1. Ntakhara heeni Anamoona a Yehova aryaaya achu oohakalala? (Moone eruku yoopacerya.)

ANAMOONA A YEHOVA achu oohakalala. Moohipwacha nipuro aryaayavo vamoha, va muthukumano wa muloko, wa ekulucu, naari echekulaka, awo annaloca nave annatheya mukina ni mukhwaawe. Ntakhara heeni aryaaya oohakalala? Nthowa nawi aamusuwela Yehova, “Muluku oohakalala.” Awo annamurumeela nave anneererya omutakiherya. (1 Timóteo 1:11, Tradução do Novo Mundo; Salumu 16:11) Yehova Ehime ya ohakalala, mwawiihiiha owo onachuna wi nikhale oohakalala, nave onnanivaha mathowa mancipale wi nikhale oohakalala.—Malamulo 12:7; Eklesiyaste 3:12, 13.

2, 3. (1) Enataphulela eheeni okhala oohakalala? (2) Ntakhara heeni enamukhala yoovila okhala oohakalala?

² Hanka vooloca sa nyuwaano? Apwanne muri ohakalala? Okhala ohakalala enataphulela wiisoona phaama, okhala oosiveliwa ni ekumi anyu naari okhala oohakalalaxa. Piipiliya onnooniherya wi yaale anareelihiwa ni Yehova ananwerya okhalano ohakalala weeparipari. Nyenya ntakhara heeni, onamukhala woovila okhala oohakalala mu elapo yeela?

 ³ Onamukhala woovila okhala oohakalala vaavaa nnahoolelaahu mikhalelo sawiiceliha muru, hiiha ntoko vaavaa onakhweiye osiveliwa, naari oniikariweiye mmulokoni, elukuluku oothela ahu onanihiyeiye naari vaavaa nnayeleelaahu muteko ahu. Navetho onamukhala woovila okhala oohakalala elukuluku ohinakhalaayavo murecele owaani nthowa na owanawana woonyesererya, vaavaa asinthamwene ahu oomutekoni naari oosikola ananlocaaya moonanara, naari elukuluku nniikariwaahu naari owaleliwa mukariposo nthowa na omulapela Yehova. Naari akhweya ekumi ahu enamuhooseya, nnamukhalano ereca yoovirelela, naari nnamuhooseya ni ereca ya mmuupuweloni. Nyenya muupuwele wi Yesu Kristu,yoowo ori “[oohakalala], orino ikuru sothene” naari Mulamuleli, onnasiveliwa waalipiha achu ni oweeriha okhala oohakalala. (1 Timóteo 6: 15; Mateu 11:28-30) Va Mwaha wa Vamwaakoni, Yesu aahithariha mikhalelo seiho sinahaala onikhaviherya okhala oohakalala, elukuluku nnakhalaahuno makacamiho mancipale nthowa na okhala mu elapo yeela ya Satana.

4, 5. Tiheeni nnaphwanelaahu opaka wi nikhale oohakalala nave ntitelele okhala oohakalala?

⁴ Echu yoopacerya Yesu aalonceiye ti yoochuneya vancipale. Owo aahiloca: “Oohakalala taale anasuwela soothowa saya soomunepani, ntakhara ori wawaya Omwene wa wirimu.” (Mateu 5:3, TNM) Waakhanle wi ninnasuwela soothowa sahu soomunepani, ninnasuwela wi ninnachuna omusuwela Muluku nave wi ninnachuna nikhaviheryo ni ohoolela wawe. Nnooniherya hayi yeeyo? Moorweela wa omuhuserya Piipiliya, omwiiwelela Muluku nave weeriha malapelo awe okhala echu yoochuneyaxa mu okumi ahu. Weerano ichu seiha enahaala onikhaviherya okhala ohakalala. Nroromelo nahu wi soororomeliha sa Muluku sinamukhwaanela nnahaala okhala noolipa. Nave “owehererya wohakalaliha” nnaphwanyaahu Mpiipiliyani onamunilipiha.—Tito 2: 13.

⁵ Wakhala wi ninnachuna okhala ohakalala, moohiphwacha yeeyo eneereya mookumini mwahu, nnaphwanela otitelela olipiha onthamwenaahu ni Yehova. Murummwa Paulo oorepa: “Muhakalaleke mahiku othene mwa Apwiya. Kinnolèlani wiliwili: muhakalaleke!” (Filipi 4:4) Wi nikhaleno onthamwene woolipa ni Yehova, nnaphwanela okhalano miruku sawirimu. Masu a Muluku ani: “Òreriwa [naari oohakalala] ti mutxhu ophwannye miruku, òrèriwa t’ule ori òsuwela. Miruku iri ntoko mwiri: sawima saya sinnàvaha ekumi yale analya seiho.”—Masiposipo 3: 13, 18.

6. Echu taani ekina nnaphwanelaahu opaka wi ntitelele okhala ohakalala?

⁶ Wi ntitelele okhala oohakalala, ti woochuneyaxa otitelela opharihela yeeyo nihusenryaahu Mpiipiliyani. Yesu aahiceenyerya okhweleya waya yeela vaavaa aalonceiye: “Mwasuwelà yela ni munatxhariha, munamukhala òrèriwa [naari oohakalala].” (Yohani 13:17; mwaalakhanye Tiyako 1: 25.) Ela ti yoochuneya wakhala wi ninnachuna  othokororya soothowa sahu soomunepani nave nikhale oohakalala. Nyenya nni niwerye hai okhala oohakalala elukuluku inakhalaayavo ichu sincipale seiyo sinawerya okukuca ohakalala waahu? Hankooni noone yeeyo Yesu aalonceiye voocharela va Mwaha wa Vamwaakoni.

7. Anakhala hai oohakalala yaale anathanana?

⁷ “Oohakalala taale anathanana, ntakhara enarwa ehakararyiwa.” (Mateu 5:4, TNM) Akhweya nnamwiikoha: ‘Onaweryeya hai yaale anathanana okhala oohakalala?’ Tahi wi Yesu aaloca oothene anathanana. Achu ancipale ootakhala annathanana, naari okhala oosooseya, nthowa nawi annahoolela makacamiho mu “mahiku òmaliherya” yaala anakhala ‘okatxamiha.’ (2 Timóteo 3:1) Nyenya awo anuupuwela pahiru wa asinenaaya nave omuhiya Yehova, mwawiihiiha hanawerya winnuwiha onthamwene ni yene, nave hanawerya okhala oohakalala. Yesu aalonce yaale anasuwela soothowa saya soomunepani. Awo annathanana nthowa nawi annoona wi achu ancipale annamukhooca Muluku naari hanakhala mmukhalelo Muluku onachuneiye. Awotho annasuwela wi toocheka nave annoona ichu soonanara sineereya mu elapo yeela. Yehova onnawoona oothene yaale anathanana mweeparipari, onnaahakararya moorweela mwa Masu awe nave onnaavaha ohakalala ni ekumi.—Mwaalakhanye Ezekiyeli 5:11; 9:4.

8. Okhala awiichacala yookhavihenryeeni hai okhala oohakalala?

⁸ “Oohakalala taale awiichacala, woona wi enarwa yaakhela elapo ya vathiva.” (Mateu 5:5, TNM) Ti mwawihai okhala awiichacala enookhaviheryayaani okhala oohakalala? Achu ancipale ta nlala ni oohoosa, yeeyo enahoolela makacamiho mancipale. Nyenya vaavaa anahuseryaaya eparipari, awo annatorokeya nave enwara “mutxhu a hihano.” Vano awo annooniherya “murima wa ikharari, waphama, wawiyeviha, womala ni wovilela.” (Kolosi 3:9-12) Ntoko yookhumelela, awo aakhalano murecele, aakhalano onthamwene waphaama ni akina nave toohakalala. Navetho, Masu a Muluku annalaiherya wi awo “enarwa yaakhela elapo ya vathiva.”—Salumu 37:8-10, 29.

9. (1) Tiheeni Yesu achuneiye oloca vaavaa aalonceiye wi awiichacala “enarwa yaakhela elapo ya vathiva”? (2) Ntakhara heni “oovoliwa etala ni nthanana ntakhara ekhaikhai” anamukhala oohakalala?

⁹ Tiheeni Yesu aachuneiye oloca vaavaa aalonceiye wi awiichacala “enarwa yaakhela elapo ya vathiva?” Oothanliwa enarwa yaakhela elapo yavathi vaavaa eneeraaya elamulele elapo yoothene ntoko mamwene ni alipa a mukucho. (Wupulula 20:6) Amilyawu a achu ahirino ewehereryo ya oya wirimu anahaala waakhela elapo yavathi vaavaa eneeraaya yeemereryiwa okhala vaava okhala wookhala. Anahaala okhala oophaameya nave anamukhalano murecele ni ohakalala. Oothanliwa ni ipucepuche ikina amohamoha yaawo Yesu aalonceiye ariki: “Oohakalala taale oovoliwa etala ni nthanana ntakhara ekhaikhai, woona wi enarwa evona.” (Mateu 5:6, TNM) Nchuno naya vooloca sa ekhaikhai nnahaala okhwaanela vaavaa Yehova onahaaleiye oviihavo otakhala woothene. (2 Pedro 3:13) Mu elapo yahiihaano, awookololowa anahaala okhala oohakalala nave herwa ethananatho nthowa na ichu soonanara seiho achu oonanara anapakaaya.—Salumu 37:17.

10. Enataphulela eheeni okhala aikharari?

 ¹⁰ “Oohakalala taale anamoriwa ikharari, woona wi enarwa emoreliwa ikharari.” (Mateu 5:7, TNM) Okhala oomoriwa ikharari onataphulela okhala oonthamwene, ooreera murima ni aikharari, eyo tiwi, okhalano niphwanya wa yaawo onahooseya. Nave, ikharari sinnapwaha moonelo vyakala wa ooreera murima. Piipiliya onahusiha wi okhala aikharari onavolowela opaka echu wi muchu aakhaviherye akina.

11. Niphwanaphwaniho vooloca sa Musamariya oonihenrye omwaacamani nnanihusiha eheeni?

¹¹ Mwaalakhanye Luka 10:30-37. Niphwanaphwaniho na Yesu vooloca sa Musamariya yoowo oonihenrye omwaacamani ninnavaha yootaphulela yaphaama ya okhala aikharari. Musamariya aahikhalano niphwanya ni oreera murima ntakhara mulopwana aahooseya, nave iha saahimweeriha omukhaviherya. Yesu amanle oloca niphwanaphwaniho nenla aahiloca: “Hawé, were hiha weyotho!” Mwawiihiiha, nnaphwanela wiikoha: ‘Apwanne kinneerano emohamoha? Apwanne kinneerano yeeyo Musamariya aapankeiye? Vaava akina anahooseyaaya, apwanne kinanwerya opaka echu wi kaakhaviherye? Ntoko yootakiherya, apwanne kinanwerya waakhaviherya awuuluvala mmulokoni, anaamukhwele naari anamwane yaawo asitiithi aya ahinamurumeela Yehova? Apwanne kinanwerya ‘oloca moohakararya wa awuukhuwa mmuupuweloni’ wi kaahakararye?”—1 Tesalónika 5:14; Tiyako 1:27.

12. Ntakhara heeni ninnahakalala vaavaa nnakhalaahu ikharari?

¹² Ntakhara heni ninnakhala ohakalala vaavaa nnamoriwaahu ikharari? Vaavaa nnakhalaahu aikharari wa oothene, ninnavaha, nave Yesu ooloca wi ovaha onnanruuhela ohakalala. Nthowa nikina tiwi noosuwela wi ninnamuhakalaliha Yehova. (Saweriwa T’arummwa 20:35; mwaalakhanye Ahebri 13:16.) Mwene Tavite ooloca wa yoole onooniherya ikharari: “Apwiya anammulipelela yowo, anammukhaliha [oohakalala] vathiva.” (Salumu 41: 1, 2) Wakhala wi ninnooniherya ikharari ni oreera murima ntakhara akina, nnahaala waakhela ikharari sa Yehova nave nnamukhala oohakalala okhala wookhala.—Tiyako 2:13.

13, 14. Ntakhara heeni eryaaya yookhweleya okhala “aweela murima”?

¹³ Yesu ooloca: “Oohakalala taale aweela  murima, woona wi enarwa emoona Muluku.” (Mateu 5:8) Wi nikhale aweela murima, nnaphwanela okhapelela muupuwelo ahu ni soochuna sahu wi ikhale saweela. Eyo ti yoochuneya wakhala wi ninnachuna wi Yehova eemererye malapelo ahu.—Mwaalakhanye 2 Korinto 4:2; 1 Timóteo 1:5.

¹⁴ Yaale ari aweela murima ananwerya okhalano onthamwene waphaama ni Yehova, yoowo olonce: “[Oohakalala] ti yale anavasa ikuwo saya.” (Wupulula 22:14) Enataphulela eheeni wi awo “anavasa ikuwo saya”? Wa Akristu oothanliwa, eyo enataphulela wi Yehova onawoona ntoko aweela, owo onahaala waavaha ekumi yoohikhwa wirimu nave anamukhala oohakalala okhala wookhala. Wa muloko mutokotoko yaawo anaweherya okhala veelaponi, eyo enataphulela wi Yehova onnaweemererya okhala asinthamwene awe, nthowa nawi owo onawoona ntoko awookololowa. Piipiliya onaloca wi: “Àvasa ni àhèliha sowara saya munikhamini na Eputxeputxhe.”—Wupulula 7: 9, 13, 14.

15, 16. Ti mwawihai aweela murima eneeraaya ‘emoone Muluku’?

¹⁵ Yehova aahiloca: “Muchu harwa oona ethoi aka nave akhala.” (Mukwaha 33:20, TNM) Vano, ti mwawiihai, aweela murima, eneeraaya ‘emoone Muluku’? Masu a Ekiriki ataphuleliwe ‘woona’ ananwerya otaphulela waanyiherya, wiiwexexa, naari osuwela. Mwawiihiiha ‘omoona Muluku’ enataphulela wiiwexexa omuchu awe ni osivela mikhalelo sawe. (Éfeso 1: 18) Yesu aahitakiherya mwawaakhwanela mikhalelo sa Muluku, mwa yeeyo anwerya oloca: “Mutxhu onakòna miyo, owona Atithi.”—Yohani 14: 7-9.

¹⁶ Mwawaaceererya, ninnawerya ‘omoona Muluku’ vaavaa nnoonaahu mukhalelo onikhavihenryeiye mu okumi ahu. (Yobi 42:5) Nnanwerya ‘omoona Muluku’ moorweela wa othokororya ichu sootikhiniha Yehova olaihenryeiye opaka wa yaale anatitelela okhala aweela nave anamurumeela yoowo moororomeleya. Nave oothanliwa anahaala omoona Yehova mwawaakhwanela vaavaa eneeraaya eviihiwe mookhwani nave eye wirimu.—1 Yohani 3:2.

17. Ntakhara heeni achu a murecele toohakalala?

¹⁷ Voocharela, Yesu aahiloca: “Oohakalala taale anapaka murecele.” (Mateu 5:9) Vaavaa nnapaceraahu opaka murecele ni akina, nnamukhala ohakalala. Oohuserya Tiyako aahirepa: “Yawima ya wokolola enamisiwa mmuretxeleni wa yale analapela muretxele.” (Tiyako 3:18) Mwawiihiiha waakhanle wi hamuniiwanana ni muchu mukina mmulokoni naari veemusini vanyu, mumveke Yehova wi ookhaviheryeeni opaka murecele. Voocharela, Yehova onahaala woovahaani munepa awe waweela, yoowo oni wookhaviheryeeni wooniherya mikhalelo Seekristu, nave munamukhala oohakalala. Yesu aahiceenyerya ochuneya waya opacera opaka murecele vaavaa aalonceiye: “Wavelèlaka vanipuroni na mukutxho yovaha-à, nto wupuwelà wi munna-à ohotxhekela, hiyà vava yovaha-à, okòkele  otxuli, wapatxerye watàna ni munna-à, nave hawè wavelèle yovaha-à.”—Mateu 5:23, 24.

18, 19. Ntakhara heeni Akristu annahakalala naamwi yiikariwaka?

¹⁸ “Oohakalala ti nyuwo mwaruwaniwa, mwiikariwa ni mootheriwa soonanara soothene wa nthowa naka.” Tiheeni Yesu aachuneiye oloca? Owo aahaaceererya: “Hakalalani ni chapani, woona wi nchuwelo nanyu nnamukhala ntokotoko wirimu, ntakhara yaapacenrye owiikara alipa a miririmo muhaakumve.” (Mateu 5:11, 12, TNM) Elukuluku arummwa yaamaniwaaya nave elamuleliwa wi ehilaleeryeke, “awo yàkhumamo mu Sinédriyo ehakalanle.” Mweeparipari, tahi wi awo yaahakalanle nthowa nawi yaahimaniwa. Nyenya awo yaari oohakalala “ntakhara yàphwanelihiwa ti Muluku ohawela nsina na Yesu.”—Saweriwa T’arummwa 5:41.

¹⁹ Olelo achu a Yehova annavilelatho nuuhakalala vaavaa aniikariwaaya wa nthowa na nsina na Yesu. (Mwaalakhanye Tiyako 1:2-4.) Moolikana ni arummwa, hannahakalala naahoosiwaka naari wiikariwa. Nyenya wakhala wi nootitelela okhala oororomeleya wa Yehova, owo onahaala onivaha olipa murima nnachunaahu wi nivilele. Muthokororye yeeyo yeeren’ye ni Henryk Dornik ni munnawe. Mu Akostu a 1944, awo yaahirumihiwa o nipuro na alipa oophariwa. Achu yaawo yaawiikara yaahiloca: “Ti yoohiweryeya waalekecha opaka echu vyakala. Ohoosiwa waya onnaaruuhela ohakalala.” Henryk aahithariha: “Naamwi kahaalakelenle okhala mulipa oohoosiwa, ohooseya moolipa murima nave mwa ncicimiho ntakhara ororomeleya waka wa Yehova waahikiruuhela ohakalala.” Owo aahaaceererya: “Mavekelo oopachaanyerya yaahikaacameliha wa Yehova, nave owo aahooniherya okhala Mukhaviheryi eeparipari.”

20. Ntakhara heeni nryaahu oohakalala omurumeela “Muluku oohakalala”?

²⁰ Vaavaa Yehova, “Muluku oohakalala” onasiveliweiye ni hiyo, nnamukhala oohakalala naamwi niikariwaka, wakhala wi amusi ahu annanaakaaha, wakhala wi nnamwiiceliwa, naari wakhala wi nohuuluvala. (1 Timóteo 1:11, TNM) Nnamukhalatho oohakalala nthowa nawi Muluku ahu “ohinotha,” onnanroromeliha ichu sincipale saphaama. (Tito 1:2) Elukuluku Yehova oneereiye akhwaaniherya soororomeliha sawe, hanirwa nuupuwela makacamiho yaawo nryaahuno olelo. Mweeparipari, hannawerya waanyiherya mukhalelo ekumi yaphaama eneeraaya ekhale mu Parataiso nave ohakalala nneeraahu nikhaleno! Chiryene, ‘nnampuha saphaama soothene mmureceleni wawaaca.’—Salumu 37:11, TNM.