Omapacereryo wa eyaakha ya 1940, asitiithi aka yaapacerya omuhuserya Piipiliya ni Anamoona a Yehova. Yoohuserya eyo hiyaatitelenle, nyenya amama aka yaahititelela waakhela irevista sa Mulipeleli ni Vinyani! Mu 1950 muthukumano wa ilapo soohiyana waaheereya o Nova York, nave emusi aka yaaheemererya nwopelo wa ophwanyeya weiwo.

Elukuluku vakhaani ohoolo waya, Munna Lawrence Jeffries aapacerya onixekurya. Owo aaheererya okikhaviherya ohuserya eparipari. Woopaceryani, kuupuwela wi Anamoona a Yehova yaanaphwanela opaka makupa mu ipoliitika ni owaniha, ohiya okhala awiivalaanya. Miyaano kaamuleela wi waakhala wi achu oothene o Amerika annakhooca owaniha ekhoco, amwiicani yanwerya orwa ni onaakha elapo. Munna Jeffries moopisa murima aakikoha: “Onoona hai, tiheeni Yehova Muluku aahaaleiye weera waakhanle wi achu oothene a wa Amerika annamurumeela nave amwiicani erwa wi yaahiphele?” Yeeyo aalonceiye vooloca sa mwaha yoola ni ichu ikina, saakikhaviherya woona wi kaakhalano moonelo wooheseya. Eyo yaahitannya nchuno naka na omuhuserya Piipiliya.

Kaanamaliha elukuluku yincipale kaalakhanyaka irevista sakhalai sa Mulipeleli ni Vinyani! seiho amama aka yaakhapelenlaaya. Moovira wa elukuluku, kaahoona wi kaahuserya eparipari, nave kaaheemererya omuhuserya Piipiliya ni Munna Jeffries. Nave tho kaahipacerya ophiya mmithukumano moohihiyererya. Kaanasiveliwa ni yeeyo kaahuseryaaka nave kaahikhala mulaleeryi a michaka saphaama. Soolakelela saka saatorokeya vaavaa kiiwexenxaaka wi ‘nihiku ntokotoko na Apwiya naakhuveela.’ (Sof. 1:14) Ohiya otikitheryeya mu oya mu exikola ya vasulu, miyaano kaanachuna waakhaviherya akina ohuserya eparipari ya Mpiipiliyani.

Kamukwaanxe tesima sekunta mu 13 a Yunyu a 1956, nave mahiku mararu ohoolo waya kaapatisiwa mmuthukumano wa ekulucu. Nkaasuwela wi kaahaala waakhela mareeliho mancipale orweela wa Yehova  nthowa na othanla opharihela okumi aka wi kihuserye ni waahusiha akina vooloca sa yoowo.

Miyeeri thanu nammoha kimanle opatisiwa, kaahikhala piyoneero a elukuluku yoothene. Orummwa wa Omwene wa Tesempuru a 1956 waahiphitaanyerya mwaha “Apwanne Munanwerya Orumeela Weiwo Oriwo Othowa Otokweene?” Kaari mmoha a yaawo yaaphwanela weerano yeeyo. Kaanachuna okhaviherya weiwo waariwo othowa wa alaleeryi a michaka saphaama.—Mat. 24:14.

Kaahithaamela o Edgefield, makupa oohico a Karolina. Muloko wa weiwo waarino pahiru alaleeryi axexe. Ni miyaano naahaakhwana alaleeryi athanu. Naapaka mithukumano mu esaala ya empa ya munna mmoha. Mu miyeeri soothene, kaanamaliha iwora 100 mmuteko woolaleerya. Kaanakhala ooweiwa nthowa nawi kaanahoolela muteko woolaleerya nave kaanapaka miyaha mmulokoni. Mootikhiniha, vaavaa kaapakaaka sincipale mmulokoni, kaanahuserya sincipale vooloca sa Yehova.

Muthiyana mmoha yoowo kaamuhusihaaka Piipiliya, aari mwaneene a empa waakhapeleliwamo miruchu o Johnston, epooma yeeyo yaari vakhiviru ni weiwo kaakhalaakawo. Owo mooreera murima aahikivaha muteko yoowo kaachunaaka, wa olapa iwora savakhaani mmahiku mancipale vasumana, nave aahineemererya opakaka mithukumano mu empa awe ekhaani.

Munna Jolly Jeffries, mwaana a munna yoowo aakihusinhe Piipiliya, aahithaama o Brooklyn, Nova York, nave aakhala nthamwene aka mmuteko wa opiyoneero. Hiyaano naakhala mu kontentoore mukhaani munna mmoha aanipolen’yeiye.

Makupa yaale naakhalaahuwo ikhorowa saakhelihiwa anaalapa saari savakhaani. Naakhelihiwa ikhorowa sawaakhwana atoolare eeli naari araru mu nihiku nanteero na muteko. Ekwaha emoha, miyaano kaahipharihela ikhorowa savakhaani kaahanlaakano wi kithume yoolya mulooxa. Vaavaa kaakhumaaka, mulopwana mmoha aakaacamela akikoha: “Onnachuna muteko? Kinahaala woolivaka mu ewora emoha ikhorowa sawaakhwana toolare mmoha.” Owo aahikivaha muteko wa mahiku mararu kirehereryaka nipuro naahaala otekiwavo ipa. Yaari yawooneya wi Yehova aanakikhaviherya wi kititelele okhala o Edgefield. Mwawiihiiha, mu 1958 kaawerya oya o muthukumano wa ilapo soohiyana yoowo weeren’ye o Nova York.

Mu nihiku nanaawiili na muthukumano yoole, yaaheereya echu yavameekhaaya. Kaamusuwela Ruby Wadlington, yoowo aarumeela ntoko piyoneera a elukuluku yoothene o Gallatin, Tennessee. Woona wi oopiili ahu naanachuna okhala mamisiyonariyu, naahiphwanyeya mmuthukumano wa yaale yaarino nchuno na ovolowa mu exikola ya Kiliyati va muthukumano yoole. Ohoolo waaya, naahipacerya orepelana ikaarata. Voocharela, kaahiwompwa wi kapake mwaha mmulokoni wo Gallatin. Kaaphwanyeryavo ekari wi kimuurye. Kaahithaamela mmuloko wa Ruby nave mu eyaakha ya 1959 naahithelana.

Vaavaa kaaryaakano iyaakha 23, kaahithanliwa ntoko murummwa a muloko (hiihaano osuweliwe ntoko muhooleli a nikhuuru na atokweene) o Gallatin. Charles Thompson ampaceraru muteko awe ntoko  ooweherya a ekulucu vaavaa aaxekunryeiye muloko ahu. Owo aahikhalano mavyakelo mancipale; naamwi hiihaa aahikikoha moonelo aka vooloca sa yeeyo anna yaachunaaya ni mukhalelo ooweherya a ikulucu akina yaakhapelelaaya soochuna seiho. Kaahuserya ni yoowo wi ti yaphaama opaka makoho ni okhalano sooleeliherya soothene nihaakumve opaka soolakelela.

Mu Maiyu a 1964, kaahiwompwa wi kivolowe mu Exikola ya Alaleeryi a Omwene wa mweeri mmoha, yeeyo yeeren’ye makupa oohico o Lansing, Nova York. Anna yaahoolela exikola yeele yaahikeeriha okhalano nchuno na ohuserya sincipale vooloca sa Yehova ni omwaacamela yoowo.

Ruby ni miyaano naahaakhela nwopelo wa okhala oowerya a ekulucu mu Yaneru a 1965. Ekulucu ahu yoopacerya yaatepa winnuwa. Eyo yaapacerya o Knoxville, Tennessee, waacamela o Richmond, Virginia. Nave yaaphitaanyerya miloko so Karolina oomoko, Kentucky ni makupa makina a Virginia. Kaarumeela pahiru mmiloko sa anamaripa nthowa nawi mu elukuluku yeele okawanyeya waatepa makupa oohico a Estatu Unitu, mwawiihiiha anamaripa hiyaaphwanela okhala vamoha ni asuku. Anna yaarino ichu vakhaani soomwiilini nave naahuserya okawana yeeyo naaryaahuno ni yaale yaathoiwa. Ooweherya a ekulucu mmoha a mavyakelo aakihusiha nihusiheryo noochuneya: “Okhale munna. Waayaaka oxekurya miloko ohiisereke ntoko patarawu. Weyaano onanwerya waakhaviherya yaawo waakhala wi annawoona ntoko munnaya.”

Vaavaa naasekuryaahu muloko mmoha mukhaani, Ruby aahipaceryiha yoohuserya ya Piipiliya ni muthiyana a iyaakha 17 yoowo aarinono mwaana amwaamuthiyana a eyaakha emoha. Vaavaa ahaaphwanyeyeiye muchu mmulokoni wi eeciheke yoohuserya, Ruby aaneerano yeeyo apharihelaka emaili. Mu oxekurya wahu woocharela, muthiyana ole aanaphiya mmithukumano soothene. Vaavaa arokora eeli yaawo yaari mapiyoneera avameekhaaya yaathaamenlaaya weiwo, yaahititelela weeciha yoohuserya nave moohilekela owo aahipatisiwa. Iyaakha 30 ohoolo waya mu 1995, o Peteli yo Patterson, murokora mmoha aari mwali aahichekula ni Ruby, owo aari mwaana a muthiyana yoole Ruby aamuhusiheiye Piipiliya. Mwaana a muthiyana yoole ni aiyawe yaavolowa mu eturma 100 ya Exikola ya Kiliyati.

Ekulucu ahu yanaawiili yaari makupa a veeri a Florita. Mu elukuluku yeele naanachuna ekaaro, mwawiihiiha naahithuma emoha yookhweya. Nyenya mu esumana yoopacerya, epeesa emoha ya mutore yaananara. Hinaarinono ikhorowa wi nireheryihe. Kaamwiichana munna mmoha yoowo koonaaka wi anwerya onikhaviherya. Owo aahimveka namalapa awe wi arehererye ekaaro. Amanle oreherya, munna owo haanilivinhe. Owo pahiru aalonce wi: “Weyaano honaphwanela okiliva.” Ophiyerya wi owo aahinivaha ikhorowa ntoko yamahala! Eyo yaari yootakiherya yaphaama vooloca sa mukhalelo Yehova onaakhapeleleiye alapeli awe. Eyo yaahinuupuxerya okhala a mahala ni akina.

Ilukuluku soothene naaxekuryaahu miloko naakhala vaate va anna. Ntoko yookhumelela, nohaapaka asinthamwene ancipale aphaama. Nihiku nimoha, kaapacerya omurepa relatoriyu aka vooloca sa muloko mmakina aka a orepa nave kimuhiya kihimukwaanxe, kipwahavo. Vaavaa kaakonkaaka ohiyu yoole, kaahoona wi mwaana a iyaakha raru a echoko yeele naakhalaahuvo aaheererya “okikhaviherya,” acapunya itekelaatu nave ananariha erelatoriyu aka. Kaanathata ni yoowo vooloca sa yeela mu iyaakha sincipale.

Mu 1971 kaahaakhela nwopelo wa orumeela ntoko ooweherya a itistiritu o Nova York. Naahikhala oohaleeliheya woona wi vaavaa naathaamenlaahu weiwo, kaarino pahiru iyaakha 34! Anna yaahinivahererya etistritu yoopacerya ya anamaripa wi neecelele nave naahaakheliwa phaama.

Ntoko ooweherya a itistiritu, kaanasiveliwa ohusiha vooloca sa Yehova omakuchuwelo wa esumana ti esumana mmithukumano sa ekulucu. Oowerya a ikulucu ancipale yaakhalano mavyakelo mancipale okipwaha miyaano. Mmoha a yaawo taaperenkhe mwaha wa opatiso aka. Munna mukina, Theodore Jaracz ohoolo waya aahikhala mmoha a Nikhuuru Noolamulela. Yaahikhalawo tho anna ancipale a mavyakelo yaawo yaarumeela Opeteli yo Brooklyn. Kaari oohakalala woona wi ooweherya a ikulucu ni Mapetelita yaanakeeriha okhala ootaphuwa. Kaahoona mukhataaka wi awo yaari akukhula oosivela, yaawo yaaroromela Masu a Muluku nave yaakhaviherya moororomeleya  marehereryo. Wiiyeviha waya waaheeriha okhala wookhweya wa miyo orumeela weiwo ntoko ooweherya a etistritu.

Mu 1974 Nikhuuru Noolamulela naahithanla nikhuuru nikina na ooweherya a ikulucu wi ekhale ooweherya a itistiritu, nave miyaano kaaphwanela okookela wanaawiili orumeela ntoko ooweherya a ekulucu, ekwaha ela o Karolina oohico. Moohakalaliha, mu elukuluku yeele miloko sa anamaripa ni asuku makupa oohico a Estatu Unitu, hisaari sookawanyeya nave anna yaahakalala vancipale ni yeeyo.

Omakuchuwelo wa 1976, kaathanliwa wi karumeeleke ekulucu yo Xeorxia variyari va Atalanta ni Kolompu. Kinnuupuwela phaameene elukuluku kaaperenkhaaka mwaha wa makhwelo wa anamwane athanu yaawo yaari anamaripa yaakhwile vaavaa achu oonanara murima yaasunkaaya empa aya. Amama aya yaapaxaara oxipitale nthowa na makhwaca yaaraayano. Anamoona a Yehova ancipale, anamaripa vamoha ni asuku yaanarwa oxipitale wi yaalipihe asitiithi yaale. Kaahoona wi osivela wa anna waari wavameekhaaya. Vaavaa alapeli a Muluku anooniheryaaya osivela ntoko yoola wa mukina ni mukhwaawe, awo ananwerya ovilela ni makacamiho oovila.

Mu 1977 naavekiwa orwa Opeteli yo Brooklyn wi nikhaviherye muteko mu miyeeri savakhaani. Vaavaa muteko waahaanlaaya vakhaani omala, anna eeli a Nikhuuru Noolamulela yaathukumana vamoha ni miyaano ekikoha waakhanle wi mi ni Ruby naahaala weemererya otitelela orumeela Opeteli. Hiyaano naaheemererya nwopelo.

Variyari va iyaakha 24, kaalapa mu Etepartamentu ya Muteko, mwemmo wiiliwiili anna anakhaviheryaaya orehererya miyaha soovila. Moovira wa iyaakha, Nikhuuru Noolamulela naavahererya ohoolela mwawiiwanana ni malakiheryo a Mpiipiliyani. Ohoolela owo onnakhaviherya Etepartamentu ya Muteko waakhula makoho, nave tho onnaphariheleya wi yaavyakihe ooweherya a ikulucu, asitokweene a mmulokoni ni mapiyoneero. Ovyakiha yoola onnaakhaviherya ancipale wunnuwa omunepani. Mwawiihiiha, eyo yoolipiha marehereryo a Yehova.

Mu 1995 ophiyerya 2018, kaaxekurya ifiliyale soohiyana hiyana ntoko aweemelela a nipuro ntokweene na Anamoona a Yehova, khalai iichaniwa ooweherya a muceche. Kaanaaxekurya Makhuuru a Ifiliyale, Mapetelita ni mamisiyonariyu wi kaalipihe ni waakhaviherya mu makacamiho vyakala. Mwawiihiiha, Ruby ni miyaano naahilipiheya ntakhara saweereya sa anna. Ntoko yootakiherya, naaxekurya o Ruwanta mu 2000. Naatannyeya murima vaavaa niiwalaahu mukhalelo anna ni emusi yo Opeteli yaakophonlaaya mu owanawana nthowa na ohiyana maloko weeren’ye mu 1994. Ancipale yaahaayeleela oosiveliwa aya mookhwani. Naamwi anna awo yaahoolela makacamiho, yaanooniherya nroromelo, ewehereryo ni ohakalala.

Hiihava, nrino iyaakha opwaha 80. Mu iyaakha 20 muculi, miyaano kaarumeela ntoko mmoha a Nikhuuru na Efiliyale yo Estatu Unitu. Nkintonko ohuserya mu exikola yavasulu; naamwi hiihaa, kohaakhela mahusiheryo aphaamaxa oorweela wa Yehova ni marehereryo awe. Mahusiheryo yaala aakikhaviherya okhala oorehereya waahusiha akina iparipari sa Mpiipiliyani inahaala okumiherya miphurelo wa yaawo okhala wookhala. (2 Kor. 3:5; 2 Tim. 2:2) Kohoona mukhalelo michaka sa Mpiipiliyani saakhavihenryaaya achu okhalano ekumi yaphaama ni wunnuwiha onthamwene ni Mpatuxa aya. (Tiy. 4:8) Vaavaa nnakhalaahuno ekari, Ruby ni miyaano ninnatitelela waaceenyerya akina ovaha esisapo ekari ya ohuserya sa Yehova ni ohusiha iparipari sa Mpiipiliyani wa akina. Ela ekari etokweene alapeli a Yehova anapuhaaya!