1. Tuuvi waari mukhalelo wa murummwa Yohani omakuchuwelo wa nsana noopacerya E.K.?

OMAKUCHUWELO wa nsana noopacerya E.K., murummwa Yohani aari mmukhalelo wookacamiha vancipale. Owo aari awuuluvala, nave iiha ari mu evilivili yo Patimu, nave enakhala wi pahiru aari murummwa mmoharu ahanle. (Wup. 1:9) Vaiye aahisuwela wi alipa a waakaaha yaanaawoka achu a mmulokoni eweerihaka okhala ookawanyeya. Nave eyo yaahaala weeriha wi moohilekela ehikhalavo Akristu eeparipari.—Yuda 4; Wup. 2:15, 20; 3:1, 17.

2. Mwawiiwanana ni Wupulula 7:9-14, yawoona taani ya miririmu Yohani aakhenleiye? (Moone eruku ya ekaapa.)

² Mu elukuluku Yohani aareiye mmukhalelo yoowo wookacamiha, Yehova aahimooniha yawoona yoohakalaliha vooloca sa omwaahiyu. Mu yawoona yeeyo, munkeelo mmoha aahaaleela ankeelo akina asese wi ephare moolipa echeku yootoloxa ya yoohoosa etokotoko ophiyerya okuchuwa wa waahela eneneeryo akapuro a Muluku. (Wup. 7:1-3) Mu nikhuuru nlo annapaka makupa achu awaakhwana 144.000, yaawo anahaala olamulela vamoha ni Yesu wirimu. (Luka 12:32; Wup. 7:4) Voocharela, Yohani onnaloca nikhuuru nikina, nikhuuru ntokweene ophiyerya wi owo aahiloca: “Kaaweha, koona mucici muncipale. Haavo aawerya waalakhanya. Waari wa achu a ilapo soothene, a maloko oothene, a mahimo oothene, yeemenle ohoolo wa munyukhu ni vamiithoni wa epucepuche.” (Mwaalakhanye Wupulula 7:9-14.) Nkaanyiheryani mukhalelo Yohani aahakalanleiye osuwela wi Masana masaneene ni macikhwi macikhweene a achu anahaala opaka makupa a malapelo eeparipari omwaahiyu!

3. (1) Mmukhalelo taani yawoona ya Yohani enalipihaaya nroromelo nahu? (2) Tiheeni nnahaalaahu ohuserya mmwaha yoola?

³ Moohikhwa minikwa, yawoona ele yaahilipiha nroromelo na Yohani. Yawoona eyo ennalipiha nroromelo nahu moopwaha, woona wi nnakhala mu elukuluku yawoona eyo enaakhwanelaaya!  Ninnoona muloko mutokweene wa achu amilyawu yaawo anaweherya ovuluwa mu makacamiho matokotoko ni okhalano ekumi yoohimala veelaponi yavathi. Mmwaha yoola, nnahaala ohuserya mukhalelo Yehova uupulunleiye osuwanyeya wa mucici muncipale wa achu awe mu iyaakha makhumi mathanu nararu ivirale. Voocharela nnahaala othokororya ichu piili vooloca sa muloko yoowo: (1) mukhalelo muloko owo wancaaya ni (2) mukhalelo oryaaya woohiyanahiyana. Eyo enahaala olipiha nroromelo na oothene yaale anaweherya opaka makupa a nloko nenlo nooreelihiwa.

4. Eparipari taani Akristu atheru ahiniiwexexaaya, nave ti mwawiihai Oohuserya a Piipiliya yaaryaaya oohiyana vooloca sa yeeyo?

⁴ Akristu atheru hanahusiha eparipari enarweela mu Soorempwa yawi vanihikuni achu yaale aniiwelela anahaala okhala ni ekumi okhala wookhala veelaponi yavathi. (2 Kor. 4:3, 4) Olelo, malapelo mancipale a Akristu atheru anahusiha wi achu oothene aphaama anaya wirimu vaavaa anakhwaaya. Eyo ti yoohiyana vancipale ni yeeyo nikhuuru nikhaani na Oohuserya a Piipiliya yaawo yaamulaleya Mulipeleli ovinyerya eyaakha ya 1979 yaalocaaya. Awo yaahiiwexexa wi Muluku onahaala weeriha elapo yavathi okhala Parataiso wanawiili nave tho wi amilyawu a achu awiiwelela yaahaala okhala veelaponi yeela yavathi—ohiya wirimu. Mwawiihiiha, yaahiviravo elukuluku yincipale wi esuwele mookwakwaleya vooloca sa achu yaawo yaahaala okhala awiiwelela.—Mat. 6:10.

5. Tiheeni oohuserya a Piipiliya yeemereryaaya vooloca sa a 144.000?

⁵ Mweeparipari, oohuserya a Piipiliya yaahisuwela orweela Mpiipiliya wi nikhuuru naachu “yoopoliwe veelaponi ya vathi” yaahaala olamulela vamoha ni Yesu wirimu. (Wup. 14:3) Nikhuuru nlo naahaala okhala achu awaakhwana 144.000 Akristu awiiveleela amvai yaawo yi eneera emurumenle Muluku moororomeleya eri veelaponi. Tiheeni awo yeemereryaaya vooloca sa mucici muncipale?

6. Tiheeni oohuserya a Piipiliya yeemereryaaya vooloca sa mucici muncipale?

⁶ Mu yawoona awe, Yohani aahoona nikhuuru nenle ‘neemenle ohoolo wa munyukhu ni vamiithoni wa epucepuche.’ (Wup. 7:9) Soorepa seiha saahiweeriha Oohuserya a Piipiliya ophiyerya makuchuwelo wi hiiha ntoko 144.000, mucici muncipale waahaala oya wirimu. Nave waakhanle we makhuuru oomeeli 144.000 ni mucici muncipale yaahala oya wirimu, waahaala owerye hai wi nikhuuru nimoha nihiyane ni nikina? Oohuserya a Piipiliya yuupuwela wi mucici muncipale yaahaala okhala Akristu yaawo yahoonihenrye ororomeleya waya mwawaakhwanela eri veelaponi yavathi. Naamwi echarihaka malakiheryo a Piipiliya, akhweya akina a yaawo yaahititelela opaka makupa a ikerexa Satheru. Oohuserya a Piipiliya, yaahiphiyerya makuchuwelo wi achu yaawo yaahooniherya mvai wamoori nyenya hiwaari wawaakhwanela wi elamulele ni Yesu. Woona wi omusivela waya Muluku hiwaari woolipa, mucici muncipale waahaala ophwanelela oya wirimu wi okhala variyari va minyukhu nyenya ohiya mu minyukhuni.

7. Mwawiiwanana ni oohuserya a Piipiliya, taani yaahala okhala veelaponi variyari aa Olamulelo wa Kristu wa Iyaakha Masanaru Khumi, nave tiheeni Oohuserya a Piipiliya yeemereryaaya vooloca sa alopwana oororomeleya akhalai?

⁷ Vano, taani yaahaala okhala veelaponi yavathi? Oohuserya a Piipiliya yeemererya wi 144.000 ni mucici muncipale emanle othukumanyiwa wirimu, amilyawu aachu yaahala okhalano okumi veelaponi yavathi wi epuhe mareeliho a Olamulelo wa Kristu wa Iyaakha Masanaru Khumi. Oohuserya a Piipiliya hiyeemererya wi amilyawu yaala yaahaala omurumeela Yehova ohaakumve opacerya Olamulelo wa Kristu. Ohiya yeeyo, yuupuweliwa wi nikhuuru nenla  naahaala ohusihiwa iphiro sa Yehova variyari va Olamulelo wa Kristu wa Iyaakha Masanaru Khumi. Mwawiihiiha, yaale yaahaala wiiwelela malakiheryo a Yehova yaahaala oreelihiwa ni okumi woohimala veelaponi, nyenya yaale yi ehiiwelele yaahaala otoloxiwa. Oohuserya a Piipiliya yuupuwela tho wi akhweya akina yaale yi ekhaleno “olamulelo” veelaponi variyari va elukuluku yeele—ophitaanyerya yaale yi eviihiwe mookhwani “makholo akhalai” (alopwana oororomeleya akhwile ahaakumve Kristu) yaahaala omwaakhela phatamari a okumi wirimu omakuchuwelo wa Olamulelo wa Kristu wa Iyaakha Masanaru Khumi.—Sal. 45:16.

8. Makhuuru taani mararu yooneya wi yaahikhalano mpuro mu yookhwela ya Muluku?

⁸ Mwawiihiiha, Oohuserya a Piipiliya yuupuwela wi yaahikhalavo makhuuru mararu: (1)  144.000 yaahaala olamulela wirimu vamoha ni Yesu; (2) mucici muncipale wa Akristu yaarino mvai vakhaani, yaawo yaahaala okhala variyari va munyukhu wa Yesu wirimu; ni (3) amilyawu aachu yaahaala ohusihiwa mu iphiro sa Yehova variyari va Olamulelo wa Kristu wa Iyaakha Masanaru Khumi. * Nyenya ohoolo waya, Yehova aapacerya waakhaviherya wiiwexexa mookwakwaleya mwaha yoola.—Masi. 4:18.

9. (1) Mmukhalelo taani mucici muncipale veelaponi yavathi oneemelaaya “ohoolo wa munyukhu ni vamiithoni wa epucepuche”? (2) Ntakhara heeni wiiwexexa wuuwu vooloca sa Wupulula 7:9 oryaaya woophwanelela?

⁹ Mu eyaakha ya 1935 Anamoona a Yehova yaahiiwexexa taani yaari mucici muncipale mu yawoona ya Yohani. Anamoona a Yehova yaahiiwexexa wi mucici muncipale hiwaahaala oya wirimu, ni weemela mmukhalelo wawooneya “ohoolo wa munyukhu ni vamiithoni wa epucepuche.” Ohiya yeeyo, eyo yaahaala weereya mmukhalelo woosiphela. Naamwi eri veelaponi ya vathi, mucici muncipale waahala weemela “ohoolo wa munyukhu” moorweela wa osuwela olamulelo wa Yehova ni wiiwelela otokweene awe. (Isa. 66:1) Awo yaahaala weemela “vamiithoni wa epucepuche” moorweela wa ororomela mukucho wa woopola wa Yesu. Moolikana, mu Mateu 25:31, 32, “maloko oothene”—ophitaanyerya achu oocheka—analociwa wi ‘athukumanyiwe vamiithoni’ va Yesu va munyukhu awe woocicimiheya. Mweeparipari, maloko oothene yaala ari veelaponi yavathi ohiya wirimu. Wiiwexexa wuuwu ovyaani ti woophwanelela. Ela ennooniherya ntakhara heeni Piipiliya hanaloca wi mucici muncipale onahaala oya wirimu. Pahiru nikhuuru nimoha noororomelihiwa waakhela ekumi yoohimala wirimu—a 144.000, yaawo eni “elamulela veelaponi ya vathi” vamoha ni Yesu.—Wup. 5:10.

10. Ntakhara heeni waahala okhala woochuneya wi mucici muncipale ohusihiwe ohaakumve Olamulelo wa Kristu wa Iyaakha Masanaru Khumi?

¹⁰ Ovinyerya mu 1935, Anamoona a Yehova yaahiiwexexa wi mucici muncipale mu yawoona ya Yohani waari wa nikhuuru na Akristu oororomeleya yaawo yaarino ewehereryo ya okhala ni ekumi okhala wookhala veelaponi yavathi. Wi ovuluwe mu makacamiho matokotoko, mucici muncipale waaphwanela ohuserya vooloca sa Yehova ni omulapelaka yoowo ohaakumve Olamulelo wa Kristu wa Iyaakha Masanaru Khumi. Awo yaaphwanela wooniherya nroromelo noolipa wi ‘yoopowe wa soothene seiyo inahaala weereya’ ohaakumve Olamulelo wa Kristu wa Iyaakha Masanaru Khumi.—Luka 21:34-36.

11. Ntakhara heeni Oohuserya a Piipiliya yuupuwelaaya wi akhweya akina yaahaala oviihiwa wi eye wirimu omanle Olamulelo wa Kristu wa Iyaakha Masanaru Khumi?

¹¹ Hanka vooloca sa achu ororomeleya yaawo yaahaala oviihiwa wi eye wirimu omanle Olamulelo wa Kristu wa Iyaakha Masanaru Khumi? Moonelo vooloca sa mwaha yoola waahilociwa mu Mulipeleli 15 a Fevereru a 1913 (a  Enklesi). Oohuserya a Piipiliya akina yaanuupuwela, ‘Ntakhara heeni alapeli ororomeleya a Muluku akhalai eneeraaya ekhale veelaponi yavathi, eniiha Akristu yaawo yahaari oororomeleya mwawaakhwanela anahaalaaya ochuweliwa ni ekumi wirimu?’ Mweeparipari, muupuwelo ola waathipeleya mu miyoonelo miili sooheseya: (1)  wawi mucici muncipale waahala oya wirimu nave wi (2) mucici muncipale owo yaahala okhala Akristu yaarino mvai vakhaani.

12-13. Tiheeni makhuuru oomeeli awoocihiwa ni muloko mutokotoko aniiwexexaaya vooloca sa nchuwelo naya?

¹² Sintonko noonaahu, ovinyerya mu 1935, Anamoona a Yehova yaahiiwexexa mookwakwaleya wi achu eni evuluwe mu ekhoco ya Armaketo ti mucici muncipale yoowo olociwe mu yawoona ya Yohani. Awo anahaala ‘ovira mmakacamiho matokotoko’ mu elapo yeela yavathi, nave anahaala ‘okhuwela yiitupiha, eriki: ‘Ovulusha ori wa Muluku ahu, yoowo okilanthe va munyukhuni woomwene, ori tho wa epucepuche.’’ (Wup. 7:10, 14) Mwawaaceererya, soorepa sinnanihusiha wi yaale anahaala oviihiwa wi eye wirimu aakhalano “echu yooreera” opwaha achu oororomeleya akhalai. (Ahe. 11:40) Anna ni arokora ahu mwawiiwanana yaahipacerya waawopa achu mwamvai wi emulapele Yehova nave ekhaleno ewehereryo ya ekumi yoohimala veelaponi yavathi.

¹³ Yaale anapaka makupa a mucici muncipale annahakalala vancipale ni ewehereryo aya. Vaya anniiwexexa wi Yehova tonalakelela mpuro alapeli awe oororomeleya anahaalaaya omulapawo, wirimu naari veelaponi yavathi. Maloko oomeeli awoocihiwa ni a muloko muncipale anniiwexexa wi nchuwelo naya nnarweela mu mahala a Yehova yaawo oonihenryeiye moorweela wa mukucho wa woopola wa Yesu Kristu.—Aro. 3:24.

14. Evinre eyaakha ya 1935, ntakhara heeni ancipale yaaniikoha mukhalelo yaahaalaaya okhwaanela yooloherya vooloca sa muloko mutokotoko?

¹⁴ Anamoona a Yehova emanle wiiwexexa matorokelo ala mu eyaakha ya 1935, ancipale yaaniikoha mmukhalelo taani achu yaale arino ewehereryo ya okhala veelaponi yavathi yaahaalaaya okhala mucici muncipale. Ntoko yootakiherya, Ronald Parkin aarino iyaakha 12 sa oyariwa vaavaa osuwanyeya wa mucici muncipale waaryaaya wookwakwaleya. Ronald onnuupuwela: “Mu elukuluku yeele, yaarivo alaleeryi 56.000 mu elapo yoothene ni ancipale a yaawo, akhweya yaari oothanliwa ni munepa waweela. Nyenya, mucici muncipale hiwaari mutokweene.”

15. Othukumanyiwa wa mucici muncipale onannuwa hai?

¹⁵ Moovira wa iyaakha, mamisiyonaario ancipale yaarumiheliwa mu ilapo sincipale, nave waaca wa Anamoona a Yehova waanaya vahoolo. Voocharela, mu 1965, marehereryo a yoohuserya ya Piipiliya aahipacerya aphariheliwa liivuru A Verdade Que Conduz à Vida Eterna. Mukhalelo  liivuru owo aathariheiye mookwakwaleya eparipari ya Mpiipiliyani aanaweeriha achu ancipale okhala mmakupa a Yehova opwahana khalai. Mpuwa mwa iyaakha xexe oohuserya avyaani awaakhwana emeya ya milyawu mmoha yaahipatisiwa. Vaavaa Ekerexa Katolika yaapacenryaaya oyeleela owerya o Amerika Latina ni ilapo ikina, ni vaavaa muteko ahu waaryaaya wootaphuwa mu ilapo ikina ntoko makupa Onakhuma Nsuwa o Europa ni makupa o Afrika, amilyawu ancipale yaahipatisiwa. (Isa. 60:22) Mu iyaakha sahiihaanoru, marehereryo a Yehova aapaka ikaruma soohiyanahiyana wi saakhaviherye achu ancipale ohuserya yeeyo Piipiliya onahusiheiye. Hisaavo minikwa wi mucici muncipale—yoowo vano orino achu amilyawu thanu nararu, onanvira waaceereryeyaka.

16. Mucici muncipale onarweela woowi?

¹⁶ Mu yawoona na Yohani, aahirepa wi achu a mucici muncipale yaahaala okhala “a ilapo soothene, a maloko oothene, a mahimo oothene ni a ilocelo soothene.” Mulipa miririmu Zakariya aahiloherya echu yoolikana ni yeela. Owo aahirepa: “Mmahiku yaawo achu khumi a ilocelo soothene, a maloko ohiyana-hiyana, annarwa emwaakelela muYuuta mmoha, eriki: ‘Munihiye noochareeni. nohiiwa wi Muluku ori ni nyuwo.’”—Zak. 8:23.

17. Tiheeni enapakiwa wi ekhaviheryiwe achu a maloko oothene ni ilocelo?

¹⁷ Anamoona a Yehova aasuwela wi, wi achu a maloko oothene ethukumanyiwe, michaka saphaama  saaphwanela olaleeryiwa mu ilocelo sincipale. Ninnataphulela soolaleeryiwa sa omuhuseryano Piipiliya mu iyaakha opwaha 130, nyenya hiihaano ninnalapa moowetha opwaha khalai wi ntaphulele soolaleeryiwa mu ilocelo masana masaneene. Mwawooneya, Yehova onnapaka sootikhiniha mmahiku ahu—othukumanya mucici muncipale orweela wa maloko oothene. Nthowa na Piipiliya ni soolaleeryiwa inathipeleya Mpiipiliyani ophwanyeya mu ilocelo sincipale, nikhuuru nenla ninnamulapela Yehova mwawiiwanana, naamwi erweelaka mmapuro oohiyana hiyana a elapo. Nave Anamoona aasuweliwa phaama moorweela wa olaleerya mwamvai ni osivelana waya. Ela ennalipiha nroromelo!—Mat. 24:14; Yoh. 13:35.

18. (1) Mwawiiwanana ni Isaiya 46:10, 11, ntakhara heeni hannatikhiniheya woona mukhalelo Yehova onakhwaaniheryeiye yooloherya vooloca sa mucici muncipale? (2) Ntakhara heeni yaale arino ewehereryo ya okhala veelaponi yavathi haniisoona okhala oohichuneya?

¹⁸ Nookhalano nthowa naphaama na ohakalala vooloca sa yooloherya ya mucici muncipale! Hinnatikhina woona mukhalelo Yehova onakhwaaniheryeiye yooloherya yeela mmikhalelo sootikhiniha. (Mwaalakhanye Isaiya 46:10, 11.) Yaale anapaka makupa a mucici muncipale annathamalela ewehereryo yeeyo Yehova onaavaheiye. Awo haniisoona okhala oohichuneya nthowa na ohithanliwa ni munepa wa Muluku wi yalamulele vamoha ni Yesu wirimu. Orweela mu Soorempwa, ninnaalakhanya saweererya sa alopwana ni athiyana oororomeleya yaawo yaahooleliwa ni munepa waweela; nyenya awo hari mu nikhuuru na 144.000. Mmoha a yaawo ti Yohani Mpatisi. (Mat. 11:11) Mukina a yaawo ti Tavite. (Saw. 2:34) Awo ni amilyawu akina anahaala oviihiwa wi ekhaleno ekumi mu parataiso veelaponi yavathi. Oothene yaawo—vamoha ni mucici muncipale—anahaala okhalano ekari ya wooniherya ororomeleya waya wa Yehova ni olamulelo awe.

19. Okhwaanela wa yawoona ya Yohani ya mucici muncipale enaceenyerya hai waakuveya wa ilukuluku nnakhalaahu?

¹⁹ Hetonko weereya mu miyaha sa achu Muluku waathukumanya amilyawu aachu a maloko oothene. Moohipwacha waakhanle wi ewehereryo ahu ti ya wirimu naari veelaponi yavathi, nnaphwanela waakhaviherya ancipale ophiyerya nnaweryelaahuvo wi epake makupa a mucici muncipale wa “ipucepuche ikina.” (Yoh. 10:16) Moohilekela, Yehova onahaala oruuha makacamiho matokotoko yaawo anahaala waatolosa alamuleli ni malapelo yaawo anaahoosa achu. Oothene yaale anapaka makupa a mucici muncipale aakhalano ekari yavameekhaaya ya omurumeela Yehova veelaponi yavathi okhala wookhala!—Wup. 7:14.