1. Yehova onoona hai vooloca sa achu awiiyeviha? Mutharihe.

YEHOVA onnaasivela achu awiiyeviha. Pahiru yaale anooniherya wiiyeviha weeparipari anamukhalano onthamwene wawaacameleya ni yoowo. Mmakupa makina, “awiirumiha annakhala ocayi ni yaawo.” (Sal. 138:6) Oothene hiyo ninnachuna omuhakalaliha Yehova ni olawiha osivela wawe, mwawiihiiha nookhalano mathowa oophwanelela a ohuserya okhala awiiyeviha.

2. Tiheeni nnahaalaahu othokororya mmwaha yoola?

² Mmwaha yoola, nnahaala othokororya maakhulo a makoho mararu: (1) Wiiyeviha tiheeni? (2) Ntakhara heeni nnaphwanelaahu wunnuwiha wiiyeviha? (3) Mikhalelo taani sinahaala weeha wiiyeviha wahu? Ntoko nnahaalaahu woona, vaavaa nnooniheryaahu wiiyeviha, ninnahakalaliha murima wa Yehova nave hiyaano ninnaphura.—Masi. 27:11; Isa. 48:17.

3. Wiiyeviha tiheeni?

³ Wiiyeviha onarweela mmuupuweloni nave ori ohikhalano moonelo wa wiirumiha. Piipiliya onnathoonyerya wi muchu awiiyeviha onnakhalano moonelo woophwanelela vooloca sa onthamwene awe ni Yehova nave tho ni akhweiye. Muchu awiiyeviha onnasuwela wi muchu ori oothene onnampwaha yoowo mmukhalelo wammoori.—Fil. 2:3, 4.

4-5. Ntakhara heeni muchu onakhala wi tawiiyeviha tahi awiiyeviha chiryene?

⁴ Achu akina anakhala wi tawiiyeviha nyenya tahi awiiyeviha. Awo ananwerya okhalano mukhalelo wa omuchu woomaaleleya. Naari ananwerya okhala oocicimiha ni eepewe wa akina woona wi ti yeeyo asitiithi aya aahusinhaaya weera. Nyenya, mweeparipari awo tahi awiiyeviha. Moohilekela naari moovira wa elukuluku ennooneya vanlakani yeeyo aryaaya mmurimani.—Luka 6:45.

 ⁵ Mmukhalelo mukina, achu akina annooneya ntoko ta wiiroromela nave enaloca yeeyo anuupuwelaaya, nyenya eyo henataphulela wi awo tawiirumiha. (Yoh. 1:46, 47) Nlelo, achu yaawo ahiri awuuliwa muru anaphwanela okhalano ekaasoope wi ehiroromele mavyakelo aya. Moohiphwacha ohuuliwa muru naari hooye, oothene ahu nnaphwanela wiilipixerya vancipale wi nikhale a wiiyeviha moomalela.

6. Ntoko yooniheryiwaaya mu 1 Korinto 15:10, tiheeni nnahuseryaahu orweela wa yootakiherya ya murummwa Paulo?

⁶ Muthokororye yootakiherya ya murummwa Paulo. Yene aahiphariheliwa muteko vancipale ni Yehova wi atikitherye miloko mivyaani mu ipooma soohiyana hiyana. Akhweya owo aahipaka sincipale mmuteko woolaleerya waapwaha arummwa akina a Yesu. Nyenya, Paulo hiisoona okhala a vasulu waapwaha anna awe. Mwa wiiyeviha, owo aaheemererya: “Miyo kiri mukhaani a arummwa nave honakiphwanela weeriwa murummwa, ntakhara kaaniikara muloko wa Muluku.” (1 Kor. 15:9) Voocharela, Paulo aaloca wi pahiru aanawerya okhalano onthamwene wa waphaama ni Yehova nthowa na mahala a Muluku, ohiya nthowa na mikhalelo sawe naari ichu aapankeiye. (Mwaalakhanye 1 Korinto 15:10.) Nla nihusiheryo naphaama na wiiyeviha Paulo onivanheiye mu ekaarata awe wa Akorinto—xaxaxa vaavaa olonceiye wi alopwana akina mmulokoni yaanaavya okhala atokweene ompwaha Paulo!—2 Kor. 10:10.

7. Ti mwawiihai munna mmoha oosuweliwa vancipale oonihenryeiye wi aari awiiyeviha?

⁷ Yaweereya emoha ya okumi yoolipiha vancipale ti ya munna Karl Klein, yoowo aapanke makupa mu nikhuuru noolamulela. Mu yaweereya ya okumi awe, munna Karl oheemererya mwawiiyeviha makacamiho mancipale yaawo aahoolenleiye mu okumi  awe. Ntoko yootakiherya, owo oothariha wi, mu eyaakha ya 1920, aahipaka makupa mmuteko woolaleerya wa empa ni empa mu ekwaha yoopacerya. Nyenya oonne eyo okhala yoovila nave aahilakelela ookiraathi owaani iyaakha piili ahikhumme wanaawiili mmuteko woolaleerya. Evinrevo elukuluku, vaavaa aakhaleiye Opeteli, munna Karl aahikuha mathowa elukuluku yincipale ntakhara munna yoowo amvanhe ekano. Ohiya yeeyo, owo aanahooxeya ni ereca ya mmuupuweloni, nave voocharela aahipenuwa. Naamwiihiiha Karl aahaakhela mirici mincipale sookhweleya. Vano mwaanyiherye: naamwi aari munna osuweliwa vancipale, Karl aari awiiyeviha nave huuliwe muru weemererya sooceecheya sawe wa achu oothene! Tahi siiyo ene anna ni arokora ancipale anamuupuwelaaya moosivela Karl ni yaweereya ya okumi awe yooreeraxa. *

8. 1 Pedro 5:6 onooniherya hai wi wiiyeviha onnamuhakalaliha Yehova?

⁸ Nthowa ntokweene wi nikhale awiiyeviha ti nawi eyo ennamuhakalaliha Yehova. Murummwa Petro aahooniherya vanlakani eyo. (Mwaalakhanye 1 Pedro 5:6.) Atharihaka masu a Petro, liivuru “Venha Ser Meu Seguidor” oni: “Wiirumiha ori ntoko echu yaawiipha. Sookhumelela saya inanwerya okhala soonanara. Mukhalelo yoowo oni omweerihe muchu orino mavyakelo mancipale okhala oohikhweleya wa Muluku. Mmakupa makina, wiiyeviha wookhalano owerya wa omweeriha muchu ohirino mavyakelo okhala okhweleya vancipale wa Yehova. . . . Muluku onahaala okhala ohakalala wooreelihaani ntakhara wiiyeviha wanyu.” * Apwanne yookhalavo echu eri yaphaamaxa opwaha ohakalaliha murima wa Yehova?—Masi. 23:15.

9. Wiiyeviha onaweeriha hai achu onaacamela hiyo?

⁹ Ohiya pahiru omuhakalaliha Yehova, wiiyeviha onnanikhaliha phaama hiyo mukhatiihu. Owo mukhalelo mmoha yoowo onahaala owaacameliha achu wa hiyo. Mwawiihai? Mweererye wiihela mu nipuro na akina. (Mat. 7:12) Apwanne nyuwaano mwaahaala osiveliwa omukhaliha muchu yoowo onachuna pahiru opaka soothene mmukhalelo awe ni ohinapwacha moonelo wa akina? Mmakupa makina, tahi yaphaama okhala ni anna vamoha ni arokora yaawo ari “ookhwelana mmulokoni, a niphwanya, ni awiiyeviha”? (1 Ped. 3:8) Waakhala wi ninnasiveliwa okhala vakhiviru ni achu ntoko yaala, nnaphwanela okhala  a wiiyeviha wi awo tho ekhaleno nchuno na okhala vakhiviru ni hiyaano.

10. Mmukhalelo taani wiiyeviha onnakhweiha ekumi ahu?

¹⁰ Wiiyeviha tho onnakhweiha ekumi ahu. Sinamukhalavo ilukuluku nnahaalaahu woona ichu seiyo mmoonelo ahu sihinahaala okhala soophwanelela naari sawookololowa. Namiruku mwene Solomoni ooloca: “Koowoona akapuro yaawenle akhavalo, achu oosuwanyeya yeecaka vathi ntoko akapuro.” (Ekle. 10:7) Achu arino mavyakelo mancipale tahi wi ilukuluku soothene annaakhela ncicimiho anaphwanelaaya. Nyenya achu arino mavyakelo vakhaani wiiliwiili annaakhela ncicimiho nawaaca. Naamwi hiiha, Solomoni aahiloca wi yaphaama weera ori weemererya mukhalelo ahu, ohiya otikitherya muupuwelo ahu mu ichu soohiphwanelela. (Ekle. 6:9) Waakhala wi naachu awiiyeviha, onahaala okhala wookhweya weemererya okumi hiiha ntoko okhanlaaya—ohiya mukhalelo nuupuwelaahu wi waaphwanela okhala.

11. Tiheeni nnaphwanelaahu weera vaavaa nnaakhelaahu ekano?

¹¹ Mahiku oothene, nookhalano ikari sincipale sa wooniherya wi naachu awiiyeviha. Hankooni nthokororye mikhalelo mikina. Ntoko yootakiherya, vaavaa nnaakhelaahu ekano. Ilukuluku ntoko seiya, ti yaphaama wuupuwelela wi, waakhala wi mukina ohuukhuwa onivaha ekano, ti nthowa nawi yoohesa ahu yoopwaha mphimo. Akhweya woopaceryani yoolakelelaahu onamukhala ookhooca ekano. Nnanwerya omwaakaaha muchu yoowo anivanhe ekano naari mukhalelo owo onivanheiye ekano. Nyenya wakhala wi naachu awiiyeviha chiryene, nnahaala wiilipixerya opwacha ekano eyo mmukhalelo woophwanelela.

12. Mwawiiwanana ni Masiposipo 27:5, 6, ntakhara heeni ninnaphwanela omuthamalela munna, naari murokora yoowo onivanhe ekano? Mphwanaphwanihe.

¹² Muchu a wiiyeviha onnathamalela vaavaa onavahiweiye ekano. Wi nlikanyihe: Nkuupuwelelani niphwanaphwaniho nla: Mwaanyiherye wi muri mu Empa ya Omwene. Mmanle waalociha anna oohiyana hiyana, mmoha a yaawo onnookusaani ookerihakaani okhwipi nave onnaloca vathi-vathi: “Yookhala yoolya yanke veeri va meeno anyu.” Moohikhwa minikwa, nyuwo mwaahaala wuuliwa muru. Apwanne himwaahaala omuthamalela munna naari murokora yoowo oolenleeni? Nyuwaano akhweya mwaamuchuna mwaaleeliwe yeeyo woosiilo! Moolikanela, waakhala wi munna moolipa murima oonivaha ekano yeeyo naachunaahu, nnaphwanela okhala awiiyeviha  nave nthamalele. Nnaphwanela omoona munna naari murokora yoowo ntoko nthamwene, ohiya ntoko mwiicani.— Mwaalakhanye Masiposipo 27:5, 6; Gal. 4:16.

13. Nni nooniherya hai wiiyeviha vaavaa akina anaakhelaaya mirici mmulokoni?

¹³ Vaavaa akina anaakhelaaya mirici. Mutokweene mmoha nsina nawe Yasoni onneemererya: “Elukuluku kinawonaaka akina yaakhela mirici, ikwaha ikina kinnuupuwela ntakhara heeni kihithanliwaaka.” Apwanne montoko wuupuwela mmukhalelo yoola? Tahi yoonanara ‘ochuna muteko woohoolela’, vooloca sa murici mutokweene. (1 Tim. 3:1) Nyenya nnaphwanela okhapelela muupuwelo ahu. Wakhala wi hinaano ephoole, nnahaala weemererya wi wiirumiha wunnuwe mmurimani mwahu. Ntoko yootakiherya, Mukristu yoowo ori munna onahaala opacerya wuupuwela wi ti yooworu ori oophwanelelasa waakhela mirici. Naari Mukristu yoowo ori murokora, akhweya onamuupuwela, ‘Aiyaka aakhalano mavyakelo a waakhela mirici ompwaha munna ole!’ Nyenya wakhala wi naachu awiiyeviha, hinnahaala wuupuwela mmukhalelo yoola.

14. Tiheeni nnahuseryaahu orweela wa moonelo wa Mose vaavaa akina yaakhenlaaya mirici?

¹⁴ Nnanwerya ohuserya sincipale orweela wa yootakiherya ya Mose. Moohikhwa minikwa, owo anavaha esisapo etokweene murici awe wa ohoolela nloko na Aisarayeli. Mose oonne hai vaavaa Yehova aaweemerenryeiye akina wi elape vamoha ni yoowo? Owo haakhalenle nrima. (Nam. 11:24-29) Owo tho aahooniherya wiiyeviha vaavaa aakawanneiye ni achu akina muteko wa waathoriha achu. (Muk. 18:13-24) Mose haahenle mirici sawe mu nipuro noopacerya opwaha okhala phaama wa achu. Owo anasuwela wi okhalano achu ancipale yaathorihaka Aisarayeli yaataphulela oophara muteko waphaama ntakhara nloko. Ela yootakiherya yaphaama wa hiyaano! Hinnaphwanela ocuwala wi, waakhala wi  ninnachuna okhala ookhweleya wa Yehova, wiiyeviha onaphwanela okhala vahoolo ohiya mavyakelo ahu. Muupuwele ela, “Nari Apwiya aryaaya wirimu, annaathokororya awiiyeviha.”—Sal. 138:6.

15. Matorokelo taani anna ancipale ahoolenlaaya?

¹⁵ Vaavaa nnahoolelaahu matorokelo. Mu iyaakha sa hiihaanoru, anna yaarino mavyakelo a orumeela mu iyaakha sincipale atoroka muteko aya. Ntoko yootakiherya, mu eyaakha ya 2014, ooweherya a etistritu ni asaaraya yaahiwompwa wi erumeele mmiteko mikina sa elukuluku yoothene. Nave Nikhuku Noolamulela naahilakelela wi opacerya eyaakha yeele, iyaakha sookiserya wi munna arumeele ntoko ooweherya a ekulucu saahaala okhala 70, nave ntoko muhooleli a nikhuku na atokweene a muloko saahaala okhala 80. Ohiya yeeyoru, mapetelita mancipale yaahithanliwa wi erumeele ntoko mapiyoneero. Nyenya akina yaari mmuteko wavameekhaaya yaahihiya orumeela nthowa na makacamiho a ekumi, mirici sa veechokoni naari mathowa makina a muchu mukhateiye.

16. Ti mwawihai anna ni arokora oonihenryaaya wiiyeviha vaavaa yaahoolelaaya matorokelo?

¹⁶ Matorokelo yaala hiyaari ookhweya wa anna ni arokora yaale opaka. Moohikhwa minikwa, awo yaari mmuteko mmohamoha mu iyaakha sincipale nave yaanasiveliwa vancipale ni yoowo. Vano, vaavaa yaakhenlaaya muteko muvyaani, yaahihoolela elukuluku “yoothananiha” vaavaa yiikhovelelihaaya. Nyenya moovira wa elukuluku yaawerya wiikhoveleliha phaama. Mwawiihai? Opwaha soothene, nthowa nawi anna yaala ni arokora annamusivela vancipale Yehova. Awo aasuwela wi yiiveleenle wa Muluku—ohiya wa muteko, ovuwa naari murici. (Kol. 3:23) Awo annakhala oohakalala otitelela omurumeela Yehova mwawiiyeviha moohipwacha mmukhalelo taani. Awo ‘wiipiwa waya murima woothene anarula wa yoowo’, ntakhara wi aasuwela wi Yehova onnaathokororya.—1 Ped. 5:6, 7.

17. Ntakhara heeni ti yaphaama ochariha yeeyo masu a Muluku ananleelaaya vooloca sa okhala awiiyeviha?

¹⁷ Ninnathamalela vancipale woona wi masu a Muluku annanceenyerya okhala aachu awiiyeviha! Vaavaa nnakhalaahu a wiiyeviha, hiyo ninnaphura nave tho akina annaphura. Ninnawerya owaniha phaama ni makacamiho a okumi. Nyenya echu yoochuneyaxa, ninnamwaacamela Tiithi ahu a wirimu. Ti yoohakalaliha osuwela wi naamwi Yehova ari “Awirimurimu, opwahasha”, ookhalano osivela otokweene ni achu awiiyeviha nave onawoona ntoko tasisapo!—Isa. 57:15.