1. Ntakhara heeni ninnaphwanela omwiiwelela Yehova?

NNAPHWANELA omwiiwelela * Yehova woona wi Mpatuxa ahu. Eyo ennamvaha yene ophwanelela wa olakelela wa soopatuxa sawe yeeyo eri yaphaama ni yoonanara. Woona wi hiyaano nipatuxiwe ni Muluku, nnaphwanela omwiiwelela yoowo. (Wup. 4:11) Nyenyatho nookhalavo nthowa ntokweene na omwiiwelela Yehova: mukhalelo awe wa olamulela ti waphaama. Ovinyerya macikhwi a iyaakha khalai, alamuleli ancipale aachu yaahikhalano olamulelo wammoori wa waalamulela akina. Nyenya wakhala wi noolikanyiha olamulelo aya ni wa Yehova, enakhala yawooneya wi Yehova mulamuleli a miruku sa vasulu, oosivela, aikharari,ni amahala wa oothene.—Muk. 34:6; Aro. 16:27; 1 Yoh. 4:8.

2. Mwawiiwanana ni Ahebri 12:9-11 ntakhara heeni omwiiwelela Yehova?

² Yehova hanachuna wi nimwiiweleleke yene moorweela wa woova. Opwaha yeeyo, owo onaweherya wi nimwiiweleleke nthowa nawi ninnamusivela ntoko Tiithi oosivela. Mu ekaarata awe wa Ahepri, Paulo ooloca wi nnaphwanela “omwiiwelela Tiithihu” wi “niphurelevo echu.”—Mwaalakhanye Ahebri 12:9-11.

3. (1) Nnooniherya hai omwiiwelela wahu Yehova? (2) Makoho taani anahaala waakhuliwa mmwaha yoola?

³ Mmikhalelo taani nneeraahu nooniherye wi ninnamwiiwelela Yehova? Mmakupa opacerya, moorweela wa opaka owetha wahu wi nimwiiwelele yene mu soothene. Mmakupa anawiili, moorweela wa owaniha muupuwelo wa ‘wiilipiha ni osuwela wahu.’ (Masi. 3:5) Echu eni enikhaviherye omwiiwelela Yehova ori osuwela mikhalelo sawe saphaama. Ntakhara heeni? Nthowa nawi mikhalelo seiya sohooniheryeya mu soothene onapakeiye. (Sal. 145:9) Wakhala wi noomusuwela vancipale Yehova, nnahaalatho omusivela  vancipale. Navetho vaavaa nnamusivelaahu Yehova, hinnachuna okhalano elista ya ichu nnaphwanelaahu opaka ni ichu nihinaphwanelaahu opaka. Ohiya yeeyo, ninniilipiserya wi nuupuwele nave woona ichu ntoko Muluku onooneleiye ni ohipaka ichu sooheseya. (Sal. 97:10) Nyenya ikwaha ikina omwiiwelela Yehova enamukhala ekhoco. Ntakhara heeni eyo enneereya? Nave tiheeni atokweene, asitiithi ni asimai eneeraaya ehuserye orweela wa yootakiherya ya muhooleli Nehemiya, mwene Taavi ni Mariya, amannya Yesu? Mwaha yoola onahaala ovahererya maakhulo wa makoho yaala.

4-5. Mwawiiwanana ni Aroma 7:21-23, ntakhara heeni omwiiwelela Yehova onamukhala woovila?

⁴ Nthowa nimoha nnaneeriha ohimwiiwelela Yehova ikwaha ikina ti nawi oothene ahu noorava yoocheka nave naachu ohiphaameya. Mpuwa mwahu nookhalano moonelo wa omwareya. Vaavaa Atamu ni Eva yaamwarenlaaya Muluku elya yawiima yeeyo yawatiihiwaaya, awo yaahooniherya wi yaachuna olakelela meekhaya yeeyo yaari yaphaama ni yoonanara. (Map. 3:22) Navetho olelo achu ancipale annathanla omukhooca Yehova nave annatikitherya malamulo aya.

⁵ Omwiiwelela Yehova onamukhalatho woovila ophiyerya wa yaale amusuwenle ni anamusivela. Murummwa Paulo aahihoolela nikacamiho nenla. (Mwaalakhanye Aroma 7:21-23.) Hiiha ntoko Paulo, hiyaano nnachuna opaka yeeyo Yehova onooneiye okhala yaphaama. Nyenya ilukuluku soothene nnaphwanela owanihaka nchuno na opaka ichu soonanara.

6-7. Nthowa taani nanawiili nneeriha okhala woovila omwiiwelela Yehova? Mvahe yootakiherya.

⁶ Echu ekina enahaala weeriha wi omwiiwelela wahu Yehova okhale woovila iri sookhovelela sahu ni mukhalelo niphwiiwaahu. Muupuwelo wa achu ancipale ti woohiyana ni yeeyo Yehova onuupuweleiye, nave ilukuluku ikina onnachuneya wiilipiserya wi nihiye muupuwelo ntoko yoowo. Moone yootakiherya emoha.

⁷ Mu ilapo ikina ti yawunlaana amiravo okhinyereryiwa opharihela ikumi saya wi ephwanye ikhorowa sincipale. Murokora oniichaniwa Mariya * aahihoolela nikacamiho nenla. Ahaakumve ohuserya vooloca sa Yehova, owo eera ahuseryaka mu esikola emoha yavasulu mu elapo awe. Emusi awe yaanamukhinyererya ophwanya muteko yoowo waahaala omulivaka ikhorowa sincipale nave waahaala omweeriha ocicimihiwaka. Navetho ti yeeyo owo aachuneiye. Mwawiihiiha, amanle ohuserya vooloca sa Yehova ni omusivela yoowo, Mariya aahitoroka soolakelela sawe. Naamwiihiiha, owo ooloca: “Mu ilukuluku ikina kinnaphwanya ikari sa ompaka nakoso wi kiphwanye ikhorowa sincipale, nyenya koosuwela wi iho sinahaala waakanyerya omurumeela waka Yehova. Nthowa na mukhalelo kiphwiiwaaka, nlelo Kinniilipiserya wi kiheemererye. Kinnamveka Yehova wi akikhaviherye ovootha yaweeha yeela wi kiheemererye muteko yoowo waahaala okaakha elukuluku ya omurumeela Yehova.”—Mat. 6:24.

8. Tiheeni nnahaalaahu othokororya hiihaano?

⁸ Ninnaphura mukhatiihu orweela wa omwiiwelela Yehova. Nyenya yaale arino murici wa ohoolela, ntoko atokweene a mmulokoni, asitiithi, ni asimai, aakhalano nthowa nikina nnahaala oweeriha ochariha ohoolela wa Muluku; awo aakhalano ekari ya waaruuhela mphurelo achu akina. Hankooni nthokororye sootakiherya ikina sinarweela Mpiipiliyani seiho sinahaala onihusiha mukhalelo wa opharihela ohoolela mmukhalelo onahaala omuhakalaliha Yehova.

9. Makacamiho taani Nehemiya aahoolenleiye?

⁹ Yehova ohaavaha atokweene a mmulokoni murici woochuneya wa waakhapelela achu awe.  (1 Ped. 5:2) Atokweene ananwerya ohuserya sincipale moorweela wa othokororya mukhalelo Nehemiya aakhalinheiye achu a Yehova. Ntoko mulamuleli o Yuteya, Nehemiya aakhalano olamulela otokweene. (Neh. 1:11; 2:7, 8; 5:14) Mwaanyiherye makacamiho makina yaawo Nehemiya aahoolenleiye. Owo aahoona wi achu yaahinanariha empa ya Muluku nave hiyaapaka sooveleela wi yaakhaviherye Alevi ntoko nlamulo naalocaaya. Ayuta hiyaacicimiha nlamulo vooloca sa nihiku na Sapata, nave alopwana akina yaahaathela athiyana a ilapo sookhopela. Mulamuleli Nehemiya aaphwanela omaliha nikacamiho nenla noovila.—Neh. 13:4-30.

10. Nehemiya aahoolenleiye hai makacamiho?

¹⁰ Nehemiya haapharihenle ohoolela wi aakhinyererye achu ochariha moonelo awe. Ohiya yeeyo, owo aahimveka Yehova ohoolela mu nivekelo noorweela vathi va murima, nave aahaahusiha achu malamulo a Yehova. (Neh. 1:4-10; 13:1-3) Nehemiya mwawiiyeviha aahilapa tho vamoha ni annawe, ophiyerya waakhaviherya oteka wanaawiili ixiri so Yerusalemu.—Neh. 4:15.

11. Mwawiiwanana ni 1 Tesalónika 2:7, 8, ti mwawiihai atokweene anaphwanelaaya waakhalihaka yaale a mmulokoni?

¹¹ Akhweya atokweene heni ehoolele makacamiho oolikana ni yaawo Nehemiya aahoolenleiye, nyenya awo ananwerya omutakiherya mmikhalelo mincipale. Ntoko yootakiherya, atokweene annalapa mwakuru wi yaaruuhele mphurelo anna ni arokora aya. Nave awo haneemererya wi ohoolela waya oweerihe okhala awiirumiha. Ohiya yeeyo, annakhaliha muloko moosivela. (Mwaalakhanye 1 Tesalónika 2:7, 8.) Osivela waya wawiiseela ni moonelo aya wawiiyeviha onnavolowela mukhalelo analocaaya ni akina. Antreya, mutokweene a mmulokoni yoowo orino mavyakelo, ooloca: “Kohoona wi vaavaa mutokweene onakhaleiye ooreera murima ni onthamwene, eyo ennatannya murima wa anna ni arokora. Mikhalelo seiya sinnaaceenyerya anna ni arokora owiiwelela atokweene.” Mutokweene mukina yoowo omalinhe elukuluku yincipale, oniichaniwa Toni, ooloca: “Kinneererya ochariha ekano enaphwanyeya mu Filipi 2:3 nave ilukuluku soothene kinniilipixerya owoonaka  akina okhala atokweene okipwaha miyo. Ela ennakikhaviherya osepa weera ichu ntoko mulamuleli.”

12. Ntakhara heeni ti yoochuneya atokweene okhala awiiyeviha?

¹² Atokweene anaphwanela okhala awiiyeviha hiiha ntoko Yehova oreiye awiiyeviha. Naamwi Yehova ari Mwene Oopwahasa a Soopatuxiwa, owo “onnuurama” wi aaviihe “oohaawa onchupini.” (Sal. 18:35; 113:6, 7) Mweeparipari, onnawiica yaale ari awiirumiha.—Masi. 16:5.

13. Ntakhara heeni mutokweene onaphwaneleiye ovareryela yeeyo onaloceiye ni mukhalelo wa oloca?

¹³ Mukhalelo mmoha mutokweene onamwiiweleleiye Yehova ori moorweela wa ovareryela yeeyo onaloceiye ni mukhalelo onaloceiye eyo. Wakhala wi haneerano eyo, onamuloca moohiphwanelela wakhala wi muchu mukina hamuciciminhe. (Tiy. 1:26; Gal. 5:14, 15) Antreya, yoowo oromoliwe wuupaceryani, ooloca: “Mu ekwaha ekina, kaahuupuwela oloca moohiphwanelela wa munna naari murokora yoowo aakhala wi haakiciciminhe ntoko mutokweene a muloko. Mwawiihiiha, kaahuupuwelela yootakiherya ya alopwana oororomeleya analociwa Mpiipiliyani, nave eyo yaahikikhaviherya woona ochuneya waya okhala awiichacala.” Atokweene annooniherya omwiiwelela waya Yehova moorweela wa okhala oosivela ni amahala vaavaa analocaaya ni anna ni arokora mmulokoni, ophitaanyerya atokweene akhwaaya.—Kol. 4:6.

14. Murici taani Yehova aavanheiye asitiithi, nave tiheeni owo onaweheryeiye wa yaawo?

¹⁴ Yehova oomuthanla tiithi ntoko muru wa emusi, nave Muluku onaweherya wi tiithi aavyakihe ni waalaka anaawe. (1 Kor. 11:3; Éfe. 6:4) Nyenya eyo henataphulela wi asitiithi anaphwanela opharihela ohoolela waya mmukhalelo anachunelaaya. Yehova tori Mpatuxa a emusi, mwawiihiiha asitiithi anahaala waakhula mulacu orweela wa mukhalelo anakhalihaaya emusi aya. (Éfe. 3:14, 15) Asitiithi annooniherya omwiiwelela waya Yehova moorweela wa opharihela ohoolela waya mmukhalelo yoowo onamuhakalaliha Muluku. Awo ananwerya ohuserya sincipale orweela wa othokororya yaweereya ya Mwene Tavite.

15. Ntakhara heeni Mwene Tavite yootakiherya yaphaama wa asitiithi?

¹⁵ Yehova aahimuthanla Tavite ntoko muru ohiya pahiru veemusini vawe nyenya okhala muru wa nloko noothene na Aisarayeli. Ntoko mwene, Tavite aahikhalano owerya otokweene. Mu ilukuluku ikina, Tavite aahipharihela owerya wawe mmukhalelo woonanara nave aapaka soocheka itokotoko. (2 Sam. 11:14, 15) Nyenya owo aahooniherya omwiiwelela wawe  Yehova moorweela wa weemererya olakiwa. Tavite aahivekela wa Yehova ni murima woothene. Nave owo aahipaka owetha wawe wi iiwelele ikano sa Yehova. (Sal. 51:1-4) Mwawaaceererya, Tavite aari awiiyeviha mwawaakhwanela ntakhara waakhela ekano ohiya pahiru yoorweela wa alopwana akhwaawe nyenya tho yoorweela wa athiyana. (1 Sam. 19:11, 12; 25:32, 33) Tavite aahihuserya orweela wa soocheka sawe nave aahipharihela okumi awe wi amurumeele Yehova.

16. Ichu taani asitiithi aneeraaya ehuserye orweela wa Tavite?

¹⁶ Pahiru muthokororye mahusiheryo yaawo asitiithi aneeraaya ehuserye orweela wa Mwene Tavite: Muhipharihele moonanara ohoolela yoowo Yehova oovanheiyeni. Mweemererye soohesa sanyu, nave mwaakhele ikano sa akina sinathipeleya Mpiipiliyani. Wakhala wi moheerano, emusi anyu enahaala woocicimihakaani nthowa na wiiyeviha wanyu. Elukuluku munavekelaanyu ni emusi anyu, mvekele mwawiiseela wa Yehova, nave voocharela emusi anyu enahaala osuwela ophiyerya mweeryo taani munachunaanyu nikhaviheryo ni ohoolela wawe. Nave opwaha soothene, mweerihe wi omurumeela wanyu Yehova okhale woochuneyaxa mookumini mwanyu. (Malam. 6:6-9) Yootakiherya anyu yaphaama yoovaha yoochuneyaxa yeeyo munaphwanelaanyu ovaha emusi anyu.

17. Murici taani Yehova aavanheiye asimai?

¹⁷ Yehova oomuthanla mai wi akhapelele murici woocicimiheyaxa veemusini, nave owo oomvaha ohoolela woophwanelela variyari va anaawe. (Masi. 6:20) Yeeyo mai onapakeiye ni onaloceiye enanwerya waavolowela anamwane okumi aya woothene. (Masi. 22:6) Moone yeeyo asimai eneeraaya ehuserya orweela wa Mariya, amannya a Yesu.

18-19. Tiheeni asimai anahuseryaaya orweela wa yootakiherya ya Mariya?

¹⁸ Mariya aahisuwela phaama Soorepa. Owo aahunnuwiha ncicimiho nawe ntakhara Yehova nave aahikhalano onthamwene woolipa ni yoowo. Owo aari ooreheryeya wiiwelela ohoolela wa Yehova, naamwi eyo yaavolowela otoroka mukhalelo woothene wa ekumi awe.—Luka 1:35-38, 46-55.

¹⁹ Asimai nyuwo, munanwerya omutakiherya Mariya mmikhalelo soohiyanahiyana. Mwawiihai? Yoopacerya, moorweela wa otikitherya onthamwene anyu ni Yehova orweela wa yoohuserya anyu ya Piipiliya ya muchu mukhateiye ni ovekela moohihiyererya. Yanawiili, moorweela wa okhala ooreheryeya opaka matorokelo mookumini mwanyu wi mmuhakalalihe Yehova. Ntoko yootakiherya, akhweya mphwiiwe ni asitiithi yaawo yaakuvela onyeenyeya nave yaaloca masu oohoma murima wa anaaya. Mwawiihiiha,  akhweya munnunwe muupuwelaka wi owo mukhalelo waphaama wa waaphuwa anamwane. Naamwi mmanle ohuserya malamulo a Yehova, akhweya nlelo munnawaniha nnikacamiho nenla wi mutitelele okhala oomaaleleya ni oopisa murima ni aniinyu, xaxaxa elukuluku munakhalaanyu oovelavela nave awo ehinachuna owiiwelelaani. (Éfe. 4:31) Mu ilukuluku sintoko seiyo, munaphwanela omuroromela vancipale Yehova opwaha khalai orweela wa nivekelo. Mai oniichaniwa Litiya ooloca: “Ilukuluku ikina, kaanavekela mwawiiseela wi kihiloce moonyeenyeya vaavaa mwanaka amwaamulopwana aahaakiiweleleiye. Kaanamaala, nave kinavekela vathi vathi wa Yehova wi akikhaviherye. Ovekela onnakeeriha okhala oomaaleleya.”—Sal. 37:5.

20. Nikacamiho taani asimai akina anahoolelaaya, nave eni evoothe hai nikacamiho nlo?

²⁰ Nikacamiho nikina asimai anahoolelaaya ti nawi onnakhala woovila wa yaawo owooniherya anaaya osivela. (Tito 2:3, 4) Athiyana akina aphuiiwale mu emusi yeeyo asitiithi aya yahaarino onthamwene wawaacameleya ni anaaya. Waakhanle wi owo mukhalelo mphwiwalaanyu, muhitakiherye soohesa sa asitiithi anyu. Mai yoowo onamwiiwelela Yehova onahaala ohuserya mukhalelo oneereiye ooniherye osivela ntakhara anaawe. Enamukhala yoovila wa yene otoroka mukhalelo wa wuupuwela, moonelo awe, ni meerelo awe. Nyenya opaka matorokelo yaawo ti wooweryeya, nave eyo enammweeriha yene vamoha ni emusi awe okhala oohakalalaxa.

21-22. Mwawiiwanana ni Isaiya 65:13, 14, miphurelo taani nnaakhelaahu moorweela wa omwiiwelela Yehova?

²¹ Mwene Tavite aahisuwela mphurelo wa omwiiwelela Yehova. Owo oorepa: “Mathorihelo a Apwiya tawookololowa, oohakalaliha murima. Malamulo a Apwiya [Yehova] taweela, annamwaleya miruku. [Miruku sanyu] sinnamulopola kapuro anyu, Pwiya, nave oreela wawe ti wiiwelela seiyo.” (Sal. 19:8, 11) Olelo nnanwerya woona ohiyana orivovo variyari va yaale anamwiiwelela Yehova ni yaale anakhooca ikano sawe sa osivela. Yaale anamwiiwelela Yehova “ekaamukhuwela murima oweenle.”—Mwaalakhanye Isaiya 65:13, 14.

²² Vaavaa atokweene a mmulokoni, asitiithi, ni asimai anakhalaaya ooreheryeya omwiiwelela Yehova, ikumi saya sinnakhala phaama, imusi saya sinnakhala soohakalala, nave muloko woothene onnakhala wawiiwanana. Echu yoochuneyaxa opwaha soothene, awo annahakalaliha murima wa Yehova. (Masi. 27:11) Chiryene, owo ohakalala otokweene nnahaalaahu okhalano!