1-3. (1) Tiheeni nnaphwanelaahu ophitaanyerya ntoko emoha ya soororomela sahu sookhweleya? (2) Ntakhara heeni ovinya mookhwani ti wookhweleya? (Moone eruku yoopacerya.)

WAKHALA wi muchu ohookohaani wi taavi ari mahusiheryo ookhweleya a nroromelo nanyu, mwaahaala waakhula hai? Mweeparipari mwaahaala oloca wi munneemererya wi Yehova ti Mpatusa ni mmoha yoowo onanivaha ekumi. Akhweyatho mwaahaala oloca wi munnamweemererya Yesu Kristu, yoowo okhwile ntoko woopola. Moohikhwa minikwa mwaahaala oloca sa Parataiso omwaahiyu veelaponi, mwemmo achu a Muluku anahaalaaya okhalano ekumi yoohimala. Nyenya apwanne mwaahaala oromola sa ovinya mookhwani ntoko emoha ya soororomela sanyu munacicimiheryaanyu vancipale?

² Nookhalano mathowa aphaama a ophitaanyerya ovinya mookhwani ntoko yoororomela ahu yookhweleya, naamwi niweheryaka ovuluwa mu ekoi etokotoko ni okhalano ekumi yoohimala veelaponi. Murummwa Paulo aahooniherya ntakhara heeni ovinya mookhwani oryaaya wookhweleya. Owo aaloca: “Atxhu òkhwa yahivinyaka mokhwani, vanonto  Kristu havinyaletho mokhwani.” Waakhanle wi Yesu haviihiwe mookhwani, owo haahaala olamulelaka ntoko Mwene wirimu, nave muteko ahu woolaleerya hiwaahaala okhalano mphurelo. (Mwaalakhanye 1 Korinto 15:12-19.) Nyenya, noosuwela wi Yesu ooviihiwa mookhwani. Woona wi ninneemererya ovinya wawe mookhwani, hanri ntoko Asatuki, yaawo yaakhooca wi honaweryeya achu ookhwa okookela okhala wanaawiili. Naamwi akina enaakaahaka, nroromelo nahu nawi Muluku onanwerya waaviiha achu ookhwa ninnatitelela okhala noolipa.​—Marko 12:18; Saweriwa T’arummwa 4:2, 3; 17:32; 23:6-8.

³ Paulo olonce wi nihusiheryo na “ovinya mokhwani” naari nikupa na “mahusiho òkhweleya a Kristu.” (Ahebri 6:1, 2) Owo aahiceenyerya ovinya mookhwani ntoko echu aaroromeleiye. (Saweriwa T’arummwa 24:10, 15, 24, 25, Nlakano Nahihano) Naamwi nri nihusiheryo noopacerya nnahuseryaahu Mmasu a Muluku, nlelo ti woochuneya ohuserya moomaaleleya vooloca sa ovinya mookhwani. (Ahebri 5:12) Ntakhara heeni?

4. Makoho taani akhweya nnapakaahu vooloca sa ovinya mookhwani?

⁴ Vaavaa achu anapaceryaaya omuhuserya Piipiliya, awo wiiliwiili annaalakhanya saweereya sa ovinya mookhwani wa khalai, ntoko wa Lasaro. Awotho annahuserya wi Aparahamu, Yupu, ni Taniyeli yaanaroromela wi omwaahiyu achu ookhwa anamukookela okhala. Naamwi hiiha, tiheeni munahaalaanyu oloca wakhala wi moovekiwa wooniherye Mpiipiliyani ntakhara heeni ninnaroromela yoolaiherya ya ovinya mookhwani epakiwe iyaakha masana masaneene muculi? Nave apwanne Piipiliya onnaloca ti liini ovinya mookhwani woomwaahiyu oneeraaya weereye? Maakhulo a makoho yaala anahaala olipiha nroromelo nahu.

5. Tiheeni nneeraahu nthokororye voopacerya?

⁵ Enamukhala yookhweya wa hiyaano omwaanyiherya muchu akookelaka okhala mukumi ahilekenle mmahiyeni. (Yohani 11:11; Saweriwa T’arummwa 20:9, 10) Apwanne nnanwerya ororomela yoolaiherya yawi muchu onahaala oviihiwa mookhwani naamwi ivinrevo masana a iyaakha, omwaahiyu? Apwanne nnawerya ororomela moohipwacha waakhanle wi oviihiwe muchu yoowo okhwile evinrevo elukuluku yincipale naari okhwile hiihaanoru? Nyuwaano munneemererya ovinya mookhwani yoowo weeren’ye iyaakha masana masaneene omanle olaiheryiwa. Ovinya taani mookhwani nnalocaahu? Nave eyo eniiwanana hai ni ewehereryo anyu ya ovinya mookhwani woomwaahiyu?

6. Yesu aavoloweliwe hai mu okhwaanela wa Salumu 118?

⁶ Nimpharihelaka Salumu 118, yoowo akhweya orepiwe ni Tavite, hankooni nthokororye ovinya mookhwani yoowo waaloheryiwe iyaakha sincipale muculi. Salumu ola onnaphitaanyerya masu: “Munivahe, Pwiya, nivuluso nanyu,” ni “Atxitximihiwe yole onarwa mwa nsina n’Apwiya [Yehova].” Achu yaahipharihela yooloherya yeela vooloca sa Mesiya vaavaa Yesu aavolonweiye mu Yerusalemu mu 9 a Nisani, mahiku vakhaani ahaakumve okhwa. (Salumu 118:25, 26; Mateu 21:7-9) Nyenya Salumu 118 onaloca hai sa ovinya mookhwani yoowo waahaala weereya iyaakha sincipale ohoolo? Moone  echu ekina namarepa a Salumu olonceiye: “Nluku nthanyiwe t’alipa òteka empa, nòkhala nluku na vamuruwoni.”​—Salumu 118:22.

7. Ayuta yaamukhonce hai Yesu?

⁷ “Alipa òteka empa” yaawo yaamukhonce Mesiya yaari ahooleli a Ayuta. Awo yaahipaka sincipale opwaha pahiru omukhooca Yesu naari okhooca omweemererya ntoko Kristu. Ayuta ancipale yaahimukhooca moorweela wa omuruma Pilato wi amuthomeye. (Luka 23:18-23) Mweeparipari, awo ti yeerinhe wi Yesu iiphiwe.

8. Yesu ii akhale hai “nluku na vamuruwoni”?

⁸ Vanonto, woona wi Yesu aahikhoociwa nave iiphiwa, aahaala okhala hai “nluku na vamuruwoni”? Eyo yaahaala weereya pahiru wakhala wi ooviihiwa mookhwani. Yesu aahooniherya mookwakwaleya vaavaa aalonceiye niphwanaphwaniho na mulipa a emaca yoowo aarumme amulapeli awe wa anamalapa a emaca awe. Anamalapa yaahaamana amulapeli oothene. Ohoolo waya, mulipa emaca aahimurumiha mwanawe ookhweleya, aweheryaka wi anamalapa yaahaala omucicimiha. Nto awo yaahimphakanela nave emwiipha. Amanle oloca sa niphwanaphwaniho nla, Yesu aahiromola yooloherya ya Salumu 118:22. (Luka 20:9-17) Murummwa Petro aahipharihela eciciri emohamoha vaavaa aalonceiye wi “yàthukumana o Yerusalemu asitokwene a Ayuda, asitokwene a nloko ni alipa òrepa.” Owo aaloca sa “Yesu Kristu o Nazaré, mmuthomen’yanyu va [mwirini] ni Muluku onvinyin’heiye mokhwani.” Voocharela owo aahiloca: “Yesu ola ti ‘nluku nnyemuliwe ti nyuwano alipa òteka empa, nto nòkòka nikhala nluku nipharenle empa.’”​—Saweriwa T’arummwa 3:15; 4:5-11; 1 Pedro 2:5-7.

9. Yaweereya taani etokweene yaaloheryiwe mu Salumu 118:22?

⁹ Mweeparipari, yooloherya ya Salumu 118:22 yaahiloherya sa ovinya mookhwani waahaala weereya iyaakha masana ohoolo. Mesiya aahaala okhoociwa ni wiiphiwa. Nyenya owo aahaala oviihiwa mookhwani nave aahaala okhala nluku na vamuruwoni. Woona wi aahiviihiwa mookhwani, Yesu aahikhala mmoha yoowo ori oophwanelela waavulusa achu. Ti nthowa nene Piipiliya onaloceiye wi, “vathiva hinavo nsina nikina nivahiwe atxhu wi hiyo nivuluwele.”—Saweriwa T’arummwa 4:12; Éfeso 1:20.

10. (1) Yooloherya taani enaphwanyeya va Salumu 16:10? (2) Ntakhara heeni nnanwerya oloca wi Salumu 16:10 hanamuloca Tavite?

¹⁰ Hankooni nthokororye eciciri ekina enaloca sa ovinya mookhwani. Eyo yaakhwaanenle opwaha iyaakha macikhwi ohoolo waya. Yaweereya yeela enaphwanela onivaha nroromelo wi ovinya mookhwani  onahaala weereya naamwi evinrevo elukuluku yincipale eloheryiwe naari elaiheryiwe. Mu Salumu 16, ninnaalakhanya masu a Tavite: “Ntakhara himukinyanyala munihiyeni, nari himwera wi nthamwene anyu ùtxele mmahiyeni.” (Salumu 16:10) Tavite haachuna oloca wi owo haki akhwe ni okhala mmahiyeni. Masu a Muluku annaloca mookwakwaleya wi Tavite aahuuluvala nave “àkhwa ni àvithiwa va Epoma ya Davide.” (1 Mamwene 2:1, 10) Vanonto, yoorepa ela enamuloca aani?

11. Ti liini Petro aatharinheiye yooloherya ya Salumu 16:10?

¹¹ Opwaha iyaakha ncikhwi amanle Tavite orepa masu yaale, Petro aahimuloca yoowo Salumu 16:10 aamuthoonyeiye. Isumana vakhaani Yesu amanle okhwa nave aviihiwa, Petro aahiloca wa macikhwi a Ayuta yaakhala o Yerusalemu ni akina yaakhala mu ilapo ikina. (Mwaalakhanye Saweriwa T’arummwa 2:29-32, NN.) Owo aahiwuupuxerya wi Tavite aahikhwa nave avithiwa. Nave Piipiliya hanaloca wi ookhala muchu amvannye Petro vaavaa aaceerenreiye wi Tavite “alocha sa ovinya’tho wa Kristu.”

12. Salumu 16:10 okhwaanenle hai, nave eyo enaroromeliha eheeni vooloca sa ovinya mookhwani wa muhoolo?

¹² Petro aahikhaviherya mwaha yoola moorweela wa oromola masu a Tavite mu Salumu 110:1. (Mwaalakhanye Saweriwa T’arummwa 2:33-36, NN.) Othokororya wa Petro orweela mu Soorempwa waahikhaviherya muloko wa achu wi Yesu aari “Apwiya Kristu.” Achu yaahisuwela wi Salumu 16:10 aahikhwaanela vaavaa Yesu aaviihiweiye mookhwani. Ohoolo waya, murummwa Paulo aahipharihela yawooniherya emohamoha vaavaa aalonceiye wa Ayuta o epooma yo Antiyokeya o Pisitiya. Yawooniherya ela chiryene yaahaatikhiniha, nave awo yaanachuna owiriyana sincipale. (Mwaalakhanye Saweriwa T’arummwa 13:32-37, 42.) Eyotho enaphwanela oniroromeliha wi sooloherya seiye sa Mpiipiliyani vooloca sa ovinya mookhwani woomwaahiyu saari seeparipari naamwi iho saakhwaanenle iyaakha masana ohoolo.

13. Makoho taani akhweya nniipakelaahu vooloca sa ovinya mookhwani?

¹³ Ti yoolipiha osuwela wi ovinya mookhwani ti wooweryeya naamwi oloheriwe iyaakha masana masaneene. Nlelo akhweya akina annakoha: ‘Apwanne eyo enataphulela wi kinaphwanela owehererya elukuluku yincipale wi kimoone oosiveliwaaka? Ovinya mookhwani onahaala weereya liini?’ Phaameene, Yesu aahaaleela arummwa awe wi sookhalavo ichu awo yahaasuwelaaya nave yeeraaya ehisuwele. Sookhalavo sikina vooloca sa “osuwela mahiku Atithi athanlelaya mokhwelani mwaya.” (Saweriwa T’arummwa 1:6, 7; Yohani 16:12) Nyenya, nookhalano sooleeliherya sikina vooloca sa ti liini ovinya mookhwani onahaalaaya weereya.

14. Ovinya mookhwani wa Yesu ohiyanne hai ni wa akina yaaviihiwe owo ahaakumve?

¹⁴ Ovinya mookhwani wookhweleya onalociwa Mpiipiliya, ovinya mookhwani wa Yesu. Waakhanle wi haviihiwe mookhwani, haavo muchu a hiyo aahaala okhalano ewehereryo ya owoona wanaawiili oosiveliwa ahu. Achu yaaviihiwe mookhwani ahaakumve Yesu orwa, ntoko yaale yaaviihiwe ni Eliya ni Eliseu, hakhanle okhala wookhala. Awo aakhwa wanaawiili ethatuwa nchupi  mmahiyeni. Nyenya Yesu “ovinnye mokhwani.” Owo “harwatho akhwa. Okhwa honan’weryatho.” Wirimu, owo “mukumi ophiyerya ilukuluku sa ilukuluku.”​—Aroma 6:9; Wupulula 1:5, 18; Kolosi 1:18; 1 Pedro 3:18.

15. Ntakhara heeni Yesu oniichaniweiye “òpatxerya”?

¹⁵ Ovinya mookhwani wa Yesu wa oya wirimu ntoko muchu oomunepani waari woopacerya wa mukhalelo wookhweleyaxa. (Saweriwa T’arummwa 26:23) Nyenya, owo hari meekheiye oviihiwe mookhwani wi aye wirimu. Yesu aahaalaiherya arummwa awe oororomeleya wi yaahaala olamulela vamoha wirimu. (Luka 22:28-30) Nyenya awo anaakhela nchuwelo nenla pahiru emanle okhwa. Voocharela, moolikana ni Yesu, awo anaviihiwa mookhwani ni mwiili woomunepani. Paulo aahirepa wi “Kristu òvinya mokhwani, òpatxerya wa yale arumpe.” Paulo voocharela aahiloca wi yaahaala okhalavo akina yaawo yaahaala oviihiwa mookhwani wi eye wirimu: “Mutxhu ti mutxhu ntoko onaphwaneleiye: òpatxerya Kristu, otxuli wawe ale ari a Kristu nihiku norwa nawe.”​—1 Korinto 15:20, 23.

16. Yawooniherya taani nryaahuno vooloca sa ti liini ovinya mookhwani wa oya wirimu onahaalaaya weereye?

¹⁶ Masu a Paulo annanivaha yawooniherya vooloca sa ti liini ovinya mookhwani wa oya wirimu oneeraaya weereye. Onahaala weereya variyari va orwa wa Kristu. Ovinyerya khalai, Anamoona a Yehova annooniherya orweela Mpiipiliyani wi ‘orwa’ wa Kristu opacenrye mu 1914. Hiyaano nnakhala variyari va ‘orwa’ wawe, nave makuchuwelo a elapo yeela yoonanara aatepa waacamela.

17, 18. Tiheeni eni yeereye ni oothanliwa akina variyari va orwa wa Kristu?

¹⁷ Piipiliya onnathariha sincipale vooloca sa ovinya mookhwani wa oya wirimu: “Hinnakhwela wi muhisuwele mwaha wa alipa òkhwa . . . Ntoko nnemereryahu wi Yesu Kristu òkhwa ni òvinya mokhwani, hihatho Muluku onamwathukumanya ni vaiye yale anarupa mwa Yesu . . . Hiyo nri akumi nave nni nikhalevo vorwani wa Apwiya, hanrwa naholela yale arumpe. Eparipari wa nlamulo . . . Apwiya anene anamukhuruwa wirimu nave atxhu akhwile mwa Kristu, t’eni epatxerye ovinya mokhwani. Oholo waya, hiyo nri akumi, nave nni nikhalevo vamoha ni yawo, nnamukerihiwa mmekuni wi nakumane ni Apwiya, wirimu. Hiha nnamukhala mahiku othene ni Apwiya.”​—1 Tesalónika 4:13-17.

¹⁸ Ovinya mookhwani woopacerya, waahaala weereya epacenrye elukuluku ya orwa wa Kristu. Oothanliwa yaawo eni ekhale variyari va ekoi etokotoko, anahaala ‘okerihiwa mmekuni.’ Eyo enataphulela eheeni? ‘Okerihiwa mmekuni’, tahi wi ‘anaya okhwa,’ eyo tiwi, heni ekhale mmahiyeni mu elukuluku yincipale. Opwaha yeeyo, vaavaa anakhwaaya, awo anaya “otatusiwa, mwa elukuluku emoha, mwa waphila wa nitho ni oruma wa nipetxa nomaliherya.”​—1 Korinto 15:51, 52; Mateu 24:31.

19. “Ovinya mokhwani waphamasa” tiheeni?

¹⁹ Olelo, Akristu ancipale tahi oothanliwa nave hathanliwe wi elamulele ni Kristu wirimu. Moohiyana, awo anaweherya “nihiku na Apwiya,” vaavaa oneereiye atoloxe elapo yeela yoonanara. Haavo muchu onasuwela mweeparipari ti liini makuchuwelo anahaalaaya ophiya, nyenya enakhala yawooneya wi ari vakhiviru. (1 Tesalónika 5:1-3) Vaavaa enaphiyaaya elapo evyaani ya Muluku, onahaala okhalavo mukhalelo woohiyana wa ovinya mookhwani. Mu elukuluku  yeeyo, achu anahaala oviihiwa mookhwani wi ekhale veelaponi yavathi nave anahala okhalano ewehereryo ya okhala oophaameya nave herwa ekhwa wanaawiili. Ola onahaala okhala “ovinya mokhwani waphamasa” opwaha yaale yaaviihiwe khalai evinyaka ekhwa.—Ahebri 11:35.

20. Ntakhara heeni ninnaroromela wi ovinya mookhwani onahaala okhala wooreheryeya?

²⁰ Piipiliya onaloca wi yaale anaya wirimu anaviihiwa mookhwani “mutxhu ti mutxhu ntoko onaphwaneleiye.” (1 Korinto 15:23) Mwawiihiiha nnanwerya ororomela wi ovinya mookhwani wa veelaponi yavathi onahaala okhala wooreheryeya. Eyo akhweya enamuneeriha wiikoha: Apwanne yaale akhwile hiihaanoru anahaala oviihiwa mookhwani omapacereryo wa Iyaakha Masanaru Khumi wa Olamulelo wa Kristu ni waakheliwa ni oosiveliwaaya aasuwenle yaawo? Apwanne alopwana oororomeleya a akhalai yaawo yaarino mavyakelo tenahaala opacerya oviihiwa wi ekhaviherye waarehererya achu a Muluku mu elapo evyaani? Tiheeni eni yeereye ni achu ahintonko omurumeela Yehova? Ti liini nave ti woowi aneeraaya eviihiwe mookhwani? Aakhalawo makoho mancipale naahaalaahu opaka. Nyenya hannaphwanela okhala awoova vooloca sa ichu seiya hiihaano. Pahiru ti yaphaama oweherya ni woona. Ninnaroromela wi enahaala okhala echu yootikhiniha woona mukhalelo Yehova onahaaleiye opaka ichu seiya.

21. Ewehereryo anyu teevi?

²¹ Ophiyerya nihiku nenlo, nnaphwanela olipiha nroromelo nahu mwa Yehova. Owo oolaiherya moorweela wa Yesu wi alipa ookhwa ari [mmuupuweloni, Tradução do Novo Mundo] Mwawe anahaala okookela okhala. (Yohani 5:28, 29; 11:23) Yawooniherya yawaaceererya wi Yehova onahaala waaviiha achu ookhwa, Yesu ekwaha emoha aahiloca wi Aparahamu, Isaki, ni Yupu “othene àkhala mwa yowo.” (Luka 20:37, 38) Chiryene, nookhalano mathowa mancipale aphaama a oloca, hiiha ntoko murummwa Paulo aalonceiye: ‘Kokhalano yoweheryerya . . . wi onarwa-okhala ovinya’tho.’​—Saweriwa T’arummwa 24:15, NN.