1. Mukhalelo wa nrima wa elapo yeela oni ovolowela hai wiiyeviha wahu?

NTAKHARA heeni ti woovila opharihela yeeyo nnahuseryaahu Mmasu a Muluku? Nthowa nimoha ti nawi, wi nipake yawookololowa, nnaphwanela okhala awiiyeviha. “M’mahiku ókutchula” yaala, okhala awiiyeviha ti woovila, nthowa nawi achu ancipale anirukurenrye ari “awisivela mkhataya, ósivela icharama, awithamala, awirumiha,” ni “óhiwerya wíhíha.” (2 Timóteo 3:1-3, Nlakano Nahihano) Ntoko akapuro a Muluku, noosuwela wi meerelo ntoko yaala toonanara, nyenya akhweya nnahaala woona wi achu yaawo aneerano meerelo yaala annakhumelela phaama nave aakhalano ohakalala weeparipari mookumini mwaya. (Salumu 37:1; 73:3) Akhweya nnamphiyera wiikoha: ‘Apwanne ti yoophwanelela ohela soochuna sa akina va nipuro noopacerya opwaha sawaka? Apwanne achu anahaala okicicimihaka wakhala wi kinneera ichu mmukhalelo wawiiyeviha?’ (Luka 9:48) Wakhala wi noheemererya wi meerelo a nrima a elapo yeela enivolowele, nnahaala onanariha onthamwene ahu waphaama ni annihu nave weeriha okhala woovila akina onisuwela ntoko Akristu. Nyenya vaavaa nnahuseryaahu sootakiherya sa wiiyeviha sa alapeli a Muluku ni waatakiherya yaawo, nnahaala okhalano sookhumelela saphaama.

2. Tiheeni nnahuseryaahu orweela wa alapeli oororomeleya a Muluku akhalai?

 ² Tiheeni yaakhavihenrye alapeli oororomeleya a Muluku khalai okhala asinthamwene awe? Awo yaamuhakalalinhe hai owo? Awo yaaphwannye woowi ikuru wi ewerye opaka yeeyo yaari yawookololowa? Elukuluku nnaalakhanyaahu vooloca sa sootakiherya saya Mpiipiliyani ni wuupuwelela yeeyo nnaalakhanyaahu, nroromelo nahu nnamukhala noolipa.

3, 4. (1) Yehova onanihusiha hai? (2) Ntakhara heeni ninnachuna sincipale opwaha nsuweliho wi nroromelo nahu ntitelele okhala noolipa?

³ Yehova onnavahererya yeeyo nnachunaahu wi ntitelele okhalano nroromelo noolipa. Ninnaakhela ekano yaphaama ni ovyakiha orweela Mpiipiliyani, soolaleeryiwa sahu Seekristu, isaiti sahu, JW Broadcasting, mithukumano sa muloko ni mithukumano sahu sa ekulucu. Nyenya Yesu aahithariha wi ninnachuna echu ekina opwaha nsuweliho. Owo aariye: “Yolya aka ti wera okhwela wa yowo okirumin’he, wi kakhwanihe muteko awe.”—Yohani 4:34.

⁴ Opaka yookhwela ya Muluku yaari ntoko yoolya wa Yesu. Olya yoolya yaphaama enaneerihaaya okhalano okumi waphaama. Mmukhalelo woolikana, opaka yookhwela ya Muluku enneeriha nroromelo nahu okhala naphaama. Ntoko yootakiherya, apwanne mohintoko oya omuthukumano wa mmuteko woolaleerya muri ookoma nave voocharela mukookela vaate mmanle woorowa mmuteko woolaleerya muri oohakalala ni oolipiheya?

5. Nnaphura hai moorweela mwa okhala a miruku?

⁵ Vaava nnapakaahu yeeyo Yehova onanivekeiye, ninnakhala amiruku. (Salumu 107:43) Nave ichu sincipale sinneereya wa yaale arino miruku. “Nave soothene inoohakalaliha, hayiivo inaphwanaphwanaayano. . . . Ori mwiri wookumi wa yaale anaphara, nave toohakalala yaale aniipharelelano.” (Masiposipo 3:13-18, Tradução do Novo Mundo) Yesu aahiloca: “Mwasuwelà yela ni munatxhariha, munamukhala òrèriwa [naari oohakalala].” (Yohani 13:17) Amuhuserya a Yesu yaahaala okhala oohakalala vaavaa awo yeeraaya etitelele opaka yeeyo Yesu aaleenleiye wi epake. Ochariha mahusiho ni yootakiherya awe okhala mukhalelo aya wa okumi.

6. Ntakhara heni ninnaphwanela otitelela opharihela yeeyo nihusenryaahu?

⁶ Olelo, nnaphwanelatho otitelela opharihela yeeyo nnahuseryaahu. Muupuwele sa mulipa ooreherya mikukuca yoowo orinono ikaruma, ni masuwelelo. Ichu seiye sinahaala omweeriha okhala mulipa ooreherya mikukuca aphaama, pahiru wakhala wi onnapharihela seiyo. Akhweya ookhalano mavyakelo mancipale variyari va iyaakha, nyenya owo onaphwanela otitelela opharihela yeeyo ohusenryeiye wakhala wi nlelo onnachuna okhala mulipa ooreherya mikukuca aphaama. Mmukhalelo woolikana, vaavaa naahusenryaahu wuupaceryani eparipari, naahihakalala nthowa nawi naahipharihela yeeyo naalakhannyaahu Mpiipiliyani. Nyenya wi nikhaleno ohakalala woohimala, nnaphwanela otitelela opharihela nihiku ti nihiku yeeyo Yehova onanihusiheiye.

7. Tiheeni nnaphwanelaahu opaka wi nihuserye orweela wa sootakiherya sa Mpiipiliyani?

⁷ Mmwaha yoola, nnahaala othokororya mikhalelo mikina mummo akhweya oneeraaya okhale woovila wa hiyo otitelela okhala awiiyeviha. Nnahaala ohuserya ti mwawiihai achu oororomeleya akhalai yaatitelenlaaya okhala awiiyeviha. Nyenya nnaphwanela opaka sincipale ohiya pahiru waalakhanya miselo. Nnaphwanela wuupuwelela vooloca sa yeeyo, nave voocharela nipharihele mookumini mwahu.

8, 9. Tiheeni nnahuseryaahu vooloca sa wiiyeviha wa Paulo orweela mu Saweriwa T’arummwa 14:8-15? (Moone eruku yoopacerya.)

⁸ Muluku “onakhwela wavulusa atxhu othene,  nave wi ephiye mosuwelani wa eparipari.” (1 Timóteo 2:4) Munawoona hai achu oothene yaawo nlelo ahihusenrye eparipari? Murummwa Paulo aahaalaleerya achu yaari Ayuta yaawo yaasuwenle echu vooloca sa Yehova. Nyenya aahaalaleeryatho yaale yaalapela amuluku atheru. Olaleerya wa yaawo, yaaheeha wiiyeviha wa Paulo. Ntakhara heeni?

⁹ Mmukwaha woopacerya wa omisiyonaariyo wa Paulo, owo ni Parnapa yaaheeca eyaaka o epooma yo Lustra. Achu o Likawoniya yaawo yaakhala weiwo yaahimukhaliha Paulo ni Parnapa ntoko achu amalavi, nave yaawiichana ni masina a amuluku aya atheru Sewu ni Hérmes. Apwanne Paulo ni Parnapa yaahichapa wa nthowa na yeela? Apwanne awo yoonne ntoko matorokelo oohakalaliha orweela wa wiikariwa yeereliwaaya mu ipooma piili sookuchula yaasekunryaaya? Apwanne awo yaahuupuwela wi ncicimiho noothene yeereliwaaya naahaala waakhaviherya achu ancipale owiriyana michaka saphaama? Hooye! Awo yaahitepa wuukhuwa nave yaahikhuwela eriki: “Akhwihu! Ti seni yela muneranyu? Hiyo nri atxhu pahi ntoko nyuwano!”—Saweriwa T’arummwa 14:8-15.

10. Ntakhara heeni Paulo ni Parnapa hiyiisonne ntoko achu a vasuluxa waapwaha o Likawoniya?

¹⁰ Elukuluku Paulo ni Parnapa yaaloncaaya wi yaari aachu ntoko yaawo, awo yaachuna oloca wi yaari oohiphaameya. Hiyaachuna oloca wi mukhalelo yaalapelaaya waari woolikana ni wa achu o Likawoniya. Paulo ni Parnapa yaarumihiwe ti Muluku ntoko mamisiyonaariyo. (Saweriwa T’arummwa 13:2) Awo yaathanliwe ni munepa waweela nave yaahikhalano ewehereryo yaphaamaxa. Nyenya nla hinaari nthowa na wiisoona okhala a vasuluxa. Awo yaahisuwela wi achu yaale yanweryatho waakhela ewehereryo ya wirimu waakhanle wi aheemererya michaka saphaama.

11. Nni nikhale hai awiiyeviha hiiha ntoko Paulo elukuluku nnalaleeryaahu?

¹¹ Wookhalavo mukhalelo mmoha yoowo nnooniheryaahu wi naachu awiiyeviha ntoko Paulo. Hannoona wi murici ahu wa olaleerya naari ichu Yehova onanikhaviheryeiye okhwaaniherya ineerihe okhala avameekhaaya. Nnaphwanela wiikoha mukhatiihu: ‘Kinoona hai vooloca sa yaale ari mu ekulucu aka? Apwanne kinnathanya makhuuru ammoori a achu?’ Orukurerya elapo yoothene yavathi, Anamoona a Yehova anneererya owaavya yaale anahaala owiriyana michaka saphaama. Akina anniilipiserya ohuserya elocelo naari sookhovelela sa achu yaawo akina anoonaaya okhala ntoko soohiphwanelela. Nave awo hantonko wiisoona okhala oophwanelela waapwaha yaale anaalaleeryaaya. Ohiya yeeyo, awo anneererya omwiiwexexa muchu ti muchu wi yaakhaviherye achu ancipale wakhala wooweryeya weemererya michaka sa Omwene.

12. Epafra oonihenrye hai wi chiryene aanaapwacha akina?

¹² Mukhalelo mukina nnooniheryaahu wi naachu awiiyeviha ori ovekela ntakhara anna ni arokora ahu, yaale arino “nroromelo nokhweleyasa ntoko hiyo.” (2 Pedro 1:1) Ela ti yeeyo Epafra enreiye. Piipiliya onnamuromola owo ikwaha raru. Elukuluku Paulo aareiye mukalaposo o Roma, owo aahaarepela ekaarata Akristu o Kolosi, atharihaka vooloca sa Epafra: “Yowo mmavekeloni mwawe onnatitela wovekelelani nyuwo.” (Kolosi 4:12) Epafra aahaasuwela anna phaama, nave aanaakhapelela yaawo mwawiiseela. Paulo aamwiichanne owo “mukhwaka” amukariposo, naamwi aarino makacamiho. (Filemoni 23) Nyenya owo nlelo aanakhapelela soochuna sa akina, nave aanapaka echu vyakala wi aakhaviherye  yaawo. Epafra aanavekela ntakhara anna ni arokora awe, nave hiyo nnanwerya weerano emohamoha ophiyerya oromola masina aya. Mavekelo ntoko yaawo takuru.—2 Korinto 1:11; Tiyako 5:16.

13. Muni mmutakiherye hai Epafra elukuluku munavekelaanyu?

¹³ Muupuwele vooloca sa muchu munahaalaanyu omvekelela muromolaka nsina nawe. Nyuwo akhweya mohaasuwela asinthamwene anyu a mmulokoni naari amusi anyu yaawo anahoolela makacamiho. Akhweya awo aakhalano soolakelela soovila wi epake naari saweeha wi evoothe. Nyuwotho munanwerya waavekelela anna yaawo masina aya anaphwanyeya mu jw.org mmiyaha “Testemunhas de Jeová presas por causa de sua fé.” (Moone vathi va IMPRENSA > CASOS JURÍDICOS.) Nyuwotho munanwerya waavekelela yaale amuyeleenle oosiveliwaaya mookhwani, yaale aakophonle mu ipahu ipaken’ye hiihaanoru naari mu ikhoco hiihaanoru, nave tho yaale ari oohaawa. Aakhalavo anna ni arokora ancipale yaawo anachuna mavekelo ahu! Vaavaa nnavekelaahu ntakhara yaawo, ninnooniherya wi ninnuupuwelela ohiya soochuna sahu pahiru nyenya tho vooloca sa soochuna sa akina. (Filipi 2:4) Yehova onniiwa mavekelo ntoko yaawo.

14. Ti mwawiihai Yehova oreiye namawiriyana oophwanelela?

¹⁴ Mukhalelo mukina nnooniheryaahu wi naachu awiiyeviha ori okhala namawiriyana aphaama. Tiyako 1:19 onnanleela ‘okhala òmalelene wiwa.’ Yehova namawiriyana oophwanelela. (Maphatxuwelo 18:32; Yosuwa 10:14) Ntoko yootakiherya, mwaalakhanye ovaanela onaphwanyeya mu Mukwaha 32:11-14. (Mwaalakhanye.) Naamwi Yehova ahaachunne moonelo wa Mose, owo aahimweemererya Mose othariha mukhalelo ooneiye. Apwanne mwanwerya onwiriyana moopisa murima muchu yoowo aahense khalai nave voocharela mucharihe sooleeliherya sawe? Chiryene, Yehova onnaawiriyana moopisa murima oothene yaale anavekela ni nroromelo.

15. Nni nimutakiherye hai Yehova moorweela mwa waavaha ncicimiho akina?

 ¹⁵ Mwiikohe mukhatiinyu: ‘Waakhanle wi Yehova tawiiyeviha ophiyerya waawiriyana achu mmukhalelo aamuwiriyanneiye Aparahamu, Rakeli, Mose, Yosuwa, Manowa, Eliya, ni Esekiya, apwanne nkinaphwanela weererya opaka emohamoha? Apwanne kanwerya waavaha annaka oothene ncicimiho noopwaha moorweela wa waawiriyana nave ochariha sooleeliherya saya wakhala wooweryeya? Mano, mmulokoni mwaka naari mu emusi aka ookhalamo yoowo kaahaalaaka ompwacha chiryene? Tiheeni kinaphwanelaaka opaka vooloca sa yeela?’—Maphatxuwelo 30:6; Amuthoriha 13:9; 1 Mamwene 17:22; 2 Matharihelo 30:20.

16. Tavite aakhulenle hai Vaavaa Semeyi aamukhalinheiye moonanara?

¹⁶ Wiiyeviha tho onnanikhaviherya wooniherya wiihiiha elukuluku akina ananikhalihaaya moonanara. (Éfeso 4:2) Ninnoona yootakiherya yaphaama wa yeeyo mu 2 Samuwele 16:5-13. (Mwaalakhanye.) Semeyi, mmusi a Mwene Sawuli, aahimuruwana nave aahimukhaliha moonanara Tavite ni alapeli awe. Tavite anwerya ommaaliha Semeyi, nyenya ohiya yeeyo Tavite aahivilela moopisa murima oruwana wawe. Tavite aawenrye hai okhalano wiihiiha ntoko yoola? Nnanwerya osuwela yeela orweela wa omuthokororya Salumu aneeraru.

17. Tiheeni yaamukhavihenrye Tavite okhalano wiihiiha, nave nni nimutakiherye hai?

¹⁷ Tavite aamurempe Salumu aneeraru elukuluku mwanawe Apisalomu eereryeiye omwiipha. Ela yaari elukuluku yeeyo Semeyi aamukhalinheiye moonanara Tavite, nyenya Tavite aahiphwanya ikuru wi atitelele okhala oomaaleleya. Mwawiihai? Mu Salumu 3:4, NN, ninnaalakhanya masu a Tavite: “Kinnakhuwelela wa Yehova ni masu aka, Nave anakakhula m’mwakoni mwawe mwawéla.” Vaavaa nnakhalihiwaahu moonanara, nnaphwanela ovekela hiiha ntoko Tevite enreiye. Voocharela Yehova onahaala onivaha munepa awe waweela yoowo oni onikhaviherye okhala oovilela. Apwanne mwanwerya waaceererya wiihiiha naari olevelela elukuluku muchu onookhaliheiyeeni moonanara? Apwanne nyuwaano munnaroromela wi Yehova onnakhapelela ohooseya wanyu nave wi onahaala wookhaviheryaani ni wooreelihaani?

18. Nni niphure hai moorweela mwa opharihela ohooleela wa Yehova?

¹⁸ Vaavaa nnapakaahu yeeyo nnasuwelaahu wi ti yawookololowa, nnamukhala achu amiruku nave Yehova onahaala onireeliha. Mu Masiposipo 4:7, Piipiliya oni: “Miruku, etxhu etokwene.” Naamwi miruku ithipeleyaka mu nsuweliho, iho sinnavolowela sincipale opwaha wiiwexexa iparipari. Miruku sinnavolowela soolakelela nnapakaahu. Ophiyerya ineneele sinnooniherya miruku orweela wa othukumanya yoolya ntakhara elukuluku ya murupi. (Masiposipo 30:24, 25) Kristu, yoowo oniichaniwa “miruku sa Muluku,” ilukuluku soothene onnapaka yeeyo enamuhakalaliha Tiithi awe. (1 Korinto 1:24; Yohani 8:29) Muluku onahaala onireeliha vaavaa nnooniheryaahu miruku moorweela wa othanla opaka yeeyo nnasuwelaahu wi ti yawookololowa ni otitelela okhala awiiyeviha. (Mwaalakhanye Mateu 7:21-23.) Mwawiihiiha mutitelele wiilipiserya wi mweerihe muloko okhala mpuro yoowo oothene eneeraaya emurumeelemo Yehova mwawiiyeviha. Ennachuneya elukuluku ni opisa murima wi nipharihele yeeyo nnasuwelaahu wi ti yawookololowa. Nyenya weerano yeela enooniherya wiiyeviha, nave wiiyeviha iwo onamuneeriha okhala oohakalala hiihaano navetho okhala wookhala.