo?

13. Yoothanla taani yookhweleya Yesu aapankeiye vaavaa aareiye mmiravo?

¹³ Vaavaa Yesu aareiye mmiravo, owo  aahithanla owiiwelela asitiithi awe. Owo hatonko ohiwiiwelela asitiithi awe, uupuwelaka wi oosuwela sincipale waapwaha yaawo. Ohiya yeeyo, owo “aanawiiwelela yaawo.” (Luka 2:51) Moohikhwa minikwa Yesu aaniilipiserya waakhwaniherya murici awe, ntoko mwaana opacerya oyariwa. Aaniilipiserya wi ahuserye muteko wo kalapinteero orweela wa Yosefe, wi awerye okhaviherya emusi awe.

14. Nnasuwela hai wi Yesu aari muhuserya aphaama a masu a Muluku?

¹⁴ Woonaru asitiithi a Yesu yaahimuleela sa oyariwa waawe wootikhiniha ni yeeyo anamichaka a Muluku yaaloncaaya sa yoowo. (Luka 2:8-19, 25-38) Yesu haakhwaneliwe pahiru ni seiyo aaleeliweiye, nyenya aanahuserya soorepa. Nnasuwela hai wi Yesu aari muhuserya aphaama a Masu a Muluku? Nthowa nawi vaavaa Yesu aareiye mmiravo, ahusiha o Yerusalemu, “yaanatikhina sa osuwela wawe ni sa waakhula wawe.” (Luka 2:46, 47) Nave vaavaa Yesu aareiyeno iyaakha 12 pahiru, owo aahooniherya wi Yehova Tiithi awe.—Luka 2:42, 43, 49.

15. Yesu oonihenrye hai wi aahithanla weerano yookhwela ya Yehova?

¹⁵ Vaavaa Yesu aasuwenleiye yeeyo Yehova aaweheryeiye wi apake, owo aahithanla weerano yookhwela awe. (Yoh. 6:38) Owo aanasuwela wi aahaala wiiciwa ni achu ancipale, nave woonaru owo aanakhala a wuukhuwa vaavaa uupuweleiye sa yeela. Naamwi hiihaa, owo aahithanla omwiiwelela Yehova. Vaavaa Yesu aapatisiweiye mu 29 E.K., yoolakelela awe yoochuneya waari weerano yookhwela ya Yehova. (Ahe. 10:5-7) Nave vaava aakhweiye vamwirini, Yesu aari oolakelela weerano yookhwela ya atiithi awe.—Yoh. 19:30.

16. Echu taani anamwane anahuseryaaya orweela wa yootakiherya ya Yesu?

¹⁶ Nwiiweleleke asitiithi anyu. Hiiha ntoko Yosefe ni Mariya, asitiithi anyu toohiphaameya. Naamwi hiihaa, asithiithi anyu athanliwe ti Yehova wi yookhapeleleeni, woovyakihaani, ni woohoolelaani. Mwiiwelela ikano saya ni ocicimiha ohoolela waya, ‘munamukhala phaama.’—Éfe. 6:1-4.

17. Mwawiiwanana ni Yosuwa 24:15, yoolakelela taani amiravo ni asimwali anaphwanelaaya opaka?

¹⁷ Mmuthanle taani munayaanyu omurumeela. Nyuwo munaphwanela wooniherya wi moomusuwela Yehova, yookhwela awe, ni mukhalelo wa weerano yookhwela awe mookumini mwanyu. (Aro. 12:2) Voocharela munahaala owerya opaka yoolakelela yoochuneya mookumini mwanyu,  yoolakelela ya omurumeela Yehova. (Mwaalakhwanye Yosuwa 24:15; Ekle. 12:1) Wakhala wi mootitelela omwaalakhanya ni omuhuserya Piipiliya moohihiyererya, osivela wanyu ntakhara Yehova onahaala otitelela wunnuwa nave nroromelo nanyu mwa yoowo nnamukhala noolipa.

18. Yoothanla taani amiravo ni asimwali anaphwanelaaya opaka, nave teevi enahaala okhumelela?

¹⁸ Muthanle opaka yookhwela ya Yehova. Elapo ya Satana enavuwiha wi wakhala wi moopharihela mavyakelo anyu wi mphwanye mphurelo, munamukhala oohakalala. Mweeparipari, oothene yaale anaavya muhakhu annakwaculeya nave annakhalano “soohooxa sincipale.” (1 Tim. 6:9, 10) Mmakupa makina, wakhala wi monwiriyana Yehova ni othanla opaka yookhwela awe, munamukhumelela phaama mookumini mwanyu nave ‘munamweeraka ichu mwa miruku.’—Yos. 1:8, TNM.

19. Tiheeni asitiithi anaphwanelaaya wuupuwela?

¹⁹ Asitiithi, mwiilipiserye waakhaviherya aniinyu wi emurumeele Yehova. Mmuroromele yoowo, nave onamookhaviheryaani opaka soolakelela mwa miruku. (Masi. 3:5, 6) Muupuwele tho wi aniinyu anahaala ovoloweliwa ni seiho munapakaanyu ni munalocaanyu. Mwawiihiiha mpake soolakelela seiho sinahaala waakhaviherya aniinyu opaka soolakelela sinahaala oweeriha okhala aweemereryiwa ni Yehova.

20. Mareeliho taani amiravo ni asimwali anahaalaaya waakhela wakhala wi aathanla omurumeela Yehova?

²⁰ Nyuwo amiravo ni asimwali, asitiithi anyu anamookhaviheryaani opaka soolakelela mwamiruku mookumini mwanyu. Nyenya munaphwanela opaka soothanla saphaama sinahaala omuhakalaliha Muluku. Mwawiihiiha mmutakiherye Yesu muthanle omurumeela tiithi anyu oosivela a wirimu. Mweerano hiihaa, munamukhalano ekumi yamphurelo, ni yoohakalala hiihaano. (1 Tim. 4:16) Nave muhoolo, munahaala okhalano ekumi yoohakalalihaxa!