1. Nni nsuwele hai waakhanle wi muchu toororomeleya?

 MUCHU oororomeleya onniilipixerya waakhwaniherya malakano awe ni oloca eparipari. (Sal. 15:4) Achu annasuwela wi ananwerya omuroromela yoowo. Hiyaano nnachuna wi anna ni arokora ahu enooneke mmukhalelo yoola. Tiheeni nnaphwanelaahu weera wi annihu eniroromeleke?

2. Nni nooniherye hai wi na muchu oororomeleya?

² Hiyaano hannaphwanela waakhinyererya akina wi eniroromeleke. Nnaphwanela wooniherya wi naachu oororomeleya. Achu akina enaloca wi ororomeleya onalikana ni ikhorowa. Ti woovila ophwanya; nave ti wookhweya oyeleela. Mweeparipari hiyaano ninnaphwanela omuroromela Yehova ilukuluku soothene nthowa nawi ‘miteko sawe soothene ti soororomeleya.’ (Sal. 33:4) Nave owo onaweherya wi hiyaano nimutakiheryeke. (Éfe. 5:1) Hankooni nthokororye sootakiherya sikina sa alapeli a Yehova yaawo yaamutakihenrye Tiithi aya a wirimu nave yooniherya wi awo yaari oororomeleya. Nnahaala tho othokororya mikhalelo mithanu seiho inahaala onikhaviherya okhala oororomeleya.

3-4. Mmukhalelo taani mulipa a miririmu Taniyeli oonihenryeiye ororomeleya, nave makoho taani nnaphwanelaahu wiipakela?

³ Mulipa a miririmu Taniyeli oovaha yootakiherya yaphaama ya okhala oororomeleya. Naamwi owo aakuxeryiwe wookapuroni o Papulu, mwawaakuveya aakhalano meecelo aphaama nave akhala mulopwana ooromeleya. Achu yaapacerya omuroromela vancipale vaavaa Yehova aamukhavihenreiye otaphulela sooloha sa Mwene o Papulu Napukotonosori. Mu ekwaha emoha, Taniyeli aaphwanela omuleela mwene wi hamuhakalalinhe Yehova. Waanachuneya olipa murima  wi amuleele Napukotonosori wi owo aakhalano meecelo oonanara. Nave eyo hiyaari yookhweya woona wi mwene aasuweliwe ntoko muchu oonanara murima nave haahaala osiveliwano muchaka yoole. (Dan. 2:12; 4:20-22, 25) Iyaakha sincipale ohoolo waya, wanaawiili Taniyeli ahooneiha ororomeleya wawe vaavaa aataphuleleiye muchaka woonanaraxa yoowo waarempwe vaxiri vaate va Mwene o Papulu. (Dan. 5:5, 25-29) Naamwi hiihaa, ohoolo waya, Tariyu Mmeti ni akhaviheryi awe yaahoona wi Taniyeli aakhalano “murima waphaama.” Awo yaanasuwela wi Taniyeli “aari oororomeleya nave haarino nthowa.” (Dan. 6:4, 5; 6:3, 4, TNM) Chiryene, ophiyerya tho wi alamuleli aamalapo yaanasuwela wi mulapeli yoola a Yehova aari oororomeleya!

⁴ Vaavaa nnuupuwelelaahu yootakiherya ya Taniyeli, nnanwerya wiikoha: ‘Ti mwawiihai kisuweliwaaka ni achu yaawo ahiri Anamoona a Yehova? Kisuweliwe ntoko muchu yoowo onaakhwaniherya mirici sawe nave ori oororomeleya?’ Ntakhara heeni ti woochuneya wiipakela makoho yaala? Nthowa nawi ninnamuruuhela ncicimiho Yehova vaavaa nnakhalaahu oororomeleya.

5. Ntakhara heeni Ananiya aasuweliwa ntoko muchu oororomeleya?

⁵ Mu eyaakha ya 455 E.E.K., Mulamuleli Nehemiya amanle oteka ixiri so Yerusalemu, aawaavya alopwana oororomeleya wi ekhapeleleke epooma. Nehemiya aamuthanla variyari va akina, mutokweene a nipuro noolipihiwa, Ananiya. Piipiliya onaloca wi Ananiya “aari muchu oororomeleya, oomoova Muluku waapwaha achu anceene.” (Neh. 7:2) Omusivela  Yehova ni woova omuhiciha, waahimweeriha Ananiya olapa mwakuru wi aakhwaniherye murici yoowo aavahiweiye. Mikhalelo seiha tho sinanwerya onikhaviherya okhala oororomeleya mmuteko ahu wa Muluku.

6. Ti mwawiihai Tikiku oonihenryeiye wi aari nthamwene oororomeleya a murummwa Paulo?

⁶ Moone yootakiherya ya Tikiku, nthamwene oororomeleya a murummwa Paulo. Vaavaa murummwa Paulo aawaleliweiye, owo aanamuroromela Tikiku nave aahiloca wi aari ‘namuteko oororomeleya.’ (Éfe. 6:21, 22) Paulo amvaha murici wa oveleela ikaarata wa anna o Efeso ni o Kolosi nave tho wi aalipihe ni waahakararya yaawo. Yootakiherya ya Tikiku ennanuupuxerya sa alopwana oororomeleya yaawo enakhapelela soothowa sahu soomunepani olelo.—Kol. 4:7-9.

7. Tiheeni muhusenryaanyu vooloca sa ororomeleya wa atokweene a mmulokoni ni arummwa oorumeela?

⁷ Olelo ninnathamalela vancipale nthowa na okhalano atokweene a mmulokoni ni arummwa oorumeela yaawo nnaphwanelaahu waaroromela. Hiihaa ntoko Taniyeli, Ananiya ni Tikiku, awo annakhapelela ni murima woothene mirici saya. Ntoko yootakiherya, vaavaa nnayaahu mmithukumano sa veri va esumana, hiyaano hannakhwa minikwa wi makupa oothene aakaiwa. Atokweene a mmulokoni annathamalela vancipale vaavaa anna ni arokora aniirehererya phaama ntakhara operekha makupa yaawo akaweliwaaya! Nave tho, vaavaa nnaawopaahu oohuserya ahu a Piipiliya wi ephwanyeye va muthukumano wa omakuchuwelo wa esumana, hiyaano ninnaroromela wi onahaala okhalavo muchu yoowo oni aperekhe mwaha wa vanlakani. Nave ninnaroromela wi nnahaala okhalano soolaleeryiwa seiho nnachunaahu ntakhara muteko woolaleerya. Anna yaala oororomeleya annanikhapelela phaama nave ninnamuthamalela Yehova nthowa na yaawo! Vano nni nooniherye hai wi naachu oororomeleya?

8. Ti mwawiihai nnaphwanelaahu okhala oophimelela vaavaa nnaalocaahu akina? (Masiposipo 11:13)

⁸ Hiyaano ninnaasivela anna ni arokora ahu nave ninnachuna osuwela mukhalelo aryaaya. Nyenya nnaphwanela okhala oophimelela ni ocicimiha miyaha saya soovitheya. Akristu akina a mmulokoni wa mu nsana noopacerya yaari ‘oolocasha ni oowakela, elocaka soohiphwanelela.’ (1 Tim. 5:13) Mweeparipari hiyaano hannachuna okhala ntoko yaawo. Mwaanyiherye wi muchu ohooleelaani mwaha awe, nave aloca wi muhimuleele muchu mukina. Ntoko yootakiherya, murokora onanwerya onleela nikacamiho na okumi nenlo onahooleleiye naari nikacamiho nikina nave aloca wi nihimuleele muchu mukina. Nnaphwanela ocicimiha yooveka awe. * (Mwaalakhanye Masiposipo 11:13.) Vano hankooni nthokororye mikhalelo mikina seiho ori woochuneya okhala ookhuwa.

9. Ti mwawiihai mmoha ti mmoha a veemusini oneereiye ooniherye wi toororomeleya?

⁹ Veemusini. Mmoha ti mmoha a veemusini ookhalano murici wa okhuwa miyaha mikina sa veemusini. Ntoko yootakiherya, murokora onanwerya okhalano yookhovelela yeeyo ehinaasivela aiyawe. Apwanne aahaala waaleelaka yeeyo akina wi amwaariye yuuliheye muru? Mweeparipari hooye! Owo onnaasivela amwaariye nave harwa achuna opaka echu yeeyo yaahaala waahiciha. (Éfe. 5:33)  Amiravo annachuna okhalihiwa mwa ncicimiho. Ti woochuneya wi asitiithi yuupuweleke yeela. Asitiithi hanaphwanela owuuliha muru anamwane aya moorweela wa waaleela akina soohesa saya. (Kol. 3:21) Anamwane tho anaphwanela ohuserya okhala a miruku, nave ehilocaka miyaha sa vachokoni vaya seiho saahaala owuuliha muru achu a veemusini vaya. (Malam. 5:16) Vaavaa mmoha ti mmoha a veemusini onapakeiye makupa awe moorweela wa okhuwa miyaha sa veemusini, emusi yoothene ennakhala yoolipa.

10. Tiheeni enavolowelavo okhala nthamwene eeparipari? (Masiposipo 17:17)

¹⁰ Ni asinthamwene ahu. Mu ilukuluku ikina, ancipale a hiyo ninnachuna okhalano nthamwene oororomeleya ni awaacameleya. Ilukuluku ikina onanwerya okhala woovila. Akhweya hiyaano hinaano yookhovelela ya waaleela akina mukhalelo nniisoonaahu ni muupuwelo ahu, woona wi naahaala ohica wakhala wi noosuwela wi nthamwene ahu ohoolo waya ohaaleela akina mwaha ahu woovitheya. Mmukhalelo mukina, ti yaphaama okhalano muchu yoowo ori ookhuwa! Owo onakhala “nthamwene” eeparipari.—Mwaalakhanye Masiposipo 17:17.

11. (1) Ti mwawiihai atokweene a mmuloko ni asaaraya anooniheryaaya wi toororomeleya? (2) Mwawiiwanana ni eruku, tiheeni nnahuseryaahu orweela wa mutokweene onakhapelela mwaha woovitheya nave ohoolo waya akhala ni emusi awe? (Moone eruku.)

¹¹ Mmulokoni. Atokweene yaawo asuweliwe wi tookhuwa eri ntoko “voochawelavo echeku yoopaka, nari nipuro nawiipithavo” wa annaya. (Isa. 32:2) Nnanwerya okhala ootaphuwa oloca echu vyakala wa anna yaala, nroromelaka wi enahaala okhuwa yeeyo naalenlaahu. Hiyaano hannaakhinyererya yaawo wi enileele ichu seiho nihiraahuno ophwanelela wa osuwela. Mwawaaceererya, hiyaano ninnaathamalela asaara a asitokweene woona wi awo haneererya waakhinyererya asiiyaya wi yaaleele miyaha soovitheya sa akina. Mweeparipari, ti yaphaama wa asaara a atokweene ohisuwela miyaha soovitheya vooloca sa anna ni arokora aya. Mwaara a mutokweene mmoha a mmulokoni ooloca: “Kinnaathamalela aiyaka nthowa na ohiloca miyaha  soovitheya sa yaawo anachuna nikhaviheryo wa atokweene, naari mano okileela masina aya. Kinnoona okhala yaphaama ohisuwela miyaha soovitheya woona wi nkiwerya weera echu wi kikhaviherye. Nthowa na yeela kinnawerya okhala ootaphuwa ochekula ni oothene mmulokoni. Nave kinnaroromela wi vaavaa kinaaleelaaka aiyaka miyoonelo naari makacamiho aka, awo enahaala tho okhuwa.” Chiryene, oothene ahu ninnachuna osuweliwa ntoko achu yaawo ari oororomeleya. Mikhalelo taani inahaala onikhaviherya waakhwaniherya yoolakelela yeela? Hankooni nthokororye mithanu sa seiyo.

12. Ntakhara heeni nnanwerya oloca wi osivela teri mathipelo a ororomeleya? Mvahe yootakiherya.

¹² Osivela teri mathipelo a ororomeleya. Yesu ooloca wi malamulo meeli matokotoko ti omusivela Yehova ni omusivela mwaacamani. (Mat. 22:37-39) Omusivela wahu Yehova onnanceenyerya ochariha yootakiherya awe yoophaameya ya ororomeleya. Ntoko yootakiherya, osivela wahu ntakhara anna ni arokora ahu onnanceenyerya okhuwa miyaha saya soovitheya. Hinaahaala osiveliwa wuupulula ichu seiho saahaala oweeriha awo okhala oothanana, oohica naari ohooxeya.—Yoh. 15:12.

13. Mmukhalelo taani wiiyeviha onanikhaviheryaaya okhala oororomeleya?

¹³ Wiiyeviha onahaala onikhaviherya okhala oororomeleya. Mukristu yoowo ori awiiyeviha haneererya waatikhiniha akina moorweela wa okhala oopacerya wuupulula mwaha yoowo ori woovitheya. (Fil. 2:3) Owo tho haneererya wiisooneiha wa akina wi oosuwela miyaha soovitheya nyenya hanaphwanela waaleela akina. Wiiyeviha onnaneeriha ohimwaramwaxa miyoonelo sahu sa miyaha seiho sihinalociwa Mpiipiliyani ni mu soolaleeryiwa sahu.

14. Ti mwawiihai mukhalelo waphaama onanikhaviheryaaya okhala muchu oororomeleya?

¹⁴ Wiisuwela onahaala omukhaviherya Mukiristu osuwela wi yookhalavo “elukuluku yoomaala ni elukuluku yooloca.” (Ekle. 3:7) Aakhala masu awunlaana asuweliwe mu ilapo ikina: “Oloca eparata, nyenya omaala ewooro.” Eyo enataphulela wi ikwaha ikina, ti yaphaama okhala oomaala opwaha oloca. Ti nthowa nene Masiposipo 11:12, BNM onaloceiye wi: “Mutxhu awisuwelela, onnasuwelano omàla.” Moone yootakiherya ya munna mmoha. Owo onarumeela ntoko mutokweene a mmulokoni mu iyaakha sincipale, nyenya nthowa na mavyakelo awe, owo onnawompwa mmiloko mikina, wi akhaviherye orehererya miyaha soovila. Mutokweene mmoha onarumeela vamoha ni yoowo ooloca: “Owo onnakhalano ekaasoope wi ahimuleele muchu mukina miyaha soovitheya sa miloko mikina.” Wa masu yaala munna yoola olonceiye, ennooniherya wi mukhalelo waphaama wa mutokweene yoole a mmulokoni waaheeriha wi owo acicimihiweke ni atokweene akina onalapeiyene. Awo annasuwela wi ananwerya omuroromela.

15. Ti mwawiihai oloca eparipari onanikhaviheryaaya okhala oororomeleya? Mvahe yootakiherya.

¹⁵ Oloca eparipari mukhalelo mukina nnachunaahu wi achu eniroromeleke. Hiyaano ninnamuroromela muchu yoowo ilukuluku soothene onaloca eparipari. (Éfe. 4:25; Ahe. 13:18) Muupuwele ela. Mwaanyiherye wi munnachuna wunnuwiha mavyakelo anyu a waahusiha akina Piipiliya. Voocharela, munnamveka muchu yoowo mmusuwenlaanyu sooleeliherya ikina sa ichu seiho munaphwanelaanyu weera wi munnuwihe mavyakelo anyu. Taani mwaahaalaanyu omuthanla, muchu yoowo mooreera murima aahaala oloca eparipari  naari muchu yoowo aahaala oloca ichu pahiru wi oohakalaliheeni? Naakhulo ti nookwakwaleya. Piipiliya oni: “Ori waphaama olopoliwa mookokoleya opwaha osivela wookhuweya. Nthamwene, nari aniphoreihaka, toororomeleya.” (Masi. 27:5, 6) Onanwerya okhala woovila owiriyana miyoonelo sa nthamwene ahu vooloca sa hiyo nyenya moovira wa elukuluku, eyo enamukhala yaphaama wa hiyo.

16. Mwawiiwanana ni Masiposipo 10:19, ntakhara heeni nnaphwanelaahu okhala awiihiiha?

¹⁶ Wakhala wi ninnachuna wi akina enroromeleke nnaphwanela okhala achu awiihiiha. Mukhalelo yoola onahaala onikhaviherya ovootha yaweeha ya oloca miyaha sookhuweya. (Mwaalakhanye Masiposipo 10:19.) Onanwerya okhala woovila okhala awiihiiha xaxaxa vaavaa nnampharihelaahu interneti. Nahikhalano ekaasoope moohichuna nnanwerya omwaramwaxa miyaha soovitheya wa achu ancipale. Nyenya nimanle ovonya sooleeliherya ikina mu interneti, hannawerya ovareryela mukhalelo eyo enahaalaaya ophariheliwa naari yoonanara enahaalaaya otannya. Wiihiiha tho onamwerya onikhaviherya vaavaa amwiicani ahu aneereryaaya oneeriha oloca miyaha seiho sinahaala oweeriha annihu okhala va yawoopiha. Ntoko yootakiherya, eyo enanwerya weereya mu elapo yeeyo muteko ahu okhwatiihiwaaya nave anna annakohakohiwa ni mapilisa. Mmikhalelo seiha, nnanwerya opharihela nlakiheryo nnaphwanyeya mu Salumu 39:1 nni: “Nkitaphula eyano aka.” Ilukuluku soothene nnaphwanela okhala achu oororomeleya, naamwi nri ni amusi, asinthamwene, anna ni arokora naari muchu vyakala. Nyenya wi nikhale achu oororomeleya, nnaphwanela okhala achu awiihiiha.

17. Nni niwerye hai okhaviherya muloko okhala mmukhalelo woororomeleya?

¹⁷ Hiyaano ninnamuthamalela vancipale Yehova nthowa na opaka makupa a emusi yoomunepani ya elapo yoothene yeeyo esaren’ye ni achu oosivela ni oororomeleya! Oothene ahu nookhalano murici wa wooniherya wi naachu oororomeleya wa anna ni arokora ahu. Wakhala wi oothene ahu ninniilipixerya wooniherya osivela, wiiyeviha, wiisuwela, oloca eparipari ni wiihiiha, muloko woothene onahaala okhala mmukhalelo woororomeleya. Osuweliwa okhala muchu oororomeleya tahi echu eneeriwano pahiru ekwaha emoha, nyenya nnaphwanela wiilipixerya mahiku oothene. Mwawiihiiha, nnahaala omutakiherya Muluku ahu Yehova ni wooniherya wi naachu oororomeleya ilukuluku soothene.