Mwawiiwanana ni 1 Korinto 15:8, Paulo ooloca: “Oonen’ye wa oothene yaala, vookuchula vaya aahooneya tho wa miyo, kiri ntoko mwaana oohororiwa.” Khalai, naathariha wi akhweya Paulo aaloca sa yaweereya awe vaavaa aamonneiye Yesu mu ncicimiho na wirimu. Waakhala ntoko wi aahivahiwa ekari ya oyariwa naari oviihiwa mookhwani wi aakhele ekumi yoomunepani ehaakumve ophiya elukuluku, iyaakha masana ohaakumve weereya ovinya mookhwani wa mukhalelo yoowo. Nyenya emanle ohuseryiwa mwawiiseela eversikulu yeela, waahooneya okhala woochuneya otoroka mukhalelo wa othariha eversikulu yeela.

Eparipari wi Paulo va onaloca sa yeeyo yeeren’ye mu orukunuwa wawe. Nyenya tiheeni owo achuneiye othariha vaavaa aalonceiye wi ari “mwaana oohororiwa”? Akhweya owo aachuna othariha ichu ikina.

Orukunuwa wawe wari wawaakuveya ni wootikhiniha. Mwaana oohororiwa ikwaha sincipale onayariwa mootutuxa. Vaavaa Saulo (yoowo ohoolo waya asuweliwe ntoko Paulo) aapakeiye mukwaha ayaaka o Tamasku wi awiikare Akristu a weiwo, owo haaweherya ovahiwa yawoona ya Yesu aviihiwe mookhwani. Orukunuwa wa Paulo hiwaamutikhininhe pahiru yene nyenya tho Akristu yaawo aalakelenleiye owiikara mu epooma yeele. Mwawaacererya, yawoona ela yaari yootikhinihaxa ophiyerya wi aarweela evaasi elukuluku yavakhaani.—Saw. 9:1-9, 17-19.

Owo aarukunuxiwe mu “elukuluku yoohiphwanelela.” Nsu na Ekiriki ntaphuleliwe “mwaana oohororiwa” nnanwerya olociwa tho ntoko “mwaana oyariwe mu elukuluku yoohiphwanelela.” Piipiliya o Yerusalemu olonce wi: “Yaakhala ntoko wi kiyariwe ahikhanlevo aawehererya yeeyo.” Mu elukuluku Paulo aarukununweiye, Yesu iha akookenle wirimu. Moohiyana ni yaale Paulo aalonceiye mu iversikulu soopacerya, owo haamonne Yesu aviihiwe mookhwani ahaakumve oya wirimu. (1 Kor. 15:4-8) Yawoona yoohiwehereryeya ya Yesu wa Paulo yaahimvaha ekari ya omoona Yesu amanle oviihiwa, naamwi yaakhala ntoko yeeren’ye mu “elukuluku yoohiphwanelela.”

Owo aaloca sa yene mwaneene mmukhalelo wa wiiyeviha. Mwawiiwanana ni alipa oohuseryaxa akina, masu Paulo opharihenleiye va ananwerya ovuwa ntoko echu ehirino esisapo. Waakhanle wi Paulo anuupuwela mmukhalelo yoola, owo eemererya wi haaphwanela ovahiwa murici yoole. Mweeparipari, owo aahititelela oloca: “Miyo kiri mukhaani a arummwa nave honakiphwanela weeriwa murummwa, ntakhara kaaniikara muloko wa Muluku. Nto, mwa mahala a Muluku, kiri ntoko kikhalenlaaka.”—1 Kor. 15:9, 10.

Mwawiihiiha, yaakhala ntoko wi Paulo aloca sa mukhalelo wawaakuveya ni wootikhiniha Yesu iisooneihaleiye wa yene, orukunuwa wawe mu elukuluku yoohiwehereryeya, naari eparipari yawi, haari oophwanelela wi aakhele yawoona yeela yootikhinihaxa. Moohipwacha mathoweene, mweeparipari Paulo aahivaha esisapo yaweereya yeele. Moohikhwa minikwa, yaahimulekecha wi Yesu aaviihiwa mookhwani. Hiwaari wa siiyo oloca sa yaweereya yeela yoohiwehereryeya wiiliwiili vaavaa aalaleeryeiye wa akina vooloca sa ovinya mookhwani wa Yesu.—Saw. 22:6-11; 26:13-18.