1-2. (1) Mwawiiwanana ni Masiposipo 16:31, ti mwawiihai nnaphwanelaahu owoonaka anna ni arokora awuuluvala ari oororomeleya? (2) Makoho taani nnahaalaahu waakhula mmwaha yoola?

O ESTATU Unitu nookhalawo nipuro weiwo alipa aweecelela mapuro anaweryaaya ophwanyawo maluku asisapo oohikhala eeparipari. Nyenya maluku yaala hiyintonko orehereryiwa wi ephariheliwe mu ichu ntoko ipirinku, amuneela, ikolaare naari ichu ikina. Ntoko yookhumelela, ancipale yaawo anoona maluku yaala hanawerya osuwela wi tasisapoxa nave hanapwacha.

² Moolikana ni maluku yaala asisapo, anna ni arokora ahu awuuluvala toochuneyaxa vancipale. Masu a Muluku annalikanyiha ipwi sa anna yaala ni ekhara ya ncicimiho. (Mwaalakhanye Masiposipo 16:31; 20:29) Vaavaa amiravo anasuwelaaya wi anna awuuluvala toochuneyaxa, awo annaphuravo echu yoochuneyaxa opwaha muhakhu. Mmwaha yoola nnahaala waakhula makoho mararu: Ntakhara heeni Yehova onnawoona anna ni arokora awuuluvala oororomeleya wi tasisapo? Ntakhara heeni anna ni arokora awuuluvala tookhweleya mmarehereryo a Yehova? Tiheeni nnahaalaahu ohuserya orweela wa sootakiherya saya?

3. Mwawiiwanana ni Salumu 92:12-15, ntakhara heeni anna awuuluvala ari oororomeleya toochuneya wa Yehova?

³ Anna awuuluvala ari oororomeleya tasisapo wa Yehova Muluku. Owo onnoona mukhalelo aya wa mpuwa, nave onnaasuwela ni onnavaha esisapo mikhalelo saya saphaama. Owo onnahakalala vaavaa onawooneiye anna awuuluvala yaavahaka miruku anna yaawo ari amiravo seiho aphwannyaaya variyari va muteko aya woororomeleya. (Yobi 12:12; Masi. 1:1-4) Yehova tho onnavaha esisapo ovilela waya. (Malak. 3:16) Awo aahoolela makacamiho mancipale mookumini mwaya, nyenya annatitelela olipiha nroromelo naya mwa Yehova. Ewehereryo aya ya omwaahiyu  ti yoolipa opwaha vaavaa yaapacenryaaya ohuserya eparipari. Nave Yehova onnaasivela nthowa nawi annatitelela olaleya nsina nawe “naari yuuluvanle.”—Mwaalakhanye Salumu 92:12-15.

4. Tiheeni enahaala waalipiha anna ni arokora ahu awuuluvala?

⁴ Waakhanle wi mohuuluvala, muroromele wi Yehova onnuupuwelela muteko yoowo mpankaanyu muculi. (Ahe. 6:10) Nyuwaano mwaahikhala amvai mukhaviheryaka muteko woolaleerya, nave ela ennamuhakalaliha Tiithi ahu a wirimu. Moovilela ni makacamiho, ophitaanyerya yaawo yaaweerihaani okhala ooceecheya. Mwaaniilipixerya wiiwelela ni waakiha malakiheryo awookololowa a Mpiipiliyani, mwaanakhapelela mirici seiho mwaavahiwaanyu moororomeleya mmarehereryo a Yehova, ni waavyakiha akina. Mwaanapaka owetha wanyu wi mwiikhovelelihe matorokelo mancipale yaawo yaapakiwa mmarehereryo a Yehova. Mohaakhaviherya ni waalipiha akina yaawo ari mmuteko wa elukuluku yoothene. Yehova Muluku onnoosivelaani vancipale nthowa na ororomeleya wanyu. Owo oororomeliha wi harwa ‘aahiya òroromeleya awe!’ (Sal. 37:28, BNM) Owo onnoororomelihaani: “Kinamokhapelelanitho ophiyerya wuluvala wanyu, kinamolipihani ophiyerya omela ipwi.” (Isa. 46:4, BNM) Mwawiihiiha muhirwe muupuwele wi nthowa na iyaakha sanyu, hamuri tho oochuneya mmarehereryo a Yehova. Munaphwanela ororomela wi nyuwaano mwa muchu asisapo!

5. Tiheeni awuuluvala anaphwanelaaya wuupuwelaka?

⁵ Awuuluvala ananwerya ophariheleya mmikhalelo soohiyanahiyana mmarehereryo a Yehova. Naamwi ehirino ikuru ntoko khalai, awo aakhalano mavyakelo mancipale yaawo aphwannyaaya moovira wa iyaakha. Yehova onanwerya otitelela waapharihela mmikhalelo soohiyanahiyana, ntoko sootakiherya sakhalai ni sahiihaano sinacharela sinooniheryaaya.

6-7. Mvahe sootakiherya sa Mpiipiliyani sa awuuluvala yaawo yaakhenle mareeliho nthowa na omulapela Yehova moororomeleya.

⁶ Nnanwerya ophwanya sootakiherya saphaama Mpiipiliyani sa achu oororomeleya yaawo yaatitelenle omurumeela Yehova naamwi yuuluvanle. Ntoko yootakiherya, Mose aarino iyaakha 80 vaavaa aapacenryeiye orumeela ntoko mulipa a miririmu a Yehova ni vaavaa  aathanliweiye okhala muhooleli a nloko na Aisarayeli. Mwawooneya vaavaa Taniyeli aareiyeno iyaakha opwaha 90, Yehova aahititelela ompharihela owo ntoko mulipa a miririmu. Nave tho ti yawooneya wi murummwa Yohani aarino iyaakha 90 vaavaa owo aaveereliweiye omurepa liivuru a Wupulula.

⁷ Achu akina oororomeleya hasuweliwe phaama, nave achu ananwerya ohoona yeeyo yeenraaya. Naamwi hiiha, Yehova aanawoona yaawo nave aahaachuwela nthowa na ororomeleya waya. Ntoko yootakiherya, Siimiyoni mulopwana “awookololowa murima ni oomucicimiha Muluku” onalociwa vakhaani Mpiipiliyani, nyenya Yehova aahimusuwela yoowo nave aahimvaha ekari ya omoona Yesu ari mwaana ni oloherya vooloca sa yoowo ni amama awe. (Luka 2:22, 25-35) Mmuupuwele tho Ana, naamukhwele yoowo aari mulipa a miririmu. Owo aarino iyaakha 84 nyenya “hávinya o’mpa ya Muluku.” Yehova aahimureeliha nthowa na ophiya mu empa ya Muluku moohihiyererya nave owo aahimweemererya omoona Yesu ari mwaana. Oopiili aya, Siimiyoni ni Ana yaari oochuneya wa Yehova.—Luka 2:36-38, NN.

8-9. Tiheeni murokora mmoha yoowo ori naamukhwele onapakeiye mmarehereryo a Yehova?

⁸ Mmahiku ahu, anna ancipale awuuluvala oororomeleya sootakiherya saphaama wa amiravo. Muthokororye yaweereya ya Murokora Lois Didur. Owo aarino iyaakha 21 vaavaa aapacenryeiye orumeela ntoko piyoneera avameekheiye o Kanata. Ohoolo waya, owo ni aiyawe John, yaahimaliha iyaakha sincipale mmuteko wa weeceeca. Ohoolo waya awo yaaya orumeela Opeteli yo Kanata iyaakha opwaha 20. Vaavaa Lois aareiyeno iyaakha 58, owo ni aiyawe yaavahiwa murici mukina o Ukraniya. Tiheeni yaahaalaaya weera? Apwanne yaahaala wuupuwela wi awo ahuuluvala nave hiyaarino owerya wi yarumeele elapo ekina? Awo yaaheemererya murici yoola, nave aiyawe yaahithanliwa wi erumeele ntoko mmoha a Nikhuuru na Efiliyale mu elapo yeele. Ohoolo waya ivinre iyaakha thanu napiili John aakhwa, nave Lois aalakelela otitelela mmuteko awe. Lois vano orino iyaakha 81. Nyenya onnatitelela omurumeela Yehova vamoha ni emusi yo Peteli yo Ukraniya, nave oothene annamusivela vancipale.

⁹ Anaamukhwele ancipale ntoko Lois ananwerya ohisuweliwa vancipale hiiha ntoko yaakhanlaaya asiiyaya eri akumi; naamwi hiihaa, awo toochuneyaxa. Yehova onnatepa waavaha esisapo arokora yaawo yaakhavihenrye asiiyaya mu iyaakha sincipale nave nlelo anatitelela omurumeela owo moororomeleya. (1 Tim. 5:3) Mweeparipari, awo annaalipiha vancipale amiravo.

10. Yootakiherya taani yaphaama Tony otikithenryeiye?

¹⁰ Anna ancipale awuuluvala ari oororomeleya yaawo anakhala mmapuro onakhapeleliwamo achu awuuluvala toochuneya tho. Ntoko yootakiherya, munna yoowo oniichaniwa Tony ori mmukhalelo yoola. Owo aapatisiwe o Pennsylvania, E.U.A., mu Akostu a 1942 arino  iyaakha 20. Elukuluku vakhaani amanle opatisiwa aalamuleliwa wi akhale mukhoco. Nthowa na okhooca weerano yeela, owo aahiwaleliwa mukariposo iyaakha piili ni emeya. Owo ni amwaariye Hilda, ahaaphuwa anamwane eeli mu eparipari. Mu iyaakha sincipale, Tony oorumeela ntoko muhooleli mmiloko miraru (olelo anasuweliwa ntoko muhooleli a nikhuuru na atokweene) nave tho ntoko ooweherya a muthukumano wa ekulucu. Owo aanahoolela mithukumano ni weeciha soohuserya sa Piipiliya mukariposo. Vaavaa oreiyeno iyaakha 98, Tony hamaanle omurumeela Yehova. Owo onnatitelela opaka owetha wawe wi amurumeele Yehova vamoha ni anna ni arokora a muloko awe!

11. Nni nooniherye hai wi ninnaacicimiha yaale anakhala mmapuro onakhapeleliwamo achu awuuluvala?

¹¹ Nni nooniherye hai ncicimiho wa anna awuuluvala yaawo anakhala mmapuro onakhapeleliwamo achu awuuluvala? Wakhala wooweryeya, atokweene ananwerya waakhaviherya awo ophiya naari owiriyana mithukumano ni olaleerya. Nnanwerya wooniherya opwacha moorweela wa waaxekurya naari waawopa wi nchekuleno moorweela wa vídeo conferência. Nnaphwanela owooniherya opwacha wavameekhaaya awuuluvala yaawo anakhala mmapuro onakhapeleliwamo awuuluvala ari ocai ni muloko aya. Wakhala wi hanri oovareryela, nnanwerya waacuwala awuuluvala yaala. Vaavaa nnachekulaahu ni anna yaala awuuluvala, wa akina onanwerya okhala woovila oloca mukhalelo aniisoonaaya. Nyenya enanwerya okhala yoolipihaxa vaavaa nnaphwanyaahu elukuluku wi naakohe ni waawiriyana vaavaa ananleelaaya ohakalala yoowo aphwannyaaya mmarehereryo a Yehova.

12. Anna a mukhalelo taani nnahaalaahu waaphwanya mmuloko ahu?

¹² Nnanwerya otikhiniheya osuwela wi mmuloko ahu aakhalamo anna awuuluvala ari oororomeleya yaawo ari sootakiherya saphaama. Murokora awiichaniwa Harriette aanamurumeela Yehova moororomeleya mu iyaakha sincipale mmuloko awe o Nova Jersey, E.U.A. Voocharela owo aathaama aya anakhala ni mwanawe a mwaamuthiyana. Anna a muloko awe muvyaani yaanamaliha elukuluku wi emusuwele yoowo, nave awo yaahoona wi toochuneya. Owo aahaalipiha yaawo ni saweereya sa muteko woolaleerya vaavaa owo aahusenryeiye eparipari variyari va eyaakha ya 1925. Ilukuluku soothene aayaaka mmuteko woolaleerya, owo aanakusa exikova yookuchano miino nthowa nawi aanasuwela wi aanwerya owaleliwa mu elukuluku vyakala. Mweeparipari, ikwaha piili mu eyaakha ya 1933 owo aahimaliha esumana emoha mukariposo. Mu elukuluku yeele, aiyawe hiyaari Namoona a Yehova, nyenya yaanamukhaviherya. Vaavaa aareiye mu kariposo, awo tho yaanaakhapelela anamwane aya araru. Mweeparipari, awuuluvala ntoko Harriette annaphwanela ocicimihiwa!

13. Tiheeni nnahaalaahu ohuserya moorweela wa waacicimiha anna awuuluvala mmarehereryo a Yehova?

¹³ Anna ni arokora ahu awuuluvala toochuneyaxa wa Yehova ni mmarehereryo awe. Awo ahoona mukhalelo Yehova oreelinheiye marehereryo awe mmikhalelo soohiyanahiyana ophitaanyerya yaawo aneene. Awo aahuserya sincipale orweela wa soohesa seiho yaapakaaya. Nwooneke yaawo ntoko “naacuucu a miruku,” nave muhuserye orweela wa saweereya saya. (Masi. 18:4) Wakhala wi munnaavya elukuluku wi mwaasuwele yaawo, nroromelo nanyu nnahaala okhala noolipa nave munahaala ohuserya sincipale ni yaawo!

14. Tiheeni Malamulo 32:7 onaaceenyereiye amiravo opaka?

¹⁴ Mukhale muni mpacerye oloca ni anna awuuluvala. (Mwaalakhanye Malamulo 32:7.)  Eparipari wi awo ananwerya ohoona phaama, ohaakuva, nave ohiloca phaama. Nyenya awo annachuna oya vahoolo, nave aapaka “nsina notxitximiheya” ni Yehova. (Ekle. 7:1, BNM) Muupuwele ntakhara heeni Yehova onnawoona okhala asisapo. Mutitelele owooniherya ncicimiho. Mukhale ntoko Eliseu. Owo aahimwaakeelela Eliya mu nihiku nookuchula okhala vamoha ni yoowo. Ikwaha raru owo aaloca: “Nkirwa koohiyaani.”—2 Mam. 2:2, 4, 6.

15. Makoho taani nnaphwanelaahu waapakela anna awuuluvala?

¹⁵ Mooniherye opwacha weeparipari wa awuuluvala moorweela wa waapakela makoho ni owiriyana maakhulo aya. (Masi. 1:5; 20:5; 1 Tim. 5:1, 2) Mwaapakele makoho ntoko ala: “Mwaaryaanyu mmiravo, tiheeni yoolekencheeni wi moophwanya eparipari?” “Ichu taani seeren’ye mu okumi anyu seiho sookhavihenryeeni omwaacamela Yehova?” “Tiheeni yookhavihenryeeni otitelela okhala oohakalala mmuteko wa Yehova?” (1 Tim. 6:6-8) Voocharela nwiriyane phaama vaavaa awo anooleelaayaani saweereya saya.

16. Ti mwawiihai ochekula vamoha oneeraaya waakhaviherye awuuluvala ni amiravo?

¹⁶ Vaavaa munna ori awuuluvala ni munna ori mmiravo anachekulaaya vamoha, ooweeli annalipiheya. (Aro. 1:12) Nyuwaano amiravo munahaala waaceererya othamalela wanyu vooloca sa mukhalelo Yehova onaakhapeleleiye alapeli awe oororomeleya, nave awuuluvala anahaala wiisoona okhala oosiveliwa. Awo anahaala ohakalala wooleelaani mukhalelo Yehova aareelinheiye.

17. Ntakhara heeni nnanwerya oloca wi anna awuuluvala annakhala ooreera moovira wa iyaakha?

¹⁷ Oreera woomwiilini onnamala nthowa na wuuluvala, nyenya yaale anamurumeela Yehova moororomeleya annakhala ooreera wa yoowo naamwi ivinrevo iyaakha sincipale. (1 Tes. 1:2, 3) Ntakhara heeni ela eparipari? Nthowa nawi moovira wa iyaakha, awo yaaneemererya wi munepa waweela wa Muluku waavyakihe ni waakhaviherya okhalano mikhalelo saphaama. Vaavaa nniilipixeryaahu wi naasuwele anna ni arokora ahu awuuluvala, waacicimiha ni ohuserya orweela wa yaawo, nnahaala owoonaka awo ntoko asisapo!

18. Tiheeni nnahaalaahu othokororya mmwaha onacharela?

¹⁸ Muloko onnakhala woolipa ohiya pahiru vaavaa anna ari amiravo anaavahaaya esisapo anna awuuluvala nyenya tho vaavaa anna awuuluvala anaacicimihaaya amiravo. Mmwaha onacharela, nnahaala othokororya mukhalelo anna awuuluvala aneeraaya yooniherye ncicimiho wa anna yaawo ari amiravo mmulokoni.