1-2. (1) Tuuvi waari mukhalelo wa o Yuteya vaavaa murummwa Paulo aarepenleiye ekaarata wa Ahepiri? (2) Ti mwawiihai ekaarata yeela yoovereliwa yoonihenryaaya okhala yoochuneya?

 AKRISTU yaawo yaari Ahepiri yaakhala o Yerusalemu ni o Yuteya yaahihoolela ilukuluku soovila ohoolo waya Yesu amanle okhwa. Omanle otikitheriwa muloko Weekristu, moohilekela muloko owo waahihoolela wiikariwa otokweene. (Saw. 8:1) Mwawiihiiha, variyari va iyaakha 20 ohoolo waya, oomuchara a Kristu yaahihoolela makacamiho matokweene a ohaawa, mwawooneya yoowo waatannyiwe moorweela wa etala yeeyo khalai yaahoonxe achu veelaponi. (Saw. 11:​27-30) Mwawiihiiha, variyari va eyaakha ya 61 E.K., Akristu yeera ehoolelaka elukuluku ya murecele olikanyihiwaka ni yoowo wahaala orwa. Variyari va elukuluku yeele, awo yaahaakhela ekaarata yoovereliwa ni murummwa Paulo—ekaarata yeeyo yooniherya okhala yoochuneyaxa.

² Ekaarata yeele wa Ahepri yaari yoochuneya woona wi murecele yoole Akristu yaaryaayano hiwaahaala olekela. Paulo aahivahererya miruku soophara muteko seiho saahaala waakhaviherya Akristu yaale ovilela ni yoohooxa yeeyo moohilekela yaahaalaaya ohoolela. Otoloxiwa wa mukhalelo wa ichu wa Ayuta, yoowo Yesu aalohenryeiye waanaacamela. (Luka 21:20) Ti yawooneya wi Paulo naari Akristu o Yuteya, yaanasuwela mookwakwaleya vaavaa otoloxa yoola wahaalaaya weereya. Mwawiihiiha, Akristu yaala yaanwerya opharihela elukuluku yaahalenle wi yiirehererye, etekaka mikhalelo ntoko nroromelo ni ovilela.—Ahe. 10:25; 12:​1, 2.

3. Ntakhara heeni liivru yoola a Ahepri toochuneya wa Akristu olelo?

 ³ Nihanle vakhaani ohoolela yoohooxa etokweenexa opwaha yeeyo Akristu yaari Ahepri yaahoolenlaaya. (Mat. 24:21; Wup. 16:​14, 16) Mwawihiiha, nnahaala othokororya miruku savakhaani soophara muteko seiho Yehova aavaherenryeiye Akristu yaale, seiho tho sinahaala onikhaviherya.

“NIILIPIXERYE OKHALA AWIICHWELAVO”

4. Makacamiho taani Akristu yaawo yaari Ayuta yaahoolenlaaya? (Moone tho eruku.)

⁴ Akristu yaawo yaari Ayuta yahihoolela nikacamiho ntokweene. Mweelukuluku emohamoha, Ayuta yeera eri achu oothanliwa ni Yehova. Yerusalemu naari nipuro ntokweene na veelaponi ya vathi wa Omwene wa Muluku, nave empa ya Muluku naari nipuro na malapelo aweela. Ayuta oothene oororomeleya yaanachariha nlamulo na Mose, mwawiiwanana ni mukhalelo ahooleli a malapelo yaatharihaaya. Mahusiheryo yaala yaanalamulela mukhalelo aya wa olya, moonelo aya wa othikiliwa ophiyerya mukhalelo wa okhala waya ni achu yaawo yaahiri Ayuta. Mwawiihiiha, Yehova hemereenrye tho mikucho sa Ayuta Yesu amanle okhwa. Eyo yaahikhala yoovila wa Akristu yaawo yaari Ayuta, yaawo yaakhovelenle ochariha nlamulo. (Ahe. 10:​1, 4, 10) Naamwi Akristu awiichwelavo, ntoko murummwa Petro, yaahiwaniha wi yiikhovelelihe ni matorokelo yaale. (Saw. 10:​9-14; Aka. 2:​11-14) Moorweela wa soororomela saya ivyaani, Akristu yaale yaahikhala nthowa na ahooleli amalapelo Ayuta.

5. Ekaasoope taani Akristu yaaphwanelaaya okhalano?

⁵ Akristu yaawo yaari Ahepri yaahihoolela makacamiho aamwiicani aya mmakupa meeli. Mmakupa mamoha, yaahikhalawo ahooleli a malapelo Ayuta yaawo yaakhaliha ntoko alipa oomwareya. Ohiya yeeyoru, Akristu akina yaawo yaapanke nlakano mmalapelo yaanaakhinyererya oomuchara a Kristu wi etitelele opaka meerelo oohiyanahiyana a nlamulo na Mose, akhweya wi esepe wiikariwa. (Aka. 6:12) Echu taani yaahaala waakhaviherya Akristu yaale oororomeleya opharelela eparipari?

6. Echu taani Paulo aaceenyenreiye annawe a munroromeloni opaka? (Ahepri 5:14–6:1)

 ⁶ Mu ekaarata awe wa Ahepri, Paulo aahaaceenyerya annawe wiixeela Mmasu a Muluku. (Mwaalakhanye Ahepri 5:14–6:1.) Paulo aahipharihela soorepa sa Ehepri nave aahithariha mukhalelo Akristu yaamurumelaaya Yehova waaryaaya waphaama opwaha mukhalelo Ayuta yaamurumeelaaya. a Paulo aahaaceenyerya Akristu osuwela ni wiiwexexa phaama eparipari ya mu soorempwa wi ewerye osuwela mahusiheryo atheru ni okhooca yaawo.

7. Makacamiho taani nnahoolelaahu olelo?

⁷ Hiiha ntoko Akristu yaawo yaari Ahepri, hiyaano tho ninnakumana ni achu yaawo anamwaramwaxa michaka sawootha ni miruku seiho inavuhana ni malamulo awookololowa a Yehova. Achu akina analoca wi Anamoona a Yehova aahesa nthowa nawiiwelela malamulo a Mpiipiliyani vooloca sa okonihana. Mikhalelo ni miyooneelo sa elapo inamvira ikhalaka ocai wa mooneelo woophaameya wa Muluku vooloca sa ichu. (Mas. 17:15) Mwawiihiiha, nnaphwanela olipiha owerya wahu wa ohiyaniha ni okhooca miruku seiho amwiicani anapharihelaaya yeereryaka oniceecheiha naari tho onihuweliha.—Ahe. 13:9.

8. Nni niilipixerye hai wi nikhale awiichwelavo mmakupa oomunepani?

⁸ Paulo aahiloca wa Ahepri wi etitelele wiilipixerya wi ekhale awiichwelavo. Ntoko Akristu, nnaphwanela weerano emohamoha. Eyo enaphitaanyerya okhalano masuwelelo awiixeela a eparipari ni otakiherya mukhalelo wawuupuwela wa Yehova. Meerelo yaala ennatitelela muchu amanle wiiveleela ni opatisiwa. Moohipwacha elukuluku nimalinhaahu nri mu eparipari, oothene ahu nnaphwanela waalakhanya ni ohuserya moohihiyererya Masu a Muluku. (Sal. 1:2) Yookhovelela ahu yaphaama ya yoohuserya ya muchu mukhateiye enahaala onikhaviherya olipiha mukhalelo mmoha yoowo Paulo aaceenyenryeiye mu ekarata awe wa Ahepri: nroromelo.—Ahe. 11:1, 6.

‘NROROMELO WI NIKHAPELELE OKUMI AHU’

9. Ntakhara heeni nroromelo noolipa naaryaaya noochuneya wa Akristu yaari Ahepri?

⁹ Akristu yaawo yaari Ahepri yaahaala ochuna nroromelo noolipa wi ewerye okophola eri akumi mu yoohooxa yeeyo yaacamela o Yuteya. (Ahe. 10:​37-39) Yesu aahaalopola oomuchara awe wi vaavaa yaahaalaaya omoona Yerusalemu arukureryiwe ni anakhocho, awo yaaphwanela ochawela omwaako. Ikano sawe saanaphariheleya wa Akristu oothene, yaawo yaakhala mpooma naari tho yaawo yaakhala mmacani. (Luka 21:​20-24) Mweelukuluku yeele, achu yaale yoopopihiwa ni anakhoco oohiphela mwawooneya yaanaavya okhapeleleya mu ipooma saarukureryiwe ni ixiri ntoko Yerusalemu. Ochawela mmiyaakoni yaakhala ntoko wi tahi echu yamiruku nave naanachuneya nroromelo nawaaca.

10. Nroromelo noolipa nahaala oweeriha Akristu opaka eheeni? (Ahepri 13:17)

¹⁰ Akristu yaawo yaari Ahepri tho yaanaphwanela waaroromela yaale Yesu aaphariheleiye wi ehooleleke muloko. Yaale yaahoolela mwawooneya yaahivahererya sooleeliherya sooluluwanya wi ekhaviherye muloko woothene ochariha ohoolela wa Yesu mu elukuluku yoophwanelela ni mmukhalelo wooreheryeya. (Mwaalakhanye Ahepri 13:17.) Masu Eekiriki aphariheliwe mu Ahepri 13:17 ‘okhala awiiwelela’ enooniherya wi muchu owo ori aweemererya wiiwelela nthowa nawi onnamuroromela muchu yoowo onamvaha ohoolela. Eyo ennavolowela sincipale ohiya pahiru omwiiwelela  nthowa nawi oovahiwa owerya wa ovaha ohoolela. Mwawiihiiha, Akristu yaari Ahepiri yaanaphwanela oteka nroromelo wa yaale yaavaha ohoolela ehaakumve yoohooxa ophiya. Waakhanle wi mu ilukuluku sa murecele Akristu yaanachariha mwawiiwelela sooleeliherya sa yaale yaavahererya ohoolela, waamukhala wookhweya vancipale wa yaawo weerano emohamoha mu ilukuluku sa sookacamiha.

11. Ntakhara heeni okhalano nroromelo noolipa oryaaya woochuneya wa Akristu olelo?

¹¹ Olelo ninnachuna nroromelo ntoko yenraaya yaale yaawaakhenle ekarata ya Paulo mu ekwaha aya yoopacerya. Olelo nnakhala mu elukuluku yeeyo achu ancipale anakhoocaaya—ophiyerya tho onyemula—olopola wa Piipiliya vooloca sa makuchuwelo a mukhalelo yoola wa ichu. (2 Pet. 3:​3, 4) Ohiya yeeyoru, naamwi Piipiliya uupululaka sawooniherya sincipale vooloca sa mukhalelo yoohooxa etokotoko enahaalaaya weereya, sookhalavo ichu sincipale nihisuwenlaahu. Nnaphwanela okhalano nroromelo noolipa wi makuchuwelo a mukhalelo yoola wa ichu onahaala ophiya mu elukuluku yoophwanelela niwi Yehova onahaala onikhapelela.—Hap. 2:3.

12. Tiheeni enahaala onikhaviherya okophola mu yoohooxa etokotoko?

¹² Nnaphwanela tho olipiha nroromelo mu marehereryo yaawo Yehova onaphariheleiye olelo wi anihoolele—“kapuro oororomeleya ni amiruku.” (Mat. 24:45) Vaavaa yoohooxa etokotoko eneeraaya epacerye, nnanwerya waakhela sooleeliherya sooluluwanya wi nivuluxe ikumi, hiiha ntoko Akristu yaale yaari Ahepri akhweya yaakhenlaaya vaavaa Aroma yaaphin’yaaya. Vano ela elukuluku ya olipiha nroromelo nahu wa ohoolela yoowo nnaakhelaahu wa yaale anavahererya ohoolela mmarehereryo a Yehova. Wakhala wi hannaroromela naari wiiwelela ohoolela waya hiihaano, onahaala okhala woovila wiiwelela ohoolela yoowo nnahaalaahu waakhela variyari va yoohooxa etokotoko.

13. Ntakhara heeni nlakiheryo nrempwe mu Ahepri 13:5 naaryaaya noophwanelela?

¹³ Vaavaa yaaweheryaaya eneneeryo wi echawe, Akristu yaawo tho yaari Ahepri yaaphwanela okhweiha okumi aya, ekhoocaka okhala “oosivela ikhorowa.” (Mwaalakhanye Ahepri 13:5.) Akina a yaawo yaahihoolela ilukuluku sa etala ni ohaawa. (Ahe. 10:​32-34) Naamwi awo yaari ooreheryeya ovilela ni sawuukhula wanthowa na michaka saphaama, akhweya akina yaampacerya woona muhakhu okhala woochuneya ntakhara okhapeleleya waya. Nyenya waaca wa ikhorowa hiwahaala waakhapelela wa otoloxa yoowo wahaala orwa. (Tiy. 5:3) Mweeparipari, muchu vyakala yoowo aasiveliwa ni ichu soomwiilini, ahaala woona okhala woovila ochawa ni ohiya muculi ipa sawe naari sookhalano sawe.

14. Ti mwawiihai nroromelo noolipa nnahaalaaya ovolowela soolakelela sahu hiihaano vooloca sa ichu soomwiilini?

¹⁴ Nnahaala oceenyeryeya okhooca wiithukumanyerya, wakhala wi nookhalano nroromelo noolipa, nawi makuchuwelo a mukhalelo yoola wa ichu onahaala weereya moohilekela. Achu evoloweliwe ni woova, “ikhorowa saya anamurihela okhwipi” nthowa nawi anamwiiwexexa wi “ikhorowa seiye ni eworo aya yeele hiirwa iwoopola nihiku na esara ya Apwiya.” (Ese. 7:​19, PMM) Ohiya otikithereya mu wiithukumanyerya ikhorowa sincipale, nnaphwanela opaka soolakelela seiho sinahaala onikhaviherya okhalaka ni ekumi yookhweya, nyenya yoophimeleleya. Eyo enaphitaanyerya okhooca yaweeha ya opaka ivaale soohichuneya naari omaliha elukuluku yincipale nikhapelelaka ichu soomwiilini. Nave tho nnahaala osepa mweephoole otikithereyaxa mu ichu seiho nryaahuno. (Mat. 6:​19, 24) Nroromelo nahu nnanwerya weehiwa moorweela wa  ichu soomwiilini ni ichu ikina vaavaa nnawehereryaahu ophiya makuchuwelo a mukhalelo yoola wa ichu.

“NYUWO MUNAPHWANELA OVILELA”

15. Ntakhara heeni Akristu yaari Ahepri yaanachuna xaxaxa ovilela?

¹⁵ Akristu yaawo yaari Ahepri yaanaphwanela ovilela mmuteko aya wa Yehova nthowa nawi makacamiho yaanaacamela o Yuteya. (Ahe. 10:36) Naamwi Akristu akina yaawo yaari Ahepri yaahoolenle wiikariwa otokweene, ancipale yaaheemererya mahusiheryo Eekristu variyari va ilukuluku sa murecele. Paulo oothariha wi naamwi yaavilenle saweeha soovila sa nroromelo, awo hiyahooxeen’ye ntoko Yesu, eyo tiwi ophiyerya okhwa. (Ahe. 12:4) Nyenya, Ayuta ancipale yaari oonyeenyeyaxa ni a nlala nthowa nawi achu ancipale yaanakhala Akristu. Muloko wa achu waahimuhiphela Paulo vaavaa owo aalaleeryeiye o Yerusalemu. Ayuta opwaha 40 ‘yaahipaka nlakano yiisuulumelaka wi ehilye echu ophiyerya emwiiphale Paulo.’ (Saw. 22:22; 23:​12-14) Naamwi yiiciwaka ni wiikariwa, Akristu yaala yaaphwanela otitelela othukumana, olaleerya michaka saphaama ni otitelela olipiha nroromelo naya.

16. Ti mwawiihai ekaarata wa Ahepri eneeraaya enikhaviherye okhalano moonelo woopwanelela vooloca sa wiikariwa? (Ahepri 12:7)

¹⁶ Tiheeni yaahaala waakhaviherya Akristu yaale yaari Ahepri ovilela ni wiica yoole yaahoolelaaya? Paulo aanasuwela wi awo yaaphwanela okhalano mooneelo woophwanelela wa saweeha saya. Mwawiihiiha, owo aahithariha wi Muluku onanwerya weemererya weehiwa wa nroromelo ntoko makupa a ovyakihiwa wa Mukristu. (Mwaalakhanye Ahepri 12:7.) Ovyakiha yoola onanwerya omukhaviherya Mukristu wuunnuwiha ni orehererya mikhalelo soochuneya Seekristu. Otikitheryeya wa ichu saphaama saahaala okhumelela muhoolo moorweela wa ovilela waya saweeha, Akristu yaawo yaari Ahepiri yaahaala woona okhala wookhweyaxa ovilela.—Ahe. 12:11.

17. Tiheeni Paulo aahusenryeiye vooloca sa ovilela wiikariwa?

 ¹⁷ Paulo ahaaceenyerya Akristu yaari Ahepri ovilela saweeha ni yoolakelela etokweene. Owo aahikhalano mathowa oophwanelela a waarepela ekaarata vooloca sa yeeyo. Ntoko mulipa oowiikara Akristu khalai, owo aanasuwela yeeyo awo yaahoolelaaya. Owo tho aanasuwela mukhalelo wa ovilela wiikariwa. Nthowa nawi, owo aahihoolela mikhalelo soohiyanahiyana sawiikariwa amanle okhala Mukristu. (2 Ako. 11:​23-25) Mwawiihiiha, Paulo aanwerya oloca moolekecha vooloca sa echu yoochuneya weera wi evilele. Owo aahiwuupuxerya Akristu wi vaavaa yaavilelaaya ni saweeha ohiya wiiroromela mukhataaya, awo yaaphwanela omuroromela Yehova. Paulo aanwerya oloca moolipa murima: “Yehova tonakikhaviherya; nkirwa koovaru echu.”—Ahe. 13:6.

18. Osuwela vooloca sa omwaahiyu oni onikhaviherye hai ovilela wiikariwa?

¹⁸ Akina a annihu tho ennahooxeya ni wiikariwa olelo. Nnanwerya waakhaviherya moororomeleya moorweela wa mavekelo ahu, nave ikwaha ikina mmikhalelo sawooneya. (Ahe. 10:33) Mwawiihiiha, Piipiliya onnaloca mookwakwaleya wi “oothene yaale anachuna omulapa Muluku, mwawiiwanana ni Kristu Yesu, enarwa tho yiikariwa.” (2 Tim. 3:12) Mwa yeeyo, oothene ahu nnaphwanela wiirehererya wa yeeyo enarwa muhoolo. Ntitelele omuroromela moomalela Yehova, nroromelaka wi owo onahaala onikhaviherya ovilela yaweeha vyakala yeeyo enahaala onikhumelela. Mu elukuluku yoophwanenela, owo onahaala oruuha otaphuwa wa alapeli awe oothene oororomeleya.—2 Ate. 1:​7, 8.

19. Mu ichu taani seiho sinahaala onikhaviherya wiirehererya ntakhara yoohooxa etokotoko? (Moone tho eruku.)

¹⁹ Moohikhwa minikwa, ekaarata ya Paulo wa Ahepiri yaahaakhaviherya Akristu a mu nsana noopacerya wiirehererya ntakhara yoohooxa yeeyo yaahaalaaya ohoolela. Paulo ahaaceenyerya annawe okhalano masuwelelo ni wiiwexexa wa wiixeela wa Soorempwa. Weerano yeeyo yaahaala waakhaviherya oreheryeya wi ehiyaniheke ni okhooca mahusiheryo atheru, yaawo yaahaala opahula nroromelo naya. Owo ahaaceenyerya olipiha nroromelo naya wi echariheke mwanvai ohoolela wa Yesu ni wa yaale yahoolela mmulokoni. Nave owo aahaakhaviherya Akristu okhala ovilela, okhalano mooneelo woophwanelela wa saweeha ni woonaka saweeha ntoko ekari ya ovyakihiwa ni Tiithi aya oosivela. Hiyaano tho nnaphwanela opharihela miruku seiha soovereliwa. Mwa weerano yeela, nnanwerya ovilela moororomeleya ophiyera omakuchuwelo.—Ahe. 3:14.