1. Ti mwawiihai Petru iisonneiye vaavaa Yehova aapankeiye yootikhiniha ya ophara ihopa sincipale?

 PETRU aahimaliha ohiyu woothene atothaka ihopa, nyenya haaphanre echu. Owo aahitikhiniheya vaavaa Yesu aalonceiye: “Oye wiixalevo, nave ovonyeremo milapa saa wi otothe.” (Luka 5:4) Petru heemerenrye wi aahaala ophara ihopa, naamwiihiiha, aaheerano yeeyo Yesu aavenkeiye. Vaavaa yaavonyenryaaya milapa mmaahini, yaahiphara ihopa sincipale ophiyerya wi iho saanaahula milapa. Petru vamoha ni alopwana yaawo aareiyeno, “yaatepa otikhiniheya.” Mwawiihiiha, Petru aahiloca: “Pwiya, vinyamvoni vamiithoni vaka, woona wi ka mulipa oocheka.” (Luka 5:6-9) Petru iisoona wi haari oophwanelela omwaacamela naari okhala vakhiviru va Yesu.

2. Ntakhara heeni ti woochuneya othokororya yootakiherya ya Petru?

² Petru aaloca eparipari—chiryeene owo aari “mulipa oocheka.” Piipiliya ikwaha ikina onnooniherya wi Petru ooloca ni weera ichu seiho ohoolo waya aakhanleiyeno ekeerelani. Apwanne mohintoko wiisoona ntoko Petru? Apwanne mwaahaala osiveliwa orehererya mukhalelo vyakala wa omuchu anyu naari ovootha nikacamiho munahoolelaanyu mu elukuluku yincipale? Yaari hiihaa, ohuserya yootakiherya ya Petru onanwerya onikhaviherya wi nihiyeleele ewehereryo. Mwawiihai? Muupuwele ela: Waakhanle wi Yehova aanachuna, owo aahaala weeriha wi soohesa sa Petru sihirempwe Mpiipiliyani. Nyenya iho soorempwa Mpiipiliyani mwawaakhwanela wi nihuseryevo echu. (2 Tim. 3:16, 17) Ohuserya vooloca sa mulopwana yoola aarino sooceecheiha ni muupuwelo mmohamoha yoowo nryaahuno inanwerya onikhaviherya osuwela wi Yehova hanaweherya wi nikhale oophaameya. Echu emoha Yehova onaweheryeiye wa hiyaano ori ohivelavela. Nyenya ntitelele weererya naamwi nrino sooceecheiha.

3. Ntakhara heeni nihinaphwanelaahu ovelavela?

³ Ntakhara heeni ti woochuneya ohivelavela? Achu akina annaloca eriki: Vakhaani-vakhaani munnaphiya ohoolo. Ntoko  yootakiherya, mulipa awiipa macipo onaphwanela wiikhoveleliha mu iyaakha sincipale wi aweryeke woopa phaama ikaruma sa macipo. Woopaceryani, owo onahaala ohesaka vancipale, nyenya waakhala wi onnatitelela, onahaala oya vahoolo. Naamwi asuwelakano woopa phaama, mu ilukuluku ikina onahaala ohesaka. Naamwiihiiha, owo hanakookela muculi. Owo onnatitelela woopa wi aye vahoolo. Mmukhalelo mmohamoha, naamwi nivonthe soohesa vyakala, akhweya nnanwerya okookela opaka. Naamwiihiiha, ninnatitelela wiilipixerya wi n’ye vahoolo. Oothene ahu ninnapaka naari ooloca ichu nnakhalaahuno ekeerelani ohoolo waya. Nyenya echu yoochuneya, ori ohivelavela, nthowa nawi neerano hiihaa, Yehova onahaala onikhaviherya orehererya mukhalelo ahu. (1 Pet. 5:10) Vano hankooni noone yootakiherya ya ohivelavela wa Petru. Niphwanya Yesu oonihenryeiye wa Petru, naamwi apakaka soohesa, nnanwerya onikhaviherya otitelela omurumeela Yehova.

4. Ntoko enatharihiwaaya mu Luka 5:5-10, Petru iisoonne hai, nyenya ti mwawiihai Yesu aamukhavihenryeiye?

⁴ Piipiliya hanaloca ntakhara heeni Petru iisooneiye ntoko “mulipa oocheka” naari vano soocheka sene owo aaloceiye. (Mwaalakhanye Luka 5:5-10.) Nyenya akhweya owo aahipaka soohesa itokweene. Yesu aahoona wi Petru aari awoova, woonaru nthowa nawi Petru iisoona okhala oohiphwanelela. Nto Yesu aanasuwela wi Petru anwerya otitelela okhala oororomeleya. Mwawiihiiha, Yesu mooreera murima aahiloca wa Petru “ohoove.” Masu yaala annooniherya wi Yesu aanamuroromela Petru, nave ela yaahitoroka okumi awe. Ohoolo waya, Petru ni munnawe Antre yaahihiya muteko aya wa ototha ihopa nave enamuhoola Yesu mu orummwa awe. Wa nthowa na yeeyo, awo yaahaakhela mareeliho mancipale a Yehova.—Mar. 1:16-18.

5. Mareeliho taani Petru aakhenleiye nthowa na ovootha woova wawe ni waakhela nwopelo wa Yesu?

⁵ Ntoko oomuchara a Kristu, Petru aahikhalano okumi woohakalaliha. Owo aahimoona Yesu aapenuxaka areca, iikaraka Masololo nave ophiyerya wi aaviihaka alipa ookhwa. b (Mat. 8:14-17; Mar. 5:37, 41, 42) Petru tho aahikhalano yawoona ya Yesu ntoko mwene oomwaahiyu a Omwene wa Muluku, nave eyo yaahivolowela vancipale okumi awe. (Mar. 9:1-8; 2 Pet. 1:16-18) Petru aahoona ichu seiyo ahaahaaleiye woona ahikhanle oomuchara a Yesu. Mweeparipari, owo aahakalalaxa nthowa na owerya ovootha miyoonelo sawe soohiphwanelela ni okhalano ekari ya waakhela mareeliho mancipale!

6. Apwanne Petru aahivootha sooceecheiha sawe mwawaakuveya? Mutharihe.

⁶ Naamwi oonne ni wiiwa ichu sincipale  saphaama vaava aareiye ni Yesu, Petru nlelo aanawaniha ni sooceecheiha sawe. Moone sootakiherya savakhaani. Vaavaa Yesu aalonceiye wi aaphwanela ohooxeya ni okhwa wi aakhwaniherye sooloherya sa Mpiipiliyani, Petru aahiloca wa Yesu wi eyo hiyi yeereye. (Mar. 8:31-33) Ikwaha ikina, Petru ni arummwa akina yaanaakhulana wi esuwele taani aari oochuneyaxa variyari va yaawo. (Mar. 9:33, 34) Mu ohiyu Yesu ahaakumve wiiphiwa, Petru ahuupuwelenle aahikwasa naaru na mulopwana mmoha. (Yoh. 18:10) Mu ohiyu ene yoole, Petru aahikhala awoovaxa ophiyerya okhooca ikwaha raru wi aari nthamwene a Yesu. (Mar. 14:66-72) Ela yaahimweeriha Petru winla moosooseya murima.—Mat. 26:75.

7. Amanle oviihiwa mookhwani, ekari taani Yesu amvanheiye Petru?

⁷ Petru aahiithananela vancipale. Naamwiihiiha, Yesu haamuhin’ye. Amanle oviihiwa mookhwani, Yesu aahimvaha Petru ekari ya wooniherya osivela wawe ntakhara yoowo. Yesu aahimvaha Petru murici muvyaani: Okhala mukukhula awiiyeviha ni okhapelela ipucepuche sawe. (Yoh. 21:15-17) Petru aahipaka yeeyo ene Yesu aamvenkeiye. Petru aari o Yerusalemu mu nihiku na Pentekoste nave aari mu nikhuuru noopacerya naathanliwe ni munepa waweela.

8. Yoohesa taani etokweene Petru aapankeiye vaavaa aareiye o Antiyokeya?

⁸ Naamwi aari Mukristu oothanliwa, Petru aaphwanela owaniha ni sooceecheiha sawe. Mu eyaakha ya 36 E.K., Muluku aahimurumiha Petru wa Korneliyu, yoowo ahaari Muyuta. Voocharela Korneliyu aahithanliwa ni munepa waweela, nave yaahikhala yookwakwaleya wi “Muluku haano nthalu” nave wi amalapo, naari wi, yaale yahaari Ayuta yaanwerya tho opaka makupa a muloko Weekristu. (Saw. 10:34, 44, 45) Emanle yeela, Petru aahipacerya olya ni achu yahaari Ayuta, echu yeeyo owo aahintonkweiye opaka khalai. (Aka. 2:12) Nyenya, Akristu akina yaari Ayuta nlelo yoona wi Ayuta ni yaawo yahaari Ayuta hiyaaphwanela olyaaka vamoha. Nave vaavaa Akristu akina yuupuwela hiihaa yaakelaaya o Antiyokeya, Petru aahihiya olya ni anna yaawo yahaari Ayuta, woonaru nthowa nawi aanoova waanyeenyeiha Akristu yaari Ayuta. Murummwa Paulo aahoona wi Petru aari nawiisootherye nave aahimookolola ohoolo wa achu oothene. (Aka. 2:13, 14) Naamwi aapanke yoohesa yeela, Petru haahinʼye otitelela orehererya mukhalelo awe. Vano tiheeni yaamukhavihenrye?

9. Ti mwawiihai Yohani 6:68, 69 onooniheryeiye ororomeleya wa Petru?

⁹ Petru aari oororomeleya, owo heemerenrye wi echu naari muchu amuhiihe omuchara Yesu. Ntoko yootakiherya, ekwaha emoha owo aahooniherya ororomeleya wawe vaavaa oomuchara yaahiiwexenxaaya echu Yesu aalonceiye. (Mwaalakhanye Yohani 6:68, 69.) Nave ancipale yaamuchara Yesu yaahihiya weerano yeeyo nave hiyaachunneru oweherya wi Yesu atharihe yootaphulela aya. Nyenya Petru henreno yeeyo. Owo aari oororomeleya nave aahiloca wi pahiru Yesu aahikhalano “masu a ekumi yoohimala.”

10. Yesu oonihenrye hai wi aanamuroromela Petru? (Moone tho eruku.)

¹⁰ Yesu haamuhin’ye Petru. Mu ohiyu wookuchula wa okumi awe veelaponi ya vathi, Yesu aanasuwela wi Petru ni arummwa akina yaahaala omuhiya. Naamwiihiiha, Yesu aahiloca wa Petru wi aanasuwela wi owo aahaala otitelela okhala oororomeleya. (Luka 22:31, 32) Yesu aanasuwela wi “munepa onnakhwela, nto mwiili ti wooceecheya.” (Mar. 14:38) Wa nthowa nenla, Yesu haamuhin’ye murummwa awe oosiveliwa, naamwi owo aakhoonce wi aahimusuwela yoowo. Nave amanle oviihiwa mookhwani, Yesu aahooneya wa Petru; mwawooneya ari meekheiye.  (Mar. 16:7; Luka 24:34; 1 Ako. 15:5) Nave ela yaahimulipiha vancipale Petru, yoowo aari oothananaxa nthowa na yeeyo aapankeiye!

11. Ti mwawiihai Yesu aamuroromelinheiye Petru wi Yehova aahaala omukhaviherya?

¹¹ Yesu aahimuroromeliha Petru wi Yehova aahaala omukhapelela yoowo. Amanle oviihiwa mookhwani, mu ekwaha yanaawiili, Yesu aahimweeriha Petru ni arummwa awe akina ophara mootikhiniha ihopa sincipale. (Yoh. 21:4-6) Moohikhwa minikwa, yootikhiniha yeela yaahimweeriha Petru wiiwexexa wi Yehova aahaala mookhweya omvahererya soothene soomwiilini aachuneiye. Akhweya Petru aahuupuwela masu a Yesu vaavaa aalonceiye wi Yehova aahaala waakhapelela yaale yaahaala “waavya woopaceryani Omwene.” (Mat. 6:33) Soothene seiha saahimukhaviherya Petru okuha mu nipuro noopacerya mu okumi awe muteko woolaleerya ohiya muteko wa ototha ihopa. Owo aari oolipa murima nave aahilaleerya mu Pentekoste a 33 E.K., aakhaviheryaka macikhwi macikhweene aachu weemererya michaka saphaama. (Saw. 2:14, 37-41) Ohoolo waya, owo aahaakhaviherya a Samariya ni achu yahaari Ayuta okhala oomuchara a Kristu. (Saw. 8:14-17; 10:44-48) Moohikhwa minikwa, Yehova aahimpharihela Petru mmukhalelo wootikhiniha wi aakerihe mmuloko Weekristu achu a mukhalelo woothene.

12. Yootakiherya ya Petru eni enikhaviherye hai wakhala wi ninnawaniha ni yooceecheiha mu elukuluku yincipale?

¹² Yehova onanwerya onikhaviherya ohivelavela. Chiryeene, tahi wi ilukuluku soothene ti wookhweya oya vahoolo, xaxaxa vaavaa nnawanihaahu ni yooceecheiha mu elukuluku yincipale. Ikwaha ikina, sooceecheiha sahu inanwerya okhala soovilaxa opwaha seiho Petru aahoolenleiye. Nyenya Yehova onanwerya onivaha ikuru nnachunaahu wi nihivelavele. (Sal. 94:17-19) Ntoko yootakiherya, moone yaweereya ya munna yoowo ahaakumve ohuserya eparipari aarino mukhalelo wa okumi wa okonihana ni achu a mwiikho woolikana mu iyaakha sincipale. Owo aahitoroka okumi awe moomalela nave anakhala mwawiiwanana ni yeeyo Piipiliya onahusiheiye. Naamwiihiiha, ilukuluku ikina owo aanawaniha ni nchuno noonanara. Vano, tiheeni emukhavihenrye ohivelavela? Owo ooloca: “Yehova onnanilipiha. Nnikhaviheryo na munepa waweela . . . , Miyaano koohuserya wi ti wooweryeya otitelela mu ephiro ya eparipari . . . Moohipwacha ohiphaameya waka, Yehova onnakipharihela nave onnatitelela okilipiha.”

13. Ti mwawiihai nneeraahu ncharihe yootakiherya ya Yesu? (Saweeriwa ti Arummwa 4:13, 29, 31) (Moone tho eruku.)

 ¹³ Ntoko nonnaahu, opwaha ekwaha emoha, Petru aahipaka soohesa nthowa na owoova achu. Nyenya Petru aanavekela avekaka ikuru nave aahiwerya opaka ichu moolipa murima. (Mwaalakhanye Saweeriwa ti Arummwa 4:13, 29, 31.) Hiyaano tho nnanwerya ovootha woova wahu. Moone yeeyo yeeren’ye ni Horst, munna yoowo ori mmiravo aakhala o Alemanya variyari va Ekhoco Yanaawiili ya Elapo Yoothene. Opwaha ekwaha emoha, owo aaheemererya okhinyererya wa asinthamwene awe oosikola nave apacerya opharihela mu oxeliha wawe masu awi “Heil Hitler!” yaataphulela “Ovuluxa Onarweela wa Hitler.” Vaavaa Horst aaleenleiye asitiithi awe, awo hiyaamuruwanne. Ohiya yeeyo, awo yaavekela ni yoowo evekaka wi Yehova amvahe olipa murima yoowo aachuneiye. Nnikhaviheryo na asitiithi awe ni omuroromela Yehova, aahiwerya okhalano ikuru aachuneiye wi atitelele okhala oolipa. Vahoolo vaya owo aahiloca: “Yehova hintonko okinyanyala.” c

14. Ti mwawiihai akukhula oosivela aneeraaya yaakhaviherye yaale ari ooceecheya?

¹⁴ Yehova ni Yesu herwa enihiya. Petru amanle omukhooca Yesu, aaphwanela opaka yoolakelela yoochuneya. Apwanne owo aahaala ohiya okhala oomuchara a Kristu naari aahaala otitelela ovilela? Yesu aahimveka Yehova ni murima woothene wi nroromelo na Petru nihiceecheye. Nave Yesu aahimuleela Petru wi aahipaka nivekelo nenlo nave aahooniherya wi aanaroromela wi Petru tho aahaala owerya waalipiha asinnawe. (Luka 22:31, 32) Moohikhwa minikwa Petru aanalipiheya vaavaa uupuweleiye yeeyo Yesu aalonceiye! Vaavaa nnachunaahu opaka yoolakelela yoochuneya mu okumi ahu, Yehova onanwerya waapharihela  akukhula oosivela wi evahererye nlipiho nnachunaahu wi ntitelele okhala oororomeleya. (Aef. 4:8, 11) Munna mmoha awiichaniwa Paulo, yoowo onarumeela ntoko mutokweene a mmulokoni mu iyaakha sincipale, onneererya weerano yeela. Vaavaa muchu onuupuweleiye ohiya omurumeela Yehova, owo onnamukhaviherya muchu owo wuupuwela mukhalelo Yehova omukerinheiye mu eparipari. Voocharela, owo onnamuupuxerya wi osivela woororomeleya wa Yehova horwa weemererya wi Yehova amuhiye muchu yoowo. Paulo ooloca tho: “Miyaano koowoona anna ancipale yaawo yaaceechen’ye eweryaka ovilela nnikhaviheryo na Yehova.”

15. Ti mwawiihai yootakiherya ya Petru ni ya Horst enooniheryaaya wi nnanwerya ororomela yeeyo Mateyu 6:33 onaloceiye?

¹⁵ Hiihaa ntoko Yehova aavaherenryeiye soothowa soomwilini sa Petru ni sa arummwa akina, owo tho onahaala ovahererya soothowa sahu wakhala wi ninnakuha Omwene wa Muluku mu nipuro noopacerya mu okumi ahu. (Mat. 6:33) Horst, yoowo olociwe mu iparakrafo ivirale, aahipacerya wuupuwela okhala piyoneeru emanle Ekhoco Yanaawiili ya Elapo Yoothene. Nyenya, owo aari oohawaxa nave oona wi hii awerye okhala piyoneero a elukuluku yoothene. Tiheeni owo aapankeiye? Owo aahilakelela woona waakhanle wi Yehova chiryeene aahaala omukhapelela, nave variyari va oxekurya wa ooweherya a ekulucu, owo aahilapa esumana yoothene mmuteko woolaleerya. Omakuchuwelo wa esumaana yeele, owo aahikhala ootikhiniheya vaavaa ooweherya a ekulucu aamvaherenreiye envilopi sirimo ikhorowa sa munna yoowo ahaachuna wiisuwanyeiha. Saahikhalamo ikhorowa sawaakhwanela wi ivakulelekeno ntoko piyoneero mu miyeeri mincipale. Horst aahoona yamahala yeela ntoko yawooniherya yawi Yehova aahaala omukhapelela yoowo. Ovinyerya vaavale, owo aahihela Omwene mu nipuro noopacerya mu okumi awe—Mal. 3:10.

16. Ntakhara heeni nnaphwanelaahu ohuserya vooloca sa Petru ni yeeyo orempeiye mu ikaarata sawe?

¹⁶ Petru aahihakalala vancipale woona wi Yesu haamuhin’ye yoowo, hiiha ntoko Petru aavenkeiye mu ekwaha emoha! Yesu aahititelela omuvyakiha Petru wi akhale murummwa oororomeleya ni okhala yootakiherya yaphaama wa Akristu. Nave hiyaano nnanwerya ohuseryavo mahusiheryo oochuneya orweela wa ovyakiha yoowo Petru aakhenleiye. Nave yoowo ene ookawa makina a mahusiheryo yaawo mu ikaarata sawe piili aarepenleiye miloko sa mu nsana noopacerya nave seiyo vano inapaka makupa a Piipiliya. Mmwaha onacharela, nnahaala woona ikano savakhaani inaphwanyeya mu ikaarata seiho ni mukhalelo wa opharihela olelo.