Eversikulu yeela yoochuneya eni: “Woona wi alipa oolamula annaapuherya achu vapoomani, ewuukhulaka oohaawa, ehookololaka miyaha, ohitikhine. Mulipa oolamula yoole ookhalano mutokotoko awe oomwaakiha, nave ala oopiili aakhalano tho mutokotoko aya.”—Ekle. 5:7.

Wakhala wi hinthokoronrye yeeyo Yehova onuupuweleiye vooloca sa yeela, eversikulu ela enakhala ntoko wi enawaaha alamuleli oomuchu. Nyenya wakhala wi nohuupuwelela mwawiiseela, eversikulu ela ennooniherya wi ennanvolowela Yehova yoowo onaphwanela onihakararya, ni onilipiha.

Eklesiyaste 5:7 onamuloca mulamuleli yoowo onaapuherya achu oohaawa ni ohookolola miyaha saya. Mulamuleli onaphwanela wuupulela wi akhweya onavareryiwa ni mulamuleli mukina yoowo orino owerya ompwaha yene. Mweeparipari, aakhalavo akina yaawo arino olamulelo woopwaha. Moothananiha, alamuleli oothene oomuchu, ta makhwankwa, nave achu annahooxeya nthowa na wi alamuleli tahi eekhaikhai.

Mwawiihiiha, naamwi ekhala wi hinaanono ewehereryo, ninnahakararyeya osuwela wi Yehova onnaavareryela alamuleli oomuchu. Nnanwerya omveka Muluku wi anikhaviherye ni omukuherya sawuukhula sahu soothene. (Sal. 55:22; Fil. 4:6, 7) Ninnasuwela wi “Apwiya annavarerya elapo yoothene wi yaalipihe yaale aniiveleela wa yaawo ni murima aya woothene.”—2 Math. 16:9.

Mwawiihiiha, Eklesiyaste 5:7 onnanuupuserya vooloca sa alamuleli a elapo yeela nave tho wi ookhalavo mulamuleli oopwahaxa. Echu yoochuneya, eversikulu ela ennanuupuserya eparipari yawi Yehova tavasuluxa, chiryene, Mulamuleli Oopwahaxa. Yehova onnalamulela hiihaano, orweela wa mwanawe, Yesu Kristu, Mwene a Omwene awe. Aikuru soothene, yoowo onavarerya ichu soothene, ta waakhwanela ni ekhaikhai vamoha ni Mwanawe.