MWAHA WOOHUSERYA 40
“Anaahoola Ancipale Owookololowani”
“Yaale anaahoola ancipale owookololowani enii ekhale ntoko itheneeri ilukuluku soothene.”—DAN. 12:3.
NCIPO 151 Yehova Onahaala Wiichana
YEEYO NNAHAALAAHU OHUSERYA *
1. Ichu taani sootikhiniha inahaala weereya variyari va Olamulelo wa Iyaakha 1.000?
NNI NIKHALE nihiku nootikhiniha vaavaa ovinya mookhwani oneeraaya opacerye veelaponi yavathi variyari va Olamulela wa Iyaakha Miili wa Kristu! Oothene yaale yaayeleenle oosiveliwa aya mookhwani annachuna owoona wanaawiili. Yehova tho onnachuna. (Yobi 14:15) Mwaanyiherye ohakalala oothene anahaalaaya okhalano owoona oosiveliwaaya eviihiwaka mookhwani. Ntoko nonnaahu mmwaha ovirale, “ékhaikhai,” yaawo masina aya anaphwanyeya mu liivuru a okumi, anahaala “oviihiwa wi yaakhele ekumi yoohimala.” (Saw. 24:15, NN; Yoh. 5:29, TNM) Akhweya ancipale a oosiveliwaahu anahaala okhala variyari va yaale anahaala oviihiwa mookhwani woopaceryani. * Mwawaaceererya “óhikhala ékhaikhai,” yaale yahaarino ekari yawaakhwanela ya omusuwela ni omurumeela Yehova moororomeleya ehaakumve okhwa, anahaala “oviihiwa wi yathorihiwe.”
2-3. (1) Ntoko enalociwaaya mu Isaiya 11:9, 10, muteko taani mutokweene wa ohusiha onahaala weereya yoowo ohintonko weeriwa veelaponi ya vathi? (2) Tiheeni nnahaalaahu othokororya mmwaha yoola?
2 Oothene yaale anahaala oviihiwa mookhwani anahaala ochuna ohusihiwa. (Isa. 26:9; 61:11) Mwawiihiiha, muteko mutokweene wa ohusiha ohintoko weereya veelaponi ya vathi onahaala opacerya. (Mwaalakhanye Isaiya 11:9, 10.) Ntakhara heeni? Oohikhala eekhaikhai enii eviihiwe mookhwani, anahaala ochuna ohuserya vooloca sa Omwene wa Muluku, mukucho wa woopola wa Yesu Kristu, ochuneya wa nsina na Yehova ni ntakhara heeni owo pahiru torino ophwanelela wa olamulela. Ophiyerya tho wi eekhaikhai yaawo anahaala oviihiwa mookhwani anahaala ochuna ohuserya vooloca sa yeeyo Yehova uupulunleiye wa alapeli awe moovira wa elukuluku vooloca sa yookhwela awe ntakhara elapo ya vathi. Akina a achu yaala oororomeleya, akhwile Piipiliya ahaakumve okwaaxiwa. Oohikhala eekhaikhai ni eekhaikhai anahaala ochuna ohuserya sincipale.
3 Mmwaha yoola nnahaala othokororya makoho anacharela: Muteko yoowo mutokweene wa ohusiha onahaala weeriwano hai? Tiheeni enahaala weereya ni achu wakhala wi awo ahaakhulela phaama muteko yoola wa ohusiha? Tiheeni enahaala weereya wakhala wi awo hiyaakhuleenle phaama? Maakhulo a makoho yaala toochuneya wa hiyaano olelo. Ntoko nnahaalaahu woona, sooloherya ikina inaphwanyeya mu liivuru a Daniyeli ni Wupulula sinahaala onikhaviherya wiiwexexa phaama yeeyo enahaala weereya vaavaa achu ookhwa eneeraaya eviihiwe. Woopaceryani hankooni nthokororye saweereya sootikhiniha seiho saaloheryiwe mu Daniyeli 12:1, 2.
“YAALE ARUMPE VATHI VACHAYA, ANARWA EVINYA”
4-5. Tiheeni Daniyeli 12:1 onuupululeiye vooloca sa elukuluku yookuchula?
4 Mwaalakhanye Daniyeli 12:1. Liivuru a Daniyeli onnuupulula mukhalelo ichu sootikhiniha inahaalaaya weereya variyari va elukuluku yookuchula. Ntoko yootakiherya, Daniyeli 12:1 onnuupulula wi Mikayeli, yoowo ori Yesu Kristu, ‘tonaakiha muloko wa Muluku.’ Makupa yaala a yooloherya apacenrye waakhwanela mu eyaakha ya 1914 vaavaa Yesu aathanliweiye ntoko Mwene a Omwene wa Muluku wirimu.
5 Nyenya, Taniyeli aaleeliwa tho wi Yesu aahaala ‘ovinya’ variyari va “elukuluku ya sawuukhula ehitonko okhala ovinya vaavale muloko okhanlaaya ophiyerya olelo.” “Elukuluku ya sawuukhula” yeela ti “ekoi etokotoko” enalociwa mu Mateu 24:21, BNM. Yesu onamvinya naari onamweeravo echu wi aakihe muloko wa Muluku, omakuchuwelo wa elukuluku ya sawuukhula, eyo tiwi mu Armaketo. Liivuru a Wupulula onnaloca sa yaawo ntoko ‘mucici muncipale yoowo wakhumale mu yohósha etokotoko.’—Wup. 7:9, 14, NN.
6. Tiheeni enahaala weereya mucici muncipale omanle okophola mu yoohooxa etokotoko? Mutharihe. (Moone tho mu erevista yeela “Makoho a Alipa Waalakhanya” enaloca sa oviihiwa ntakhara okumi veelaponi ya vathi.)
6 Mwaalakhanye Daniyeli 12:2. Tiheeni enahaala weereya mucici muncipale omanle okophola mu elukuluku ya sawuukhula? Yooloherya yeela henaloca sa oviihiwa mookhwani woosiphela; oviihiwa woomunepani wa alapeli a Muluku yoowo oneereya variyari va mahiku ookuchula, ntoko niiwexexaahu khalai. * Ohiya yeeyo, masu ala analoca sa oviihiwa wa achu ookhwa onahaala weereya mu elapo evyaani yeeyo enaacamela. Ntakhara heeni nnalocaahu yeela? Masu awi “vachaya” annaphariheliwa tho mu Yobi 17:16, BNM nave mamohamoha ni masu awi ‘Mahiye.’ Eparipari yeela enooniherya wi Daniyeli 12:2 onaloca sa oviihiwa mookhwani wa veelaponi onahaala weereya omakuchuwelo wa mahiku ookuchula, emanle ekhoco ya Armaketo.
7. (1) Mmukhalelo taani akina anahaalaaya oviihiwa wi yaakhele “okumi woohimala?” (2) Ntakhara heeni ola oryaaya “ovinya mokhwani waphamasa?”
7 Vano tiheeni Daniyeli 12:2 onataphuleleiye, vaavaa onaloceiye wi akina anahaala oviihiwa wi yaakhele “okumi woohimala?” Ela enataphulela wi yaale anahaala oviihiwa nave emusuwela naari etitelela omusuwela ni omwiiwelela Yehova ni Yesu variyari va iyaakha 1.000, wookuchulani anamwaakhela okumi woohimala. (Yoh. 17:3) Ola onahaala okhala “ovinya mokhwani waphamasa” woohiyana ni yoole weeren’ye ni achu akina khalai. (Ahe. 11:35, BNM) Ntakhara heeni? Nthowa nawi achu yaale yaaviihiwe khalai aakhwa wanaawiili.
8. Ti mwawiihai akina eneeraaya eviihiwe wi eye “woonyemuwani ni othanyeya woohimala?”
8 Nyenya tahi wi oothene yaale enii eviihiwe mookhwani anahaala weemererya ohusihiwa ni Yehova. Yooloherya ya Taniyeli enaloca wi akina anahaala oviihiwa wi eye “woonyemuwani ni othanyeya woohimala.” Woona wi awo anahaala wooniherya meecelo oomwaryeya, masina aya herempwa mu liivuru a okumi nave awo hiyaakhela okumi woohimala. Mweeparipari awo anahaala waakhela “othanyeya woohimala,” naari otoloxiwa. Mwawiihiiha Daniyeli 12:2 onaloca sa yookhumelela yookuchula wa oothene yaale anahaala oviihiwa, mwawiiwanana ni yeeyo anahaalaaya opaka emanle oviihiwa mookhwani. * (Wup. 20:12) Akina anahaala waakhela okumi woohimala; akina hooye.
“ANAAHOLA ANCIPALE OWOOKOLOLOWANI”
9-10. Echu taani ekina enahaala weereya emanle yoohooxa etokotoko, nave taani anahaala “waarya ntoko erimu?”
9 Mwaalakhanye Daniyeli 12:3. Echu taani ekina enahaala weereya emanle ovira “elukuluku ya sawuukhula”? Mwawaaceererya ni Daniyeli 12:2, eversikulu 3 onnaloca echu ekina yeeyo enahaala weereya emanle yoohooxa etokotoko.
10 Taani anahaala “waarya ntoko erimu?” Mateu 13:43 onnanikhaviherya waasuwela taani yaawo, vaavaa onaloceiye: “Awookololowa murima ekaamwaarya ntoko nsuwa, mu omwene wa Atiithi aya.” Masu Yesu aalonceiye ahaakumve oloca masu yaala, owo aathariha sa “anamwane a omwene,” yaawo ari annawe othanliwa, anahaala orumeela ni yoowo mu Omwene wa wirimu. (Mat. 13:38, BNM) Mwawiihiiha Daniyeli 12:3 akhweya onaloca sa oothanliwa ni muteko yoowo anahaalaaya opaka variyari va Olamulelo wa Iyaakha 1.000.
A 144.000 anahaala olapa mwawiiwanana ni Yesu Kristu wi ehoolele muteko wa ohusiha onahaala weereya variyari va iyaakha 1.000 (Moone eparakrafo 11)
11-12. Muteko taani a 144.000 anahaalaaya opaka variyari va iyaakha 1.000?
11 Ti mwawiihai oothanliwa anahaalaaya waakeriha “ancipale owookololowani?” Oothanliwa anahaala olapa mwawiiwanana ni Yesu Kristu wi ehoolele muteko wa ohusiha onahaala weeriwa veelaponi ya vathi variyari va iyaakha 1.000. A 144.000 tahi wi pahiru anahaala olamulela ntoko mamwene, nyenya tho anahaala orumeela ntoko alipa a mukucho. (Wup. 1:6; 5:10; 20:6) Mwawiihiiha, awo anahaala okhaviherya mu ‘openuxa maloko,’ vakhaani-vakhaani yeerihaka wi achu ekookele okhala oophaameya. (Wup. 22:1, 2; Ezek. 47:12) Enahaala okhala echu yoohakalaliha wa oothanliwa!
12 Taani anahaala okhala variyari va “ancipale” yaawo anahaala okerihiwa owookololowani? Anahaala ophitaanyerya yaale enii eviihiwe mookhwani, yaale anahaala okophola mu yoohooxa etokotoko vamoha ni anamwane yaawo anahaala oyariwa mu elapo evyaani. Wookuchulani wa iyaakha 1.000, oothene yaawo anahaala okhala veelaponi ya vathi anahaala okhala oophaameya. Vano ti liini masina aya anahaalaaya orempwa ni kaneta wi etitelele okhala mu liivuru a okumi ohiya ni elaapixi?
YAWEEHA YOOKUCHULA
13-14. Tiheeni achu oothene oophaameya veelaponi ya vathi anaphwanelaaya wooniherya ehaakumve waakhela okumi woohimala?
13 Nnaphwanela wuupuwela wi okhala oophaameya honataphulela wi muchu ori oomalela wi aakhele okumi woohimala. Muupuwele sa Atamu ni Hava. Awo yaari oophaameya, nyenya yaaphwanela wooniherya omwiiwelela waya Yehova Muluku ehakumve waakhela okumi woohimala. Nyenya moothananiha, awo hiyaamwiiwelenle yoowo.—Aro. 5:12.
14 Tuuvi onahaala okhala mukhalelo wa achu veelaponi ya vathi omakuchuwelo wa iyaakha 1.000? Oothene anahaala okhala oophaameya. Apwanne achu yaala oophaameya anahaala okhaviherya moomalela olamulelo wa Yehova okhala wookhala? Naari apwanne akina anahaala okhala ntoko Atamu ni Hava, yaawo naamwi yaari oophaameya, yaakhala oohiroromeleya? Makoho yaala annaphwanela waakhuliwa, nyenya mwawiihai?
15-16. (1) Ti liini achu oothene anahaalaaya okhalano ekari ya wooniherya oororomeleya waya wa Yehova? (2) Teevi eni ekhale yookhumelela yookuchula mu yaweeha yeeyo?
15 Satana onahaala owaleliwa mu iyaakha 1.000. Variyari va elukuluku yeeyo, owo haweryaka waawoka achu. Nyenya omakuchuwelo wa iyaakha 1.000, Satana onahaala ohuleliwa. Mwawiihiiha owo onahaala weererya waawoka achu oophaameya. Variyari va weeha yoola, achu oothene oophaameya veelaponi yavathi anahaala okhalano ekari ya wooniherya mookwakwaleya waakhanle wi annacicimiha nsina na Muluku ni okhaviherya olamulelo awe. (Wup. 20:7-10) Yeeyo anahaalaaya weera mu elukuluku yeeyo, enahaala wooniherya waakhanle wi masina aya anahaala orempwa ni otitelele okhala mu liivuru a okumi.
16 Akina, anahaala okhala ntoko Atamu ni Hava, ekhoocaka olamulelo wa Yehova. Tiheeni enahaala weereya ni yaawo? Wupulula 20:15 onnanleela: “Yaale masina aya yaahaphwanyiwe erempwe mu liivuru a okumi, yaariheliwa tho munchiyani nenle na mooro.” Chiryene, achu yaawo oomwaryeya anahaala otoloxiwa moomalela okhala wookhala. Nyenya ancipale a achu oophaameya, anahaala okhumelela phaama mu weeha yoola wookuchula. Mwawiihiiha masina aya anahaala orempwa wi etitelele mu liivuru a okumi.
VARIYARI VA “ELUKULUKU YOOKUCHULA”
17. Tiheeni munkeelo aalonceiye wa Taniyeli wi yaahaala weereya mmahiku ahu? (Daniyeli 12:4, 8-10)
17 Ti yoohakalaliha wuupuwela vooloca sa saweereya seiho soomwaahiyu! Nyenya, Taniyeli aahaakhela tho orweela wa munkeelo sooleeliherya ikina soochuneya vooloca sa elukuluku ahu, “elukuluku yookuchula.” (Mwaalakhanye Daniyeli 12:4, 8-10; 2 Tim. 3:1-5) Munkeelo aaloca wa Taniyeli: ‘Osuwela onahaala waaceereryeya.’ Chiryene, masu a miririmu a mu liivuru awe yaahaala wiiwexexiwa phaama ni achu a Muluku. Munkeelo aahaaceererya wi variyari va elukuluku yeeyo “oonanara murima enii yeerekeru soonanara. Haavovo a yaawo anii esuweleke.”
18. Tiheeni enahaala weereya moohilekela ni oonanara murima?
18 Olelo onooneya ntoko wi oonanara murima annakhumelela phaama ni meecelo aya oonanara. (Malak. 3:14, 15) Nyenya moohilekela, Yesu onahaala waathoriha yaawo ari ntoko ipuri ni waavalaanya yaawo ni ooreera murima analikana ni ipucepuche. (Mat. 25:31-33) Achu yaawo oonanara murima hekophola mu yoohooxa etokotoko naari mano heviihiwa mookhwani wi ekhale mu elapo evyaani. Masina aya hephwanyeya mu “nliivuru nawuupuxerya” nnalociwa mu Malakiya 3:16, TNM.
19. Tiheeni nnaphwanelaahu weera hiihaano, nave ntakhara heeni? (Malakiya 3:16-18)
19 Hiihaano, elukuluku ya wooniherya orweela mmeecelo ahu wi hanri variyari va yaawo ari oonanara murima. (Mwaalakhanye Malakiya 3:16-18.) Yehova onnaathukumanya yaale onawooneiye ntoko ‘achu awe,’ eyo tiwi yaawo ari oochuneya wa yoowo. Mweeparipari hiyaano nnachuna okhala variyari va yaawo.
Enahaala okhala yoohakalaliha omoona Taniyeli, oosiveliwa ahu ni ancipale ‘evinnye’ wi yaakhele makupa aya mu elapo evyaani! (Moone eparakrafo 20)
20. Yoororomeliha taani yookuchula Taniyeli aavahiweiye, nave ntakhara heeni munachunaanyu woona waakhwanela wa yooloherya yeeyo?
20 Mweeparipari, nnakhala mmahiku ootikhiniha. Nyenya ichu sootikhinihaxa sihanle vakhaani weereya. Moohilekela nnahaala woona otoloxiwa wa achu oothene oonanara. Voocharela, nnahaala woona waakhwanela wa yooloherya ya Yehova wa Taniyeli: “Omakuchuwelo wa mahiku onarwa ovinya wi waakhele makupa ari awaa.” (Dan. 12:13) Apwanne nyuwaano munnawehererya nihiku Taniyeli vamoha ni oosiveliwa anyu anahaalaaya “ovinya” mookhwani? Waakhanle wi ti hiihaa, mpake owetha wanyu hiihaano wi mukhale oororomeleya nave munanwerya ororomela wi nsina nanyu nnahaala orempwa okhala wookhala mu liivuru a okumi a Yehova.
NCIPO 80 “Ereryani ni Onani Apwiya Oréra waya Murima”
^ Mwaha ola onnavahererya matorokelo mu wiiwexexa wahu vooloca sa muteko mutokweene wa ohusiha onalociwa mu Daniyeli 12:2, 3. Nnahaala othokororya ti liini onahaalaaya weereya nave taani onahaala opaka makupa. Nnahaala tho woona mukhalelo muteko yoola wa ohusiha onahaalaaya waarehererya yaale eni ekhale veelaponi ntakhara yaweeha yookuchula omakuchuwelo wa Olamulela wa Iyaakha 1.000 wa Kristu.
^ Akhweya oviihiwa mookhwani onahaala opacerya ni yaale akhwile eri oororomeleya mmahiku ookuchula nave voocharela yaale akhwile khalai. Wakhala wi ti hiiha, muchu ti muchu onahaala okhalano ekari ya owaakhela yaale aasuwenleiye anahaala oviihiwa mookhwani. Moohipwacha mukhalelo ene, Soorepa sinnaloca wi oviihiwa oya wirimu waahaala weereyaka ‘echarihiwaka elukuluku,’ nave nnanwerya ororomela wi oviihiwa mookhwani wa veelaponi yavathi onahaala weereya tho mmukhalelo wooreheryeya.—1 Kor. 14:33; 15:23.
^ Othariha yoola, matorokelo a wiiwexexa onaphwanyeya mu liivuru Preste Atenção à Profecia de Daniel! ekapitulu 17, ni Mulipeleli a 1 a Yulyu a 1987, ipaax. 21-25, (a Ekunya.)
^ Moohiyana, masu awi “ékhaikhai” ni “óhikhala ékhaikhai” anaphwanyeya mu Saweriwa T’arummwa 24:15, NN ni masu awi “yaale yenreno ichu saphaama” ni “yaale yenreno ichu soonanara” anaphwanyeya mu Yohani 5:29, TNM enaloca sa meecelo yaawo achu anahaala oviihiwa mookhwani yaaryaayano ehakumve okhwa.
