1, 2. Ntakhara heeni alipa ooyara akina akhweya annoova vaavaa anamwane aya aniiveleelaaya wa Yehova ni opatisiwa?

MACIKHWI a oohuserya a Piipiliya anniiveleela mukhataaya wa Yehova ni opatisiwa. Ancipale amiravo ni asimwali yaawo aphuiwale mu eparipari nave athanlile mukhalelo waphaama wa okumi. (Salumu 1:1-3) Waakhanle wi mwa Mukristu oyanre, akhweya munnaweherya nihiku mwaninyu mwaamulopwana naari mwaamuthiyana oneereiye apatisiwe.​—Mulikanyihe ni 3 Yohani 4.

² Nlelo akhweya munnoova. Nyuwaano munnawoona amiravo ni asimwali epatisiwaka nyenya ohoolo waya enakhwa minikwa waakhanle wi okhala mwawiiwanana ni malakiheryo a Muluku echu yaphaama chiryene wa yaawo. Akina annaphiyerya ohiya eparipari. Mwawiihiiha akhweya munnakhala awuukhuwa wi mwaninyu onahaala opacerya omurumeela Yehova nyenya voocharela ayeleele osivela aareiyeno ntakhara eparipari. Mwaninyu akhweya onamukhala ntoko Akristu o Efeso mu nsana noopacerya. Yesu aahiloca wa yaawo: “Wòhiya okhwela wà wopatxerya.”  (Wupulula 2:4) Mano, muni nwerye hai omukhaviherya mwaninyu olipiha osivela wawe ni ‘wunnuwa mpaka ovuluwa’? (1 Pedro 2:2) Nnanwerya ohuserya orweela wa yootakiherya ya Timoteo.

3. (1) Timoteo aakhanle hai Mukristu, nave tiheeni opankeiye wi apharihele yeeyo ohusenryeiye? (2) Mikhalelo taani miraru sa ohuserya Paulo aalonceiye wa Timoteo?

³ Voopacerya murummwa Paulo aaxekunrye epooma yo Lustra mu eyaakha ya 47. Elukuluku yeeyo, Timoteo akhweya aari mmiravo, aahusenrye sa mahusiheryo a Yesu. Owo aahipharihela muteko yeeyo aahusenryeiye, nave iyaakha piili ohoolo waya owo aapacerya opaka mikwaha ni Paulo. Voovira iyaakha 16, Paulo aahimurepela ekaarata Timoteo: “Nto weyano olipe mwa seiho ohusenryawe ni wakhenlawe ni wemererya. Wòmusuwela phama yole ohusin’he, nave, ovinya oyenve, wòsuwela Sorempwa sa Muluku. Seiho sinnawerya wovaha miruku inakeriha onivulusoni vomwemererya Yesu Kristu.” (2 Timóteo 3:14, 15) Moone wi Paulo olonce wi Timoteo (1) aahisuwela soorempwa sa Muluku, (2) aahaakhela ni eemererya ichu aahusenryeiye, ni (3) saahimvaha miruku inakeriha onivulusoni voomweemererya Yesu Kristu.

4. Tiheeni munapharihelaanyu wi mwaahusihe anamwane anyu? (Moone eruku yoopacerya.)

⁴ Nyuwaano ntoko Mukristu oyanre, munnachuna wi mwaninyu asuwele soorempwa sa Muluku, seiyo olelo sinaphitaanyerya Soorempwa sa Ehepiri ni Soorempwa sa Ekiriki Seekristu. Ophiyerya wi maponkwe ni anahano ananwerya ohuserya vooloca sa achu ni saweereya sinalociwa Mpiipiliyani. Marehereryo a Yehova annaavahererya aliivuru awaaca, iproxura, ni ixilema seiyo alipa ooyara eneeraaya epharihele wi yaakhaviherye anamwane aya. Tisivi wa seiya sinaphwanyeya mu elocelo anyu? Mwaninyu onnachuna osuwela echu eri Mpiipiliyani wi alipihe onthamwene awe ni Yehova.

5. (1) Enataphulela eheeni ‘wakhela ni wemererya’? (2) Nnasuwela hai wi Timoteo aahaakhela ni eemererya michaka yaphaama vooloca sa Yesu?

⁵ Henaakhwana pahiru waahusiha anamwane vooloca sa achu ni saweereya sa Mpiipiliyani. Muupuweletho wi Timoteo ‘ahakhela ni wemererya.’ Masu a Ekiriki Paulo opharihenleiye anataphulela “osuwela sa” naari “okhala oolekecheya ni echu yammoori wa echu yeeparipari.” Timoteo aahisuwela Soorempwa sa Ehepiri ‘ovinya ayenve,’ eyo tiwi, ovinyerya elukuluku aareiye ponkwe. Ohoolo waya, owo aahilekecheya wi Yesu aari Mesiya. Nroromelo na Timoteo naari noolipa ophiyerya opatisiwa ni olapa ni Paulo ntoko misiyonaariyo.

6. Muni nwerye hai waakhaviherya anamwane anyu olipiha nroromelo naya mu Masu a Muluku?

⁶ Muni mwaakhaviherye hai anamwane anyu okhalano nroromelo noolipa ntoko Timoteo, wi eweryetho ‘wakhela ni wemererya’? Voopacerya, mukhale oopisa murima. Ennaviravo elukuluku wi muchu akhaleno nroromelo noolipa. Nave wakhala wi  nyuwaano munneemererya echu henataphulela wi anamwane anyu anahaala weemereryatho siiyo ene. Mwaana ti mwaana onaphwanela opharihela “owerya [wawe] wuupuwela” wi ateke nroromelo nawe mu Piipiliya. (Mwaalakhanye Aroma 12:1, Tradução do Novo Mundo.) Ntoko mulipa ooyara, munaphwanela opaka sincipale wi mwaakhaviherye anamwane anyu olipiha nroromelo naya, xaxaxa vaavaa anapakaaya makoho. Hankooni noone echu nneeraahu nihuserye orweela wa yootakiherya ya tiithi mmoha.

7, 8. (1) Tiithi mmoha Eekristu onooniherya hai ovilela vaavaa onamuhusiheiye mwanawe mwaamuthiyana? (2) Ti liini mwachunnaanyu okhala oovilela ni mwaninyu?

⁷ Tomasi, yoowo mwanawe mwaamuthiyana orino iyaakha 11, olonce wi ikwaha ikina mwanawe owo onnapaka makoho ntoko ala: “Apwanne Yehova opharihenle othatuwa wi okhalevo ikumi veelaponi?” naari “Ntakhara heeni hannavolowela miyaha sa vamucecheni, ntoko othanla wi neererye orehererya ichu?” Ikwaha ikina, owo onnasepa omuleela pahiru ichu onaphwaneleiye weemererya. Tomasi oosuwela wi echu enamulekecha muchu vooloca sa eparipari tahi yaweereya etokotoko nyenya sawooniherya sincipale ikhaani.

⁸ Tomasi onnasuwelatho wi owo onnachuna okhala oovilela wi amuhusihe mwanawe mwaamuthiyana. Mweeparipari, Akristu oothene annachuna okhala oovilela. (Kolosi 3:12) Tomasi aahisuwela wi enahaala oviravo elukuluku ni ovaanela vancipale wi amukhaviherye mwanawe mwaamuthiyana wunnuwiha olekecheya wawe. Owo onnachuna waalikhela ni yoowo vooloca sa yeeyo onahusereiye Mpiipiliyani. Tomasi ooloca: “Xaxaxa mu miyaha sookhweleya, mwaaraka ni miyaano nnachuna osuwela waakhanle wi mwanihu mwaamuthiyana onneemererya chiryene yeeyo onahusereiye nave waakhanle wi ennamulekecha. Wakhala wi onnakhalano makoho eyo echu yaphaama. Kilocaka eparipari, kinakhala awoova wakhala wi oneemererya echu ahaakumve opaka makoho.”

9. Muni mwaakhaviherye hai anamwane anyu weemererya Masu a Muluku?

⁹ Vaavaa alipa ooyara anahusihaaya moovilela, veelukuluku aya anaaya anahaala opacerya wiiwexexa “oruku, murakamelo, mwemelelo, mwiseryo” wa nroromelo. (Éfeso 3:18) Nnanwerya waahusiha awo mmukhalelo oniiwanana ni iyaakha ni wiiwexexa waya. Vaavaa nroromelo naya mwa seiyo anahuseryaaya nnakhalaaya noolipa, onahaala okhala wookhweya waakiha soororomela saya ni akina, ophitaanyerya asinthamwene aya oosikola. (1 Pedro 3:15) Ntoko yootakiherya, apwanne anamwane anyu ananwerya ompharihela Piipiliya wi etharihe yeeyo eneereya muchu akhwa? Apwanne mukhalelo Piipiliya onathariheiye onnaaphara murima? * (Moone masu avathi.) Muupuwele wi munaphwanela okhala oovilela wi mmukhaviherye mwaninyu oteka nroromelo mwa Masu a Muluku, nave  yookhumelela ene enahaala okhala yoohakalaliha.​—Malamulo 6:6, 7.

10. Tiheeni enaphwanela okhala makupa ookhweleya a ohusiha wanyu?

¹⁰ Mweevelevelo, yootakiherya anyu echu yookhweleyatho wi mwaakhaviherye anamwane anyu wunnuwiha nroromelo. Estefaniya, mai a anamwane aasithiyana araru, ooloca: “Ovinyerya anamwane aka yaaryaaya akhaanixa, kaaniikoha, ‘Apwanne kinnaaleela anaaka vooloca sa ntakhara heeni kiryaaka oolekecheya wi Yehova ookhala, okhwela wawe, ni wookololowa wa iphiro sawe? Apwanne anaaka annawerya woona mookwakwaleya wi kinnamusivela chiryene Yehova?’ Nkinaphwanela oweherya wi anaaka elekecheye miyaano kihilekechen’ye.”

11, 12. Miruku tiheeni, nave nnasuwela hai wi muchu hanakhala a miruku nthowa nawi ohinnuwa?

¹¹ Noomala ohuserya wi Timoteo (1) aahisuwela Soorempwa sa Muluku ni (2) aalekecheya vooloca sa soororomela sawe. Nyenya tiheeni Paulo aachuneiye oloca vaavaa aalonceiye wi soorempwa sa Muluku saahaala omweeriha Timoteo okhala a “miruku inakeriha onivulusoni”?

¹² Estudo Perspicaz das Escrituras, Evolume 3, onnathariha wi Mpiipiliyani, miruku inaphitaanyerya “mavyakelo a opharihela masuwelelo ni wiiwexexa onakhumelela phaama mu omaliha makacamiho, osepa sawoopiha, okhalano soolakelela, naari waavaha ekano akina mu weerano hiiha. Iho ti soohiyana ni ohisuwela.” Piipiliya onnaloca wi “Ohìsuwela wokirathi mmurimani w’anamwane.” (Masiposipo 22:15) Woona wi miruku ori ohiyana ni ohisuwela, miruku eneneeryo ya wiichwelavo. Muchu onnakhala awiichwelavo omunepani woona wi owo onnamoova Yehova nave onnachuna omwiiwelela, ohiya nthowa nawi owo ohinnuwa.​—Mwaalakhanye Salumu 111:10.

13. Amiravo ni asimwali eni yooniherye hai wi awo aakhalano miruku inakeriha onivulusoni?

¹³ Amiravo ni asimwali yaawo iichwenlevo omunepani ‘hanahekhereya pure, nave hanakusiwa ti etxheku yothene’ moorweela wa soochuna saya naari moorweela wa ovoloweliwa ni amiravo akina. (Éfeso 4:14) Opwaha yeeyo, ‘vaweranosha annakhoveleliha masuwelelo aya ohiyaniha yaphama ni yonanara.’ (Ahebri 5:14, Nlakano Nahihano) Mwawiihiiha awo annapaka soolakelela mwamiruku, naamwi makholo aya naari achu akina ehaavareryaka. (Filipi 2:12) Miruku ntoko seiyo sinnakeriha onivulusoni. (Mwaalakhanye Masiposipo 24:14.) Muni nwerye hai waakhaviherya anamwane anyu wunnuwiha miruku ntoko seiyo? Munaphwanela ororomela wi awo annasuwela echu munavahaanyu esisapo. Mwa yeeyo munalocaanyu ni munapakaanyu, awo anaphwanela woona wi nyuwaano munneererya okhala mwawiiwanana ni malakiheryo a Mpiipiliya.​—Aroma 2:21-23.

14, 15. (1) Tiheeni mmiravo naari mwali onachuna opatisiwa onaphwaneleiye wuupuwelela ahaakumve? (2) Muni mwaakhaviherye hai anamwane anyu wuupuwelela mareeliho anakhalavo moorweela wa wiiwelela malamulo a Muluku?

¹⁴ Nyenya, wi mwaakhaviherye anamwane  anyu wunnuwiha nroromelo naya, honaakhwana pahiru waaleela echu yaphaama ni yoonanara. Munaphwanelatho waakhaviherya wi yuupuwelele makoho ntoko ala: ‘Ntakhara heeni Piipiliya onnawatiiha ichu seiyo sinakhala wi ti saphaama? Kini kisuwele hai wi malakiheryo a Piipiliya mahiku oothene taphaama wa miyaano?’​—Isaiya 48:17, 18.

¹⁵ Wakhala wi mwaninyu onachuna opatisiwa, mmukhaviherye wuupuwelela mwawiiseela vooloca sa mirici inarweela mu opatiso. Owo onoona hai vooloca sa mirici iho? Tisivi siri miphurelo? Taavi ari makacamiho? Ntakhara heeni miphurelo ti sincipale opwaha makacamiho? (Marko 10:29, 30) Ti wookhweleya wuupuwelela ichu seiya mweephoole ahaakumve opatisiwa. Mmukhaviherye mwaninyu wuupuwelela mareeliho a wiiwelela ni sookhumelela soonanara sa ohiiwelela. Voocharela owo akhweya onahaala weemererya wi ochariha malakiheryo a Piipiliya mahiku oothene enahaala okhala echu yaphaama wa yoowo.​—Malamulo 30:19, 20.

16. Tiheeni alipa ooyara anaphwanelaaya opaka wakhala wi mwanaya opatisiwe onnapacerya opwata mu nroromelo nawe?

¹⁶ Tiheeni muneeraanyu mpake wakhala wi mwaninyu oopacerya okhwa minikwa vooloca sa eparipari amanle opatisiwa? Ntoko yootakiherya, mwaninyu mwaamulopwana naari mwamuthiyana akhweya oovoloweliwa ni ichu seelapo. Naari wi mwaninyu  onnapacerya okhwa minikwa waakhanle wi ochariha malakiheryo a Piipiliya mukhalelo waphaama wa okumi chiryene. (Salumu 73:1-3, 12, 13) Echu munahaalaanyu opaka enahaala wooniherya waakhanle wi owo onamutitelela omurumeela Yehova. Muheererye owana ni mwaninyu vooloca sa yeeyo, moohipwacha waakhanle wi nlelo mwaana naari wi vano mmiravo naari mwali. Opwaha yeeyo, mweerihe wi asuwele wi nyuwaano munnamusivela nave wi munnachuna omukhaviherya.

17, 18. Wakhala wi mmiravo onnakhwa minikwa, alipa ooyara eni emukhaviherye hai?

¹⁷ Mmiravo naari mwali opatisiwe ohiiveleela wa Yehova. Eyo yoororomeliha ya omusivela ni omurumeela opwaha echu ekina. (Mwaalakhanye Marko 12:30.) Yehova onoona wiiveleela ntoko yoororomeliha etokweene, nave hiyaano nnaphwanela woona mmukhalelo mmohamoha. (Eklesiyaste 5:4, 5) Mmuupuserye mwaninyu sa yeela. Nyenya voopacerya, mwaalakhanye ikaruma marehereryo a Yehova anaavahereryaaya alipa ooyara. Voocharela, mmukhalelo waphaama nave mu elukuluku yoophwanelela, mmuleele mwaninyu wi yoolakelela awe ya wiiveleela wa Yehova ni opatisiwa yaari echu etokotoko, nyenya enahaala omuruuhela mareeliho mancipale.

¹⁸ Ntoko yootakiherya, munahaala ophwanya miruku saphaama mu masu awaaceererya “Os Pais Perguntam,” oculi wa liivuru Os Jovens Perguntam​—Respostas Práticas, Volume 1. Ennaavaha ekano alipa ooyara wi awo hanaphwanela waakuvela wuupuwela wi amiravo aya aakhooca eparipari nto anaphwanela osuwela nikacamiho nene. Akhweya okhinyererya wa asinthamwene aya ooxikola naari omeekha. Naari wi mwaninyu onoona wi amiravo naari asimwali akina annapaka sincipale mmuteko wa Yehova opwaha vaiye. Masu awaaceererya annatharihatho wi miyaha iha hasinataphulela wi mwaninyu onakhooca soororomela sanyu. Akhweya sookhumelela sa makacamiho makina owo onakumaneiyeno. Masu awaaceererya annavahererya sooleeliherya vooloca sa mukhalelo mulipa ooyara oneereiye amukhaviherye mwanawe yoowo onakhwa minikwa vooloca sa eparipari.

19. Alipa ooyara eni yaakhaviherye hai anaaya okhalano “miruku inakeriha onivulusoni”?

¹⁹ Ntoko mulipa ooyara, mookhalano murici wookhweleya ni ekari ya waaphuwa anamwane anyu mu “merelo ni malakelo a Apwiya.” (Éfeso 6:4) Ntoko nihusenryaahu, eyo enataphulela wi munaphwanela waahusiha anamwane anyu yeeyo Piipiliya onaloceiye ni waakhaviherya okhala oolekecheya vooloca sa yeeyo anahuseryaaya. Vaavaa nroromelo naya nnalipaaya, awo anahaala oceenyeryeya wiiveleela wa Yehova ni omvaha owetha waya. Ennachuneya wi Masu a Yehova, munepa awe, ni wiilipiserya wanyu yaakhaviherye anamwane anyu okhalano “miruku inakeriha onivulusoni.”