1. Mwaha taani wookhweleya Yesu aathokoronryeiye mu ohiyu awe wookuchula ni amuhuseryaawe?

MU OHIYU awe wookuchula ni amuhuserya awe ahaakumve okhwa, Yesu aahiloca osivela waacamela ikwaha makhumi mararu. Aahaaleela amuhuserya awe wi “mukhwelaneke mukina ni mukhwawe.” (Yohani 15:12, 17) Okhwela naari osivela waya waaphwanela okhala wawooneya wi akina yoone nave esuwele wi awo yaari oomuchara eeparipari a Kristu. (Yohani 13:34, 35) Osivela yoowo Yesu aalonceiye hiwaari moonelo vyakala; owo mukhalelo wakuru ni wawiikhooca. Yesu aahiloca: “Havo mutxhu orino okhwela otokotoko ompwaha yowo onavaha ekumi awe wa nthowa na asinthamwene awe. Nyuwo muni mukhale asinthamwene aka, mwerà yeyo kinorumakani.”—Yohani 15:13, 14.

2. (1) Akapuro a Muluku asuweliwe ntakhara eheeni? (2) Makoho taani nnahaalaahu waakhula mmwaha yoola?

² Akapuro a Yehova olelo aasuweliwa ntakhara osivela waya weeparipari wawiikhooca, ni wiiwanana waya woolipa. (1 Yohani 3:10, 11) Osivela owo honapwacha elapo naari nihimo  nnarweelaahuwo, elocelo nnalocaahu, nipuro nrwenlaahuwo, naari mukhalelo niphiwaahuwo. Akapuro a Yehova orukurerya elapo chiryene annasivelana mukina ni mukhwaawe. Ntakhara heeni osivela oryaaya wookhweleya olelo? Yehova ni Yesu ananteka hai ni osivela? Nave nni nooniherye hai osivela yoola wi naahakararye ni waalipiha akina?—1 Korinto 8:1.

3. “Ilukuluku sokatxamiha” inaavolowela hai achu?

³ Hiyaano nnakhala mu “ilukuluku sokatxamiha,” nave okumi woosareya ni “ohawa ni wukhuwa.” (2 Timóteo 3:1-5; Salumu 90:10) Achu ancipale annahooseya vancipale ophiyerya wuupuwela omaliha ekumi. Achu opwaha amilyawu athanu nararu muchu mmoha mu asekuntu makhumi masese onniisiipha muyakha ti muyakha. Echu yoothananiha ti yawi ophiyerya annihu ahooniherya moonelo yoola nave emaliha ekumi aya.

4. Achu taani analociwa Mpiipiliyani mu elukuluku yaachuna okhwa?

⁴ Khalai, akapuro a Muluku oororomeleya yaahiisoona moonanara nthowa na makacamiho aya ophiyerya ochuna okhwa. Ntoko yootakiherya, Yupu aari mmukhalelo yoowo nave aahiloca: “Kinnathanya ekumi; nkinatxhuna okhala.” (Yobi 7:16; 14:13) Yona aahuukhuwa ophiyerya oloca: “Yakhala hiha, Pwiya, ti yaphama wi miyano kikhwe. Wa miyano ti yaphama akhwa ohiya okhala ni ekumi.” (Yona 4:3) Mulipa a miririmu Eliya ahiyeleela ewehereryo ophiyerya oloca: “Pwiya, wokimalelavo! Kusa ekumi aka.” (1 Mamwene 19:4) Nyenya Yehova aanaasivela akapuro yaala oororomeleya nave aanachuna wi awo ekhale. Owo haathorinhe nthowa na moonelo yaaryaayano. Ohiya yeeyo, aahaakhaviherya okookela nchuno naya na okhala wi ewerye otitelela omurumeela moororomeleya.

5. Ntakhara heeni anna ni arokora ahu annachuna chiryene osivela wahu hiihaano?

⁵ Olelo, anna ni arokora ancipale annahoolela mikhalelo soothananiha nave annachuna osivela wahu. Akina annavilela ni otheiwa naari okhinyereryiwa. Akina annavilela ni onyemuliwa naari waapiwa va nipuro naya na muteko. Akina aceechen’ye nthowa na olapa iwora sincipale naari arino muteko yoowo onaaceecheiha. Nlelo akina aakhalano makacamiho matokweene veemusini. Akhweya athelanne ni muchu yoowo ohinamurumeela Yehova nave wiiliwiili onaakacakaca. Nthowa na makacamiho yaala ni sookhinyererya ikina, ancipale annuupuwela wi haanono ikuru nave annaphiyerya okhwa minikwa esisapo aya. Taani oni aakhaviherye?

6. Ti mwawiihai osivela wa Yehova onaalipihaaya alapeli awe?

⁶ Yehova onnaaroromeliha akapuro awe wi onnaasivela hiihaano nave onahaala waasivela okhala wookhala. Nkaanyiheryani mukhalelo Aisarayeli yonnaaya vaavaa Yehova aaleenleiye ariki: “Vano muryanyu òphwanelela miyano kinnotxitximihani ni kinnokhwelani,” nave “Muhòve, miyano kiri ni nyuwano!” (Isaiya 43:4, 5) Noosuwela wi muchu ti muchu a hiyo tookhweleya wa  Yehova. * (Moone masu avathi.) Piipiliya onnaroromeliha: “T’awupa ni t’ovulusa! Awo anamutxhapa wa nthowa na weyano.”—Sofoniya 3:16, 17.

7. Osivela wa Yehova onalikana hai ni mai onamwaamwiha mwanawe? (Moone eruku yoopacerya.)

⁷ Yehova onnaroromeliha waalipiha ni waahakararya achu awe moohipwacha makacamiho aryaayano. Owo ooloca: “Ntoko mai onamwàmwiha mwanawe onamukuseiye mmatani ni anamuthatiha vametxoni. Ntoko mai onammàliheiye mwanawe, miyano kinamomàlihani.” (Isaiya 66:12, 13) Nkaanyiheryani mukhalelo mwaana onooneiye okhala ookhapeleleya vaavaa mannya onampwacheiye naari othatano! Yehova onnoosivelaani mwawiiseela nave onakhwela wi mukhale ookhapeleleya. Muhirwe mukhwe minikwa wi nyuwo muri ookhweleyaxa wa Yehova.—Yeremiya 31:3.

8, 9. Osivela wa Yesu oni onilipihe hai?

⁸ Nookhalavo nthowa nikina nnasuwelaahu wi Yehova onnanisivela: “Muluku òtepa wakhwela atxhu a mwelaponi, ophiyerya onvaha Mwana awe mmoharu, wi mutxhu onamwemererya yowo, ahirimele, nto akhaleno ekumi yohimala.” (Yohani 3:16) Mukucho wa Yesu onnooniherya wi owo onnanisivela, nave osivela wawe onnanilipiha. Piipiliya olonce wi “ohosa, othanana” hisiwerya “onimwalanyiha ni okhwela wa Kristu.”—Aroma 8:35, 38, 39.

⁹ Mu ilukuluku, ikina ninnakhalano makacamiho yaawo ananceecheiha omwiilini naari mmuupuweloni naari yaawo ananaakha ohakalala wahu mu omurumeela Yehova. Nyenya wuupuwelela ophiyerya  mweeryo taani Kristu onisivenleiye enanwerya onilipiha wi nivilele. (Mwaalakhanye 2 Korinto 5:14, 15.) Osivela wa Yesu onnanivaha nchuno na okhalano ekumi ni otitelela omurumeela Yehova. Osivela owo onanwerya onimaaliha okhala oophweeleya, naamwi nihooseyaka ni ipahu, wiikariwa, wuukhuwa naari wiiniwa murima.

10, 11. Taani orinono murici wa waalipiha anna ooceecheya? Mutharihe.

¹⁰ Yehova onnapharihela tho muloko wi onteke ni osivela. Elukuluku nnaasivelaahu anna ni arokora ahu, ninnooniherya osivela wahu ntakhara Yehova. Ninnapaka echu eri yoothene nnaweryaahu wi naakhaviherye annihu osuwela wi awo tookhweleya nave wi Yehova onnaasivela. (1 Yohani 4:19-21) Murummwa Paulo oorepa: “Muhakalalihaneke ni mukhaviheryaneke ntoko mwenraanyu ophiyerya olelo.” (1 Tesalónika 5:11) Tahi atokweeneru eni epake yeela. Muchu ti muchu a hiyo onanwerya omutakiherya Yesu moorweela mwa ovaha nihakararyo wa anna ni arokora ahu.—Mwaalakhanye Aroma 15:1, 2.

¹¹ Akina mmulokoni anahooseya ni othanana naari mmuupuweloni, anamuchuna nikhaviheryo na totore naari murece. (Luka 5:31) Atokweene ni akina mmulokoni annasuwela wi naamwi ehiri matotore yaawo avyakihiwe, nikhaviheryo ni nihakararyo eneeraaya evahe ti nookhweleya vancipale. Oothene mmulokoni nnanwerya ‘walipihaka awova, wakhapelelaka òtxetxeya nave okhala òvilela n’atxu othene.’ (1 Tesalónika 5:14) Nnachuna weererya wiiwexexa mukhalelo annihu anoonaaya. Nnaphwanela okhala oopisa murima ni yaawo nave nloce mmukhalelo yoowo onahaala  waahakararya elukuluku awo anakhalaaya ooceecheya. Apwanne munneererya waalipiha akina? Tiheeni munaphwanelaanyu opaka wi mukhale oohakararya ni oolipiha?

12. Mvahe yootakiherya ya muchu yoowo aalipihiwe orweela wa osivela wa mmulokoni mwawe.

¹² Murokora o Europa ooloca: “Mu ilukuluku ikina kaahikhalano muupuwelo wa wiisiipha, nave kookhalano nikhaviheryo naphaama. Muloko kinapakaaka makupa woovuluxa ekumi aka. Anna ni arokora wiiliwiili annatepa okilipiha ni okisivela. Naamwi eri achu avakhaani anasuwela wi kinnahooseya mmuupuweloni, ilukuluku soothene muloko onakhala ni miyo. Mutheli mmoha ori ntoko asitiithi aka oomunepani. Awo annakikhapelela phaama, annakhala ni miyo nihiku noothene.” Mweeparipari, tahi wi achu oothene anahaala okhaviherya mmukhalelo woolikana. Nyenya oothene hiyo nanwerya opaka sincipale wi naakhaviherye anna ni arokora ahu. * (Moone masu avathi.)

13. Tiheeni nnaphwanelaahu opaka wi naahakararye akina?

¹³ Mukhale namawiriyana aphaama. (Tiyako 1:19) Ninnooniherya oosivela vaavaa nnawiriyanaahu moopwacha. Mpake makoho mmukhalelo onahaala wookhaviheryaani wiiwexexa moonelo wa munninyu. Owo onahaala osuwela wi munnampwacha chiryene, orweela wa mukhalelo wa ethoi anyu. Vaavaa owo onaloceiye, mukhale oopisa murima nave mmuhiye atharihe moonelo awe woothene muhimukwatelenle. Moorweela wa okhala namawiriyana aphaama, munanwerya omwiiwexexa mwawaakhwanela nave munanwerya omukhaviherya wi oororomeleeni. Voocharela onahaala okhala wookhweya wa yene woowiriyanaani elukuluku muneereryaanyu omukhaviherya. Vaavaa munaapwachaanyu akina chiryene, nyuwo munahaala okhala nihakararyo ntokweene wa yaawo.

14. Ntakhara heeni hannaphwanela okhala ookacakaca?

¹⁴ Muhaakacakace akina. Muchu awiiniwa murima onahaala otepa, pahiru wakhala wi onnuupuwela wi ninnamukacakaca. Voocharela onamukhala woovila wa hiyo omukhaviherya. “Masu a mulavilavi t’ophoreiha ntoko nsipàtxa nto malotxelo a anamiruku, t’openusa.” (Masiposipo 12:18) Naamwi nihiyaaka omphoreiha moolakelela ni masu muchu awuukhuwa mmuupuweloni, nlelo nnanwerya waaceererya wiicela vaavaa nnalocaahu nihuupuwelenle. Wi nimulipihe munnihu, nnaphwanela omweeriha wi alekecheye wi hiyo chiryene ninneererya wiiwexexa mukhalelo awe.—Mateu 7:12.

15. Ikaruma taani soophara muteko nneeraahu nipharihele wi naahakalalihe akina?

¹⁵ Mpharihele masu a Muluku wi mwaahakalalihe akina. (Mwaalakhanye Aroma 15:4, 5.) Piipiliya orwenle wa “Muluku òvilela ni òhakalaliha,” mwawiihiiha ela henantikhiniha wi hiyo ninnaphwanya nihakararyo nawaaca mmasu awe. Nookhalanotho Índice das Publicações da Torre de Vigia ni Guia de Pesquisa para Testemunhas de Jeová. Opharihela Ikaruma seiya nnamphwanya soorempwa ni soolaleeryiwa seiyo nneeraahu nipharihele wi naahakararye nave naalipihe anna ni arokora ahu.

16. Mikhalelo taani sini sinikhaviherye omulipiha muchu yoowo ori awuukhuwa mmuupuweloni?

 ¹⁶ Mukhale aikharari ni eepewe. Yehova ti “Tithi a ikharari ni Muluku a nihakalaliho nothene,” nave owo ta “murima wa ikharari” ntakhara amulapeli awe. (Mwaalakhanye 2 Korinto 1:3-6; Luka 1:78; Aroma 15:13) Paulo oovaha yootakiherya yaphaama mwa yeela nthowa nawi aahimutakiherya Yehova. Owo aahirepa: “Nàhiyeviha veri vanyu ntoko mai onakhapeleleiye anawe. Hiyotho, wa nthowa na wokhwelani wahu, nanakhwela wovahani tahi Mutxhakaru wa Muluku, nto ekumi ahutho, wona wi nantepa wokhwelani.” (1 Tesalónika 2:7, 8) Elukuluku nnakhalaahu aikharari ntoko Yehova, nnanwerya waavahererya annihu nihakararyo nenlo awo anavekelaaya!

17. Moonelo taani woophimelela ntakhara annihu onahaala onikhaviherya waalipiha?

¹⁷ Muhiweherye wi anninyu ekhale oophaameya. Mukhale oophimelela. Wakhala wi munaweherya wi anninyu ekhale oophaameya, nyuwo munahaala oceecheya. (Eklesiyaste 7:21, 22) Muupuwele wi Yehova, ori oophimelela mwa yeeyo onaweheryeiye wa hiyo. Mwawiihiiha nnaphwanela okhala oopisa murima mukina ni mukhwaawe. (Éfeso 4:2, 32) Nihirwe niweerihe annihu wuupuwela wi awo hanapaka sawaakhwanela naari waalikanyiha ni akina. Ohiya yeeyo, naalipihe yaawo nave nloce ichu saphaama anapakaaya. Eyo enamwaakhaviherya okhala oohakalala vaavaa anamurumeelaaya Yehova.—Galasya 6:4.

18. Ntakhara heeni ninnachuna waateka akina ni osivela?

¹⁸ Mulapeli a Yehova ori oothene tookhweleya wa yoowo navetho wa Yesu. (Galasya 2:20) Ninnaasivela anna ni arokora ahu mwawiiseela, mwawiihiiha nnaphwanela waakhalihaka yaawo mwa ikharari. Mwa yeeyo “nasyeke seihe inavaha muretxele ni inakhaviherya wunnuwihana wahu.” (Aroma 14:19) Ninnawehererya moohakalala ekumi ya muhoolo mparataiso, elukuluku muchu oneereiye ahikhaleno nthowa na okhala ooceecheya! Horwa okhalavo wiiceliwa naari ekhoco. Achu heki enakhwa wa nthowa na orava yoocheka, nave horwa okhalavo wiikariwa, makacamiho a veemusini, naari sawuukhula muukumini. Omakuchuwelo wa iyaakha ncikhwi, achu oothene anahaala okhala oophaameya. Yaale eni etitelele okhala oororomeleya mu yaweeha yookuchula anahaala waakheliwa ni Yehova ntoko anaawe veelaponi nave anamukhalano “onethi mwa ovuwa wa ana a Muluku.” (Aroma 8:21) Mwawiihiiha oothene ahu nnaphwanela wooniherya osivela yoowo onateka nave nikhaviheryane mukina ni mukhwaawe wi nivuluwe nave nivolowe mu elapo evyaani yooreera ya Muluku.