Nthowa na ohikhalavo oohuserya makhumi mathanu napiili vaavaa Yesu aatikithenryeiye Yoolya ya Apwiya, hannaphwanela wuupuwela wi awo hiyeemereryiwa naari wi yaarimunyanyaliwa ni yoowo. Pahiru Yesu aachuna okhala ni arummwa awe mu elukuluku yeele.

Owo aanaweemererya oohuserya khumi napiili vamoha tho ni ale makhumi mathanu napiili. Yesu aahaathanla voopacerya wa oohuserya awe ancipale alopwana awaakhwana khumi napiili, yaawo aawiichaneiye arummwa. (Luka 6:​12-16) Owo aari o Kalileya vaavaa ‘aathukumannyeiye oohuserya Khumi napiili’ ni ‘aarumiha wi yalaleerye michaka sa Omwene wa Muluku ni waapenuxa awiiceliwa.’ (Luka 9:​1-6) Voocharela, o Yuteya Yesu ‘aahaathanla oohuserya akina makhumi mathanu napiili, ni aahaarumiha eeli-eeli.’ (Luka 9:51; 10:1) Mwawiihiiha, Yesu aakhalano oomuchara awe mmapuro mancipale weiwo michaka sawe saalaleeryiwaayawo.

Ayuta yaawo yaari oohuserya a Yesu nlelo yaanampaka Paska avayaakhani, ti yawooneya wi yaamweera ni ichoko saya sene. (Muk. 12: 6-11, 17-20) Vaavaa elukuluku ya okhwa wawe yaacamelaaya, Yesu ni arummwa awe yaaya o Yerusalemu. Nyenya owo haapanke muthukumano mutokweene wa Paska wa oohuserya awe oothene—o Yuteya, o Kalileya ni o Pereya. Mweeparipari, pahiru Yesu aachuna okhala ni arummwa mu elukuluku yeele. Owo aaloca ni yaawo ariki: “Kaanakhwelaxa omulya Paska yoola vamoha ni nyuwo kihaakumve ohooxeya.”—Luka 22:15.

Yaahikhalavo mathowa aphaama a Yeeyo. Moohilekela Yesu aahaala okhwa ntoko “Epucepuche ya Muluku, yeeyo enaviihavo yoocheka ya mweelaponi!” (Yoh. 1:29) Eyo yaahaala weereya o Yerusalemu, weiwo mikucho sa Muluku saavahiwaayawo mu elukuluku ya khalai. Epucepuche ya Paska yaahiwuupuxerya a Isarayeli wi Yehova aahaataphula o Yikuputu, nyenya ni mukucho awe Yesu aahaala opaka sincipalexa, Owo aahaala waataphula achu oothene wa yoocheka ni okhwa. (1 Ako. 5:​7, 8) Wa nthowa na mukucho wa Yesu, arummwa khumi napiili yaahipaka makupa a mathipelo a muloko Weekristu. (Aef. 2:​20-22) Mootikhiniha, Yerusalemu epooma yaweela orino “maluku khumi nameeli a mathipelo” yaawo arempwevo “masina khumi napiili a arummwa khumi napiili a Mwaasaana Eepucepuche.” (Wup. 21:​10-14) Hiiha, arummwa oororomeleya yaahaala okhalano murici woochuneya mu waakhwanela yookhwela ya Muluku. Mwawiihiiha, ninnawerya wiiwexexa ntakhara heeni Yesu aachuneiye okhala ni yaawo va Paska yoole ookuchula yoowo mwawakuveya aahaala ocharelana—ni Yoolya ya Apwiya.

Oohuserya makhumi mathanu napiili ni akina hiyaari va yoolya yeele ni Yesu. Naamwi hiiha, oohuserya yaawo yaahaala wooniherya ororomeleya yaahaala ophura orweela wa yeeyo Yesu aatikithenryeiye—Yoolya ya Apwiya. Moovira wa elukuluku, ohuserya oothene yaawo yaahaala okhala Akristu oothanliwa yaahaala ovolowa mu nlakano na Omwene, nenlo Yesu aalonceiye ni arummwa mu ohiyu yoole.—Luka 22:​29, 30.