1. Ti mwawiihai wiikariwa mmulokoni wa oosiveliwa onaavolowelaaya akina?

APWANNE mookhalano oosiveliwa anyu yoowo iikariwe mmulokoni? Ela enanwerya okhala yawiicela! Murokora oniichaniwa Hilda, ooloca: “Vaavaa aiyaka yaakhwilaaya nimalinhe iyaakha 41 mu othela, kuupuwela wi ela yaari echu yawiicelaxa yeeyo kahintonkaaka ohoolela. * Nyenya vaavaa mwanaka, amwaariye ni anamwane awe yiikariwaaya mmulokoni eyo yaari yawiicelaxa wa miyaano.”

2-3. Mwawiiwanana ni Salumu 78:40, 41, ti mwawiihai Yehova onooneiye vaavaa alapeli awe anamuhiyaaya yoowo?

² Muupuwele mukhalelo Yehova aasoosen’yeiye murima vaavaa ankeelo akina yaapaka makupa mu emusi awe yaammwarenlaaya yoowo! (Yuda 6) Nave mwaanyiherye mukhalelo aathananeiye vaavaa aawooneiye achu awe oosiveliwa, Aisarayeli, emmwaaryeelaka yoowo mwawuuluulela. (Mwaalakhanye Salumu 78:40, 41.) Muroromele wi Tiithi ahu oosivela a wirimu onnathanana tho vaavaa onamooneiye muchu yoowo munamusivelaanyu amuhiyaka yoowo. Owo onniiwexexa othanana yoowo munakhalaanyuno. Owo moosivela onahaala ovahererya nlipiho nnikhaviheryo munachunaanyu.

³ Mmwaha yoola, nnahaala othokororya tiheeni nnaphwanelaahu weera wi naakhele nikhaviheryo na Yehova wakhala wi muchu yoowo nnamusivelaahu oohiya omurumeela yoowo. Nnahaala tho othokororya mukhalelo nneeraahu naakhaviherye akina mmulokoni yaawo anahoolela nikacamiho nenla. Nyenya voopaceryani, nnahaala othokororya muupuwelo woohiphwanelela nnaphwanelaahu osepa.

4. Asitiithi ancipale aniisoona hai vaavaa mwanaya a mwaamulopwana naari amwaamuthiyana onamuhiyeiye Yehova?

⁴ Vaavaa mwaana a mwaamulopwana naari amwaamuthiyana oochuneya onamuhiyeiye Yehova, ti yawunlaana wa asitiithi wiiphwanyerya  mathowa wi yaaphwanela opaka sincipale wi emukhaviherye mwanaya otitelela okhala mu eparipari. Mwanawe amanle wiikariwa mmulokoni, munna awiichaniwa Luke onneemererya: “Kaaniiphwanyerya mathowa. Ophiyerya wi kaanaloha soonanara vooloca sa yeela. Ilukuluku ikina kaaninla nave murimaaka waanakisoosa.” Elizabeth yoowo mwanawe iikariweiye tho mmulokoni, aanuupuwela: “Tiheeni kenraaka yoonanara ntoko mai? Kaaniisoona wi kaaphwanela omuhusihaka mwanaka iparipari mwawuuluulela.”

5. Taani onakhalano nthowa vaavaa muchu onamuhiyeiye Yehova?

⁵ Nnaphwanela wuupuwela wi Yehova oomvaha mmoha ti mmoha a hiyo yamahala ya othanla wootaphuwa. Ela enataphulela wi hiyaano nnanwerya othanla omwiiwelela yoowo naari hooye. Anamwane akina hiyaano asitiithi arino yootakiherya yaphaama, nyenya awo aalakelela omurumeela Yehova ni omuroromela yoowo. Akina aakhalano asitiithi yaawo yiilipixenrye vancipale waahusiha omusivela Yehova, nyenya ohoolo waya ehiya omurumeela yoowo. Mwawiihiiha mmoha ti mmoha a hiyo onaphwanela olakelela waakhanle wi onahaala omurumeela Yehova. (Yos. 24:15) Mwa yeela, asitiithi yaawo ari awuukhuwa nthowa nawi mwanaya oohiya omurumeela Yehova, hanaphwanela wuupuwela wi nthowa ti nawaya!

6. Ti mwawiihai anamwane anavoloweliwaaya vaavaa asitiithi aya anahiyaaya omurumeela Muluku?

⁶ Ilukuluku ikina, tiithi onnahiya eparipari nave tho ophiyerya ohiya emusi awe. (Sal. 27:10) Ela enanwerya okhala yawiicelaxa wa anamwane yaawo yaamoona tiithi aya okhala yootakiherya aya. Esther, yoowo atiithi awe yiikariwe mmulokoni, ooloca: “Ikwaha ikina kaananla nthowa nawi kaahisuwela wi awo hiyaarimoona ohiya eparipari moohisuwela. Awo yaarimulakelela othanla ohiya omurumeela Yehova. Kinnaasivela apapa aka, mwawiihiiha vaavaa yiikariwaaya mmulokoni, ilukuluku soothene kaanuukhuwa vooloca sa okhala waya phaama. Ophiyerya tho wi kaanakhala oohaleeliheya.”

7. Yehova onoona hai vooloca sa amiravo yaawo asitiithi aya yiikariwe mmulokoni?

⁷ Amiravo nyu, waakhanle wi mmoha a asitiithinyu ohiikariwa mmulokoni, ninnoothananelaani vancipale! Munaphwanela tho ororomela wi Yehova onnasuwela mukhalelo munahooxeyaanyu. Owo onnoosivelaani nave onnahakalala woona wi munnatitelela omurumeela yoowo moororomeleya. Nave tho hiyaano, anna ni arokoraanyu mmulokoni, ninnahakalala tho. Muupuwele tho wi nyuwaano himwaano nthowa wa soolakelela sa asitiithi anyu. Hiihaa ntoko elociwaaya woopaceryani, Yehova oomvaha mmoha ti mmoha yamahala ya othanla woochuna. Nave muchu ori oothene yoowo iivelenle ni opatisiwa onaphwanela ‘oteexa murici awe.’—Gal. 6:5.

8. Tiheeni amusi oororomeleya anaphwanelaaya weera vaavaa anaweheryaaya wi oosiveliwaaya akookele wa Yehova? (Moone tho ekaaxa “ Kookelani wa Yehova.”)

⁸ Vaavaa muchu yoowo mwaamusivelaanyu onamuhiyeiye Yehova, ti yawiiwexexeya wi munnakhalano ewehereryo wi nihiku nikina owo onarwa amukookela Yoowo. Tiheeni munaphwanelaanyu weera mweelukuluku yeeyo munawehereryaanyu? Mpake soothene munaweryaanyu wi mutitelele olipiha nroromelo nanyu. Mweerano yeela, munahaala otikitherya yootakiherya yaphaama wa achu a veemusini vanyu nave  tho akhweya wa muchu yoowo iikariwe mmulokoni. Munahaala tho ophwanya ikuru seiho munachunaanyu wi nvilele ni wiicela. Tiheeni munaphwanelaanyu weera wi mutitelele olipiha nroromelo nanyu?

9. Mmikhalelo taani muneeraanyu nwerye ophwanya ikuru soorweela wa Yehova? (Moone tho ekaaxa “ Soorepa Seiho Sinahaala Woolipihaani Wakhala wi Oosiveliwa Anyu Oohiya Omurumeela Yehova.”)

⁹ Mutikitherye yoolakelela yaphaama ya opaka ichu soomunepani. Ti woochuneyaxa wa nyuwaano otitelela okhala oolipa vamoha ni achu a veemusini vanyu. Muni mweereno hai yeela? Mphwanye ikuru orweela wa Yehova moorweela wa otikitherya yookhovelela ya waalakhanya Masu a Muluku mahiku oothene ni wuupuwelela yaawo ophitaanyerya ophiya mmithukumano Seekristu. Joanna, yoowo apapa awe ni murokora awe mutokweene ehin’ye eparipari, ooloca: “Kinnakhala oomaaleleya vaavaa kinaalakhanyaaka vooloca sa achu a Mpiipiliyani ntoko Apikayeli, Estere, Yobi, Yosefe, ni Yesu. Sootakiherya saya sinnakilipiha ni okikhaviherya okhala oolipa vaavaa kinaceecheyaaka. Nave tho kohoona wi macipo ahu avameekhaaya annakilipiha vancipale.”

10. Ti mwawiihai Salumu 32:6-8 onanikhaviheryeiye ovilela ni wuukhuwa?

¹⁰ Mmuleele Yehova echu eri yoothene yeeyo enawuukhulaani. Vaavaa munakhalaanyu awuukhuwa, muhimaale ovekela wa yoowo. Mutitelele omveka Muluku ahu oosivela wi ookhaviheryeeni wuupuwela ichu mmukhalelo owo onuupuweleiye nave tho wi ‘oohusiheeni ni owoonihaani ephiro yoochara.’ (Mwaalakhanye Salumu 32:6-8.) Vakina vaya, onanwerya okhala woovila omuleela Yehova mukhalelo muniisoonaanyu. Nyenya Yehova onniiwexexa osooseya wa murima anyu. Owo onnoosivelaani vancipale nave onnooceenyeryaani ohula murima anyu wa yoowo.—Muk. 34:6; Sal. 62:7, 8.

11. Mwawiiwanana ni Ahebri 12:11, ntakhara heeni nnaphwanelaahu ororomela olaka woosivela wa Yehova? (Moone tho ekaaxa “ Wiikariwa Mmulokoni—Olaka Woosivela wa Yehova.”)

 ¹¹ Mukhaviherye yoolakelela ya atokweene. Wiikariwa mmulokoni onnapaka makupa a marehereryo a Yehova. Olaka wawe woosivela mukhalelo waphaama wa omukhaviherya muchu yoole ohin’ye omurumeela Yehova ni wa akina tho. (Mwalakhanye Ahebri 12:11.) Akina mmulokoni ananwerya oloca wi atokweene hepanke yoolakelela yoophwanelela ya omwiikara namacheka mmulokoni. Nyenya muupuwele, achu yaala hanachuna oloca ichu soohiphwanelela seiho namacheka enreiye. Mweeparipari hiyaano hannasuwela ichu soothene inavolowelavo. Ti yamiruku ororomela wi atokweene yaawo avaherenrye othoriha aapaka owetha waya wi echarihe malakiheryo a Mpiipiliyani ni othoriha “mwa Apwiya.”—2 Math. 19:6.

12. Sookhumelela taani saphaama akina anakhalaayano vaavaa anakhaviheryaaya olaka wa Yehova?

¹² Moorweela wa okhaviherya yoolakelela ya atokweene ya omwiikara oosiveliwaanyu mmulokoni, nyuwaano munanwerya omukhaviherya owo okookela wa Yehova. Elisabeth, yoowo oromoliwe woopaceryani onneemererya: “Waari woovila ohilocihana ni mwanihu. Nyenya ohoolo waya vaavaa aakookenleiye wa Yehova, owo aaloca wi yaari yoolakelela yaphaama wiikariwa mmulokoni. Owo aaloca wi aahuseryavo vancipale. Owo ooloca wi oohuserya ovaha esisapo olaka wa Yehova.” Iyawe Mark, ooloca: “Evinrevo elukuluku yincipale, mwanihu aakileela wi aanachuna okookela mmulokoni nthowa nawi hinaalocaru ni yoowo. Kinnamuthamalela vancipale Yehova nthowa na onikhaviherya omwiiwelela.”

13. Tiheeni enahaala wookhaviheryaani ovilela ni wuukhuwa?

¹³ Muloce ni asinthamwene yaawo aniiwexexa mukhalelo muniisoonaanyu. Mmaliheke elukuluku ni anna ni arokora amavyakelo yaawo anahaala wookhaviheryaani ohiyeleela ewehereryo. (Masi. 12:25; 17:17) Joanna, yoowo oromoliwe woopaceryani, ooloca: “Kaaniisoona omeekha. Nyenya oloca ni asinthamwene oororomeleya waakikhaviherya ovilela.” Nyenya tiheeni munaphwanelaanyu weera wakhala wi akina mmulokoni annaloca ichu seiho sinaweerihaani okhala awuukhuwa?

14. Ntakhara heeni ti woochuneya otitelela ‘ovilelana mukina ni mukhwaawe ni okhurumuwelana’?

¹⁴ Mukhale oopisa murima ni anna ni arokora anyu. Hannaphwanela oweherya wi muchu ori oothene onahaala olocaka ichu soophwanelela. (Tiy. 3:2) Oothene ahu naachu ohiphaameya, mwawiihiiha hannaphwanela otikhiniheya wakhala wi akina hanasuwela echu ya oloca naari wakhala wi awo aaloca echu yeeyo eninyeenyeihale naamwi awo yahaachuna oniphoreiha ni masu aya. Muupuwele nlakiheryo na murummwa Paulo: “Muvilelane mukina ni mukhwaawe nave mukhurumuwelaneke, mukina akhalano mwaha ni mukhwaawe.” (Kol. 3:13) Murokora mmoha yoowo asitiithi awe yiikariwe mmulokoni oothariha: “Yehova aakikhaviherya waakhurumuwela anna yaawo yeererya weera ichu soophwanelela nyenya mmukhalelo woohiphwanelela.” Tiheeni muloko onaphwanelaaya weera wi waakhaviherye a veemusini yaawo ari oororomeleya?

15. Tiheeni enahaala waakhaviherya a veemusini yaawo oosiveliwaaya iikariwe hiihaanoru mmulokoni?

¹⁵ Mukhale ooreera murima ni oonthamwene wa amusi oororomeleya. Murokora mmoha awiichaniwa Miriam onneemererya wi aanakhala awuukhuwa oya mmithukumano munnawe amanle wiikariwa mmulokoni. “Kanakhala awoova wa yeeyo achu yaahaalaaya olocaka. Nyenya yaakhalavo anna ni arokora ancipale yaawo tho yaari awuukhuwa vooloca sa yeeyo yeeren’ye. Nave awo hiyantonko oloca ichu soohiphwanelela vooloca sa munnaka. Kinnaathamalela yaawo, nave nkintonko wiisoona oomeekha mu othanana waka.” Murokora mukina onnuupuwela: “Mwanihu amwaamulopwana amanle wiikariwa mmulokoni, asinthamwene oosiveliwa yaananilipiha. Akina yaananleela wi yaanahaleela echu ya oloca. Akina yaananla ni miyaano nave akina yaanakirepela muchaka woolipiha. Awo yaakikhaviherya vancipale!”

16. Ti mwawiihai muloko oneeraaya otitelele ovaha nikhaviheryo?

¹⁶ Mutitelele waakhaviherya a veemusini yaawo ari oororomeleya. Xaxaxa mweelukuluku yeeyo awo annachuna osivela ni nlipiho nanyu. (Ahe. 10:24, 25) Ilukuluku ikina, amusi a yaawo yiikariwe mmulokoni annoona wi akina hanaloca ni yaawo, enakhala ntoko wi awo tho ahiikariwa mmulokoni. Hannaphwanela weemererya wi ela yeereyeke! Nnaphwanela waakhapelela ni waalipiha amiravo yaawo asitiithi aya ahin’ye omurumeela Yehova. Maria, yoowo aiyawe yiikariwe mmulokoni nave ehiya emusi, ooloca: “Asinthamwene akina yaanarwa owaani nave yaanaapeya yoolya ni onikhaviherya ohuserya vamoha ni anaaka. Awo yaaniisoona mmukhalelo kiisoonaaka nave yaananla ni miyaano. Awo yaanakaakiha vaavaa achu akina yaalocaaya ichu sawootha vooloca sa miyaano. Awo yaakilipiha vancipale!”—Aro. 12:13, 15.

17. Tiheeni atokweene anaphwanelaaya weera wi yaahakararye yaale ari awuukhuwa?

¹⁷ Atokweene nyu, mpharihele ekari eri yoothene yeeyo muryaanyuno wi mwaalipihe amusi oororomeleya. Nyuwaano mookhalano murici wavameekhaaya wa waahakararya alapeli akhwiinyu yaawo oosiveliwa aya amuhin’ye Yehova. (1 Tes. 5:14) Wi mwaalipihe, muloce ni yaawo ihaakumve nave tho imanle mithukumano Seekristu. Mwaaxekurye yaawo nave mvekele ni yaawo. Mulape vamoha ni yaawo mmuteko woolaleerya, naari  mwaawope wi ekhale vamoha ni nyuwaano va malapelo anyu a echoko. Akukhuli oomunepani anaphwanela wooniherya ooreera murima, osivela, ni opwacha yoowo onachuneya wa ipucepuche soothanana sa Yehova.—1 Tes. 2:7, 8.

18. Mwawiiwanana ni 2 Pedro 3:9, tiheeni Muluku onachuneiye wa yaale ahin’ye omurumeela yoowo?

¹⁸ Yehova “hanachuna wi mmoha a nyuwo atholowe, nto wi oothene ephiye wuucharuwani.” (Mwaalakhanye 2 Pedro 3:9.) Naamwi muchu apanke yoocheka etokweene, okumi awe nlelo ti woochuneya wa Muluku. Muupuwele wi Yehova ooliva esisapo ya vasuluxa, okumi wa Mwanawe oosiveliwa, wa mmoha ti mmoha a hiyo. Moosivela Yehova onnaakhaviherya yaale amuhin’ye owo wi ekookele wa yoowo. Owo onnaweherya wi awo enahaala weerano yeela, hiihaa ntoko nnoonaahu oorweela mu niphwanaphwaniho na Yesu vooloca sa mwaana oorimeela. (Luka 15:11-32) Ancipale yaawo ahin’ye eparipari ohoolo waya annakookela wa Tiithi aya oosivela a wirimu. Nave muloko onnawaakhela phaama yaawo. Elizabeth, yoowo oromoliwe woopaceryani, aahakalala omoona mwanawe akookelaka mmulokoni. Uupuwelaka sa muculi, owo ooloca: “Kinnaathamalela vancipale oothene yaawo yaanilipiha wi nihiyeleele ewehereryo.”

19. Ntakhara heeni nnaphwanelaahu otitelela omuroromela Yehova?

¹⁹ Nnaphwanela omuroromela Yehova ilukuluku soothene. Owo harwa avaha ohoolela yoowo onahaala onihooxa. Owo Tiithi amahala ni ooreera murima yoowo onaasivela mwawiiseela oothene yaale anamusivela ni omurumeela yoowo. Muroromele wi Yehova harwa oohiyaani mu elukuluku ya othanana. (Ahe. 13:5, 6) Mark, yoowo oromoliwe mmwaha yoola, ooloca, “Yehova haanihin’ye. Owo hantonko okhala ocai ni hiyaano variyari va makacamiho.” Yehova onahaala otitelela woovahaani “owerya wene woopwaha.” (2 Kor. 4:7) Chiryene, nyuwaano munaphwanela otitelela okhala oororomeleya ni ohiyeleela ewehereryo naamwi oosiveliwa anyu amuhin’ye Yehova.