1. Elukuluku taani onakhalaaya woovila omurumeela Yehova?

APWANNE munnoona okhala woovila,omurumeela Yehova, xaxaxa vaavaa munahoolelaanyu makacamiho naari okumi anyu onakhalaaya mmureceleni? Ti woochuneya omuroromela Yehova, vaavaa nnahoolelaahu makacamiho. Nyenya tiheeni nnaphwanelaahu opaka vaavaa nnakhalaahu mmureceleni? Apwanne ilukuluku ikina munnacuwala ochuneya waya omurumeela Muluku? Yehova aahaalopola Aisarayeli wi eyo yaanwerya weereya.—Malam. 6:10-12.

2. Yootakiherya taani Mwene Asa otikithenryeiye?

² Mwene Asa ootikitherya yootakiherya yaphaama ya okhala muchu amiruku moorweela wa omuroromela Yehova. Owo aahimurumeela Yehova ohiya pahiru mu elukuluku yookacamiha nyenya tho variyari va elukuluku ya murecele. Wuupaceryani, “Asa murima awe woothene waari mwa Apwiya.” (1 Mam. 15:14) Asa aahooniherya wi aanamurumeela Yehova ni murima awe woothene moorweela wa omaliha malapelo atheru o Yuteya. Piipiliya onaloca wi “aaviihamo omiyaakoni mapuro a mukucho a amuluku atheru aahapwesha apoco aya amaluku, awuuwiha a miri.” (2 Math. 14:2, 4) Ophiyerya wi aahiwaakha amunnawe yiichaniwa Maacah, murici woochuneya yoowo yaaryaayano mu omwene. Ntakhara heeni? Nthowa nawi awo yaanavuwiha malapelo atheru a soophwaniherya.—1 Mam. 15:11-13.

3. Tiheeni nnahaalaahu othokororya mmwaha yoola?

³ Asa aahipaka sincipale ohiya pahiru omaliha malapelo atheru. Owo aahivuwiha malapelo aweela, nave tho aahaakhaviherya achu o Yuteya wi ekookele omulapela Yehova. Yehova aahimureeliha Asa vamoha ni Aisarayeli moorweela wa waavaha elukuluku ya murecele. * Variyari va iyaakha khumi sa olamulelo wa  Asa ‘elapo yaari mmureceleni.’ (2 Math. 13:23; 14:3,5) Mmwaha yoola, nnahaala othokororya mukhalelo Asa aapharihenleiye elukuluku ya murecele. Voocharela nnahaala othokororya yootakiherya ya Akristu a nsana noopacerya, yaawo moolikana ni Asa, yaapharihenle elukuluku ya murecele. Vookuchula, nnahaala waakhula nikoho nla: Waakhanle wi muri mu elapo yeeyo munaweryaanyu omulapela Yehova mootaphuwa, muni mpharihele hai mwamiruku elukuluku yeela ya murecele?

4. Mwawiiwanana ni 2 Matharihelo 14:1, 5, 6, Asa aapharihenle hai elukuluku ya murecele?

⁴ Mwaalakhanye 2 Matharihelo 14:1, 5, 6. Asa aahaaleela Aisarayeli wi “aari Yehova yoowo aawiichaaliha wa amwiicani.” Asa haapharihenle elukuluku ya murecele wi apuhe okumi. Ohiya yeeyo, owo aahipacerya oteka ipooma, ixiri ni apoco aya. Owo aahaaleela Ayuta wi: “Nivano, elapo ti yaahu.” Tiheeni Asa aachuneiye oloca? Owo aachuna oloca wi haarivo mwiicani ahaala waahiiha weeca mootaphuwa mu epooma naari oteka. Owo aahaalopola achu wi yaaphwanela opharihela mwamiruku elukuluku ya murecele.

5. Ntakhara heeni Asa aahaalipiha akhoco awe?

⁵ Asa aahipharihela elukuluku yeele ya murecele wi aalipihe akhoco awe. (2 Math. 14:7) Apwanne ela yaataphulela wi Asa hamuroromela Yehova? Hooye. Ohiya yeeyo, Asa aahisuwela wi ntoko mwene waari murici awe waarehererya achu ntakhara makacamiho yaawo yaahaalaaya ohoolela omwaahiyu. Asa aahisuwela wi elukuluku ya murecele yeeyo Ayuta yaapuhaaya hiyaahaala olekela nave eyo yaaheereya.

6. Akristu a nsana noopacerya yaapharihenle hai elukuluku ya murecele?

⁶ Naamwi Akristu a nsana noopacerya yiikariwa wiili-wiili, awo tho yaahipuha elukuluku ya  murecele. Oohuserya yaapharihenle hai elukuluku yeele ya murecele? Alopwana ni athiyana yaale oororomeleya yaahilaleerya michaka yaphaama moohihiyererya. Mu Saweriwa T’arummwa mwaha ola onaloca wi awo “yaneeca ewoovaka Apwiya [Yehova].” Awo yaahititelela olaleerya michaka yaphaama, nave ntoko yookhumelela, awo “yaanaaceereryeya.” Mwawooneya Yehova aahireeliha olaleerya waya mwamvai variyari va elukuluku ya murecele.—Saw. 9:26-31.

7-8. Tiheeni Paulo ni akina yenraaya vaavaa yaaryaayano ekari? Mutharihe.

⁷ Akristu a nsana noopacerya yaahipharihela ekari eri yoothene wi emwaramwaxe michaka yaphaama. Ntoko yootakiherya, vaavaa murummwa Paulo aasuwenleiye wi yaahikhalawo achu ancipale o Efeso, owo aahititelela okhala weiwo alaleeryaka.—1 Kor. 16:8, 9.

⁸ Paulo ni Akristu akina tho yaahiwerya waalaleerya achu ancipale mu eyaakha ya 49 E.K. vaavaa arummwa ni atokweene akina o Yerusalemu yaapankaaya yoolakelela vooloca sa ohithokororya othikiliwa. (Saw. 15:23-29) Yoolakelela emanle olokohiwa mmulokoni, oohuserya yaahilapa mwakuru “elaleeryaka masu a Apwiya.” (Saw. 15:30-35) Tiivi yaari yookhumelela? Piipiliya onaloca wi “yaanalipiha muloko nipuro nnipuro nave nihiku nnihiku waanaaceereryeya.”—Saw. 16:4, 5.

9. Ekari taani nryaahuno mu ilapo sincipale olelo, nave nikoho taani nnaphwanelaahu wiipakela?

⁹ Mu ilapo ikina olelo, ninnawerya olaleerya mootaphuwa. Apwanne munakhala mu elapo yeeyo oriwo otaphuwa vooloca sa malapelo ahu? Waakhanle wi tihiiha, mwiikohe, kinapharihela hai otaphuwa yoola? Mahiku yaala ookuchula, toohakalaliha wa achu a Yehova nthowa nawi ari ooweiwa mmuteko mutokweene wa olaleerya ni ohusiha yoowo oneeriwano veelaponi yoothene yavathi. (Mar. 13:10) Sookhalavo ichu sincipale nnaphwanelaahu opaka mmuteko yoola.

10. 2 Timóteo 4:2 onanceenyerya opaka eheeni?

¹⁰ Muni mpharihele hai mwa miruku elukuluku ya murecele? (Mwaalakhanye 2 Timóteo 4:2.) Ntakhara heeni ohaalikhela mikhalelo sanyu ni woona waakhanle wi nyuwaano naari muchu aveemusini vanyu anwerya waacererya orummwa awe, akhweya orumeela ntoko piyoneero? Ela tahi elukuluku ya waavya muhakhu naari ichu soomwiilini seiho sihinahaala okophola ni hiyaano mu yoohooxa etokotoko.—Masi. 11:4; Mat. 6:31-33; 1 Yoh. 2:15-17.

11. Alaleeryi akina tiheeni apankaaya wi ewerye waaphwanyiha ancipale michaka saphaama?

¹¹ Alaleeryi ancipale olelo, annahuserya elocelo evyaani wi epharihele mmuteko woolaleerya ni ohusiha. Marehereryo a Muluku olelo annaakhaviherya moorweela wa okumiha soolaleeryiwa inathipeleya Mpiipiliyani mu ilocelo sincipale. Ntoko yootakiherya, mu 2010, soolaleeryiwa sahu saanaphwanyeya mu ilocelo sawaakhwana 500. Nyenya olelo soolaleeryiwa sahu sinnaphwanyeya mu ilocelo soopwaha 1.000!

12. Achu anaphura hai vaavaa aniiwaaya michaka ya Omwene mu elocelo aya? Mvahe yootakiherya.

¹² Achu anaakhulela hai vaavaa anaweryaaya wiiwa eparipari yoorweela mmasu a Muluku mu elocelo aya? Muthokororye yaweereya ya murokora mmoha yoowo aaphwannye mphurelo va muthukumano wa muceche yoowo weeren’ye o Memphis, Tennessee, E.U.A. Muthukumano owo weeren’ye mu Ekinyarwanda, elocelo yeeyo enalociwa o Rwanda, Congo (Kinshasa), ni Uganda. Omanle muthukumano, murokora yoowo onaloca Ekinyarwanda ahi: “Ela ekwaha yoopacerya wiiwa mwawaakhwanela muthukumano woothene  wa muceche ovinyerya vaavaa kaathamenlaaka o Estatu Unitu mu iyaakha 17 ivirale.” Mwawooneya, murokora ola aahitannyeya murima vancipale vaavaa iiwaleiye muthukumano wa muceche mu elocelo awe yooyariwano. Waakhanle wi mikhalelo sanyu sinneemererya, apwanne mwanwerya ohuserya elocelo evyaani wi mwaakhaviherye akina mu ekulucu anyu? Apwanne munoona wi ela yaamukhala yoohakalaliha nthowa nawi akina mu ekulucu ya muloko anyu, annakhala ootaphuwa oloca elocelo ekina? Olapa wanyu mwakuru onamooruuhelaani ohakalala wawaaca.

13. Ti mwawiihai annihu o Rusiya yaapharihenlaaya elukuluku ya murecele?

¹³ Tahi wi annihu oothene annalaleerya mootaphuwa. Mu ilapo ikina annihu hanawerya olaleerya mootaphuwa nthowa nawi alamuleli annakhwatiiha muteko ahu woolaleerya. Ntoko yootakiherya, nwuupuwele annihu o Rusiya. Emanle wiikariwa mu iyaakha sincipale, mu Marsu a 1991 alamuleli yaahiweemererya wi emulapeleke Yehova mootaphuwa. Mu elukuluku yeele, o Rusiya yaariwo alaleeryi awaakhwana 16.000. Ivinre iyaakha 20 alaleeryi yaahaaceereryeya opwaha 160.000! Chiryene, annihu yaahipharihela mwamiruku elukuluku yootaphuwa yaaryaayano wi elaleerye michaka yaphaama. Elukuluku yeele ya murecele hiyaalekenle. Nyenya naamwi ichu saatoroken’ye mu elapo yeele annihu annatitelela okhala amvai wa Yehova. Awo annatitelela omurumeela Yehova, epharihelaka meerelo oohiyana hiyana.

14-15. Yehova aapharihenle hai ikuru sawe wi amukhaviherye Asa?

¹⁴ Mmahiku a Asa, elukuluku ya murecele hiyaalekenle omala. Nikhuuru na akhoco awuupa a waakhwana 1.000.000 naahirwa o  Etiyopiya. Muhooleli aya Sera, aahiroromela wi aahaala waavootha akhoco o Yuteya. Mwawiihiiha, Mwene Asa, haaroromenle waaca wa akhoco, nyenya aamuroromenle Muluku awe, Yehova. Asa aavekela ariki: “Munikhaviherye, Apwiya Muluku ahu, ntakhara nnoohamelaani nyuwo. Mu nsina nanyu noorwa owana ni muloko ola muncipale.”—2 Math. 14:11.

¹⁵ Naamwi akhoco o Etiyopiya yaari ancipale waapwaha akhoco a Asa, owo aahisuwela wi Yehova takuru nave wi aahaala waakhaviherya achu Awe. Chiryene Yehova aahaakhaviherya achu awe, nave akhoco o Etiyopiya yaahivoothiwa.—2 Math. 14:7-12.

16. Nnasuwela hai wi elukuluku ya murecele enahaala omala?

¹⁶ Naamwi nihisuwelaka soothene seiho muchu ti muchu a hiyo onahaaleiye ohoolela muhoolo, ninnasuwela wi elukuluku ya murecele yeeyo achu a Muluku anapuhaaya olelo heni elekele. Muupuwele wi, Yesu aahilaiherya wi mmahiku ookuchula, oohuserya awe yahaala ‘wiiciwaka ni achu a maloko oothene.’ (Mat. 24:9) Moolikana, murummwa Paulo aahiloca wi oothene “yaawo anakhwela omuchara Kristu Yesu moororomeleya ekaamwaavyaavyiwa.” (2 Tim. 3:12) Satana toosareya “owali,” mwa yeeyo heni ekhale yamiruku wuupuwela wi nnanwerya osepa owali awe.—Wup. 12:12.

17. Mmikhalelo taani nroromelo nahu nneeraaya neehiwe?

¹⁷ Moohilekela oothene ahu ororomeleya wahu anahaala weehiwa. Nave enamphiya, “ekoi etokotoko ehitonko okhala ovinya nihiku noopacerya elapo ophiyerya olelo.” (Mat. 24:21, BNM) Variyari va elukuluku yeeyo, achu a veemusini vahu anahaala onirukunuwela nave muteko ahu akhweya onahaala okhwatiihiwa. (Mat. 10:35, 36) Apwanne muchu ti muchu a hiyo, moolikana ni Asa, onahaala omuroromela Yehova wi amukhaviherye ni omukhapelela?

18. Mwawiiwanana ni Ahebri 10:38, 39, tiheeni enahaala onikhaviherya wiirehererya ntakhara makuchuwelo a elukuluku ya murecele?

¹⁸ Yehova onnanivyakiha hiihaano mmukhalelo woomunepani ntakhara yeeyo nnahaalaahu ohoolela muhoolo. Yehova onnamuhoolela “namuteko ororomeleya ni amiruku” wi avahererye yoolya yoomunepani mu “elukuluku yoophwanelela,”  wi anikhaviherye okhala aweemeleleya mmalapelo ahu. (Mat. 24:45) Nyenya mmoha ti mmoha a hiyo onaphwanela opaka makupa awe wi alipihe nroromelo mwa Yehova.—Mwaalakhanye Ahebri 10:38, 39.

19-20. Mwawiiwanana ni 1 Matharihelo 28:9, makoho taani nnaphwanelaahu wiipakela, nave ntakhara heeni?

¹⁹ Moolikana ni Mwene Asa, nnaphwanela ‘omwaavya Yehova.’ (2 Math. 14:3; 15:1, 2) Ninnapacerya omwaavya moorweela wa omusuwela Yehova ni opatisiwa. Ninnapharihela ekari eri yoothene wi nlipihe osivela wahu ntakhara Yehova. Wi nroromele waakhanle wi ninnalipiha onthamwene ahu ni Yehova, nnaphwanela wiikoha: ‘Apwanne kinnaphiya mmithukumano moohihiyererya?’ Vaavaa nnaphiyaahu mmithukumano seiho inavahereryiwa ni marehereryo a Yehova, ninnaakhela nlipiho noomunepani orweela wa anna ni arokora ahu. (Mat. 11:28) Nnaphwanela tho wiikoha: ‘Apwanne kinnamuhuserya Piipiliya moohihiyererya?’ Waakhanle wi munakhala ni emusi anyu, apwanne mootikitherya elukuluku yoophwanelela ntakhara malapelo a echoko esumana ti esumana? Naari waakhanle wi munakhala mkhatinyu, apwanne munnapaka malapelo a echoko hiiha ntoko imusi ineeraaya? Nave tho, apwanne munnapaka owetha wanyu wi mulaleerye ni waahusiha akina?

²⁰ Ntakhara heeni ti woochuneya wiipakela makoho yaala? Piipiliya onnanleela wi Yehova onnavareryela muupuwelo, ni yeeyo eri mmurimani mwahu, mwa yeeyo nnaphwanela tho wiivareryela. (Mwaalakhanye 1 Matharihelo 28:9.) Wakhala wi ninnoona wi onnachuneya opaka matorokelo vyakala, mu soolakelela sahu naari mmuupuwelo, nnaphwanela omveka Yehova wi anikhaviherye opaka matorokelo sintoko yaawo. Ela elukuluku ya wiirehererya ntakhara saweeha seiho inoorwa muhoolo. Muheemererye wi echu vyakala ewaakanyeryeni mu opharihela elukuluku ya murecele mwamiruku!