1. Mikhalelo taani soovila Yowasi, Usiya ni Yosiya yaahoolenlaaya?

 APWANNE mohintoko waanyiherya muri mwaana naari mmiravo muthanliwe okhala mwene a nloko na Muluku? Mwaahaala opharihela hai owerya ni olamulelo anyu? Piipiliya onnaloca sa amiravo ancipale yaakhanle mamwene o Yuta. Ntoko yootakiherya, Yowasi aakhanle mwene arino iyaakha 7 sa oyariwa, Usiya aarino iyaakha 16 nave Yosiya aarino iyaakha 8. Eyo hiyaari yookhweya wa yaawo! Naamwi yaari mmukhalelo woovila, Yehova ni akina yaahaakhaviherya ovootha makacamiho ni opaka ichu sincipale saphaama.

2. Ntakhara heeni oryaaya woochuneya wi nihuserye yootakiherya ya Yowasi, Usiya ni Yosiya?

² Eparipari wi hiyaano tahi na mamwene, nave nnanwerya ophwanya mahusiheryo oochuneya ni Yowasi, Usiya vamoha ni Yosiya. Awo yaahipaka soothanla saphaama, nyenya tho yaahipaka soothanla soonanara. Nthokororyaka sootakiherya saya, nnahaala woona ntakhara heeni nnaphwanelaahu waathanlaka asinthamwene aphaama, otitelela okhala awiiyeviha ni wiilipixerya omwaacamela Yehova.

3. Ti mwawiihai Yehoyata aamukhavihenryeiye Mwene Yowasi opaka soolakelela saphaama?

³ Mutakiherye soolakelela sa miruku sa Yowasi. Vaavaa aareiye mmiravo, Mwene Yowasi aahipaka yoothanla ya miruku. Naamwi aayeleenle apapa awe, owo aahichariha miruku sa mulipa a Mukucho Mutokweene oororomeleya, Yehoyata. Yehoyata aahimphuwa Yowasi ntoko mwanawe. Nave nthowa na yootakiherya yaphaama ya Yehoyata, Yowasi aahilakelela omulapela Yehova ni okhaviherya nloko weerano emohamoha. Ophiyerya wi Yowasi aahipaceryiha orehererya empa ya Yehova.—2 Math. 24:1, 2, 4, 13, 14.

4. Miphurelo taani nnakhalaahuno vaavaa nnamusivelaahu Yehova ni wiiwelela malamulo awe? (Masiposipo 2:1, 10-12)

⁴ Waakhanle wi asitiithi anyu naari muchu mukina onnoohusihaani  vooloca sa Yehova ni malakiheryo awe, mulekecheye wi eyo yamahala yasisapo muryaanyuno. (Mwaalakhanye Masiposipo 2:1, 10-12.) Asitiithi anyu ananwerya woohusihaani mmikhalelo soohiyanahiyana. Moone mukhalelo tiithi aamukhavihenryeiye Katiya opaka soolakelela saphaama. Elukuluku yoothene vaavaa yaamuhoolaaya osikola, awo yaanavaanela sa yoorepa ya nihiku. Katiya ooloca: “Ovaanela yoole waanakikhaviherya ohoolela makacamiho a nihiku nenle.” Nyenya akhweya asitiithi anamutikitherya malamulo anathipeleya Mpiipiliyani, nave nyuwaano munoona okhala oovila. Mmukhalelo yoowo, tiheeni enahaala wookhaviheryaani owiiwelela? Murokora oniichaniwa Anastasiya ooloca wi asitiithi awe ikwaha sincipale yaanamuleela owo ntakhara heeni yaatikitheryaaya malamulo ammoori. Owo ooloca: “Eyo yaanakikhaviherya wiiwexexa wi awo hiyaatikitherya malamulo yaawo wi ekivareryeleke, nyenya nthowa nawi awo yaanakisivela nave yaachuna okikhapelela.”

5. Ti mwawiihai saweera sanyu sinaavolowelaaya asitiithi anyu ni Yehova? (Masiposipo 22:6; 23:15, 24, 25)

⁵ Asitiithi anyu anamukhala oohakalala vaavaa munacharihaanyu miruku sa Mpiipiliyani anoovahaayaani. Nyenya echu yoochuneyaxa ti yawi Yehova onamutepa ohakalala nave onthamwene anyu ni yoowo onahaala okhala woolipa. (Mwaalakhanye Masiposipo 22:6; 23:15, 24, 25.) Ala mathowa aphaama wi mucharihe yootakiherya ya Yowasi vaavaa aareiye mmiravo.

6. Ikano taani Yowasi aapacenryeiye owiriyana Yehoyata amanle okhwa, nave teevi yaari yookhumela ene? (2 Matharihelo 24:17, 18)

⁶ Muhuserye orweela wa soolakelela soonanara sa Yowasi. Yehoyata amanle okhwa, Yowasi aapacerya okhalano asinthamwene oonanara. (Mwaalakhanye 2 Matharihelo 24:17, 18.) Owo aalakelela ocharihaka ikano sa ahooleli a Ayuta, yaawo yaahaamusivela Yehova. Akhweya munamweemererya wi Yowasi aaphwanela okhala ocai wa onthamwene wa mukhalelo yoowo. (Mas. 1:10) Ohiya yeeyo, owo aari mulolo nave alakelela waawiriyana anamiruku yaale oonanara. Pirimu awe Sakariya aaheererya omookolola nave Yowasi aalamulela wi iiphiwe. (2 Math. 24:20, 21; Mat. 23:35) Yaari yoothananiha! Yowasi aapacerya phaama, nyenya moothananiha aahikhala mulipa oomwaryeya ni mulipa awiipha. Wookuchulani, owo aahiiphiwa ni alapeli awe. (2 Math. 24:22-25) Ichu saahaala omweecela phaama waakhanle wi ootitelela onwiriyana Yehova ni yaale anamusivela! Tiheeni munahuseryaanyu orweela wa yootakiherya ya Yowasi?

7. Taani munaphwanelaanyu waathanla ntoko asinthamwene anyu? (Moone tho eruku.)

⁷ Echu emoha nnahuseryaahu orweela wa soolakelela soonanara sa Yowasi ti yawi onnachuneya waathanla asinthamwene enanivaha ovolowela waphaama, yaawo anamusivela Yehova nave anachuna omuhakalaliha yoowo. Nyenya asinthamwene anyu ananwerya okhala a iyaakha soohiyanahiyana. Muupuwele wi Yehoyata aari  awunnuwelavo ompwaha mmiravo Yowasi. Vooloca sa asinthamwene anyu, mwiikohe: ‘Apwanne awo annakikhaviherya olipiha nroromelo naka mwa Yehova? Apwanne awo annakiceenyerya okhala mwawiiwanana ni malakiheryo a Yehova? Awo annaloca vooloca sa Yehova ni iparipari sa Mpiipiliyani? Awo annacicimiha malakiheryo a Muluku? Apwanne analoca ichu wi ekihakalalihe naari annakhalano olipa murima wi ekivahe ekano vaavaa kinachunaaka?’ (Mas. 27:5, 6, 17) Eparipari ti yawi, waakhanle wi asinthamwene hanamusivela Yehova, tahi oochuneya wa nyuwo. Nyenya waakhanle wi asinthamwene anyu annamusivela Yehova, mwiipharelele ni asinthamwene yaawo, woona wi awo anahaala wookhaviheryaani ilukuluku soothene!—Mas. 13:20.

8. Wakhala wi munnampharihela interneti, tiheeni munaphwanelaanyu wuupuwela?

⁸ Interneti onanwerya okhweiha olocihana ni amusi ni asinthamwene. Nyenya ancipale annampharihela interneti wi yaacaparihe akina erumihaka iruku ni ixilema, yooniheryaka yeeyo anathumaaya ni anapakaaya. Waakhanle wi munnampharihela interneti, munaphwanela wiikoha: ‘Apwanne yoolakelela aka ori waacapariha akina? Apwanne kinachuna okawana ni akina yeeyo eri yaphaama naari wi kinachuna wiivuwiha? Apwanne yeeyo akina anavonyaaya onnavolowela mukhalelo aka wa wuupuwela, wa oloca ni opaka ichu?’ Munna Nathan Knorr, yoowo orumeenle mu Nikhuuru Noolamulela, oovaha ekano ela: “Muheererye waahakalaliha achu oothene, nthowa nawi hanwerya omuhakalaliha naari mano muchu mmoha. Mweererye omuhakalaliha Yehova. Mmukhalelo yoowo, munahaala waahakalaliha oothene yaale anamusivela.”

9. Yehova aamukhavihenrye Usiya opaka eheeni? (2 Matharihelo 26:1-5)

⁹ Mutakiherye soolakelela saphaama sa Usiya. Vaavaa Mwene Usiya aareiye mmiravo, owo aari awiiyeviha. Owo aahihuserya “omoova Muluku.” Usiya aakhwile arino iyaakha 68, nave mmakupa a okumi awe aahireelihiwa ni Yehova. (Mwaalakhanye 2 Matharihelo 26:1-5.) Usiya aahitoloxa maloko mancipale a amwiicani nave aahimweeriha Yerusalemu okhala nipuro nookhapeleleya. (2 Math. 26:6-15) Moohikhwa minikwa, Usiya aahitepa ohakalala ni ichu aapankeiye nnikhaviheryo na Yehova.—Ekl. 3:12, 13.

10. Tiheeni yeeren’ye ni Usiya?

¹⁰ Muhuserye ni soolakelela soonanara sa Usiya. Mwene Usiya aahikhovelela waaleela akina yeeyo awo yaaphwanelaaya opaka. Apwanne ela yaahimweeriha wuupuwela wi aaphwanela weera soothene aachuneiye? Nihiku nimoha, Usiya aahivolowa mu empa ya Muluku nave aaheererya opaha mukucho va altare, echu yeeyo mamwene yahaaphwanelaaya weera. (2 Math. 26:16-18) Mulipa a Mukucho Mutokotoko Asariya aaheererya omookolola, nyenya Usiya aahitepa onyeenyeya. Moothananiha, Usiya haatitelenle okhala oororomeleya wa Yehova nave aahilakiwa ni mareca. (2 Math. 26:19-21) Ichu saahala okhala soohiyana waakhanle wi Usiya aatitelela okhala awiiyeviha!

11. Tiheeni enahaala wooniherya wi naachu awiiyeviha? (Moone tho eruku.)

¹¹ Vaavaa Usiya aakhanleiye mulopwana ooweryaxa, owo aahicuwala ichu soothene saphaama seiho Yehova aampakenleiye. Tiheeni nnahuseryaahuvo? Nnaphwanela wuupuwelaka ilukuluku soothene wi mareeliho ahu oothene ni mirici sahu sinarwa wa Yehova. Ohiya wiirumiha ni ichu seiho nnaweryaahu opaka, nnaphwanela oveleelaka ncicimiho nahu noothene wa Yehova. b (1 Ako. 4:7) Ohiya yeeyo, nnaphwanela okhala awiiyeviha ni osuwela wi naachu oohiphaameya nave ninnaphwanela olakiwa. Munna mmoha a iyaakha 60, oorepa: “Miyaano koohuserya ohikhala oonyeenyeya naari ooceecheya vaavaa akina anoonaaya soohesa saka. Ikwaha ikina kinnapaka  soohesa soololo nave kinnavahiwa ikano nthowa na seiyo. Naamwiihiiha, kinneererya ni otitelela omvaha Yehova owetha waka.” Vaavaa nnamwiiwelelaahu Yehova ni otitelela okhala awiiyeviha, ninnakhalano ohakalala weeparipari.—Mas. 22:4.

12. Vaavaa aareiye mmiravo, ti mwawiihai Yosiya aamwaacamenleiye Yehova? (2 Matharihelo 34:1-3)

¹² Mutakiherye soolakelela saphaama sa Yosiya. Yosiya aari mmiravo vaavaa aapacenryeiye omwaacamela Yehova. Owo aanachuna opaka sincipale vooloca sa Yehova ni opaka yoochuna awe, nyenya mwene yoola aari mmiravo ilukuluku soothene okumi awe hiwaari wookhweya. Mu elukuluku yeele, achu ancipale yaalapela amuluku atheru, nave Yosiya aanaphwanela okhala oolipa murima wi awerye waakiha malapelo eeparipari. Nave ti yeeyo ene eenreiyeno! Owo haarinono naari mano iyaakha 20 sa oyariwa vaavaa aapacenryeiye otoloxa malapelo atheru.—Mwaalakhanye 2 Matharihelo 34:1-3.

13. Wiiveleela wa Yehova onataphulela eheeni wa nyuwo?

¹³ Naamwi nyuwaano muri mmiravo, munanwerya omutakiherya Yosiya ni ohuserya sincipale vooloca sa Yehova ni mikhalelo Sawe sootikhiniha. Ti yeeyo enahaala oweerihaani ochuna wiiveleela wa Yehova. Nyenya, ti mwawiihai yoolakelela yeela enahaalaaya ovolowela okumi anyu? Luka yoowo opatisiwe arino iyaakha 14, ooloca: “Ovinyerya hiihaano, kinahaala okuha muteko wa Yehova mu nipuro noopacerya mu okumi aka nave kinahaala wiilipixerya wi kihakalalihe murima awe.” (Mar. 12:30) Munanwerya ororomela wi munahaala oreelihiwa vancipale wakhala wi moolakelela weerano yeeyo!

14. Mvahe sootakiherya sa mukhalelo amiravo akina anamutakiheryaaya Mwene Yosiya.

¹⁴ Ntoko mmiravo munamulapela Yehova, makacamiho taani munahoolelaanyu? Yohani, yoowo opatisiwe arino iyaakha 12, onnaloca sa okhinyereryiwa onahooleleiye ni asinthamwene awe oosikola wi amulyeeke soona. Wi awerye okhalano ikuru ni ovilela mu okhinyererya yoowo, Yohani aahuupuwela wa yene meekheiye wi ohiya pahiru onanariha mwiili awe, soona aahaala onanariha onthamwene awe ni Yehova. Rakeli, yoowo opatisiwe arino iyaakha 14, onnathariha yeeyo enamukhaviherya ovootha makacamiho yaawo onahooleleiye oxikola. Owo oriye: “Miyaano kinneererya olikanyiha soothene kinoonaaka ni ichu ikina sa Mpiipiliyani. Ntoko yootakiherya, yoohuserya emoha ya osikola ennawerya okuupuxerya mwaha wammoori wa  Mpiipiliya naari yooloherya. Nave ikwaha ikina, vaavaa kinachekulaaka ni muchu osikola, kinnuupuwela yoorepa emoha ya Mpiipiliya nave kinnamooniherya muchu yoowo.” Makacamiho yaawo munahoolelaanyu ananwerya okhala oohiyana ni yaawo Yosiya aahoolenleiye, naamwiihiiha, munanwerya okhala amiruku ni oororomeleya, hiihaa ntoko owo aareiye. Ovootha makacamiho hiihaano muryeene mmiravo onahaala wookhaviheryaani ohoolela makacamiho oomwaahiyu.

15. Tiheeni yaamukhavihenrye Mwene Yosiya omurumeela Yehova moororomeleya? (2 Matharihelo 34:14, 18-21)

¹⁵ Vaavaa Mwene Yosiya aareiyeno iyaakha 26, aahipacerya orehererya empa ya Muluku. Waari vaavaa aaphwanyiweiye, “liivuru a Nlamulo na Yehova naavahiwe moorweelaa wa Mose.” Vaavaa mwene iiwaleiye yeeyo yaari mu liivuru, mwawaakuveya aahipaka matorokelo wi iiwelele yeeyo yaarempwe mwemmo. (Mwaalakhanye 2 Matharihelo 34:14, 18-21.) Apwanne moheererya omwaalakhanya Piipiliya mahiku oothene? Waakhanle wi aa, apwanne munnapuha? Apwanne munnarepela iversikulu ikina seiho inahaala wookhaviheryaani? Luka yoowo olociwe woopaceryani, onnarepela mu katerno miyaha soochuneya seiho onaphwanyeiye mu waalakhanya wawe wa Piipiliya. Akhweya, weerano mmukhalelo mmohamoha onanwerya wookhaviheryaani wuupuwelelaka iversikulu sa Mpiipiliyani naari mahusiheryo yaawo muhusenryaanyu. Vaavaa munahaalaanyu omwiiwexexaka ni omusivela Piipiliya, munahaala ochunaka omurumeela Yehova. Nave hiihaa ntoko Masu a Muluku yaamukhavihenryaaya Yosiya opaka yeeyo yaari yaphaama, anahaala wookhaviheryaani tho.

16. Ntakhara heeni Yosiya aahipaka yoocheka, nave tiheeni nnahuseryaahu ni yeeyo?

¹⁶ Muhuserye ni soolakelela soonanara sa Yosiya. Vaavaa Yosiya aareiyeno iyaakha 39, owo aahipaka soohesa saahenle okumi awe va yawoopiha. Ohiya waavya ohoolela wa Yehova, owo aahiiroromela mukhateiye. (2 Math. 35:20-25) Nla nihusiheryo ntokweene wa hiyaano. Moohipwacha iyaakha sahu naari elukuluku nimalinhaahu nimurumeelaka Yehova, hiyaano nnaphwanela otitelela omwaacamelaka Yoowo. Wi neereno yeeyo, nnaphwanela ovekelaka wa Yehova  ilukuluku soothene, nivekaka ohoolela wawe, omuhuserya Piipiliya ni owiriyana ikano sa Akristu awiichwelavo. Mwawiihiiha, hokhala wookhweya wa nyuwaano opaka yoocheka nave munanwerya okhalano ekari yawaaca ya okhala oohakalala.—Tiy. 1:25.

17. Mahusiheryo taani oochuneya nihusenryaahu ni mamwene mararu o Yuta?

¹⁷ Sookhalavo ichu saphaama munahaalaanyu opaka muryeene mmiravo. Saweereya sa Yowasi, Usiya ni Yosiya sinnooniherya wi munanwerya opaka soolakelela saphaama ni omuhakalaliha Yehova naamwi muri mmiravo. Eparipari wi awo aapaka soohesa seiho saakumihenrye makacamiho. Wakhala wi nyuwaano mootakiherya ichu saphaama apankaaya ni ohichariha soohesa apankaaya, ekumi anyu enanwerya okhala yoohakalalaxa.

18. Sootakiherya taani sa Mpiipiliyani inooniherya wi okumi anyu onanwerya okhala woohakalalihaxa? (Moone tho eruku.)

¹⁸ Piipiliya onnaloca tho sa amiravo yaawo yaamwaacamenle Yehova, ereelihiwa ni yoowo nave ekhala oohakalala. Tavite mmoha a yaawo. Vaavaa aareiye mmiravo, owo aahithanla okhala nthamwene a Yehova nave voocharela aahikhala mwene oororomeleyaxa. Eparipari wi Tavite aahipaka soohesa ikina, nyenya naamwiihiiha, Yehova aanamoona Tavite ntoko mulapeli oororomeleya. (1 Mam. 3:6; 9:4, 5; 14:8) Munoona hai ohuserya sincipale vooloca sa okumi wa Tavite? Moohikhwa minikwa, munamukhala oolipiheya ni ooceenyeryeya omurumeela Yehova moororomeleya. Nyuwaano tho munanwerya ohuserya vancipale vooloca sa yootakiherya ya Marku naari ya Timotiyu. Awo yaapacenrye omurumeela Yehova ereene amiravo nave yaahititelela okhala oororomeleya ophiyerya okhwa waya. Awo yaahaakhela weemereryiwa ni Yehova nave yaahikhala oohakalalaxa wa nthowa na yeela.

19. Munachuna wi okumi anyu okhale wa mukhalelo taani?

¹⁹ Mukhalelo munapharihelaanyu okumi anyu hiihaano onahaala ovolowela omwaahiyu anyu. Wakhala wi munnamuroromela Yehova, ohiya wiiroromela mukhatiinyu, ilukuluku soothene onahaala wookhaviheryaani opaka soolakelela saphaama. (Mas. 20:24) Chiri nyuwaano munanwerya okhalano okumi woohakalala ni woosareya ichu sincipale saphaama. Nyenya muupuwele wi Yehova onnavaha esisapo yincipale yeeyo munapakaanyu ntakhara yoowo. Opharihela okumi anyu wi mmurumeele Tiithi anyu oosivela Yehova, yoothanla yaphaama munaphwanelaanyu opaka. Hiyaavo echu yaphaama opwaha yeeyo.