1-2. Eklesiyaste 11:6 oniiwanana hai ni muteko woolaleerya michaka ya phaama ya omwene?

MU ILAPO ikina, achu annaakhulela phaama vaavaa aniiwaaya michaka sa omwene. Nave ela ti yeeyo anawehereryaaya wiiwa! Eniiha mu ilapo ikina achu anooniherya nchuno na vakhaani vooloca sa Muluku ni Piipiliya. Mmukuma munakhalaanyuwo achu anaakhulela hai? Moohipwacha mukhalelo achu anaakhulelaaya, Yehova onaweherya wi ntitelele olaleerya ophiyerya elukuluku onahaaleiye oloca wi muteko woomala.

² Mu elukuluku yoophwanelela, Yehova onahaala omaaliha muteko woolaleerya voocharela “teneeraaya ephiye makuchuwelo.” (Mat. 24:14, 36) Ehaakumve ophiya elukuluku yeeyo, nni niiwelele hai masu awi “ohiichuuwihe mata aa”? *—Mwaalakhanye Eklesiyaste 11:6.

3. Tiheeni nnahaalaahu othokororya mmwaha yoola?

³ Mwaha ovirale woothokororya ichu xexe nnaphwanelaahu othokororya wi nikhumelele phaama ntoko alipa a “waatotha achu.” (Mat. 4:19) Mwaha ola onahaala othokororya meerelo mararu anahaala olipiha yoolakelela ya olaleerya moohipwacha mikhalelo nnahoolelaahu. Nnahaala ohuserya ntakhara heeni oryaaya woochuneya, (1) otikitheryeya mmuteko woolaleerya, (2) okhala oopisa murima ni (3) otitelela olipiha nroromelo nahu.

4. Ntakhara heeni ninnaphwanela otikitheryeya mmuteko yoowo Yehova onivanheiye wi nipake?

⁴ Yesu aahilaiherya saweereya ni mikhalelo seiho saahala weereya mmahiku ookuchula nave seiho saahaala owaakanyerya omuchara awe mu waakhwaniherya muteko woolaleerya. Owo aahaaleela ohuserya awe wi ‘ewehereryeke.’ (Mat. 24:42) Olelo, ninnahoolela sawaakanyerya soolikana ni seihe saahiihale achu  a mmahiku a Nowa wiiwelela olopola yoowo Nowa aalaleyeiye. (Mat. 24:37-39; 2 Ped. 2:5) Mwawiihiiha nnaphwanela otikitheryeya mmuteko woolaleerya yoowo Yehova onivanheiye wi nipakeke.

5. Saweriwa T’arummwa 1:6-8 onaloca wi muteko woolaleerya waahaala omwaramwaseya ophiyerya woowi?

⁵ Olelo ninnaphwanela chiryene otikitheryeya mmuteko woolaleerya michaka sa phaama sa omwene. Yesu aahilaiherya wi omuchara awe yaahaala otitelela olaleerya owo amanle okhwa nave wi yaahaala opaka sincipale opwaha seiho owo aapankeiye. (Yoh. 14:12) Yesu amanle okhwa, oohuserya akina yaahikookela ototha ihopa. Amanle oviihiwa mookhwani, owo aahaavaha oohuserya awe yootikhiniha ya ototha ihopa. Yesu aahipharihela elukuluku yeele wi aaroromelihe wi murici aya wa waatotha achu waari woochuneyaxa opwaha echu eri yoothene. (Yoh. 21:15-17) Mu elukuluku vakhaani ahaakumve oya wirimu, owo ahaaleela ohuserya awe wi muteko wa weerela onamoona yoowo aapaceryinheiye waahaala opwaha elapo yo Isarayeli. (Mwaalakhanye Saweriwa T’arummwa 1:6-8.) Mu iyaakha ohoolo waya, Yesu aahimvaha yaawoona murummwa Yohani yeeyo yaahaala weereya mu “nihiku na Apwiya.” * Mu yawoona awe, Yohani aahimoona munkelo yoowo akunshe “michaka yaphaama yoohimala” wi alaleye “wa ilapo, mahimo, wa ilocelo ni wa maloko.” (Wup. 1:10; 14:6) Chiryene, yookhwela ya Yehova wa hiyo olelo ti yawi ntitelele wuuka muteko woolaleerya wa elapo yoothene.

6. Nni niwerye hai okhala ootikitheryeya mmuteko woolaleerya?

⁶ Nnanwerya okhala ootikitheryeya mmuteko woolaleerya, waakhala wi ninnuupuwela soothene Yehova onapakeiye wi anikhaviherye. Ntoko yootakiherya owo onnanivahererya yoolya yincipale yoomunepani, orweela mu soolaleeryiwa sa wimpirimiiriwa, sa mukhankoonya,  sookaravaariwa, ixilema ophitaanyerya Broadcasting. Muupuwele ela: Mu site ahu sinnaphwanyeyaamo soolaleeryiwa opwaha ilocelo 1.000! (Mat. 24:45-47) Moohipwacha okawanyeya wa achu nthowa na epoliitika, malapelo, muhakhu, alapeli a Muluku opwaha amilyawu 8 tawiiwanana mu onna wa elapo yoothene. Ntoko yootakiherya, Naneethanu 19 a Apirili, anamoona orukurerya elapo yoothene yaari awiiwanana vaavaa yoonaaya exilema yeeyo yaathokororya yoorepa ya nihiku. Mu oxekuwa wa nihiku nenle muloko wa achu awaakhwana 20.919.041 yaahithukumana wi yuupuwelele okhwa wa Yesu. Ninnaceenyeryeya otikitheryeya mmuteko yoola wa Omwene, vaavaa nnuupuwelaahu ekari nryaahuno ya opaka makupa mu saweereya seiha sootikhiniha.

7. Yootakiherya ya Yesu enanikhaviherya hai okhala ootikitheryeya?

⁷ Mukhalelo mukina onahaala onikhaviherya okhala ootikitheryeya mmuteko woolaleerya ori ochariha yootakiherya ya Yesu. Owo heemerenrye wi echu vyakala emwaakanyerye weerela onamoona eparipari. (Yoh. 18:37) Yesu haavoloweliwe vaavaa Satana amvanheiye “omwene woothene wa elapo ya vathi ni ocicimiheya waya,” naari vaavaa eeryeryiweiye ni akina wi akhale mwene. (Mat. 4:8, 9; Yoh. 6:15) Owo haavoloweliwe ni nchuno na okhalano muhakhu woomwiilini, naari huulinwe muru vaavaa aakaahiweiye. (Luka 9:58; Yoh. 8:59) Vaavaa nroromelo nahu nneehiwaaya, nnanwerya okhala ootikitheryeya wakhala wi ninnuupuwela ekano ya murummwa Paulo. Owo ahaaceenyerya Akristu wi echarihe yootakiherya ya Yesu wi ‘ehivele naari ovolola’!—Ahe. 12:3.

8. Opisa murima tiheeni nave ntakhara heeni oryaaya woochuneyaxa hiihaano?

⁸ Muchu oopisa murima onawehererya moomaleleya ophiyerya ichu itoroken’ye. Nnaphwanela okhala oopisa murima mmikhalelo soohiyana hiyana vakina vaya ninnahoolela mikhalelo soovila nave ninnachuna wi imale mwawaakuveya. Naari ninnakhwela wi echu nnachunaahu yaakhwaniheryeye. Mulipa a miririmo Hapakukhi aanawehererya mu elukuluku yincipale omala wa meerelo a nlala a o Yuteya. (Hab. 1:2) Oohuserya a Yesu yaaweherya wi Omwene waahaala wooneya “vahilekenle” nave owoopole mu olamulelo wa o Roma. (Luka 19:11) Ninnawehererya nihiku Omwene wa Muluku onahaalaaya oviihavo sootakhala ni otikitherya elapo evyaani yeeyo enahaala osareya ni achu anamwiiwelela Muluku. (2 Ped. 3:13) Mwawiihiiha nnaphwanela okhala oopisa murima vaavaa nnawehereryaahu nihiku nenlo Yehova othanlileiye. Muthokororye mikhalelo mikina mummo Yehova onanihusiheiye okhala achu oopisa mirima.

9. Sootakiherya taani inooniherya opisa murima wa Yehova?

⁹ Yehova yootakiherya yaphaama vooloca sa opisa murima. Owo aamvaha Nowa elukuluku yoophwanelela wi amuteke mwaaceya nave wi akhale mulipa “oolaleya a sawookololowa.” (2 Ped. 2:5; 1 Ped. 3:20) Yehova aahinwiriyana Aparahamu vaavaa aamukoheiye mwawuuluulela vooloca sa yoolakelela aapankeiye ya waatoloxa achu oonanara murima yaawo yaakhala epooma ya Sotoma ni Komora. (Map. 18:20-33) Mu iyaakha masana masaneene, Yehova aahooniherya opisa murima otokotoko ni nloko nohiroromela na Isarayeli. (Neh. 9:30, 31) Olelo ninnoona opisa murima wa Yehova moorweela wa waavaha elukuluku yincipale achu yaale ‘anachuna ocharuwa.’ (2 Ped. 3:9; Yoh. 6:44; 1 Tim. 2:3, 4) Yootakiherya ya Yehova ennanivaha mathowa aphaama a okhala oopisa murima vaavaa nnatitelelaahu olaleerya ni ohusiha. Owo tho onnahusiha okhala oopisa murima orweela wa niphwanaphwaniho nnacharela nenlo nnaphwanyeya mmasu awe.

10. Yootakiherya ya namalima enaphwanyeya mu Tiyako 5:7, 8, enanihusiha eheeni?

 ¹⁰ Mwaalakhanye Tiyako 5:7, 8. Niphwanaphwaniho vooloca sa mukhalelo mmiso onannuwaaya ninnanihusiha okhala oopisa murima. Mweeparipari miri mikina sinnannuwa mwawaakuveya. Nyenya miri mincipale, xaxaxa seihe inavaha sawiima, sinnamaliha elukuluku yincipale wi ivahe sawiima. Mu elukuluku ya Aisarayeli miri mikina saanamaliha miyeeri mithanu nammoha wi sinnuwe. Wiili-wiili namalima aala mu ephula yoopacerya ya mweeri wa Otupuru nave aahepha emanle epula ya murupi. (Mar. 4:28) Nnamukhala a miruku wakhala wi nootakiherya opisa murima wa namalima. Naamwi hiiha, weerano yeela onamukhala woovila.

11. Opisa murima onanikhaviherya hai mmuteko woolaleerya?

¹¹ Ntoko achu oohiphaameya wiili-wiili anachuna woona sookhumelela sa muteko aya mwawaakuveya. Nyenya wi mmiso okumihe soolya, namalima onaphwanela opwacha phaama. Owo onaphwanela olimavo, waala, okohola ni ohela maahi. Wakhala wi ninnachuna waapaka oohuserya nnaphwanela tho olapa mwakuru, ennaviravo elukuluku yincipale wi naakhaviherye oohuserya a Piipiliya ahu okhala achu oosivela ni oohikhala nthalu. Opisa wahu murima onahaala onikhaviherya okhala oohiceecheya vaavaa nnakumanahuno makacamiho. Nave vaavaa akina anaakhulelaaya michaka sahu, nnaphwanela okhala oopisa murima. Chiryene hinaphwanela omukinyererya oohuserya a Piipiliya winnuwiha nroromelo nawe. Ophiyerya wi oohuserya a Yesu ikwaha ikina yaanalekela wiiwexexe yeeyo Yesu aahusiheiye. (Yoh. 14:9) Nuupuwele wi naamwi naalaka ni ohela maahi onannuwiha ti Muluku.—1 Kor. 3:6.

12. Nni nooniherye hai opisa murima vaavaa nnaalaleeryaahu yaale ari amusi ahu yaawo ahiri anamoona a Yehova?

¹² Echu emoha enahaala weeriha okhala woovila opisa murima ori vaavaa nnalaleeryaahu  amusi ahu ahiri anamoona a Yehova. Echu enahaala onikhaviherya nri nlakiheryo nenlo nri mu Eklesiyaste 3:1, 7 nenlo nni: “Ichu soothene sookhalano elukuluku aya . . . elukuluku yoomala ni elukuluku yooloca.” Ikwaha ikina nnaphwanela okhala oomala wi meerelo ahu eloce wa hiyaano, nyenya ninnaavya elukuluku wi niphwanye ekari ya oloca eparipari. (1 Ped. 3:1, 2) Ti woochuneya okhala a mvai mmuteko woolaleerya ni ohusiha nyenya nnaphwanela okhala oopisa murima ni achu oothene ophitaanyerya yaale ari amusi ahu.

13-14. Sootakiherya taani sa opisa murima nnaphwanelaahu ochariha?

¹³ Nnanwerya okhala oopisa murima orweela wa ohuserya sootakiherya sa alapeli oororomeleya a khalai ni a mmahiku ahu. Hapakukhi aanawehererya woona makuchuwelo a nlala, nyenya owo aahooniherya opisa murima vaavaa aalonceiye ariki: ‘Kinamwemela vanipuroni vaka noowehererya.’ (Hab. 2:1) Murummwa Paulo aanachuna “okhwaaniherya” muteko awe. Nyenya owo aahititelela weerela onamoona “michaka yamahala ya mahala a Muluku” moopisa murima.—Saw. 20:24.

¹⁴ Muthokororye yootakiherya ya mutheli mmoha, yoowo aavolonwe mu exikola yo Okiliyati. Vaavaa yaakuchunlaaya exikola yo Okiliyati, yaahirummwa wi yarumeele mu elapo yeeyo yaariwo anamoona a Yehova vakhaani, nave weiwo achu ancipale yaahiri Akristu. Mutheli haaphwannye achu ancipale yaarino nchuno na omuhuserya Piipiliya. Moohiyana, asinthamwene aya akina yaawo yaaryaayano mu exikola ya Okiliyati yaarumeela mu ilapo ikina, wiili-wiili yaanarumiha michaka soohakalaliha elocaka waaca wa soohuserya sa Piipiliya yaaryaayano seiyo saaya vahoolo. Naamwi hiihaa, mutheli aahititelela okhala oopisa murima, moohipwacha wunnuwa wa muteko aya woolaleerya mu ekulucu yeele yaahaya vahoolo, awo hiyaahiyerenrye olaleerya. Emanle olaleerya mu iyaakha 8 mu ekulucu yeele, awo yaahihakalala omoona oohuserya aya mmoha a Piipiliya apatisiwaka. Sootakiherya sakhalai ni sa mmahiku ahu iniiwanana hai? Awo hiyaavelavenle naari wiichuuwiha mata aya, nave Yehova aahaareeliha nthowa na okhala oopisa murima. Moohikhwa minikwa ela ennanceenyerya “otakiherya nroromelo ni nthiti na yaale anii yaakhele yeeyo Muluku aaroromelinheiye.”—Ahe. 6:10-12.

15. Ti mwawiihai nroromelo nnanceenyeryaaya opaka yoolakelela ya olaleerya?

¹⁵ Ninnaroromela michaka seiyo nnalaleeryaahu, mwawiihiiha ninniilipiserya wi naalaleerye achu ancipale. Ninnaroromela tho soolaiherya sa Muluku inaphwanyeya Mpiipiliyani. (Sal. 119:42; Isa. 40:8) Ninnoona sooloherya sa Piipiliya saakhwanelaka mmahiku ahu. Ninnawoona tho achu epharihelaka malakiheryo a Piipiliya wi etoroke okumi aya. Ela ennaceenyerya ororomela wi achu oothene annachuna wiiwa michaka saphaama sa Omwene.

16. Mwawiiwanana ni Salumu 46:1-3, ti mwawiihai omuroromela Yehova ni Yesu oneeraaya onceenyerya olaleerya?

¹⁶ Nave tho, hiyaano ninnamuroromela Yehova, yoowo ori mwaneene a michaka yaphaama nnalaleeryaahu, nave ninnamuroromela Yesu yoowo Yehova omuthanlileiye wi akhale Mwene a Omwene wa Muluku. (Yoh. 14:1) Moohipwacha mukhalelo ahu, Yehova onahaala okhala voochawela vahu ni ikuru sahu. (Mwaalakhanye Salumu 46:1-3.) Mwawaaceererya ninnaroromela wi Yesu onahaala otitelela ohoolela muteko woolaleerya orweela wirimu, apharihelaka ikuru seiyo aakhenleiye wa Yehova.—Mat. 28:18-20.

17. Ntakhara heeni ninnaphwanela otitelela olaleerya? Mvahe yootakiherya.

¹⁷ Nroromelo ninnanceenyerya omuroromela Yehova wi onahaala oreeliha wiilipixerya  wahu, nave eyo enamweereya mmukhalelo nihinaanyiheryaahu. (Ekle. 11:6) Ntoko yootakiherya, noosuwela wi achu ancipale annoona mahiku oothene ekarinya ya soolaleeryiwa sahu. Apwanne meerelo yaala annakumiherya mphurelo? Chiryene annakumiherya mphurelo! Orummwa Wahu wa Omwene wa Novempuru a 2014, woothariha yaweereya emoha ya nasikola yoowo ori mwali a esikola ya vasulu yoowo aachuna opaka muteko awe wa osikola, vooloca sa Anamoona a Yehova. Owo haasuwenle waariwo Empa ya Omwene, nyenya owo aahiwoona Anamoona a Yehova ni ekarinya ya soolaleeryiwa waacamela osikola wawe, nave aahiphwanya sooleeliherya sikina wi awerye opaka muteko awe wa osikola. Vano owo Namoona a Yehova opatisiwa nave onarumeela ntoko piyoneera ookilaatheya. Saweereya ntoko seiya sinnanceenyerya otitelela olaleerya, nave sinnooniherya wi aakhalavo achu anachuna owiriyana michaka sa Omwene.

18. Ntakhara heeni ninnaroromela wi muteko woolaleerya sa Omwene onahaala waakhwanela hiiha ntoko Yehova onachuneleiye?

¹⁸ Nnaphwanela ororomela wi muteko wa olaleerya michaka sa Omwene, onahaala omala mu elukuluku yoophwanelela. Muupuwele yeeyo yeeren’ye mmahiku a Nowa. Yehova aahooniherya wi onnapaka ichu, mu elukuluku yoophwanelela. Mu iyaakha 120, Yehova aahilakelela oruha maahi mancipale. Mu iyaakha sincipale vahoolo vaya, Yehova aahimuleela Nowa wi ampake mwaaceya. Akhweya mu iyaakha 40 naari 50, Nowa aahititelela olapa mwakuru, ehaakumve maahi mancipale. Naamwi achu yaahanwiriyana, owo aahititelela olaleerya muchaka wa olopola ophiyerya elukuluku Yehova aamurummeiye wi apacerye waavoliiha axinama mmwaaceyani. Mu elukuluku yoophwanelela, “Apwiya yaawala nsele.”—Map. 6:3; 7:1, 2, 16.

19. Tiheeni nnaphwanelaahu owehererya wakhala wi hiniichuuwinhe mata ahu?

¹⁹ Moohilekela, Yehova onahaala onleela wi muteko wa olaleerya michaka wa omwene wookuchula,nave onahaala ‘owala nsele’ voocharela owo onahaala otoloxa elapo ya Satana ni oruuha elapo evyaani yeeyo enahaala osareya ni achu anamwiiwelela Muluku. Ophiyerya elukuluku yeeyo, nnaphwanela omutakiherya Nowa, Hapakukhi, ni akina yaawo yahiichuuwinhe mata aya. Nnaphwanela otikitheryeya mmuteko woolaleerya, opisa murima, ni otitelela olipiha nroromelo nahu mwa Yehova vamoha ni soororomeliha sawe.