1. Tiheeni akhweya nneeraahu nikohiwe omutekoni naari oxikola?

 MUNIISOONA hai vaavaa nthamwene anyu ooxikola naari oomutekoni onoopakeleiyeni makoho vooloca sa soororomela sanyu? Apwanne munnakhala awuukhuwa? Ancipale a hiyo ninnakhala. Nyenya makoho yaawo ananwerya onikhaviherya osuwela yeeyo muchu owo onuupuweleiye nave enamunivaha ekari ya oloca sa michaka saphaama. Nto ikwaha ikina, achu annapaka makoho pahiru wi enaakaahe. Eyo henantikhiniha! Ancipale anniiwa soolokoha sawootha vooloca sa soororomela sahu. (Saw. 28:22) Ti yawooneya wi hiyaano nnakhala “mmahiku ookuchula,” elukuluku yeeyo achu aryaaya “oohaataanyiheya”, nave ophiyerya tho wi ‘toowali.’—2 Tim. 3:1, 3.

2. Ntakhara heeni nnaphwanelaahu okhala achu oomaaleleya?

² Akhweya nyuwaano munnuupuwela: ‘Ti mwawiihai kineeraaka kikhale oomaaleleya vaavaa muchu onachuneiye waakaaha mwaha vyakala wa Mpiipiliyani?’ Moosuwela echu enahaala wookhaviheryaani? Ori okhala oomaaleleya. Muchu oomaaleleya hanaakuvela onyeenyeya, moohiyana, owo onnawerya wiivareryela naamwi aroxiwaka nave ahinasuwela mukhalelo wa waakhula. (Mas. 16:32) Eparipari wi ti wookhweyaxa oloca ohiya opaka. Ti mwawiihai muneeraanyu mukhale muchu oomaaleleya? Ti mwawiihai munahaalaanyu waakhula moomaaleleya vaavaa muchu onaakaaheiye soororomela sanyu? Waakhanle wi mwa alipa ooyara, ti mwawiihai muneeraanyu mwaakhaviherye aniinyu waakiha nroromelo naya moomaaleleya? Nnahaala othokororya mmwaha yoola.

3. Ntakhara heeni nnanwerya oloca wi wooniherya omaaleleya eneneeryo ya okhala oolipa, ohiya ooceecheya? (2 Timotiyu 2:24, 25)

³ Okhala oomaaleleya henataphulela wi mwa muchu ooceecheya,  nto mukhalelo wa achu oolipa. Ti woochuneya okhalano ikuru sa mpuwa wi ntitelele okhala oomaaleleya vaavaa nnahoolelaahu mikhalelo soovila. Wiichacala naari omaaleleya, mukhalelo mmoha wa “yawiima ya munepa.” (Aka. 5:22, 23) Masu a Ekiriki awi “wiichacala” naari omaaleleya yaanaphariheliwa wi elociwe sa akavalo ootakhwani yaawo yaakusiwa wi enakhala vaate. Emanle okuxiwa mutakhwani nave enakhala vaate, akavalo annakhala oomaaleleya ni oohuukhuwa, nyenya awo annatitelela okhala akuru. Vano hanka hiyo? Ti mwawiihai nneeraahu nikhale oomaaleleya nave mu elukuluku emohamoha okhala oolipa? Haniwerya weerano yeeyo mukhatiihu. Nnaphwanela ovekela nivekaka nikhaviheryo na Muluku wi ninnuwihe mukhalelo yoola wooreera. Sookhalavo sootakiherya sincipale seiho sinooniherya wi ti wooweryeya ohuserya okhala oomaaleleya. Anna ni arokora ancipale aatitelela okhala oomaaleleya, naamwi vaavaa yaakhalihiwaaya moonanara, nave aahiya yootakiherya yaphaama wa achu yaavarerya. (Mwaalakhanye 2 Timotiyu 2:24, 25.) Ti mwawiihai muneeraanyu musuweliwe ntoko muchu oomaaleleya?

4. Tiheeni emukhavihenrye Isaki okhala oomaaleleya?

⁴ Piipiliya ookhalano miyaha mincipale seiho sinooniherya wi omaaleleya mukhalelo mmoha woochuneyaxa. Moone yootakiherya ya Isaki. Vaavaa owo aathammeiye wi akhaleke o Kerari, amwaacamani awe yaari Afilisti, yaahimukhalela nrima yoowo nave yuuheela ihime soothene seiho akapuro a apapaawe yaathimpaaya khalai. Ohiya wiimuwaniha wi eererye ohala ni ihime sawe, Isaki vamoha ni emusi awe yaahithaamela woorakamawo nave ethipa ihime ikina. (Map. 26:12-18) Nyenya Afilisti yaahiloca wi ihime seihe ivyaani saari sawaya tho. Nto naamwiihiiha, Isaki aahikhala oomaaleleya. (Map. 26:19-25) Vano ti mwawiihai Isaki aawenryeiye okhala oomaaleleya naamwi akina yeera soothene wi emuroxe? Mweeparipari, owo aahaalikhela yootakiherya ya asitiithi awe nave aahihuserya vancipale ni yootakiherya ya apapaawe, Aparahamu, yaawo yaari a murecele, ni yootakiherya ya Sara, yaawo yaarino ‘munepa woomaaleleya ni wawiichacala.’—1 Pet. 3:4-6; Map. 21:22-34.

5. Sootakiherya taani inooniherya wi asitiithi ananwerya waakhaviherya anaaya okhala oomaaleleya?

⁵ Asitiithi, nyuwaano tho munanwerya waahusiha aniinyu okhala oomaaleleya. Moone yootakiherya ya Maxense, yoowo orino iyaakha 17. Oxikola ni mmuteko woolaleerya aanaaphwanya achu oorucu, nyenya asitiithi awe yaahikhala oopixa murima nave yaamuhusiha okhala oomaaleleya. Asitiithi a Maxense aaloca: “Mwanihu aahiiwexexa wi ti wookhweya waakhulela moowali vaavaa nnaroxiwaahu. Nyenya muchu oolipa chiryeene onnakhala oomaaleleya.” Moohakalaliha, Maxense vano muchu oomaaleleyaxa.

6. Nivekelo nni nnikhaviherye hai wooniherya omaaleleya?

⁶ Tiheeni nnaphwanelaahu weera wakhala wi muchu onnaniroxa moorweela wa omuloca moonanara Yehova ni Piipiliya? Nnaphwanela ovekela wa Yehova nivekaka munepa awe ni miruku wi naakhulele moomaaleleya. Vano tiheeni nnaphwanelaahu weera wakhala wi nohoona wi hinaakhulenle mmukhalelo woophwanelela? Nnanwerya ovekela wanaawiili ni wuupuwela yeeyo nnaphwanelaahu weera mu ekwaha yoocharela. Wakhala wi noheerano yeeyo, Yehova onahaala onivaha munepa awe waweela ni onikhaviherya wiivareryela ni otitelela okhala oomaaleleya.

7. Nikhaviheryo taani nryaahuno wi nivareryele yeeyo nnalocaahu ni mukhalelo nnaakhulelaahu mmikhalelo soovila? (Masiposipo 15:1, 18)

⁷ Iversikulu sincipale sa Mpiipiliyani inahaala onikhaviherya olacaka moomaaleleya mmikhalelo soovila. Munepa waweela onanwerya onikhaviherya wuupuwela soorepa seiho. (Yoh. 14:26) Ntoko yootakiherya, malakiheryo nnaphwanyaahu mu liivuru a Masiposipo ananwerya onikhaviherya okhala oomaaleleya.  (Mwaalakhanye Masiposipo 15:1, 18.) Liivuru yoola a Mpiipiliyani onnanooniherya tho ntakhara heeni ti waphaama okhala oomaaleleya mmikhalelo soovila.—Mas. 10:19; 17:27; 21:23; 25:15.

8. Ntakhara heeni nnaphwanelaahu wuupuwela phaama nihaakumve omwaakhula muchu yoowo onavaanyiha soororomela sahu?

⁸ Miruku tho sinanwerya onikhaviherya. (Mas. 19:11) Muchu amiruku onnasuwela wiivareryela vaavaa muchu mukina onavaanyiheiye soororomela sawe. Ikwaha sincipale, vaavaa achu ananipakelaaya makoho, awo hananleela mathowa anaweeriha opaka makoho yaawo. Wanthowa na yeela, nihaakumve waakhula, waamukhala waphaama wuupuwela wi hiyaano hansuwenle yeeyo emweerinhe muchu owo onipakela makoho yaawo.—Mas. 16:23.

9. Ti mwawiihai Kiteyoni oonihenryeiye miruku ni omaaleleya vaavaa aawaakhuleiye alopwana o Efarayimu?

⁹ Muthokororye mukhalelo Kiteyoni aakhulenleiye vaavaa alopwana o Efarayimu yaaloncaaya ni yoowo moowali. Awo yaachuna osuwela ntakhara heeni Kiteyoni haawiichanne wi yawane ni amwiicani a Aisarayeli. Nyenya tinivi naari nthowa neeparipari na oloca ni yoowo moowali? Akhweya nthowa na wiirumiha? Moohipwacha mathoweene, Kiteyoni aahooniherya miruku. Owo aaheererya osuwela ntakhara heeni alopwana yaale yaaryaaya oonyeenyeya nave aahaakhula moomaaleleya. Ni yookhumelela  taani? Piipiliya olonce wi ‘murima aya waahaakhurumuwa.’—Amut. 8:1-3, PMM.

10. Tiheeni enahaala onikhaviherya owaakhula achu anavaanyiha nroromelo nahu? (1 Petru 3:15)

¹⁰ Akhweya nthamwene ahu oosikola naari oomuteko onanwerya onikoha ntakhara heeni nnapharihelaahu malakiheryo a Mpiipiliyani vooloca sa meecelo. Vaavaa nnaakhulaahu, nnahaala opaka owetha wahu wi naakihe soororomela sahu, nave tho nnahaala ocicimiha miyoonelo sa muchu yoowo. (Mwaalakhanye 1 Petru 3:15.) Ohiya woona nikoho nlo ntoko nikacamiho, waamukhala waphaama woona ntoko ekari ya osuwela yeeyo eri yoochuneya wa muchu yoowo. Moohipwacha yeeyo emweerinhe opaka nikoho nno, hiyaano ilukuluku soothene nnaphwanela waakhulelaka mooreera murima ni moomaaleleya. Naakhulo nahu nnanwerya omukhaviherya muchu yoowo otoroka moonelo awe. Naamwi muchu owo ari oonyeenyeya naari oorucu, hiyaano ilukuluku soothene nnaphwanela waakhulelaka mmukhalelo woosivela.—Aro. 12:17.

11-12. (1) Tiheeni nnaphwanelaahu wuupuwela nihaakumve waakhula nikoho noovila? (Moone tho eruku.) (2) Mvahe yootakiherya enooniherya wi makoho makina ananwerya okumiherya ovaanela waphaama.

¹¹ Akhweya nthamwene anyu oomutekoni onnachuna osuwela ntakhara heeni muhinachapelaanyu nihiku na oyariwa wanyu. Mweere cuu nave muupuwele. Apwanne owo onuupuwela wi hannathata? Naari wi onuupuwela wi nthowa na ohichapela nihiku na oyariwa munnaakanyerya murecele orivovo mu empresa? Munanwerya omuthamalela nthamwene anyu oomutekoni nthowa na waapwacha akina ni wuukhuwa ni murecele wa empresa ni oloca wi nyuwaano tho munnachuna olapa mwa murecele. Hiihaa, munahaala ovukula wuukhuwa wa nthamwene anyu oomutekoni nave akhweya munahaala owerya omvaha ekari ya ovaanela waphaama vooloca sa yeeyo Piipiliya onooniheryeiye sa ochapela nihiku na oyariwa.

¹² Nnanwerya opaka echu yoolikana vaavaa inakhumelelaaya miyaha mikina sawuukhula. Ntoko yootakiherya, akhweya nthamwene anyu ooxikola onanwerya oloca wi Anamoona a Yehova anaphwanela otoroka moonelo aya vooloca sa okonihana wa achu a mwiikho woolikana. Apwanne owo onaloca yeeyo nthowa na ohikhalano sooleeliherya seeparipari vooloca sa Anamoona a Yehova? Apwanne owo onuupuwela wi ninnawiica achu yaawo arino mukhalelo yoowo? Woonaru waamukhala waphaama omutharihela wi hiyaano ninnuukhuwa ni achu oothene nave wi ninnacicimiha nave ninnasuwela wi muchu ti muchu ookhalano ophwanelela wa opaka soothanla sawe. b (1 Pet. 2:17) Akhweya nnanwerya okhalano ekari ya omooniherya mukhalelo ochariha malakiheryo a Mpiipiliyani onanivahaaya ohakalala wawaaca mu okumi.

13. Muni mmukhaviherye hai muchu yoowo onoona wi weemererya wi Muluku ookhala ololo?

¹³ Vaavaa nnachekulaahu ni muchu yoowo orino moonelo woolipa vooloca sa mwaha wammoori, hannaphwanela wuupuwela wi noosuwela soororomela sawe. (Titu 3:2) Ntoko yootakiherya, tiheeni munahaalaanyu weera wakhala wi nthamwene anyu ooxikola ooloca wi weemererya wi Muluku ookhala ololo? Apwanne mwawaakuveya mwaahaala wuupuwela wi owo oneemererya nihusiheryo na othatuwa, nave wi oosuwela phaama vooloca sa yeeyo? Akhweya pahiru owo onuuluulela yeeyo iiwaleiye nave wi hintonko wuupuwela mwawiiseela sa yeeyo. Ohiya weererya opaceryiha ovaanela vooloca sa nihusiheryo na othatuwa, mweererye omvaha nthamwene anyu ooxikola echu wi uupuwelele elukuluku ekina. Akhweya munanwerya omooniherya yooleeliherya yammoori vooloca sa opatuxa mu jw.org, nave akhweya nihiku nikina mvaanele vooloca sa mwaha wammoori naari exilema owo ophwannyeiye.  Vaavaa nnooniheryaahu ncicimiho mmukhalelo yoola, onnakhala wookhweya wa achu ochuna ohuserya sincipale vooloca sa yeeyo Piipiliya onahusiheiye.

14. Niall aapharihenle hai esaiti jw.org wi amukhaviherye nthamwenaawe oxikola otoroka moonelo awe wooheseya vooloca sa Anamoona a Yehova?

¹⁴ Mmiravo mmoha awiichaniwa Niall aahipharihela esaiti ahu jw.org wi ooniherye wi yeeyo achu yaalocaaya sa Anamoona a Yehova hiyaari yeeparipari. Owo ooloca: “Nthamwene aka mmoha ooxikola ilukuluku soothene aaloca wi miyaano nkamweemererya siyensiya nthowa nawi kaamweemererya liivuru yoowo opakiwe ni achu, ohiya weemererya iparipari sa siyensiya.” Woona wi nthamwene yoowo haachunaru mano onwiriyana, Niall pahiru aalonce wa yoowo wi avolowe mu jw.org makupa ani “Siyensiya ni Piipiliya.” Ohoolo waya, Niall aahoona wi nthamwene awe aahiwerya ovolowa mu esaiti nave vano aanachuna ovaanela vooloca sa opatuxa. Enanwerya weereya echu yoolikana ni nyuwaano.

15. Asitiithi eni yaakhaviherye hai anaaya mukhalelo wa waakhula moomaaleleya vaavaa akina anavaanyihaaya soororomela saya?

¹⁵ Asitiithi ananwerya waakhaviherya anaaya osuwela mukhalelo wa waakhula moomaaleleya vaavaa muchu onavaanyiheiye soororomela saya. (Tiy. 3:13) Asitiithi akina anaavyakiha mmukhalelo yoowo variyari va malapelo aya a echoko. Awo annahuserya miyaha mikina sinahaala okhumelela oxikola nave annapaka sawooniherya sa mukhalelo wa waakhula nave annaahusiha anaaya mukhalelo wa oloca moomaaleleya ni otannya nchuno na akina.—Moone ekaaxa “ Mpakeke Malapelo a Echoko Anahaala Okhaviherya Echoko Anyu.”

16-17. Ntakhara heeni wiivyakiha woosiilo mukhalelo wa omwaakhula muchu onanwerya waakhaviherya amiravo?

¹⁶ Waavyakiha woosiilo onanwerya waakhaviherya  amiravo waatharihela akina soororomela saya ni okhala oolekecheya wi aakhalano mathowa matokweene a ororomela yeeyo Piipiliya onaloceiye. Miyaha soohiyanahiyana irino muru “Os Jovens Perguntam” mu esaiti jw.org sookhalamo itapela ikina sinahaala waakhaviherya amiravo. Iho inapakiwa wi saakhaviherye amiravo olipiha soororomela saya ni orehererya maakhulo mmasu aya. Vaavaa ichoko inahuseryaaya miyaha seiho vamoha, oothene annawerya ohuserya mukhalelo wa waakiha nroromelo naya moomaaleleya ni onatannya nchuno na akina.

¹⁷ Mmiravo mmoha awiichaniwa Mateyu onnathariha mukhalelo ovyakiha yoowo waaryaaya woochuneya wa yene. Mu malapelo a echoko, Mateyu ni asitiithi awe yaanatholathola miyaha saahaala okhumelela oxikola. Owo ooloca: “Hiyaano naanuupuwela makoho yaawo asinthamwene aka yaahaalaaya opaka nave naanatholathola mukhalelo kaahaalaaka waakhula. Vaavaa kiiwexexaaka phaama ntakhara heeni kaamweemereryaaka Piipiliya, nkaakhala awuukhuwa nave waanakhala wookhweya waakhula moomaaleleya vaavaa akina yaakipakelaaya makoho.”

18. Tiheeni Akolose 4:6 onanihusiheiye?

¹⁸ Eparipari wi ovaha othariha waphaama howeeriha achu akina okhala oolekecheya. Nyenya oloca mwaphaama ni moomaaleleya onanwerya okhaviherya. (Mwaalakhanye Akolose 4:6.) Oloca soororomela sahu onnalikana ni omvonyerya mphirya muchu mukina. Nnanwerya omvonya mphirya mwaphaama naari mwakuruxa. Naahimvonya mphirya mwakuruxa, onahaala okhala wookhweya muchu mukina omwaakhelela ni otitelela omvonya. Moolikana, vaavaa nnalocaahu mwaphaama ni moomaaleleya, achu anahaala okhalano nchuno ntokweene na oniwiriyana ni otitelela ovaanela. Eparipari wi wakhala wi muchu onnachuna waakhulana naari oloca moonanara soororomela sahu, hannakhinyereryiwa otitelela ovaanela ni omwaakhula muchu yoowo. (Mas. 26:4) Nyenya achu ancipale anahaala waakhulela phaama. Mweeparipari, ancipale anahaala oniwiriyana.

19. Tiheeni enaphwanela onceenyerya wooniherya omaaleleya vaavaa nnaakihaahu nroromelo nahu?

¹⁹ Mweeparipari, ninnaphura vancipale vaavaa nnakhalaahu achu oomaaleleya. Mvekele wa Yehova mvekaka ikuru munachunaanyu wi mutitelele okhala oomaaleleya vaavaa munaphwanelaanyu omwaakhula muchu onaakaaha naari oloca moonanara soororomela sanyu. Muupuwele wi naakhulo nanyu noomaaleleya nnanwerya osepa wi ochekula wanyu okhale waakhulana. Nave waakhula moomaaleleya ni ncicimiho onanwerya waakhaviherya akina ochuna owiriyana ni otoroka moonelo aya vooloca sa hiyo ni Piipiliya. Mukhale ‘ooreheryeya ilukuluku soothene wi mwaakihe’ soororomela sanyu, “mweerakano yeela mwawiichacala ni ncicimiho nawiixeela.” (1 Pet. 3:15) Mulakelele okhala oomaaleleya ilukuluku soothene ni wooniherya wi mwa muchu oolipa!