1, 2. (1) Mukhalelo Yehova onaakhaliheiye achu onahiyana hai ni mukhalelo achu oowerya anaakhalihaaya achu? (2) Tiheeni nnahaalaahu othokororya mmwaha yoola?

ACHU oowerya wiiliwiili annaalamulela akina naari ophiyerya waahoosa. (Mateu 20:25; Eklesiyaste 8:9) Yehova hanapaka yeeyo! Naamwi ari Aikuru Soothene, Muchu ooweryaxa a elapo yoothene, owo onnaathokororya vancipale achu oohiphaameya. Owo teepewe ni oopwacha vooloca sa moonelo ahu ni soochuna sahu. Owo onnuupuwela wi naachu oohiphaameya nave oosuwela okotakota wahu, mwawiihiiha hananiveka opaka echu opwaha nnaweryelaahu.—Salumu 103:13, 14.

² Mpiipiliyani, ninnahuserya mukhalelo Yehova oreiye oopwacha wa achu awe. Hankooni nthokororye sootakiherya chaaru: Yoopacerya, mukhalelo Yehova mweepewe aamukhavihenryeiye mmiravo Samuwele operekha muchaka woothoriha wa Mutokweene Eephepa Eli. Yanawiili, mukhalelo Yehova aareiye oopisa murima ni Mose vaavaa Mose uupuweleiye wi haahaala owerya ohoolela nloko na Aisarayeli okhuma o Yikuputu. Nave yaneeraru,  mukhalelo Yehova aathokoronryeiye Aisarayeli vaavaa yaakhummaaya o Yikuputu. Tiheeni nnahuseryaahu vooloca sa Yehova orweela wa sootakiherya seiya ni mukhalelo nneeraahu nimutakiherye?

3. Echu taani yootikhiniha yaamweerenle mmiravo Samuwele mu ohiyu omoha, nave makoho taani nnaphwanelaahu wiipakela? (Moone eruku yoopacerya.)

³ Samuwele aapacenrye orumeela mu tapernaakulu ari mmiravo. (1 Samuwele 3:1) Mu ohiyu omoha, amanle okona, echu yootikhinihaxa yaaheereya. * (Moone masu avathi.) (Mwaalakhanye 1 Samuwele 3:2-10.) Samuwele aahimwiiwa muchu amwiichanaka. Samuwele uupuwela wi muchu awuuluvala, Mutokweene a Anamukucho Eli taamwiichana. Mwawiihiiha mwawiiwelela Samuwele aahivinya nave aahichimakela wa Eli nave aloca: “Miyo kiri va, ntakhara wòkitxhana.” Nyenya Eli aahi wa yoowo: “Mwana aka, nkiwitxhanne.” Emanle weereya ela mu ikwaha piili, Eli aahisuwela wi aari Muluku yoowo aamwiichana Samuwele. Mwawiihiiha Eli aahimuleela Samuwele echu ya oloca mu ekwaha yoocharela, nave Samuwele aahiiwelela. Ntakhara heeni Yehova haamulenle Samuwele wuupaceryani wi aari yoowo aamwiichana? Piipiliya hanaloca. Nyenya ela ti yooweryeya wi Yehova aahipaka ichu mmukhalelo yoola woona wi aanapwacha miyoonelo sa Samuwele.

4, 5. (1) Tiheeni Samuwele aapankeiye elukuluku Yehova aamvaherenryeiye muchaka wi aperekhe wa Eli? (2) Tiheeni yaweereya ela enanihusihaaya vooloca sa Yehova?

⁴ Mwaalakhanye 1 Samuwele 3:11-18. Nlamulo na Yehova naanaalamulela anamwane waacicimiha achu awuuluvala, xaxaxa yaale yaahoolela. (Mukwaha 22:28; Onamukutxho 19:32) Mwawiihiiha ti woovila waanyiherya mmiravo ntoko Samuwele wi aahaala oya wa Eli woosiiselo ene, nave moolipa murima amuleela owo muchaka woothoriha wa Muluku. Piipiliya onnanleela wi Samuwele “ànova omutharihela Heli etxhu ìwaleiye.” Mwawiihiiha Yehova aaheeriha okhala yawooneya wa Eli wi owo taamwiichana Samuwele. Ntoko yookhumelela, Eli amveka Samuwele wi ahikhuwe yeeyo Muluku aalonceiye. Samuwele aahiiwelela nave “àmulèla ahimukhun’weru” echu.

⁵ Muchaka yoola hiwaari muvyaani moomalela. Wuupaceryani “mutxhu a Muluku” aahimvahererya Eli muchaka woolikana. (1 Samuwele 2:27-36) Yaweereya yeela ennanihusiha mukhalelo Yehova oreiye oothokororya ni amiruku.

6. Tiheeni nnahuseryaahu orweela wa mukhalelo Muluku aamukhavihenryeiye mmiravo Samuwele?

⁶ Apwanne nyuwo mwa mmiravo? Waakhanle wi tihiiha, yaweereya vooloca sa Samuwele ennooniherya wi Yehova onniiwexexa makacamiho anyu ni miyoonelo sanyu. Akhweya nyuwaano munnuuliwa muru nave onnakhala woovila wa nyuwo waalaleerya achu atokotoko naari oohiyana ni iyaakha sanyu. Munaphwanela ororomela wi Yehova onnachuna wookhaviheryaani. Mwawiihiiha mvekele wa yoowo nave mmuleele mukhalelo munoonaanyu chiryene. (Salumu 62:8) Muupuwele mwawiiseela vooloca sa sootakiherya sa Mpiipiliyani sa amiravo ntoko Samuwele. Nave  muloce wa anna ni arokora munalikanaanyuno iyaakha naari awunnuwelavo yaawo avoonthe makacamiho analikana ni awinyu. Awo anahaala wooleelaani vooloca sa ilukuluku Yehova aakhavihenryeiye, akhweya mmikhalelo yahiweheryaaya.

7, 8. Yehova oonihenrye hai wi aanapwacha vancipale miyoonelo sa Mose?

⁷ Elukuluku Mose aareiyeno iyaakha makhumi mathanu namararu, Yehova aahimvaha murici woovilaxa: woopola nloko na Aisarayeli mu okapuro o Yikuputu. (Mukwaha 3:10) Akhweya murici owo waari wawuukhula wa Mose, nthowa nawi owo aari mukukhula o Mitiya mu iyaakha makhumi masese. Mose aahiloca: “Miyano kàni wi kiye wa mwene Farawo, w’Egipitu ni wi kàvìhewo atxhu a nloko na Isarayele?” Yehova aahimulipiha Mose: “Miyano kinamukhala ni weyano!” (Mukwaha 3:11, 12) Yehova aahimuroromelihatho Mose wi asitokweene o Isarayeli yaahaala ‘owiriyana nsu nawe.’ Nlelo Mose aahiloca: “Atxhu a Isarayele hekemereryà, hekiwiriyanà.” (Mukwaha 3:18; 4:1) Xaxaxa Mose aaloca wi Yehova aahihesa! Nyenya Yehova aapixa murima ni Mose. Ophiyerya wi aahimvaha Mose owerya wa opaka sootikhiniha. Mweeparipari, Mose aari muchu oopacerya oromoliwe Mpiipiliyani yoowo aavahiwe owerya yoola.—Mukwaha 4:2-9, 21.

⁸ Naamwi seeren’ye soothene seiya, nlelo Mose aahiikhupanyerya. Owo aalonce wi haki awerye oloca phaama. Mwawiihiiha Muluku aahimuleela ariki: “Miyano kinamukhala ni weyano wàlotxaka, nave kinamòhusiha yeyo onayawe olotxa!” Apwanne Mose aahilekecheya moomalela? Hooye, owo aahimveka Muluku wi amurumihe muchu mukina! Voocharela, Yehova aahinyeenyeya. Nyenya owo nlelo aahithokororya miyoonelo sa Mose, mwawiihiiha aahimuruma Aroni wi aloce mu nipuro na Mose.—Mukwaha 4:10-16.

9. Opisa murima ni epewe ya Yehova yaamukhavihenrye hai Mose okhala muhooleli aphaama?

⁹ Yaweereya yeela enanihusiha eheeni vooloca sa Yehova? Woona wi Yehova ti Aikuru Soothene, owo anwerya opharihela owerya wawe wi amoopopihe Mose nave amweerihe omwiiwelela. Ohiya yeeyo, Yehova aari oopisa  murima ni eepewe, nave owo aahimulipiha mulapeli awe oororomeleya ni awiiyeviha wi aahaala okhala ni yoowo. Apwanne meerelo yaala yaaphara muteko? Aai, yaaphara! Mose aahikhala muhooleli mutokweene aachu a Muluku. Owo aaheererya okhala awiiyeviha nave aanaathokororya akina, hiiha ntoko Yehova enreiye ni yoowo.—Namarepela 12:3.

10. Nnaphura hai vaavaa nnaathokororyaahu akina hiiha ntoko Yehova oreiye?

¹⁰ Tiheeni nnahuseryaahu mwa yeela olelo? Waakhanle wi mwa mutheli, tiithi, naari mutokweene, nyuwo mookhalano ohoolela vyakala ntakhara akina. Wa nthowa na yeela, ti yookhweleyasa wa nyuwo omutakiherya Yehova moorweela mwa okhala oothokororya, eepewe, ni oopisa murima wa mwaarinyu, aniinyu, vamoha ni anna ni arokora mmulokoni. (Kolosi 3:19-21; 1 Pedro 5:1-3) Wakhala wi munnamutakiherya Yehova Muluku ni Yesu Kristu, Mose Mutokotoko, munahaala weeriha okhala wookhweya wi akina erwe wi eloce ni nyuwo, nave munahaala okhala nlipiho wa yaawo. (Mateu 11:28, 29) Munahaalatho okhala yootakiherya yaphaama wa yaawo.—Ahebri 13:7.

11, 12. Yehova aaweerinhe hai Aisarayeli woona okhala ookhapeleleya ni awaakiheya vaavaa aahooleleiye ekhumaka o Yikuputu?

¹¹ Akhweya yaahikhalavo Aisarayeli opwaha macikhwi mararu yaawo yaachawenle o Yikuputu mu eyaakha ya 1513 ahaakumve Kristu. Mu nikhuuru nenlo yaahikhalavo anamwane, awunnuwelavo, nave akhweya yaahikhalavo akina yaari awiiceliwa naari oorakala. Muloko mutokweene wa achu ntoko yoowo, waanamuchuna Muhooleli oothokororya ni awiiwexexa. Nave ti yeeyo chiryene Yehova enreiye moorweela wa Mose. Ntoko yookhumelela, Aisarayeli yaahiisoona okhala ookhapeleleya vaavaa yaakhummaaya owannyaya weiwo yaasuwenlaayawo.—Salumu 78:52, 53.

¹² Yehova aaweerinhe hai achu awe wiisoona okhala ookhapeleleya? Owo aahirehererya nloko na Aisarayeli “mmukhalelo wa owana ekhoco” vaavaa yaakhumaaya o Yikuputu. (Mukwaha 13:18) Woona wi yaari orehereryeya mmukhalelo yoowo, awo yaanawerya woona mookwakwaleya wi Muluku aya aanavareryela mwaha. Yehova “othana áháhola n’neku,” nave ohiyu ni “omwaléla wa moro” awuupuseryaka wi vaiye aari ni yaawo, aahoolelaka nave aakhapelelaka. (Salumu 78:14) Nave nloko na Aisarayeli naanachuna nlipiho nenle nthowa na yeeyo yeeren’ye ohoolo waya.

13, 14. (1) Yehova aakhapelenle hai Aisarayeli mu Eniya Yooxeerya? (2) Yehova oonihenrye hai wi aari ooweryaxa waapwaha Ayikuputu?

¹³ Mwaalakhanye Mukwaha 14:19-22.  Nkaanyiheryani wi muri vamoha ni Aisarayeli. Nyuwaano mootepa othanana. Akhoco o Yikuputu ari oculi wanyu, nave Eniya Yoophilivila eri ohoolo wanyu. Voocharela Muluku onneeravo echu. Neeku naweemela nenlo naari vahoolo vanyu ninnachikela oculi wa nikhuuru, variyari va nyuwo ni Ayikuputu. Vano awo ari mweepiiphini, nyenya mu nikhuuru nanyu woosareyamo waarya wootikhiniha! Voocharela munnamoona Mose ookolelaka ntata nawe mu eniya, nave echeku yakuru enarweela onakhuma nsuwa ennakhumelela, ehulaka mphiro variyari va eniya. Mwawiihiiha, nyuwaano ni emusi anyu, ni muhuwo anyu munneeca mvolowaka mu eniya mmukhalelo wooreheryeya vamoha ni achu oothene. Nyuwo munnatikhiniheya woona wi vathi hiwaavovo ncokwa naari otherenya. Echaya ti yawuuma navetho yoolipa, mwawiihiiha onnakhala wookhweya wa nyuwo olapuwa. Ntoko yookhumelela, ophiyerya yaale ahinaakuva annaphiya o ekhopela ekina mookhapeleleya.

¹⁴ Mwaalakhanye Mukwaha 14:23, 26-30. Elukuluku eneereyaaya yeela, Farawo, yoowo ori awiirumiha nave oolosowa, onnapacerya owiikaraani nyuwo ni Aisarayeli akina. Voocharela wanawiili Mose onnookolela ntata nawe mu eniya, nave ixiri soopiili sa maahi, sinnakumana. Maahi annamuhuruwela Farawo ni anakhoco awe. Haavovo naari mmoharu mano a yaawo onakophola!—Mukwaha 15:8-10.

15. Yaweereya yeela enoohusihaani eheeni vooloca sa Yehova?

¹⁵ Yaweereya yeela ennanihusiha echu yoochuneya vooloca sa Yehova. Owo Muluku ooreheryeya, nave mukhalelo yoola onnanikhaviherya okhala ookhapeleleya ni awaakiheya. (1 Korinto 14:33) Ntoko mukukhula yoowo onasivela nave onavareryela  muhuwo awe, Yehova onnaathokororya achu awe mmikhalelo sawooneya. Onnatitelela owaakiha ni waakhapelela wa amwiicani aya. Ela ennanilipiha ni onihakararya vancipale vaavaa nnaacamelaahu o makuchuwelo a mukhalelo yoola wa ichu.—Masiposipo 1:33.

16. Nni niphure hai orweela wa wuupuwelela mukhalelo Yehova aavulunseiye Aisarayeli?

¹⁶ Olelo, Yehova onnaakhapelela achu awe ntoko nikhuuru. Owo onnaakhaviherya yaawo okhapelela onthamwene aya ni yoowo nave onnaakhapelela wa amwiicani aya. Nave owo onahaala otitela weerano yeela variyari va yoohooxa etokotoko yeeyo enahaala ochoowa moohilekela. (Wupulula 7:9, 10) Mwawiihiiha moohipwacha waakhanle wi amiravo ni asimwali naari awunnuwelavo, arino okumi waphaama naari toorakala, achu a Muluku heni ehaleele yaweera naari woova, variyari va yoohooxa etokotoko. * (Moone masu avathi.) Mweeparipari, achu a Muluku anahaala okhala aweemeleleya! Awo anahaala wuupuwela masu a Yesu: “Mwitxhuwe ni nvinyihe muru, ntakhara wopoliwa wanyu ori vakhiviru.” (Luka 21:28) Ophiyerya wi vaavaa eneeraaya ehipheliwe ni Koki, nikhuuru na maloko nenlo nri nakuruxa ompwaha Farawo, achu a Muluku anahaala ororomela wi Owo onahaala waakhapelela. (Ezekiyeli 38:2, 14-16) Ntakhara heeni? Nthowa nawi awo aasuwela wi Muluku hanatorokeya. Wanawiili Muluku onahaala wooniherya wi toosivela nave Mvuluxa onaathokororya achu awe.—Isaiya 26:3, 20.

17. (1) Nni niphure hai vaavaa nnahuseryaahu saweereya sa Mpiipiliyani vooloca sa mukhalelo Yehova onaathokororyeiye achu awe? (2) Tiheeni nnahaalaahu othokororya mmwa onacharela?

¹⁷ Mmwaha yoola, nohoona sootakiherya ikina sa mukhalelo Yehova oreiye oothokororya ni eepewe vaavaa onakhapeleleiye, onahooleleiye, navetho onaavuluseiye achu awe. Vaavaa munuupuwelelaanyu saweereya ntoko seiya, mweererye ohuserya echu evyaani vooloca sa Yehova orweela mwa ovareryela ichu seiyo akhweya mwahonnaanyu khalai. Vaavaa munahuseryaanyu sincipale vooloca sa mikhalelo saphaama sa Yehova, osivela wanyu ni nroromelo nanyu mwa yoowo inahaala okhala soolipa. Mmwaha onacharela, nnahaala ohuserya vooloca sa mikhalelo nneeraahu nimutakiherye Yehova moorweela wa waathokororya achu aveemusini vahu, mmulokoni, nave mmuteko woolaleerya.