1. Yehova ampharihenle hai Petru elukuluku vakhaani ahaakumve okhwa?

 MURUMMWA Petru aanasuwela wi aahaala okhwa moohilekela. Variyari va iyaakha sawe soothene sa orummwa woororomeleya, owo aahimuhoola Yesu mu orummwa awe, aahipacerya muteko woolaleerya mmapuro oohiyanahiyana nave aahirumeela ntoko mmoha a nikhuuru noolamulela. Nyenya muteko wa Petru hiwaamanle. Variyari va eyaakha ya 62-64 E.K., owo aahiveereliwa orepa ikaarata piili sa Mpiipiliyani, seiho iri 1 Petru ni 2 Petru. Owo aanawehererya wi ikaarata seiho saakhaviherye Akristu naamwi owo amanle okhwa.—2 Pet. 1:12-15.

2. Ntakhara heeni ikaarata sa Petru saahirempwa mu elukuluku yoophwanelela?

² Petru aahirepa ikaarata sawe piili sooveereliwa mu elukuluku yeeyo anna yaaryaaya “awuukhuwa wa nthowa na saweeha soohiyanahiyana.” (1 Pet. 1:6) Achu yaarino yoolakelela yoonanara yaneererya onanariha muloko ni mahusiheryo awootha ni meecelo oothanyeya mmulokoni. (2 Pet. 2:1, 2, 14) Akristu moohilekela yaahaala ohoolela “makuchuwelo a ichu soothene,” naari wi, Aroma yaahaala omutoloxa Yerusalemu ni mukhalelo woothene wa Ayuta a elukuluku yeele. (1 Pet. 4:7) Moohikhwa minikwa, ikaarata sa Petru saahaakhaviherya Akristu osuwela yeeyo yaaphwanelaaya weera wi ehoolele makacamiho yaale ni wiirehererya ntakhara makacamiho amuhoolo. b

3. Ntakhara heeni nnaphwanelaahu othokororya ikaarata sa Petru?

³ Eparipari wi Petru aarempe ikaarata seiha wa Akristu a elukuluku yeele, nyenya Yehova oheeriha wi ikaarata seiho irempwe Mmasu Awe. Mwawiihiiha, hiyaano tho nnanwerya ohuserya vancipale ni seiho. (Aro. 15:4) Hiyaano nnakhala mu elapo yoonanara  ni variyari va achu yaawo ahinamurumeela Yehova. Wa nthowa na yeeyo, ninnahoolela makacamiho mancipale nave ikwaha ikina, onnakhala woovila omurumeela Muluku. Ohiya yeeyo, moohilekela nnahaala ohoolela yoohoosa etokweenexa opwaha yeele Ayuta ahoolenlaaya khalai. Wa nthowa na yeela, ikano nnaphwanyaahu mu ikaarata piili sa Petru ti soochuneyaxa wa hiyo. Iho sinnanikhaviherya otitelela owehererya nihiku na Yehova, ovootha owoova wahu achu ni wooniherya osivela weeparipari mukina ni mukhwaawe. Ikano seiha inanwerya tho waakhaviherya atokweene a muloko osuwela mukhalelo wa okhapelela soothowa sa ipucepuche sa Muluku.

4. Mwawiiwanana ni 2 Petru 3:3, 4, tiheeni yaahaala oceecheiha nroromelo nahu?

⁴ Hiyaano nrukureryiwe ni achu yaawo ahineemererya sooloherya sa Mpiipiliyani. Akina annantheya nthowa nawi nnaloca sa makuchuwelo mu iyaakha sincipale. Akina annanruwana elocaka wi makuchuwelo herwa ephiya. (Mwaalakhanye 2 Petru 3:3, 4.) Vaavaa nniiwaahu masu yaala, akhweya orweela wa achu a mu ekulucu ahu, asinthamwene ahu oomutekoni naari achu a veemusini vahu, nroromelo nahu nnanwerya weehiwa. Petru oothariha echu enahaala onikhaviherya.

5. Tiheeni enahaala onikhaviherya otitelela owehererya moopisa murima makuchuwelo? (2 Petru 3:8, 9)

⁵ Wa akina, onanwerya wooneya ntoko wi Yehova onamulekela omaliha ichu sootakhala sa elapo yeela. Nyenya masu a Petru annanikhaviherya okhalano moonelo woophwanelela, enuupuxeryaka wi mukhalelo wa Yehova woona ovira wa elukuluku onnahiyana vancipale ni mukhalelo achu anoonaaya. (Mwaalakhanye 2 Petru 3:8, 9.) Iyaakha macikhwi wa achu, ori ntoko nihiku nimoha wa Yehova. Owo toopixa murima nave hanachuna wi muchu atoloxiwe. Nyenya vaavaa eneeraaya ephiye elukuluku yoophwanelela, Yehova onahaala omaliha makacamiho oothene. Nave hiyaano nookhalano ekari etokweene ya opharihela elukuluku ehalenle wi naalaleerye achu a elapo yoothene.

6. Tiheeni nnaphwanelaahu weera wi ‘nikhaleno mmuupuweloni’ nihiku na Yehova? (2 Petru 3:11, 12)

⁶ Petru onceenyerya ‘okhalano mmuupuweloni’ nihiku na Yehova. (Mwaalakhanye 2 Petru 3:11, 12.) Nni neereno hai yeeyo? Ti waphaama wuupuwelela mareeliho nnahaalaahu okhalano mu elapo evyaani, wakhala wooweryeya, mahiku oothene. Munnawerya wiisaanyiherya muri mu nipuro nooreeraxa ni noomaaleleya, mpuhaka yoolya yoosiva nave nwaakhelaka asinthamwene ni amusi anyu yaawo anahaala oviihiwa mookhwani? Naari mwaahusihaka achu yaakhanle mu iyaakha sa muculi vooloca sa sooloherya sa Mpiipiliyani saakhwanenle? Wuupuwelela ichu seiha onahaala wookhaviheryaani otitelela oweherya ni ororomela wi makuchuwelo aatepa okhuveela. Nsuwelaka omwaahiyu ahu nave ‘nsuwelaka yeela woosiilo ene,’ hiyaano ‘hinihuwelihiwa’ ni sawootha sa elapo yeela.—2 Pet. 3:17.

7. Ti mwawiihai owoova achu onanivolowelaaya?

⁷ Hiyaano noosuwela wi nihiku na Yehova nohaacamela. Nthowa na yeeyo, nnachuna opaka owetha wahu wi naalaleerye akina michaka saphaama. Nyenya mu ikwaha ikina, mwawiiwanana ni mikhalelo sene, nnanwerya oyeleela olipa murima. Ntakhara heeni? Nthowa nawi nnanwerya woova hiihaa ntoko yeeren’yaaya ni Petru. Mu ohiyu Yesu aathorihiweiye, Petru ahikhala awoova oloca wi aari mmoha a oomuchara awe, nave mwawuuluulela aahikhooca wi aahimusuwela Yesu. (Mat. 26:69-75) Nyenya Petru aahivootha woova wawe nave aahirepa moolucuwa: “Muhooveke yeeyo awo anoovaaya, naari mano okhala oohaleeliheya.”  (1 Pet. 3:14) Masu a Petru annaniroromeliha wi hiyaano tho nnanwerya ovootha owoova achu.

8. Tiheeni enahaala onikhaviherya ovootha owoova achu? (1 Petru 3:15)

⁸ Tiheeni enahaala onikhaviherya ovootha owoova achu? Petru ooloca: “Mmweelihe Kristu ntoko Pwiya mmurimani mwanyu.” (Mwaalakhanye 1 Petru 3:15.) Ela enaphitaanyerya wuupuwelela ikuru ni owerya wa Pwiyaahu ni Mwene, Yesu Kristu. Vaavaa munakhalaanyuno ekari ya okawana michaka saphaama ni akina, apwanne munnakhala awuukhuwa naari awoova? Mmuupuweleke Mwene ahu. Vaavaa ela enereyaaya, mmuupuweleke Yesu alamulelaka wirimu arukureryiwe ni ankeelo awaaca ni awaacaxa. Muupuweleke wi owo okhalano “owerya woothene wirimu ni veelaponi yavathi,” nave owo mwaneene ooniroromeliha ariki: “Kiri ni nyuwo mahiku oothene ophiyerya omakuchuwelo wa mukhalelo yoola wa ichu.” (Mat. 28:18-20) Petru onceenyerya ‘okhala oorehereya ilukuluku soothene’ wi nloce soororomela sahu wa achu akina. Mwaamusiveliwa omulaleerya muchu omutekoni, oxikola naari mu nipuro nikina? Muupuwele woosiilo mukhalelo mwaahaalaanyu weerano yeeyo nave murehererye mukhalelo mwaahaalaanyu oloca. Mvekele wi mukhaleno olipa murima nave muroromele wi Yehova onahaala wookhaviheryaani ovootha owoova wanyu achu.—Saw. 4:29.

9. Mu ekwaha emoha, ti mwawiihai Petru aahin’yeiye wooniherya osivela? (Moone tho eruku.)

⁹ Petru aahihuserya mukhalelo wa wooniherya  osivela. Owo aari ni Yesu vaavaa aalonceiye: “Kinnoovahaani nlamulo mvyaani: Musivelaneke mukina ni mukhwaawe; hiihaa ntoko koosivenlaakaani, nyuwo tho musivelaneke mukina ni mukhwaawe.” (Yoh. 13:34) Naamwiihiiha, elukuluku vakhaani ohoolo waya, Petru aahoova nave aahikhooca olya ni anna yaawo yahaari Ayuta. Murummwa Paulo aahiloca wi mukhalelo yoole wa Petru waari ‘onawiisootherye.’ (Aka. 2:11-14) Petru aaheemererya wookolola yoole nave aahihuseryavo echu. Mu ikaarata sawe piili, Petru aahivuwiha wi hiyaano hannaphwanela okhalano pahiru osivela wa annihu. Nyenya nnaphwanela wooniherya osivela yoowo.

10. Tiheeni enahaala onikhaviherya wooniherya “osivela wa onna woohiwoka?” (1 Petru 1:22)

¹⁰ Petru ooloca wi nnaphwanela okhalano “osivela wa onna woohiwoka.” (Mwaalakhanye 1 Petru 1:22.) Wi nikhaleno osivela yoowo wa onna nnaphwanela “wiiwelela eparipari.” Eparipari yeela enaphitaanyerya nihusiheryo nawi “Muluku haano nthalu.” (Saw. 10:34, 35) Wakhala wi ninnathanla wooniherya osivela wa anna akina mmulokoni nave nihinooniherya wa akina, hanniiwelela nlamulo na Yesu. Eparipari wi nnanwerya okhala awaacameleya ni achu akina hiihaa ntoko Yesu aareiye ni arummwa akina. (Yoh. 13:23; 20:2) Nyenya Petru onnanuupuxerya wi niilipixerye wi nikhaleno “osivela wa onna”—osivela ori woolipa ntoko yoowo orivovo variyari va echoko.—1 Pet. 2:17.

11. Onavolowela eheeni osivelana mukina ni mukhwaawe “mweeparipari vamoha ni murima woothene?”

¹¹ Petru ohooniherya wi ti woochuneya ‘osivelanaka mukina ni mukhwaawe mweeparipari ni murima woothene.’ Mu yoorepa yeela, osivela “weeparipari” onataphulela wooniherya osivela wa muchu naamwi okhalaka woovila wooniherya osivela wa muchu yoowo. Ntoko yootakiherya, tiheeni mwaahaalaanyu weera waakhanle wi munna naari murokora ohooroxaani naari woonyeenyeihaani mmukhalelo wammoori? Muupuwelo ahu woopacerya akhweya onahaala okhala omukookiherya yoonanara, ohiya omooniherya osivela. Nyenya Petru aahihuserya ni Yesu wi mukhalelo yoowo wa waakhulela honamuhakalaliha Yehova. (Yoh. 18:10, 11) Petru oorepa: “Muhikookiheke yoonanara ni yoonanara naari oruwana ni oruwana. Ohiya yeeyo, mwaareeliheke yaawo.” (1 Pet. 3:9) Wakhala wi mookhalano osivela weeparipari wa anninyu munahaala okhala oreera murima ni oothene nave munahaala owerya omwiiwexexa muchu naamwi oonyeenyeihaleeni.

12. (1) Osivelana mukina ni mukhwaawe mweeparipari onanikhaviherya weera eheeni? (2) Mwawiiwanana ni exilema Niheemererye wi Echu Vyakala Yaakanyerye Wiiwanana Wahu, tiheeni munaphwanelaanyu wiilipixerya weera?

¹² Mu ekaarata awe yoopacerya, Petru ooloca sa “osivela weeparipari.” Osivela ntoko yoola onnanikhaviherya okhurumuwela, ohiya pahiru soocheka savakhaani nyenya ‘soocheka sawaaca.’ (1 Pet. 4:8) Akhweya Petru aahuupuwela yeeyo aahusenryeiye ni Yesu mu iyaakha sa muculi vooloca sa okhurumuwela. Mu elukuluku ene yeeyo Petru eemererya wi aakhala ooreera murima vaavaa owo aalonceiye wi munna aaphwanela olevelela “ikhwa thanu napiili.” Nyenya Yesu aahimuhusiha Petru, ophitaanyerya oothene ahu olevelela ophiyerya “ikwaha makhumi mathanu napiili ni thanu napiili [77],” naari wi ikwaha soothene onakhalaaya woochuneya. (Mat. 18:21, 22) Waakhanle wi munnoona okhala woovila opharihela ekano yeela, muhiceecheye! Oothene ahu ninnakhalano ilukuluku seiho onakhalaaya woovila olevelela. Echu yoochuneya ori omulevelela munninyu ni opaka onthamwene ni yoowo. c

13. Tiheeni enahaala weeriha okhala woovila wa atokweene ophwanya elukuluku wi yaalipihe anna ni arokora?

¹³ Mweeparipari, Petru hantonko ocuwala yeeyo Yesu aalonceiye wa yoowo amanle oviihiwa mookhwaani: “Okukhuleke ipucepuche saka.” (Yoh. 21:16) Waakhanle wi mwa mutokweene a muloko, moosuwela wi masu yaala annaphariheleya tho wa nyuwaano. Eparipari wi onanwerya okhala woovila wa mutokweene ophwanya elukuluku wi athokororye murici yoola woochuneyaxa. Atokweene anaphwanela woopaceryani othokororya soothowa soomwiilini, sa mmuupuweloni ni soomunepani sa ichoko saya. Ohiya yeeyo, awo anaphwanela otikitherya yootakiherya yaphaama mmuteko woolaleerya ni vaavaa anarehereryaaya ni opaka makupa mmithukumano sa muloko, sa ekulucu ni sa miceche. Ophiyerya tho wi akina aakhalano murici wa okhaviherya Makhuuru Aniiwanana ni Exipitali naari Makhuuru a Oteka naari Mmakhuuru a Muteko wa Oteka wa Vanipuroni. Moohikhwa minikwa, atokweene a muloko, alopwana ooweiwaxa!

14. Tiheeni enahaala waakhaviherya atokweene okukhula muhuwo? (1 Petru 5:1-4)

¹⁴ Petru ooloca wa atokweene: “Mukukhuleke muhuwo wa Muluku.” (Mwaalakhanye 1 Petru 5:1-4.) Waakhanle wi mwa mutokweene, noosuwela wi munnaasivela anna ni arokora nave munnachuna waakhapelela yaawo. Nyenya mu ikwaha ikina, munanwerya okhala ooweiwaxa naari oovelavela, muhinawerya okhwaaniherya murici anyu. Mwa yeeyo, tiheeni munaphwanelaanyu weera? Mmuleele Yehova mukhalelo muniisoonaanyu. Petru oorepa: “Wakhala wi muchu onamurumeela, eereno yeeyo ni ikuru Muluku onavaheiye.” (1 Pet. 4:11) Akhweya anna annahoolela makacamiho yaawo ahinahaala orehereryiwa moomalela mmukhalelo yoola wa ichu. Nyenya muupuwele wi “mukukhula mutokweene,” Yesu Kristu, onanwerya waakhaviherya vancipale opwaha nyuwaano. Owo onanwerya weerano yeeyo mmahiku ahu yaala ni mu elapo evyaani. Echu Yehova onachuneiye wi atokweene yeere ti yookhweya, ori waasivela anna, waakukhula ni okhala “yootakiherya wa muhuwo.”

15. Ti mwawiihai mutokweene mmoha onakukhuleiye muhuwo? (Moone tho eruku.)

¹⁵ Wiliyamu, munna mmoha yoowo onarumeela ntoko mutokweene mu iyaakha sincipale, oosuwela ochuneya waya waakukhula anna. Vaavaa epahu ya Koronaviru yaapacenryaaya,  owo ni anna akina yaahipaka marehereryo a omulikaarela mmoha ti mmoha a makhuuru aya a muteko woolaleerya. Owo onnathariha nthowa nene: “Anna ancipale yaari mukhataaya mmavaate nave waari wookhweya opacerya okhalano muupuwelo wooheseya.” Vaavaa munna naari murokora aahooleleiye nikacamiho, Wiliyamu aananwiriyana moomaaleleya, wi iiwexexe phaama mukhalelo iisooneiye ni yeeyo owo aachuneiye. Voocharela owo aanaphwanya soolaleeryiwa naari ixilema mu esaiti wi awerye omulipiha munna naari murokora. Owo ooloca: “Hiihaano opwaha khalai, ti woochuneya waakukhula anna. Hiyaano ninnapaka owetha otokweene wi naakhaviherye achu yaawo ehimusuwenle Yehova, mwawiihiiha, nnaphwanela opaka owetha omohamoha wi naakhaviherye annihu otitelela okhala mu eparipari.”

16. Mmikhalelo taani nneeraahu nipharihele ikano nihusenryaahu mu ikaarata sa Petru?

¹⁶ Ophiyerya vaavaa, noonne pahiru mahusiheryo avakhaani nihusenryaahu mu ikaarata piili sa Petru. Akhweya nyuwaano mohoona echu yeeyo munaphwanelaanyu orehererya. Ntoko yootakiherya, apwanne mwaamusiveliwa wuupuwelela mu ikwaha sincipale mareeliho yaawo munahaalaanyu okhalano mu elapo evyaani? Apwanne mwanwerya otikitherya yoolakelela ya ovaha onamoona oxikola, omutekoni naari mu nipuro nikina? Apwanne munnawerya woona mikhalelo mikina seiho mwaahaalaanyu wooniherya osivela weeparipari wa anninyu? Vano nyuwo atokweene, muri oolakelela okukhula muhuwo wa Yehova ni murima woothene? Woonaru mohoona wi munnaphwanela orehererya mukhalelo wammoori mu okumi anyu, muheemererye wi eyo yooceecheiheeni. “Apwiya taphaama,” nave awo anahaala wookhaviheryaani opaka matorokelo oochuneya. (1 Pet. 2:3) Petru ooniroromeliha: “Muluku . . . onarwa aakhwaniherya ovyakihiwa wanyu. Owo onarwa ootikitheryaani, owo onarwa oolipihaani, owo onamookuhaani mmathipelo ootikitheryeya.”—1 Pet. 5:10.

17. Wakhala wi noovilela nave neemererya ovyakihiwa ni Yehova, teevi eni ekhale yookhumelela?

¹⁷ Woopaceryani, Petru oona wi haaphwanela okhala ni Yesu. (Luka 5:8) Nyenya nnikhaviheryo noosivela na Yehova ni Yesu, Petru aahivilela ni otitelela okhala oohuserya a Yesu. Yookhumelela ene yaari wi Yehova aaheemererya wi Petru avolowe “mu Omwene woohimala wa Apwiya ahu ni Mvuluxa Yesu Kristu.” (2 Pet. 1:11) Ala yaari mareeliho matokweene! Wakhala wi hiihaa ntoko Petru, nyuwaano hamunavelavela nave munneemererya ovyakiha wa Yehova, munahaala tho waakhela mareeliho a okumi woohimala. Mmukhalelo yoola, munahaala waakhwaniherya “yoolakelela ya nroromelo nanyu, ori ovuluxiwa wanyu.”—1 Pet. 1:9.