1-2. Ntakhara heeni ti waphaama ohuserya vooloca sa Sansawu?

 TIHEENI munuupuwelaanyu vaavaa muniiwaanyu nsina na Sansawu? Ti yawooneya wi munnuupuwela wi owo aari mulopwana akuruxa. Eyo eparipari. Nave eparipari wi owo aahipaka soolakelela soonanara nave aahooxeya ni sookhumelela sa soolakelela sawe. Naamwiihiiha, Yehova aahitikitheryeya wa ichu saphaama soothene Sansawu aapankeiye. Muluku oohiya yootakiherya ya Sansawu Mpiipiliya ntakhara mphurelo ahu.

² Yehova aahimpharihela Sansawu wi apake ichu sootikhiniha ni waakhaviherya Aisarayeli. Iyaakha masana masaneene Sansawu amanle okhwa, Yehova aahimveerela murummwa Paulo ophitaanyerya nsina nawe mu elista ya achu yaawo yoonihenrye nroromelo nenlo nahaari nawunlaana mu elukuluku yeeyo. (Ahe. 11:32-34) Yootakiherya ya Sansawu enanwerya onilipiha. Owo aahimuroromela Yehova naamwi ahoolelaka mikhalelo soovilaxa. Nnahaala woona ti mwawiihai yootakiherya ya Sansawu enahaalaaya onilipiha ni mahusiheryo oophara muteko nnahaalaahu ohuserya ni yoowo.

3. Murici taani Sansawu aakhenleiye?

³ Vaavaa Sansawu aayariweiye, Afilisti yaanahiphela ni ohooxa nloko na Isarayeli. (Amut. 13:1) Awo yaari anlalaxa nave ti nthowa nene Aisarayeli yaahooxeyaaya mmatani mwaya. Yehova aahimuthanla Sansawu wi ‘awoopole Aisarayeli wa Afilisti.’ (Amut. 13:5, PMM) Eyo yaanwerya okhala yoovila! Wi aakhwaniherye murici yoowo, Sansawu aaphwanela omuroromela Yehova.

4. Ti mwawiihai Yehova aamukhavihenryeiye Sansawu okophola mmatani mwa Afilisti? (Amuthoriha 15:14-16)

⁴ Nnahaala woona yootakiherya emoha enooniherya mukhalelo Sansawu aamuroromeleiye Yehova ni mukhalelo Muluku  amvaheiye nikhaviheryo. Mu ekwaha emoha, nikhuuru na anakhoco na Afilisti naahiya o Leyi, woonaru o Yuta wi yamphare Sansawu. Achu o Yuta yaakhala awoova, mwawiihiiha, awo yaalakelela omperekha Sansawu wa amwiicani aya. Nloko na Sansawu naahimmaka ni mikoyi miili mivyaani ni emperekha mmatani mwa Afilisti. (Amut. 15:9-13) Nyenya, “Munepa wa Apwiya [Yehova] wamvolowa ni ikuru.” Nave Sansawu aahitaphula mikoyi seiho aamakiweiyeno. Waari vaavaa Sansawu ‘aaconceiye elakutha ekithi ya puuru,’ nave ni yeeyo aawiiphano alopwana a Afilisti awaakhwana ncikhwi!—Mwaalakhanye Amuthoriha 15:14-16, PMM.

5. Sansawu oonihenryeiye hai wi aanamuroromela Yehova?

⁵ Ntakhara heeni Sansawu aapharihenleiye elakutha ya puuru? Eyo yaari echu yookuchula muchu aahaaleiye wuupuwela opharihela wi awaniheno! Nyenya, moohikhwa minikwa, Sansawu aasuwela wi okhumelela wawe phaama waari wooweryeya nnikhaviheryo na Yehova, ohiya wa ekaruma yeeyo aahaaleiye opharihela. Mulopwana yoola oororomeleya aahipharihela yeeyo yaari vakhiviru wi awerye waakhwaniherya yookhwela ya Yehova. Moohikhwa minikwa, Sansawu aatepa oreelihiwa mu elukuluku yeele nave aawerya waavootha alopwana yaale nthowa nawi owo aahimuroromela Yehova.

6. Yoororomeliha taani yootakiherya ya Sansawu enanivahaaya?

⁶ Yehova tho onanwerya onivaha ikuru wi naakhwaniherye murici vyakala, naamwi yooneyaka okhala yoohiweryeya. Nave Muluku onanwerya weerano yeeyo ophiyerya mmukhalelo wootikhiniha. Mwawiihiiha, mmuroromele Yehova. Hiihaa ntoko amvanheiye owerya Sansawu, owo tho onahaala wookhaviheryaani waakhwaniherya yoochuna Awe wakhala wi munnamuroromela ni waavya nikhaviheryo Nawe.—Mas. 16:3.

7. Mvahe yootakiherya enooniherya mukhalelo oryaaya woochuneya waavya ohoolela wa Yehova.

⁷ Anna ni arokora ancipale analapa mmiteko sa oteka sa marehereryo annooniherya wi annamuroromela Yehova. Khalai yaari yawunlaana anna opaka marehereryo ni oteka Ipa  sa Omwene sincipale ni ipereetiyu ikina sa marehereryo. Nyenya, moovira wa elukuluku achu ancipale annapatisiwa nave marehereryo yaanaphwanela opaka matorokelo makina. Anna yaahoolela miteko seiha yaahaavya ohoolela wa Yehova nave yaaheererya mikhalelo mivyaani. Ntoko yootakiherya, othuma ipereetiyu saatekiwe ni orehererya seiho. Roperto, munna mmoha yoowo mu iyaakha sahiihaanoru olampe mmiteko mincipale sa oteka mu elapo yoothene, ooloca: “Woopaceryani, hiwaari wookhweya weemererya wi ichu seiha saahaala opakiwaka mmukhalelo yoola. Eyo yaatepa ohiyana ni yeeyo naapakaahu mu iyaakha sincipale muculi. Nyenya anna yaari ooreheryeya wiikhoveleliha nave yaanooneya phaameene wi Yehova aahireeliha matorokelo yaala.” Ela yootakiherya emoha ya mukhalelo Yehova onaahooleleiye achu awe wi yaakhwaniherye yoochuna awe. Elukuluku ti elukuluku yaamukhala yaphaama oothene ahu wiikoha: ‘Apwanne kinnaavya ohoolela wa Yehova nave kiri ooreheryeya opaka matorokelo wi kimurumeele Yoowo mmukhalelo waphaama?’

8. Tiheeni Sansawu aapankeiye vaavaa aareiye ni nchanana?

⁸ Akhweya nyuwaano munamuupuwela wi Sansawu aahipaka ichu sincipale sootikhiniha. Ntoko yootakiherya, ahirino echu mmatani, aahimwiipha mwaco, nave voocharela, awiipha alopwana 30 a Afilisti mu epooma ya Axekaloni. (Amut. 14:5, 6, 19) Sansawu aanasuwela wi nahaari nikhaviheryo na Yehova, owo hi awerye opaka ichu seiha. Ela yaahikhala yookwakwaleya, mu ekwaha emoha vaavaa Sansawu aakhanleiye ni nchanana ntokweene amanle owiipha Afilisti awaakhwana ncikhwi. Tiheeni owo aapankeiye? Ohiya waavya maahi ni weererya orehererya nikacamiho mukhateiye, owo aahiveka nikhaviheryo na Yehova.—Amut. 15:18.

9. Tiheeni Yehova aapankeiye vaavaa Sansawu aavekenleiye avekaka nikhaviheryo? (Amuthoriha 15:19)

⁹ Yehova aahaakhula yooveka ya Sansawu moorweela wa opaka mootikhiniha ehime ya maahi. Vaavaa Sansawu aawunryeiye maahi yaale, ‘aalipiha murima ni aakhala ni ikuru.’ (Mwaalakhanye Amuthoriha 15:19, BNM.) Mwawooneya, ehime yeele ya maahi nlelo yaahikhala mu iyaakha sincipale, ophiyerya vaavaa mulipa a miririmu Samuwele aaveereliweiye omurepa liivuru a Amuthoriha. Ilukuluku soothene Aisarayeli yoonaaya ehime yeele ya maahi, awo yaanuupuwela wi wakhala wi annamuroromela Yehova, owo aahaala waakhaviherya mu nikacamiho vyakala.

10. Tiheeni nnaphwanelaahu weera wi naakhele nikhaviheryo na Yehova? (Moone tho eruku.)

¹⁰ Hiyaano tho nnaphwanela waavyaka nikhaviheryo na Yehova moohipwacha masuwelelo naari mavyakelo nryaahuno naari ichu kavi niwenryaahu opaka mmuteko awe. Nnaphwanela okhala oophimelela ni weemererya wi pahiru nnahaala owerya opaka yookhwela ya Yehova wakhala wi ninnamuroromela Yoowo. Hiihaa ntoko Sansawu aakookenleiye okhala oolipa amanle owurya maahi yaawo Yehova amvanheiye, hiyaano tho nnanwerya otitelela okhala oolipa omunepani wakhala wi ninnapharihela soovaha soothene sa Yehova.—Mat. 11:28.

11. Ti mwawiihai Aleksey oonihenryeiye wi onnamuroromela Yehova, nave nni neereno hai yeeyo?

¹¹ Moone yootakiherya ya Aleksey, munna mmoha onakhala o Rusiya, yoowo onahoolela wiikariwa otokweene. Tiheeni emukhavihenrye otitelela okhala oolipa, naamwi ahoolelaka mikhalelo soovilaxa? Owo ni mwaariye aatikitherya yookhovelela yoomunepani yaphaama. Owo ooloca: “Kinneererya ochariha marehereryo aka a yoohuserya ya muchu  mukhateiye ni omwaalakhanya Piipiliya nihiku nnihiku. Woosiiselo ori woothene, miyaano ni mwaaraka ninnathokororya yoorepa ya nihiku nave ninnavekela wa Yehova vamoha.” Tiheeni nnahuseryaahu ni yootakiherya ya Aleksey? Ohiya wiiroromela mukhatiihu, nnaphwanela omuroromela Yehova. Mwawiihai? Nnaphwanela otikitherya yookhovelela yaphaama ya yoohuserya ya muchu mukhateiye ni miteko soomunepani seiho sinahaala olipiha nroromelo nahu. Wakhala wi noheerano yeela, Yehova onahaala oreeliha wiilipixerya wahu wa omurumeela yoowo. Owo aahimulipiha Sansawu, nawe mweeparipari, onahaala tho onilipiha.

12. Yoolakelela taani yoonanara Sansawu aapankeiye, nave ntakhara heeni ompwana wa Sansawu ni Talila waaryaaya woohiyana ni yoowo aareiyeno ni athiyana akina?

¹² Sansawu aari oohiphaameya hiihaa ntoko hiyo. Mwawiihiiha, owo aahipaka soolakelela ikina soonanara. Xaxaxa yoolakelela emoha aapankeiye yaahimuruuhela makacamiho mancipale. Sansawu amanle orumeela ntoko muthoriha mu elukuluku yincipale, “aamoona muthiyana a mpopa wa oSoreki, amuchuna. Nsina nawe naari Talila.” (Amut. 16:4, PMM) Elukuluku vakhaani muculi, Sansawu aahimuurya muthiyana mmoha Mfilisti. Aari Yehova aamurumme weerano yeeyo, woona wi yaahaala okhala ekari ya owana ni Afilisti. Mu ekwaha emoha, Sansawu aahikhala vaate va capaheya mmoha o Kasa, epooma yo Filisti. Mu ekwaha yeeyo Yehova aahimvaha owerya Sansawu wa ophola mukhora wa ekintaale ya epooma, hiihaa, eyo yaahikhala yoohikhapeleleya. (Amut. 14:1-4; 16:1-3) Nto vooloca sa Talila, waari woohiyana. Woonaru, owo aari Muisarayeli. Mwawiihiiha, ompwana aya hiwi omvahe Sansawu ekari ya owana ni Afilisti.

13. Tiheeni Talila aamweerenleiye Sansawu?

¹³ Afilisti yaahimuliva ni ikhorowa sincipale Talila wi anwoke Sansawu. Owo aatepa  omuchuna Talila ophiyerya ohiiwexexa yeeyo Talila aachuneiye opaka. Owo aahimukhinyererya Sansawu omuleela nthowa naamweeriha okhala akuruxa. Wookuchulani, Sansawu aahimuleela soothene Talila. Moothananiha, aari mwaneene Sansawu iihenle mu nikacamiho nenlo noovila. Yoohesa awe yaahimweeriha oyeleela ikuru sawe ni weemereryiwa ni Yehova mu elukuluku yammoori.—Amut. 16:16-20.

14. Sookhumelela taani Sansawu aahoolenleiye nthowa na omuroromela Talila?

¹⁴ Sansawu aahikhalano sookhumelela soowaawaxa nthowa na omuroromela Talila, ohiya Yehova. Afilisti yaahimphara Sansawu, ewoxola miitho awe nave enwalela o Kaasa. Mu ekwaha emoha Sansawu aahiwuuliha muru achu a epooma yeele. Vano, owo aanuulihiwa muru ni achu ntoko kapuro aaxila ichu ni namahaani. Nave Sansawu aahititelela onyemuliwa vaavaa Afilisti yaamukunxaaya wi eye o efesta yeeyo yaampakenlaaya muluku aya Takoni. Awo yuupuwela wi waari nnikhaviheryo na muluku yoowo atheru yaawenryaaya omphara Sansawu. Mu elukuluku yeele, Afilisti yaanachuna omuroha nave yaahimwiichana Sansawu mukariposo wi “enathatano.”—Amut. 16:21-25, PMM.

15. Ti mwawiihai Sansawu oonihenryeiye wi aahikookela omuroromela Yehova? (Amuthoriha 16:28-30) (Moone eruku ya ekaapa.)

¹⁵ Sansawu aahipaka yoohesa etokweene, nyenya owo haahin’ye otitelela omurumeela Yehova. Owo aahaavya ekari wi apake yookhwela ya Yehova, naari wi, owana ni Afilisti. (Mwaalakhanye Amuthoriha 16:28-30, PMM.) Sansawu aavekela wa Yehova ariki: “Mukilipihe miyo . . . wi kinle ikuhu khuluwi ni aFilisti.” Yehova aahaakhula nivekelo na Sansawu, nave wanaawiili, aahimvaha ikuru moopwaha mphimo mmukhalelo wootikhiniha. Ni yeela, Sansawu aawerya owiipha Afilisti ancipale mu elukuluku yeele opwaha yaawo aawiiphaleiye mu okumi awe woothene.

16. Tiheeni nnahuseryaahu ni yoohesa ya Sansawu?

¹⁶ Eparipari wi Sansawu aahoolela mikhalelo soovila wa nthowa na soohesa sawe, nto owo haahin’ye weererya opaka yookhwela ya Yehova. Emohamoha enneereya tho ni hiyaano. Wakhala wi noopaka yoocheka nave nlakiwa naari n’yeleela mirici sahu, hannaphwanela ohiya omurumeela Yehova. Muupuwele ela: Yehova harwa anihiya. (Sal. 103:8-10) Naamwi nihesaka, nnanwerya otitelela ophariheliwa ni Yehova, hiihaa ntoko Sansawu.

17-18. Tiheeni munahuseryaanyu ni yootakiherya ya Michael? (Moone tho eruku.)

 ¹⁷ Moone yeeyo yeeren’ye ni munna mmoha ori mmiravo awiichaniwa Michael. Owo aari ooweiwa ni ichu sa muloko arumeelaka ntoko murummwa oorumeela ni piyoneero a elukuluku yoothene. Nyenya moothananiha, owo aahipaka yoocheka nave ayeleela mirici sawe mmulokoni. Owo ooloca: “Ichu saaneeca phaama, nave kaakhalano ichu sincipale wi kipake mmuteko wa Yehova, nyenya moohiwehererya waakhanle ntoko wi kaamanne mwala. Kaanasuwela wi Yehova hi akinyanyale, nyenya kaanuupuwela waakhanle wi kaanwerya okhalano onthamwene woolipa ni yoowo naari waakhanle wi nlelo kaahaala orumeela mmulokoni ni opaka sincipale ntoko khalai.”

¹⁸ Moohakalaliha, Michael haavelavenle. Moovira wa elukuluku, owo aakookela mirici sawe mmulokoni nave vano onarumeela ntoko mutokweene ni piyoneero a elukuluku yoothene. Owo oothariha: “Miyaano kaahitikitheryeya mu orehererya onthamwene aka ni Yehova moorweela wa ohula murima aka wa yoowo mu nivekelo ilukuluku soothene, ohuserya ni wuupuwelela. Nikhaviheryo ni nlipiho kaakhenlaaka, xaxaxa wa atokweene, naahikikhaviherya wiiwexexa wi Yehova nlelo onnakisivela. Vano kinnawerya orumeela wanaawiili mmulokoni ni yawuupuxerya-ya-murima yaphaama. Ela yookihusiha wi Yehova ilukuluku soothene onahaala omukhurumuwela muchu vyakala yoowo ocharunwe mweeparipari.” Tiheeni nnahuseryaahuvo? Hiyaano tho nnanwerya ororomela wi Yehova onanwerya onipharihela ni onreeliha naamwi nipanke yoohesa. Ilukuluku soothene ninniilipixerya orehererya soohesa sahu ni otitelela omuroromela yoowo.—Sal. 86:5; Mas. 28:13.

19. Ti mwawiihai muniisoonaanyu vaavaa mmanlaanyu ohuserya vakhaani vooloca sa Sansawu?

¹⁹ Mwaha yoola woonuupuserya saweereya savakhaani sootikhiniha sa mu okumi wa Sansawu. Owo haari oophaameya, naamwiihiiha, haahin’ye wiilipixerya omurumeela Yehova, naamwi amanle opaka yoohesa ya omuchuna Talila. Yehova haamunyanyanle yoowo. Owo aahikookela ompharihela Sansawu mmukhalelo wootikhiniha. Nave nlelo Yehova onnamoona Sansawu ntoko mulopwana a nroromelo nootikhiniha, ti nthowa nene owo onaphwanyeyeiye mu elista ya achu oororomeleya, yaawo anaphwanyeya mu Ahepri ekapitulu 11. Ti yoohakalalihaxa osuwela wi nnamurumeela Tiithi oosivelaxa yoowo onachuna onilipiha, xaxaxa vaavaa nnakhalaahu ooceecheya! Mwawiihiiha, ntoko Sansawu, nimveke Yehova nriki: “Kinnoovekaani wi mukuupuwele nave mukilipihe.”—Amut. 16:28, PMM.