1. Nnasuwela hai wi waapaka oohuserya muteko onavuluxa ikumi?

WAAPAKA oohuserya muteko onavuluxa ikumi! Nnasuwela hai? Vaavaa Yesu aavanheiye nlamulo nnaphwanyeya mu Mateu 28:19, 20, owo aahi: “Haweni, . . . mwaapakeke oohuserya aka . . . , munaapatisa.” Tiheeni nnasuwelaahu vooloca sa ochuneya waya opatiso? Nnaphwanela opatisiwa wi nikhaleno ekumi yoohimala. Yaale aniiveleela mu opatiso, anaphwanela ororomela wi, ovuluxiwa waya ti wooweryeya pahiru nthowa nawi Yesu aakhwa aveleela mukucho nave aaviihiwa mookhwani. Tinthowa nene murummwa Petru aalonceiye wa Akristu akhwaawe ariki: “Opatiso, [ti] yoowo vano onoovulushaani mwa ovinya wookhwani wa Yeesu Kristu.” (1 Ped. 3:21) Vaavaa oohuserya muvyaani onapatisiweiye, owo onnakhalano ewehereryo ya okhala ni ekumi okhala wookhala.

2. Mwawiiwanana ni 2 Timóteo 4:1, 2 nnaphwanela okhala ahusiha a mukhalelo taani?

² Wi naapake oohuserya, nnaphwanela wunnuwiha mavyakelo ahu. (Mwaalakhanye 2 Timóteo 4:1, 2.) Ntakhara heeni? Nthowa nawi Yesu oonilamulela: “Haweni, . . . mwaapakeke oohuserya . . . , munaahusiha.” Murummwa Paulo aahiloca wi: “Otitelele” mmuteko yoowo, “weerano hiiha onamwiivulusha weyo vamoha ni yaawo anoowiriyana.” Ni mathowa aphaama murummwa Paulo aahiloca: “Wiikhapelela meekhaa . . . okhapelele mahusiheryo.” (1 Tim. 4:16) Woona wi waahusiha achu onniiwanana ni waapaka oohuseya, nnachuna wi ohusiha wahu okhale woophwanelela.

3. Mmwaha yoola tiheeni nnahaalaahu ohuserya vooloca sa mukhalelo wa weeciha soohuserya sa Piipiliya?

³ Ninnaahusiha amilyawu aachu iparipari sa Mpiipiliyani moohihiyererya. Nyenya ntoko noonnaahu mmwaha ovirale, nnachuna  osuwela mukhalelo nneeraahu naakhaviherye ancipale a yaawo okhala oohuserya a Yesu Kristu oopatisiwa. Mmwaha yoola, nnahaala ohuserya ichu thanu sawaaceererya, seiyo muhusiha ori oothene onaphwaneleiye opaka, wi amukhaviherye oohuserya oya vahoolo ophiyerya opatisiwa.

4. Ntakhara heeni muhusiha onaphwaneleiye okhala awiihiiha vaavaa oneeciheiye yoohuserya ya Piipiliya? (Moone masu a vathi.)

⁴ Ninnasiveliwa ni yeeyo nnahusihaahu orweela Mmasu a Muluku. Mwa yeeyo nnamuchuna oloca soothene nnasuwelaahu. Mwawiihiiha vaavaa muneecihaanyu Yoohuserya ya Mulipeleli, Yoohuserya ya Piipiliya ya Muloko, naari yoohuserya ya Piipiliya vaate va muchu, hamunaphwanela oloca ichu soothene munasuwelaanyu. Wi amuhiye Piipiliya wi ahusihe, muhusiha onaphwanela okhalano wiihiiha wi aheererye oloca echu eri yoothene osuwenleiye, vooloca sa nikupa na Piipiliya naari mwaha vyakala. * (Yoh. 16:12) Mulikanyihe masuwelelo a Piipiliya mwaaraanyuno vaavaa mwaayaanyu opatisiwa, ni yaawo muryaanyuno hiihaano. Elukuluku mwaapatisiwaanyu akhweya mwaarino masuwelelo a mahusiheryo oopacerya a Piipiliya. (Ahe. 6:1) Saahiviravo iyaakha sincipale wi muhuserye seiyo musuwenlaanyu olelo, mwawiihiiha muheererye omuleela oohuserya anyu a Piipiliya soothene musuwenlaanyu.

5. (1) Mwawiiwanana ni 1 Tesalónika 2:13, tiheeni nnachunaahu wi oohuserya yiiwexexe orweela mu yoohuserya aya? (2) Nni nimuceenyerye hai oohuserya ahu olocaka ichu seiyo onahuseryeiye?

⁵ Nnachuna wi oohuserya ahu a Piipiliya, iiwexexe wi yeeyo onahusereiye enarweela Mmasu ooveereliwa a Muluku. (Mwaalakhanye 1 Tesalónika 2:13.) Nni neereno hai eyo? Mmuceenyerye oohuserya anyu olocaka ichu seiyo ohusenryeiye. Ohiya omutharihelaka iversikulu sa Mpiipiliyani ilukuluku soothene, mumveke oohuserya anyu wi ootharihelekeeni ikina sa seiyo. Mmukhaviherye oohuserya anyu woona mukhalelo Masu a Muluku anaphariheleyaaya wa yene. Mumpakele makoho yaawo anahaala omukhaviherya oloca, yeeyo onuupuweleiye ni onooneiye vooloca sa soorepa aalakhanyeiye. (Luka 10:25-28) Ntoko yootakiherya mmukohe muriki: “Yoorepa ela enookhaviheryani hai woona mmoha wa makhalelo a Yehova?” “Ichu seiyo muhusenryaanyu Mpiipiliyani hiihaanoru sookhavihenryeni hai?” “Munoona hai vooloca sa seiho muhusenryaanyu?” (Masi. 20:5) Echu yoochuneya, tahi waaca wa ichu oohuserya osuwenleiye, nyenya ophiyerya mweeryo taani onasiveleiye ni opharihela seiyo osuwenleiye.

6. Ntakhara heeni eryaaya yaphaama okhala vamoha ni muhusiha a mavyakelo mu yoohuserya ahu ya Piipiliya?

⁶ Vaavaa muneecihaanyu yoohuserya ya Piipiliya, apwanne munnaakuxa alaleeryi yaawo arino mavyakelo a ohusiha? Wakhala wi munneerano  munanwerya waaveka awo wi eloce moonelo aya vooloca sa mukhalelo muneecihaanyu yoohuserya ya Piipiliya, navetho waakhanle wi munnampharihela phaama Piipiliya. Nyuwo munaphwanela okhala awiiyeviha wakhala wi munnaphwanela wunnuwiha mavyakelo a ohusiha. (Mulikanyihe ni Saweriwa T’arummwa 18:24-26.) Opwaha yeeyo, mmukohe mulaleeryi a mavyakelo waakhanle wi oohuserya anyu a Piipiliya onniiwexexa yeeyo onahusereiye. Mumveke mulaleeryi mmohamoha wi eeciheke yoohuserya anyu ya Piipiliya, wakhala wi munampwahavo. Eyo enahaala weeriha wi yoohuserya anyu ehimaale, nave enahaala omukhaviherya oohuserya woona ochuneya wa yoohuserya awe. Muhirwe muupuwele wi eyo “yoohuseraanyu” pahiru nave wi haavo onaphwanela weeciha. Opwaha soothene, nyu munachuna yeeyo eri yoophwanelela wa oohuserya anyu, wi awerye ohuserya sincipale vooloca sa eparipari.

7. Tiheeni enahaala omukhaviherya oohuserya a Piipiliya ohakalala ni yeeyo onahusereiye?

⁷ Oohuserya onaphwanela woona wi, munnasivela nave munneemererya yeeyo Piipiliya onahusiheiye. (1 Tes. 1:5) Voocharela owo onahaala osiveliwaka ni yeeyo onahusereiye. Wakhala wooweryeya, mmutharihele ti mwawiihai okhala mwawiiwanana ni malakiheryo a Mpiipiliyani wookhavihenryaayani. Voocharela owo onahaala osuwela wi Piipiliya ookhalano ohoolela woophara muteko yoowo onahaala omukhaviherya.

8. Echu taani munaphwanelaanyu opaka wi mmukhaviherye oohuserya anyu a Piipiliya, nave ntakhara heeni munahaalaanyu weerano hiiha?

⁸ Variyari va yoohuserya anyu ya Piipiliya, mmutharihele oohuserya anyu vooloca sa anna ni arokora, yaarino makacamiho oolikana ni awawe ni mukhalelo avonthaaya. Nyuwo munanwerya omukuxa munna naari murokora a mmulokoni yoowo orino yaweereya enahaala omukhaviherya oohuserya a Piipiliya. Naari munanwerya ophwanya yaweereya yoolipiha mu jw.org mmiyaha “A Bíblia Muda a Vida das Pessoas.” * Miyaha ni ixilema ntoko seiya inammukhaviherya oohuserya anyu a Piipiliya woona mukhalelo oneereiye apharihele malakiheryo a Mpiipiliyani mookumini mwawe.

9. Muni mmuceenyerye hai oohuserya oloca yeeyo onahusereiye ni amusi vamoha ni asinthamwene awe?

⁹ Waakhanle wi oohuserya anyu oothela naari ootheliwa, apwanne oothelanaawe onnahuserya tho? Waakhanle wi hooye, mmuwope oothelana awe akhale va yoohuserya eyo. Mmuceenyerye oohuserya anyu oloca yeeyo ohusenryeiye wa amusi ni asinthamwene. (Yoh. 1:40-45) Mwawiihai? Pahiru mmukohe: “Mwaahaala othariha hai eparipari yeela wa amusi anyu?” naari “Yoorepa  taani mwaahaalaanyu opharihela wi mooniherye yeela wa nthamwene anyu?” Mu weerano hiiha munahaala omuvyakiha oohuserya anyu wi akhale muhusiha. Voocharela owo aphwanelela, onampacerya olaleerya ntoko mulaleeryi oohipatisiwa. Nyuwo munanwerya omukoha oohuserya anyu waakhanle wi oomusuwela muchu mukina yoowo aahaala osiveliwa omuhuserya Piipiliya. Waakhanle wi oomusuwela muloceno mwawaakuveya nave mwiivahe omuhuserya Piipiliya ni yoowo. Mmoonihe exilema Tiheeni Eneereya mu Empa ya Omwene? *

10. Ntoko elociwaaya mu 1 Tesalónika 2:7, 8, muhusiha oni acharihe hai yootakiherya ya Paulo?

¹⁰ Ahusiha anaphwanela wooniherya opwacha otokotoko wa oohuserya aya. Ewooneke awo ntoko annaya naari arokora aya oomunepani amuhoolo. (Mwaalakhanye 1 Tesalónika 2:7, 8.) Tahi wookhweya wa yaawo waahiya asinthamwene aya a mweelaponi, ni opaka matorokelo anachuneya wi emurumeele Yehova. Nnaphwanela waakhaviherya yaawo wi yaaphwanye asinthamwene eeparipari a mmulokoni. Mukhale nthamwene a oohuserya anyu a Piipiliya moorweela wa omaliha elukuluku ni yoowo ohiya pahiru variyari va yoohuserya ya Piipiliya, nyenya tho mu ilukuluku ikina. Olocano mu telefoni, omurepela michaka, naari omaliha elukuluku vakhaani mmanle ohuserya, eyo enammooniherya wi munnampwacha.

11. Tiheeni nnachunaahu wi oohuserya ahu aphwanye mmulokoni, nave ntakhara heeni?

¹¹ Aakhalavo masiposipo anii: “Muchu ti muchu a vamucecheni onanwerya okhaviherya omphuwa mwaana.” Ni yeeyo mmuupuweloni, nnanwerya oloca wi: “Ninnachuneya nikhaviheryo na muloko woothene wi nimpake oohuserya.” Mwawiihiiha ahusiha a Piipiliya a mavyakelo annaakhaviherya oohuserya aya, wasuwela anna a mmulokoni yaawo anahaala waakhaviherya omwaacamela Yehova. Voocharela, oohuserya anampuha onthamwene ni achu a Muluku yaawo anahaala waakhaviherya vaavaa anahoolelaaya makacamiho. Nnachuna wi oohuserya a Piipiliya ori oothene, iisooneke wi onnapaka makupa a mmulokoni, yeeyo eri emusi ahu yoomunepani. Nnachuna wi oohuserya ahu alekecheye ni osivela wa anna ni arokora ahu. Neerano hiiha nnamukhaviherya oohuserya ahu a Piipiliya, omaala opaka onthamwene ni achu yaawo ahinahaala omukhaviherya omwaacamela Yehova. (Masi. 13:20) Wakhala wi achu yaawo yaari asinthamwene awe aamwiica, owo onahaala osuwela wi, onanwerya waaphwanya asinthamwene eeparipari mmarehereryo a Yehova.—Mar. 10:29, 30; 1 Ped. 4:4.

12. Ntakhara heeni ninnaphwanela oloca sa wiiveleela ni opatiso wa oohuserya ahu?

¹² Wiiliwiili munaphwanela olocaka ochuneya waya wiiveleela ni opatisiwa. Opwaha soothene  yoolakelelaahu vaavaa nneecihaahu yoohuserya ya Piipiliya, ori omukhaviherya muchu omurumeela Yehova ni opatisiwa. Muchu amanle omuhuserya Piipiliya moohihiyererya mu miyeeri vakhaani, xaxaxa waakhala wi oopacerya ophiya mmithukumano, owo onaphwanela wiiwexexa wi yoolakelela ya yoohuserya awe eri omukhaviherya yene, opacerya omurumeela Yehova ntoko mmoha a Anamoona Awe.

13. Tiheeni oohuserya a Piipiliya onaphwaneleiye opaka wi apatisiwe?

¹³ Sookhalavo ichu sincipale seiyo oohuserya onaphwaneleiye opaka wi apatisiwe! Yoopacerya, oohuserya a Piipiliya echu onaphwaneleiye opaka ori omusuwela Yehova, omusivela ni omuroromela Yoowo. (Yoh. 3:16; 17:3) Oohuserya a Piipiliya eerano hiiha onnalipa onthamwene awe ni Yehova, nave tho onnalipiha onthamwene awe ni anna ni arokora a mmulokoni. (Ahe. 10:24, 25; Tiy. 4:8) Voocharela oohuserya onnacharuwa soocheka seiho aapankeiye nave hanakookela. (Saw. 3:19) Owo tho, onnaaleela akina vooloca seiyo onaroromeleiye. (2 Kor. 4:13) Voocharela owo onniiveleela wa Yehova nave onnooniherya vanlakani moorweela wa opatisiwa. (1 Ped. 3:21; 4:2) Nave nihiku na opatiso ti noohakalaliha wa muchu ti muchu! Vaavaa oohuserya onapakeiye ichu seiho inahaala omukhaviherya wi apatisiwe, mmuthamaleleke nave mmuceenyeryeke wi atitelele weerano seiyo.

14. Muhusiha oni aalikhele hai oya vahoolo wa oohuserya?

¹⁴ Nnaphwanela okhala oopisa murima, vaavaa nnamukhaviheryaahu oohuserya a Piipiliya oya vahoolo wi iiveleele ni opatisiwa. Nyenya mmakupa makina, nnachuna osuwela waakhanle wi onachuna omurumeela Yehova Muluku. Apwanne mohoona waakhanle wi oohuserya onneererya ochariha malamulo a Yesu? Naari onachuna ohuserya ichu soochuneya orweela Mpiipiliyani?

15. Tiheeni enahaala omulekecha muhusiha osuwela wi oohuserya awe onnaphwanelela opatisiwa?

¹⁵ Ti woochuneya waalikhela oya vahoolo wa oohuserya moohiyererya. Ntoko yootakiherya, apwanne onnaloca moonelo awe wa Yehova? Apwanne owo onnavekela wa Yehova? (Sal. 116:1, 2) Mano onnasiveliwa omwaalakhanya Piipiliya? (Sal. 119:97) Apwanne onnaphiya mmithukumanoni moohihiyererya? (Sal. 22:22) Apwanne onnapaka matorokelo vyakala mookumini mwawe? (Sal. 119:112) Apwanne opacerya oloca yeeyo onahusereiye wa amusi ni asinthamwene? (Sal. 9:1) Echu yoochuneyaxa, mano, owo onnachuna okhala mmoha a Anamoona Yehova? (Sal. 40:8)  Wakhala wi oohuserya hanooniherya oya vahoolo mmikhalelo seiya, mwa miruku mweererye osuwela mathowa ene nave muthokororye mwaha owo ni yene mooreera murima nyenya mooluluwanya. *

16. Tiheeni enahaala wooniherya wi munnaphwanela otitelela ni yoohuserya naari hooye?

¹⁶ Moohihiyererya mwaavyaavye osuwela waakhanle wi munnaphwanela otitelela ohuserya ni muchu. Mwiikohe: ‘Apwanne oohuserya haniirehererya ntakhara yoohuserya? Mano, ophiya mmithukumano onoona okhala echu yoochuneya? Apwanne nlelo onnatitelela opaka ichu soonanara? Nlelo onnapaka makupa a malapelo atheru?’ Wakhala wi naakhulo ti nawi aa, otitelela omuhusiha muchu yoowo, ori ntoko weererya omuhusiha weekha muchu yoowo ohinachuna! Waakhanle wi oohuserya hanasiveliwa ni ichu onahusereiye nave hanapaka matorokelo mookumini mwawe, ntakhara heeni otitelela ohuserya ni yoowo?

17. Mwawiiwanana ni 1 Timóteo 4:16, ahusiha oothene a Piipiliya tiheeni anaphwanelaaya opaka?

¹⁷ Ninnoona okhala woochuneya waakhwaniherya murici ahu wa waapaka oohuserya, nave nnachuna waakhaviherya oohuserya a Piipiliya, oya vahoolo ophiyerya opatisiwa. Ti nthowa nene nnaphwanelaahu omuhiya Piipiliya wi ahusihe, nooniheryaka tho wi ninnasivela nave ninneemererya yeeyo Piipiliya onahusiheiye. Nnammuceenyerya oohuserya a Piipiliya waapaka asinthamwene mmulokoni. Nave nnahaala oceenyerya yoolakelela ya wiiveleela ni opatiso, naalikhelaka moohihiyereya oya vahoolo wa oohuserya. (Moone ekaaxa “ Yeeyo Ahusiha Anaphwanelaaya Opaka wi Yaakhaviherye Oohuserya Aya Ophiyerya Opatisiwa.”) Ninnahakalala opaka makupa mmuteko yoola wa ovuluxa ikumi! Hankooni nikhale oolakelela opaka soothene ophiyerya nnaweryelaahuvo wi neecihe soohuserya sa Piipiliya inaya vahoolo seiyo inahoolela opatiso.