VAAVAA munachunaanyu osuwela ewora, tiheeni munapakaanyu? Nyuwo akhweya munnavarerya erelooxiyu anyu. Akhweya munnoona wi yohaakhwana ewora emoha ya othana ni aminutu makhumi mararu. Tiheeni mwaahaalaanyu omuleela nthamwene anyu waakhanle wi ohookohaani, “ewora taani?”

Munahaala waakhula mwawiiwanana nnipuro munakhalaanyuwo. Ntoko yootakiherya, nyuwo akhweya munamuloca, “eri 1:30” naari “eri 13:30.” Mmapuro makina munamphiyerya oloca, “aminutu makhumi mararu wi iphiyerye iwora piili,” etaphulelaka wi anahala aminutu makhumi mararu ihaakumve ophiyerye iwora piili.

Khalai achu yaaromola hai iwora? Awotho yaahikhalano maromolelo oohiyanahiyana. Soorempwa sa Ehepiri inapharihela masu ntoko “woosiiselo” “othana” “mw’epiphini” ni “osekuwa.” (Maphatxuwelo 8:11; 19:27; 43:16; Malamulo 28:29; 1 Mamwene 18:26) Nyenya ilukuluku ikina Piipiliya onnapharihela masu ooluluwanya.

Wa Aisarayeli akhalai, yaari yawunlaana okhalano mulipeleli, xaxaxa variyari va ohiyu. Aisarayeli yaanakawanya ohiyu mu makupa mararu, yiichanaaya “irilo.” (Salumu 63:6) Mu Amuthoriha 7:19, Ninnaalakhanya vooloca sa elukuluku ya “muthupi wanawili.” Mu elukuluku Yesu aayariweiye, Ayuta yaanakawanya ohiyu mu olipelela ikwaha sese, hiiha ntoko Akriki ni Aroma yeerelaaya.

Mu aliivuru a michaka sinnaromoliwa iwora sa ohiyu ikwaha sincipale. Ntoko yootakiherya, “Oyaka osa,” Yesu aaheeca vasulu va maahi waacamela mwaaceya mwemmo yaarimo amuhuseryaawe. (Mateu 14:25) Nave Yesu aahiloca mu niphwanaphwaniho: “wi mwanene empa ásuwenleke elukuluku tani mulipa-wiya aniriye arwe, yowo akáshisha, nave hakémyerenrye wi vakhuvuliwe va’mpa vawe.”—Mateu 24:43, Nlakano Nahihano.

Yesu aahithariha iwora sa ohiyu soothene sese vaavaa owo aalonceiye wa amuhuseryaawe wi ekhale oolipelela ‘ntakhara hasuwenle elukuluku mwanene a vate onereiye akòke, wariki okhale osekuwa, erilo, mithupi sinlaka, nari wosiselo.’ (Marko 13:35) Wa ewora yoopacerya wa seiya, “osekuwa”, waari waacamela ewora nsuwa naanelaya ophiyerya ewora yaneethanu nasese ya ohiyu. Yanawiili, “erilo”, waari waacamela ewora yaneethanu nasese ophiyerya ohiyu eriyari. Ewora yaneeraru,[ohaakumve osavo] naari “mithupi sinlaka”, waari ohiyu eriyari waacamela ewora yaneeraru ya woosiiselo. Akhweya waari variyari va ewora yeeyo muthupi winlalaaya mu ohiyu Yesu aaphariweiye. (Marko 14:72) Mu ewora yaneesese, “wosiselo” waari waacamela ewora yaneeraru vaava nsuwa nnakhumaaya.

Naamwi achu mu elukuluku yeele yahaarino erelooxiyu ntoko nryaahuno olelo, awo yaahikhalano meerelo a oloca ewora.