MWAHA WOOHUSERYA 38
“Rwaani wa Miyo . . . Miyo Kinamuwiichuuwihaani”
“Rwaani wa miyo oothene nyuwo mvenle munyokoliwa, miyo kinamuwiichuuwihaani.”—MAT. 11:28.
NCIPO 17 “Kinnakhwela”
YEEYO NNAHAALAAHU OHUSERYA *
1. Mwawiiwanana ni Mateu 11:28-30, yoororomeliha taani Yesu opankeiye?
YESU aahipaka yoororomeliha yaphaamaxa wa muloko waachu yaawo yanwiriyana. “Rwaani wa miyo” owo aahiloca, “miyo kinamuwiichuuwihaani.” (Mwaalakhanye Mateu 11:28-30.) Tahi wi yaari masu yahaarino yootaphulela. Muupuwele yootakiherya wa yeeyo aamweerenleiye muthiyana yoowo aahooxeya ni ereca yawoopiha.
2. Tiheeni Yesu aapankeiye wa muthiyana iiceliwa?
2 Muthiyana ole ahaarino ewehereryo aanachuna nikhaviheryo. Owo aaya mwa alipa ooloola ancipale, awehereryaka openuwa. Saavira iyaakha khumi napiili ahooxeyaka, nyenya nlelo haavo aawenrye omukhaviherya. Mwawiiwanana ni Nlamulo, owo aari ooriipiheya. (Onam. 15:25) Voocharela aahiwa wi Yesu aanawerya waapenusa yaale yaahooxeya, mwawiihiiha aaya omwaavya. Vaavaa amphwanyeiye, aaphara niveru na yoowara awe nave moohilekela aahipenuwa! Nyenya Yesu aahipaka sincipale opwaha ompenusa—mukhalelo aamukhalinheiye, aahimooniherya osivela ni ncicimiho. Ntoko yootakiherya, vaavaa aaloceiye ni yene, aahipharihela masu a ncicimiho “mwanaka.” Mweeparipari muthiyana ole aahilipiheya nave aahakararyeya!—Luka 8:43-48.
3. Makoho taani nnahaalaahu waakhula?
3 Moone wi muthiyana aaya wa Yesu. Owo aahiilipiserya omphiyerya Yesu. Emohamoha enaphwanela weereyaka olelo—nnaphwanela wiilipiserya wi ‘nrwe wa’ Yesu. Mu elukuluku ahu, Yesu hanahaala waapenuxa mmukhalelo wootikiniha areca yaawo ‘anarwa wa’ yene. Nyenya nlelo owo onnapaka nwopelo “Rwaani wa miyo, . . . miyo kinamuwiichuuwihaani.” Mmwaha yoola, nnahaala waakhula makoho mathanu: Tiheeni nnaphwanelaahu opaka wi ‘nrwe wa’ Yesu? Tiheeni Yesu aachuneiye oloca vaavaa aalonceiye wi “teeshani murici aka”? Tiheeni nneeraahu nihuserye orweela wa Yesu? Ntakhara heeni muteko Yesu onivanheiye onnanihakararya? Nave mmukhalelo taani nneeraahu ntitelele ophwanya ohakararya mu murici wa Yesu?
“RWAANI WA MIYO”
4-5. Mikhalelo taani nneeraahu ‘nrwe wa’ Yesu?
4 Mukhalelo mmoha wa omphiyerya Yesu ori ohuserya sincipale ophiyerya nnaweryelaahuvo, ichu olonceiye ni opankeiye. (Luka 1:1-4) Haavo onawerya opaka eyo mu nipuro nahu. Ori murici ahu ohuserya yeeyo Piipiliya onanleeleiye vooloca sa Yesu. Hiyo tho ‘ninnarwa’ wa Yesu vaavaa nnapakaahu yoolakelela ya opatisiwa ni okhala oomuchara a Kristu.
5 Mukhalelo mukina wa ‘orwa wa’ Yesu ori oveka nikhaviheryo wa atokweene a mmulokoni vaavaa onakhalaaya woochuneya. Yesu onnapharihela ‘yamahala ya achu’ wi akhapelele ipucepuche sawe. (Éfe. 4:7, 8, 11; Yoh. 21:16; 1 Ped. 5:1-3) Nnaphwanela wiilipixerya oveka nikhaviheryo naya. Hannaphwanela oweherya wi atokweene anahaala osuwela yeeyo nnuupuwelaahu ni nnachunaahu. Muthokororye yeeyo munna oniichaniwa Yulian olonceiye: “Miyaano kaaphwanela ohiya orumeela opeteli nthowa na makacamiho a ekumi, nave mmoha a asinthamwene aka aahikileela wi kaaphwanela oveka nikhaviheryo wa atokweene wi ekilipihe. Voopaceryani, miyo kuupuwela wi eyo heki ekhale yoochuneya. Nyenya ohoolo waya kaahiveka nikhaviheryo, nave oxekurya yoole yaari yoovaha yasisapo yeeyo kaakhenlaaka.” Atokweene oororomeleya, ntoko yaale eeli yaamusekunrye Yulian, ananwerya onikhaviherya osuwela “muupuwelo a Kristu,” yeeyo eri, wiiwexexa ni otakiherya muupuwelo ni moonelo awe. (1 Kor. 2:16; 1 Ped. 2:21) Mweeparipari ela eri yoovaha yaphaamaxa eneeraaya enivahe.
“TEESHANI MURICI AKA”
6. Tiheeni Yesu aachuneiye oloca: “Teeshani murici aka”?
6 Vaavaa Yesu aalonceiye: “Teeshani murici aka,” owo aachuna oloca “Mweemererya otokweene awe.” Owo anweryatho oloca “Muteese murici vamoha ni miyaano, nave vamoha nnahaala olapa ntakhara Yehova.” Masu yaala meeli anataphulela wi nnaphwanela olapa.
7. Mwawiiwanana ni Mateu 28:18-20, muteko taani nivahiwaahu opaka, nave nnaphwanela olekecheya ni eheeni?
7 Hiyo noheemererya nwopelo wa Yesu vaavaa naavelenlaahu okumi ahu wa Yehova nave nipatisiwa. Nwopelo owo ori woohuleya wa oothene—Yesu hanahaala omukhooca naari mano mmoha a yaawo anachuna omurumeela Muluku. (Yoh. 6:37, 38) Oomuchara oothene a Kristu aakhalano ekari ya waakhela ekari ya olapa mmuteko yoowo Yehova aamvenkeiye Yesu wi apake. Nnaphwanela oolekecheya wi ikwaha soothene Yesu onahaala okhala ni hiyo wi anikhaviherye olapa muteko yoola.—Mwaalakhanye Mateu 28:18-20.
“HUSERYANI WA MIYO”
Nwiichuuwihe akina ntoko yesu enreiye (Moone iparakrafo 8-11) *
8-9. Ntakhara heeni achu awiiyeviha annamwaacamela Yesu, nave makoho taani nnaphwanelaahu wiipakela?
8 Achu awiiyeviha yaanamwaacamela Yesu. (Mat. 19:13, 14; Luka 7:37, 38) Ntakhara heeni? Muthokororye ohiyana waarivo variyari va Yesu ni Afarisi. Ahooleli a malapelo ale hiyaarino osivela nave yaari awiirumiha. (Mat. 12:9-14) Yesu aari oosivela ni awiiyeviha. Afarisi yaari anrima nave yaaniirumiha nthowa na murici aya wa vasulu variyari va achu. Yesu aaloca wi hiyaari yaphaama wiisoona mmukhalelo yoowo. Owo aahaahusiha omuchara awe okhala a wiiyeviha ni waarumeelaka akina. (Mat. 23:2, 6-11) Afarisi yaanapharihela owerya waya variyari va akina woona wi achu yaanoova yeeyo yaahaala weereya waakhanle wi hawiiwelenle Afarisi. (Yoh. 9:13, 22) Yesu aanaahakararya akina moorweela wa meerelo oosivela ni masu oolipiha.
9 Apwanne yookhala muhusenryaanyu orweela wa Yesu? Mwiikohe: ‘Apwanne akina akisuwenle ntoko awiichacala ni awiiyeviha? Apwanne kiri ooreheryeya olapa muteko woohicicimiheya wi kaarumeela akina? Mano, kinnawooniherya epewe akina?’
10. Mukhalelo taani Yesu aatikithenryeiye wa yaale yaalapa ni yene?
10 Yesu ootikitherya mukhalelo wa murecele ni woophwanelela ni yaale yaalapa vamoha ni yene, nave aanasiveliwa vancipale waavyakiha. (Luka 10:1, 19-21) Owo aanaaceenyerya oohuserya opaka makoho nave aanachuna wiiwa miyoonelo saya. (Mat. 16:13-16) Hiiha ntoko miri naari ithutu sinnakhapeleliwa wi sihuume ni oviha wa nsuwa, oohuserya yaakhalano nipuro naphaama wi yunnuwe. Awo yaahikhapelela mahusiheryo yaawo Yesu aahusinheiye, nave ntoko yookhumelela, yaahiimiha sawiima, eyo ti wi, miteko saphaama.
Mukhale awaacameleya ni onthamwene
Mukhale oolucuwa ni amvai
Mukhale a wiiyeviha ni oolapa muteko *
11. Makoho taani nnaphwanelaahu wiipakela?
11 Wakhala wi mookhalano olamulelo vyakala variyari va akina, mwiikohe: ‘Kinaakhaliha hai akina omutekoni ni owaani? Mano, ka muchu a murecele? Apwanne kinnaaceenyerya akina opaka makoho? Kiri ooreheryeya wiiwa miyoonelo saya?’ Moohikhwa minikwa, haavo a hiyo onachuna okhala ntoko Afarisi, yaanyeenyeya mwaapure mwaapure vaavaa akina yaapakelaaya makoho nave yaawiikara yaale yaarino miyoonelo soohiyana ni sawaya.—Mar. 3:1-6; Yoh. 9:29-34.
“MUNNAMPHANYA WIICHUUWA”
12-14. Ntakhara heeni muteko Yesu onivanheiye onnanilipiha?
12 Ntakhara heeni nnanwerya oloca wi muteko Yesu onivanheiye woonilipiha? Aakhalavo mathowa mancipale, nyenya nnahaala othokororya makina a yaawo.
13 Nookhalano alipa oohoolela aphaamaxa. Yehova, Ooweherya ahu a Vasuluxa, tahi muhooleli oohoosa naari oohithamalela. Owo onnavaha esisapo muteko nnapakaahu. (Ahe. 6:10) Nave onnanivaha ikuru nnachunaahu wi niwerye oteexa murici ahu. (2 Kor. 4:7; Gal. 6:5) Yesu, Mwene ahu, onnanivaha yootakiherya yoophaameya mmukhalelo wa waakhaliha akina. (Yoh. 13:15) Nave atokweene a mmulokoni ananikukhula anneererya omutakiherya Yesu, “mukukhula mutokotoko.” (Ahe. 13:20; 1 Ped. 5:2) Wi enihusihe ni onikhapelela, awo anniilipixerya wi ekhale oreera murima, oohakararya ni olipa murima.
14 Nookhalano asinthamwene aphaamaxa. Hinaavo nikhuuru nikina naachu nrino muteko woohakalaliha onalikana ni waahu nave nrino asinthamwene oosivelasa ntoko hiyo. Muupuwele ela: Hiyo nookhalano ekari ya olapa ni achu anachariha meecelo avasulu, nyenya ahiniisoona okhala a vasulu waapwaha akina. Awo aakhalano mavyakelo mancipale, nyenya tawiiyeviha nave anawoona akina ntoko atokweene. Awo hananoona pahiru ntoko asinthamwene a muteko, nyenya ntoko asinthamwene eeparipari. Onthamwene yoola ti woolipiha ophiyerya wi ari oolakelela ovaha ekumi aya ntakhara hiyo!
15. Nnoona hai muteko naakhenlaahu wi nipake?
15 Nookhalano muteko waphaamaxa. Hiyo ninnaahusiha achu eparipari vooloca sa Yehova nave ninnalokoha vanlakani sawootha sa Musaserya. (Yoh. 8:44) Satana onnaateesiha achu ni micholo seiyo ahinaweryaaya oteexa. Ntoko yootakiherya, owo onachuna wi neemererye wi Yehova harwa alevelela soocheka sahu nave wi hannaphwanela waakhela osivela wa Tiithi ahu. Eyo yawootha ya woopihasa nave ori mucholo woovila oteesa! Vaavaa ‘nnarwaahu wa’ Kristu, soocheka sahu sinnakhurumuweliwa. Nave eparipari ti yawi Yehova onnanisivela vancipale. (Aro. 8:32, 38, 39) Mano, tahi yoohakalaliha waakhaviherya achu omuroromela Yehova ni okhalano ekumi yoophwanelela?
MUTITELELE WIICHUUWIHIWA NI MURICI WA YESU
16. Ohiyana taani orivovo variyari va murici Yesu onanivekeiye wi niteese ni mirici mikina nnateesaahu?
16 Murici Yesu onanivekeiye wi niteexe ori woohiyana ni murici nnateesaahu nihiku ti nihiku. Ntoko yootakiherya, ori wawunlaana achu ophiya va mutekoni ohiya pahiru oovelaveleene, nyenya oohapaleya. Mmakupa makina, vaavaa nnalapaahu ntakhara Yehova ni Yesu, ninnahakalala. Omakuchuwelo wa nikhuku na muteko, akhweya nnamukhala ovelavela nave onamuchuneya wiikhinyererya oya o muthukumano mu ohiyu yoole. Nyenya vaavaa nnakookaahu o muthukumano, ikwaha soothene ninniisona okhala oolipiheya nave nrino ikuru sawaaca. Emohamoha enneereya vaavaa nniilipiseryaahu olaleerya ni opaka yoohuserya ya muchu mukhateiye. Miphurelo nnaakhelaahu ti soopwahaxa nalikanyiha ni ikuru n’yelenlaahu!
17. Ntakhara heeni ninnaphwanela okhala oophimelela, nave ephoole taani nnaphwanela okhalano?
17 Nnaphwanela okhala oophimelela. Mmoha ti mmoha a hiyo ookhalano mphimo vooloca sa ikuru sawe. Mwa yeeyo, nnaphwanela okhalano ephoole vaavaa nnathanlaahu murici wa oteesa. Ntoko yootakiherya, naahaala oyeleela ikuru sahu neereryaka othukumanya muhakhu woomwiilini. Ekwaha emoha, mmiravo mmoha aamukoha Yesu: “Keere sheeni wi kaakhele okumi woohimala?” Mmiravo owo aniiwelela Nlamulo. Nave akhweya aari muchu aphaama, woona wi, xaxaxa Muchaka wa Marko, olonce wi Yesu ‘aamuweha amukhwela.’ Voocharela, Yesu aapaka nwopelo ntakhara mmiravo: ‘Hawe, watumihe ichu saa soothene, . . . vaavonto orwe okichareke.’ Mmiravo ole aakhala ookawanyeya. Owo annachuna omuchara Yesu, nyenya hawerya ohiya ichu sawe woona wi ‘aahaacano muhakhu.’ (Mar. 10:17-22) Ntoko Yookhumelela, heemerenrye murici yoowo Yesu amvanheiye nave aatitelela okhala kapuro a “Muhakhu.” (Mat. 6:24) Hanka nyuwaano? Tiheeni mwaahaalaanyu othanla?
18. Tiheeni nnaphwanelaahu opaka elukuluku ti elukuluku, nave ntakhara heeni?
18 Elukuluku ti elukuluku, ti yaphaama ovareryela ichu nnahelaahu vanipuro noopacerya. Ntakhara eheeni? Nthowa nawi eyo enamunikhaviherya woona waakhanle wi ninnapharihela phaama ikuru sahu. Moone yeeyo yeeren’ye ni munna onichaniwa Marko. Owo ooloca: “Mu iyaakha sincipale miyo kaachuna wi mukhalelo aka wookumi okhale wookhweya. Miyo kaari piyoneero, nyenya wiiliwiili kuupuwela okhalano ikhorowa sincipale ni okhalano mukhalelo wa okumi waphaama. Miyo kaaniikoha ntakhara heeni okumi aka waaryaaya woovilasa. Voocharela, kaahiiwexexa wi kaatikitheryeya vancipale ni soochuna saka nave kimvahaka Yehova pahiru ikuru saahalela.” Marko aawerya otoroka mukhalelo awe wa wuupuwela nave aapaka matorokelo a okumi wi akhaleno elukuluku yincipale ya omulapela Yehova. Marko ooloca: “Ikwaha ikina, kinnakhala ooteteiwa. Nyenya nnikhaviheryo na Yehova vamoha ni Yesu, kinnawerya ovootha makacamiho aka.”
19. Ntakhara heeni ti wookhweleya okhalano moonelo woophwanelela?
19 Wakhala wi ninnachuna otitelela okhala oolipiheya ni murici wa Yesu, nnaphwanela opaka ichu chaaru. Mu nipuro noopacerya, mukhaleno moonelo woophwanelela. Woona wi muteko nnaapakaahu ti wa Yehova, owo onaphwanela opakiwa mmukhalelo wa Yehova. Hiyo na anamalapa, nave ti Yehova onavaha malamulo. (Luka 17:10) Weererya opaka muteko mmukhalelo ahu ori ntoko owana ni murici. Mwaanyiherye yeeyo eneereya ni emope yeeyo, ohiya okhala vathi va murici yoowo onahooleliwa ni mwaneene, enneererya ohuluwa wi eye weiwo enachunaayawo. Naamwi eri yakuru, emope enahaala okhala yoovelavela nave enamphiyerya ophoreya. Mmakupa makina, vaavaa nnapakaahu ichu mmukhalelo wa Yehova, sookhumelela sinakhala saphaama. Muupuwelele: Vaavaa Yehova onachuneiye wi yeereye echu, haavo onawerya omuhiiha.—Aro. 8:31; 1 Yoh. 4:4.
20. Tiheeni enaphwanela ooniceenyerya oteesa murici wa Yesu?
20 Mu nipuro nanawiili, mulape ni mathowa oophwanelela. Echu enahaala onceenyerya nri nchuno na omucicimiha Tiithi ahu, Yehova. Achu yaawo mu elukuluku ya Yesu yaalapa nthowa na nrima naari ni nthowa na wiiphwanyerya, moohilekela yaayeleela ohakalala nave yaahiya murici wa Yesu. (Yoh. 6:25-27, 51, 60, 66; Fil. 3:18, 19) Mmakupa makina, yaale yaalapa eceenyeryiwaka ni osivela ntakhara Muluku ni mwaacamani, yaanateesa moohakalala murici wa Yesu mu ekumi aya yoothene veelapo ya vathi ni aahaakhela ewehereryo ya orumeela ni Kristu wirimu. Emohamoha enamweereya ni hiyo. Wakhala wi nooteesa murici wa Yesu ni mathowa oophwanelela, nnahaala olapa moohakalala.
21. Mwawiiwanana ni Mateu 6:31-33, tiheeni nnaphwanelaahu oweherya wi Yehova apake?
21 Mu nipuro naneeraru, mukhaleno soowehererya soophwanelela. Vaavaa nneemereryaahu murici wa Yesu, ninnathanla okusa okumi wa wiikhooca ni muteko wakuru. Ophiyerya wi Yesu ooloca wi nnahaala wiikariwa. Nyenya nnaphwanela oweherya wi Yehova onahaala onivaha ikuru nnachunaahu wi nivilele, moohipwacha nikacamiho nene. Wakhala wi ninnatepa ovilela, nnahaala okhala oolipasa. (Tiy. 1:2-4) Navetho nnaphwanela onweherya Yehova okhapelela soochuna sahu, wi Yesu anikukhule nave anna ni arokora enilipihe. (Mwaalakhanye Mateu 6:31-33; Yoh. 10:14; 1 Tes. 5:11) Moohikhwa minikwa, nookhalano soothene nnachunaahu wi nivilele!
22. Mu eheeni nnaphwanelaahu othamalela?
22 Muthiyana yoole aakhuma nikhami aahiisoona okhala oohakararyeya mu nihiku nenle Yesu aampenunseiye. Nyenya, wi atitelela okhala oohakararyeya okhala wookhala, aaphwanela okhala oohuserya oororomeleya a Kristu. Yoolakelela taani munaanyiheryaanyu wi owo aapaka? Waakhanle wi aathanlile oteexa murici wa Kristu, mwaanyiherye mareeliho aakhenleiye: orumeela ni Yesu wirimu! Mukucho vyakala aapankeiye wi amuchare Kristu hiwaahaala olikana ni mareeliho yaala! Moohipwacha teevi eri yoowehererya ahu—okhala wirimu elukuluku yoothene naari veelaponi ya vathi—nnaphwanela othamalela vancipale weemererya nwopelo wa Yesu: “Rwaani wa miyo!”
NCIPO 13 Kristu Yootakiheryaahu
^ par. 5 Yesu onnaniwopa hiyo wi nrwe wa yoowo. Tiheeni nnaphwanelaahu opaka wi neemererye nwopelo awe? Mwaha ola onahaala waakhula nikoho nenla, nave onahaala onuupuserya mukhalelo nneeraahu niichuuwihiwe moorweela wa olapa vamoha ni Kristu.
