1. Ntakhara heeni opatiso yaweereya yookhweleya? (Moone eruku yoopacerya.)

EYAAKHA ti eyaakha macikhwi a oohuserya a Piipiliya annapatisiwa. Ancipale a yaawo maponkwe, anahano, amiravo ni asimwali. Awo akhweya aphuiwale mu eparipari. Apwanne mwa mmoha a yaawo? Waakhanle wi aai, moopaka echu yaphaamaxa. Mukristu ti Mukristu onaphwanela opatisiwa. Nave opatiso ti woochuneya wi avulusiwe ni okhalano ekumi yoohimala.​—Mateu 28:19, 20; 1 Pedro 3:21.

2. Ntakhara heeni hamunaphwanela okhala awoova wiiveleela wa Yehova?

² Vaavaa mwaapatisiwaanyu, Yehova aahipacerya wooreelihaani mmikhalelo mincipale mivyaani. Nyenya nyuwotho mwaahikhalano mirici mivyaani. Mmukhalelo taani? Mu nihiku na opatiso anyu, munna aperenkhe mwaha wa opatiso aahikoha: “Mu mathipelo a mukucho wa Yesu Kristu, moocharuwa soocheka  sanyu, nave mohiiveleela mukhatiinyu wa Yehova wi mweere yookhwela awe?” Nyuwaano mwaakhunle aa. Mwaahiroromeliha omusivela Yehova nave mweeriha wi omurumeela wanyu yene ekhale echu yookhweleya mu okumi anyu. Apwanne munnaphwanela okhalano ekeerelani mu opaka nlakano ntoko nenlo? Mweeparipari hooye! Hamurwa mukhalano ekeerelani omuhiya Yehova ohoolela okumi anyu. Yaale ahimusuwenle Yehova anapaka makupa a elapo ya Satana. Musaserya hanaakhapelela ophitaanyerya oothene nyuwo. Chiryene, owo onahaala ohakalala wakhala wi mooyeleela ewehereryo anyu ya okhala wookhala nthowa nawi muri mmakupa awe ni omukhooca Yehova.

3. Yehova ooreelinheeni hai nthowa na wiiveleela wa yene?

³ Muupuwele mukhalelo Yehova ooreelinheiyeni nthowa na wiiveleela wa yene ni opatisiwa. Mooveleela okumi anyu wa Yehova, wa nthowa nenla munanwerya oloca mwa nroromelo: “Apwiya ari ni miyo, nkinova; tiseni onereiye akèrele mutxhu?” (Salumu 118:6) Hiwaavo ohakalala otokweene opwaha okhala mmakupa a Muluku ni osuwela wi owo onniirumiha ni nyuwaano.

4, 5. (1) Ntakhara heeni nnalocaahu wi wiiveleela wa Yehova murici wa muchu mukhateiye? (2) Makacamiho taani Akristu a iyaakha soothene anakhalaayano?

⁴ Ntoko Mukristu oopatisiwa, onthamwene anyu ni Yehova hori ntoko muhakhu wa emusi naari emaca yeeyo muhiyeriwaanyu. Naamwi waakhanle wi munakhala ni asitiithi anyu, onthamwene anyu ni Yehova murici anyu mukhatiinyu. Ntakhara heeni oryaaya wookhweleya wuupuwelela yeela? Haavo a hiyo onasuwela mukhalelo nroromelo nahu nnahaalaaya weehiwa omwaahiyu. Ntoko yootakiherya, akhweya mpatisiwe muhaakumve okhala mmiravo naari mwali. Nyenya vano muryaanyu mmiravo naari mwali, mookhalano miyoonelo mivyaani ni makacamiho mavyaani. Mwali mmoha ooloca: “Mwaana wiiliwiili haahaala okhooca okhala Namoona a Yehova pahiru nthowa nawi haanono epoolu osikola nihiku oyariweiye. Nyenya voovira wa iyaakha, vaavaa nchuno na okonihana nnakhalaaya noolipa, owo onaphwanela okhala oolekecheya wi wiiwelela malamulo a Yehova wiiliwiili yoothanla yaphaama.”

⁵ Tahi pahi amiravo ni asimwali anahaala okumanano makacamiho mavyaani. Ophiyerya wi yaale apatisiwe eri atokweene nroromelo naya naaheehiwa mmikhalelo awo yahiweheryaaya. Saweeha saya saarweela mu othela waya, okumi aya, naari mmuteko aya. Moohipwacha iyaakha nryaahuno, muchu ti muchu a hiyo onaphwanela okhalano nroromelo mwa Yehova mmikhalelo soohiyana hiyana.​—Tiyako 1:12-14.

6. (1) Tiheeni munaphwanelaanyu wuupuwelela vooloca sa wiiveleela wanyu? (2) Tiheeni munahuseryaanyu orweela mu Filipi 4:11-13?

⁶ Wi yookhaviheryeeni okhala oororomeleya, mahiku oothene muupuwelele wi muroromelinhe omurumeela Aikuru Soothene moohipwacha yeeyo eni yeereye, naamwi wakhala wi asinthamwene naari asitiithi anyu aamaala weerano yeeyo. (Salumu 27:10) Mmikhalelo soothene, mumveke Yehova wi ookhaviheryeeni okhwaaniherya yoororomeliha anyu wa yoowo.​—Mwaalakhanye Filipi 4:11-13.

7. Enataphulela eheeni ophara “muteko aya wovulushiwa wanyu va wova, ni othukumela”?

⁷ Yehova onachuna wi mukhale nthamwene awe. Nyenya onnachuneya wiilipixerya wi mulipihe onthamwene yoowo ni ophara muteko aya woovulisiwa wanyu. Ophiyerya wi mu Filipi 2:12, NN Piipiliya onnaloca:  “Pharani muteko aya wovulushiwa wanyu va wova, ni othukumela.” Ela enataphulela wi nnaphwanela wuupuwelela mweephoole vooloca sa mukhalelo nneeraahu nikhale vakhiviru va Yehova ni otitelela ororomeleya moohipwacha yeeyo eni yeereye. Hannaphwanela wiimoona oloca pahiru wi nnahaala weerano hiiha. Muupuwele wi akina yaawo yaamurumeela Muluku mu iyaakha sincipale hiyaatitelenle ororomeleya. Mikhalelo taani saphaama sinahaala wookhaviheryaani ophara muteko aya woovulisiwa wanyu?

8. Yoohuserya ya muchu mukhateiye enavolowela eheeni? Ntakhara heeni eryaaya yookhweleya?

⁸ Wi nikhale asinthamwene a Yehova, ti woochuneya onwiriyana ni olocano. Mukhalelo wookhweleya wa onwiriyana Yehova ori omuhuserya Piipiliya. Eyo enaphitaanyerya waalakhanya ni wuupuwelela Masu a Muluku ni soolaleeryiwa sinathipeleya Mpiipiliyani. Nyenya omuhuserya Piipiliya hori ntoko okhapelela mmuupuweloni saweereya ntoko wi nnapaka eporova osikola. Moohiyana, enakhala ntoko mukwaha wootikhiniha muneeraanyu muthole ni ophwanya ichu ivyaani vooloca sa Yehova. Munahaala omwaacamela Muluku, nave owotho onahaala owaacamelani.​—Tiyako 4:8.

9. Ikaruma taani sookhavihenryeni mu yoohuserya anyu ya muchu mukhateiye?

⁹ Marehereryo a Yehova annavahererya ikaruma sincipale sini sookhaviheryeeni mu yoohuserya anyu. Ntoko yootakiherya, aakhala makupa aniichaniwa “Exercícios Bíblicos” mu nikupa “Adolescentes” mu jw.org wi yookhaviheryeeni opharihela yeeyo muhusenryaanyu orweela wa saweereya  sa Mpiipiliya. Navetho mu jw.org, munanwerya ophwanya Guia de Estudo “O Que a Bíblia Realmente Ensina?” Ikaruma iha sinanwerya wookhaviheryaani oteka nroromelo nanyu ni othariha soororomela sanyu wa akina. Munanwerya ophwanya ichu ikina wi mpharihele mu yoohuseraanyu ya muchu mukhateiye mmwaha “Os Jovens Perguntam . . . Como tornar a leitura da Bíblia agradável?” mu Despertai! Apirili a 2009, (a ekunya). Ohuserya ni wuupuwelela ti wookhweleya wi mphare muteko aya woovulusiwa wanyu.​—Mwaalakhanye Salumu 119:105.

10. Ntakhara heeni Mukristu opatisiwe onnaphwanela ovekela?

¹⁰ Vaavaa nnamuhuseryaahu Piipiliya, onwiriyana Yehova, ni vaavaa nnavekelaahu, nnaloca wa yoowo. Nihooneke ovekela pahiru ntoko yookhovelela naari ntoko echu ‘enaneeriha okhalano ekari’ ya okhumelela phaama. Ovekela ori chiryene oloca ni Mpatusa ahu. Muupuwele: Yehova onachuna wiiwa yeeyo munachunaanyu oloca! (Mwaalakhanye Filipi 4:6.) Mwawiihiiha vaavaa munakhalaanyu ooteteiwa mu echu vyakala, Piipiliya onnaloca wi “mwàreye Apwiya miritxi sanyu.” (Salumu 55:23) Anna ni arokora ancipale ananwerya wooleelaani wi ekano ela yaahaakhaviherya. Eyotho enamookhaviheryani!

11. Ntakhara heeni munnaphwanela mahiku oothene omuthamalela Yehova?

¹¹ Nyenya hannaphwanela ovekela pahiru vaavaa nnachunaahu wi Yehova anikhaviherye. Piipiliya onnanuupuserya: “Khalani atxhu òthamala.” (Kolosi 3:15) Ikwaha ikina ninnoova vancipale vooloca sa makacamiho ahu ophiyerya ohoona ichu soothene saphaama nryaahuno. Vano mweererye ela: Mahiku oothene, muupuwele ichu chaaru munathamalelaanyu, nave voocharela mmuthamalele Yehova wa seiyo. Mwali oniichaniwa Apikayeli, yoowo opatisiwe arino iyaakha 12, ooloca: “Kinnoona wi Yehova onnaphwanela othamaleliwa vancipale ompwaha muchu mukina mweelaponi. Nnaphwanela omuthamalela mu ikari soothene wa samahala owo onanivaheiye.” Ilukuluku ikina, Apikayeli onniipakela nikoho nla iiwaleiye vanihikuni: ‘Wakhala wi koohuhumuwa omeelo woosiiselo nave kisuwela wi kooyeleela ichu kihimuthamalenlaaka Yehova olelo, echu taani chiryene kaahaalaaka okhalano?’

12, 13. Mu yaweereya anyu nwenrye hai woona oreera murima wa Yehova, nave ntakhara heeni ti yaphaama wuupuwelela vooloca sa mukhalelo ookhavihenryeiyeni?

¹² Yehova aahimukhaviherya Mwene Tavite ovilela mikhalelo mincipale soovila. Mwawiihiiha Tavite aaloca sa yaweereya awe vaavaa aalonceiye: “Ereryani ni onani Apwiya orèra waya murima; òrèriwa ti mutxhu onatxhawela wa yawo.” (Salumu 34:9) Eciciri ela ennanooniherya wi nnaphwanela weererya oreera murima wa Yehova mookumini mwahu. Vaavaa munamwaalakhanyaanyu Piipiliya ni soolaleeryiwa sahu ni ophwanyeya mmithukumano sahu, munnahuserya  mukhalelo Muluku aakhavihenryeiye akina okhala oororomeleya. Nyenya vaavaa onthamwene anyu ni Yehova onakhalaaya woolipa, munaphwanela woona mukhalelo Yehova onookhaviheryeiyeni. Mu yaweereya anyu nwenrye hai woona oreera murima wa Yehova?

¹³ Mukristu ti Mukristu onnoona oreera murima wa Yehova mmukhalelo wavameekhaaya. Owo onnanwopa mmoha ti mmoha a hiyo, omwaacamela vamoha ni Mwanawe. Yesu ooloca: “Havo onawerya orwa wa miyo, Atithi akirumme ehimuthanlile.” (Yohani 6:44) Apwanne munnoona wi Yehova ohoothanlaani? Naari munuupuwela wi, ‘Yehova aathanlile asitiithi aka nave miyaano pahiru kinamwaachara’? Muupuwele wi vaavaa mwiiveleenlaanyu wa Yehova ni mpatisiwa, nyuwaano mwaahikhalano onthamwene wavameekhaaya ni yoowo. Piipiliya onnanleela: “Nto mutxhu onamukhwela Muluku, onnasuweliwa ti Muluku yowo.” (1 Korinto 8:3) Mahiku oothene mvaheke esisapo mpuro Yehova oovanheiyeni mmarehereryo awe.

14, 15. Muteko woolaleerya oni wookhaviheryeeni hai okhalano nroromelo noolipa?

¹⁴ Nyuwaanotho munneererya oreera murima wa Yehova vaavaa onoovaheiyeeni olipa murima wi muloce sa nroromelo nanyu wa akina, mmuteko woolaleerya naari osikola. Onamukhala woovila waalaleerya asinthamwene anyu ooxikola. Akhweya munamoova mukhalelo eneeraaya ewaakhuleeni. Enamukhala xaxaxa yoovila othariha soororomela sanyu vamiithoni va achu ancipale. Tiheeni eni yookhaviheryeeni?

¹⁵ Muupuwele vooloca sa ntakhara heeni munneemererya yeeyo muneemereryaanyu. Wakhala wi Guia de estudo iri mu jw.org sinnaphwanyeya mu elocelo anyu, munaphwanela opharihela. Iho sinanwerya wookhaviheryaani wuupuwela vooloca sa yeeyo muneemereryaanyu, ntakhara heeni munneemererya, ni mukhalelo muneeraanyu mutharihe soororomela sanyu wa akina. Vaavaa munakhalaanyu oolekecheya ni ooreheryeya phaama, munahaala ochuna ovaha onamoona vooloca sa Yehova.—Yeremiya 20:8, 9.

16. Tiheeni eni yoovaheeni olipa murima wi muloce soororomela sanyu?

¹⁶ Naamwi mwiireherenrye phaama, nlelo munamukhala awuukhuwa vooloca sa othariha soororomela sanyu. Murokora mmoha a iyaakha 18 yoowo aapatisiwe arino iyaakha 13, ooloca: “Kinnasuwela yeeyo kinaroromelaaka, nyenya ilukuluku ikina kinnawaniha ohela muupuwelo aka mmasu.” Mwawiihiiha owo onneererya oloca eparipari mmukhalelo woophwanelela ni mootaphuwa. Owo ooloca: “Asinthamwene aka analoca mootaphuwa ichu awo anapakaaya. Kinnakhalatho ootaphuwa opaka emohamoha. Variyari va ovaanela, kinnaloca echu emoha ntoko ela: ‘Nihiku nimoha keeciha yoohuserya ya Piipiliya nave . . . ’ voocharela kinnatitelela ni echu yeeyo kaachunaaka oloca. Eparipari wi vaavaa kinapakaaka yeeyo, nkinaloca mooluluwanya vooloca sa Piipiliya. Nyenya ikwaha ikina asinthamwene aka ooxikola annakhwela osuwela nave annakoha yeeyo eneereya va yoohuserya ni ichu ikina. Vaavaa kineerakano eyo, ennakhala yookhweya. Nave owerya ovaha onamoona ennakihakalaliha!”

17. Echu taani ekina eni yookhaviheryeeni oloca ni akina?

 ¹⁷ Vaavaa akina anoonaaya wi munnaapwacha ni waacicimiha, enakhala yookhweya awo woocicimihaani vamoha ni soororomela sanyu. Olivia, yoowo orino iyaakha 17 nave opatisiwe vaavaa aareiye nahano, ooloca: “Wiiliwiili vaavaa kaavaanelaaka kaanoova omuromola Piipiliya woona wi achu yaahaala okoona ntoko muchu onasiveliwano pahiru ni Piipiliya.” Voocharela aapacerya woona ichu mmukhalelo woohiyana. Ohiya wuupuwelela vancipale vooloca sa woova wawe, owo aahuupuwela: “Amiravo ni asimwali ancipale hasuwenle echu vooloca sa Anamoona a Yehova. Hiyaano pahiru na Anamoona veeri vaya. Mwawiihiiha mukhalelo nnapakaahu ichu enahaala wooniherya waakhanle wi anahaala waakhulela. Hanka wakhala wi ninnuuliwa muru naari nookhalano makacamiho a oloca sa nroromelo nahu, naari wakhala wi ninnoovelela yeeyo nnalocaahu? Voocharela awo akhweya anamunoona wi hinnacicimiherya yeeyo nryaahu. Awo akhweya heni yaakhulele phaama nthowa na oyeleela wahu ororomela. Nyenya, wakhala wi nnaloca mookhweya ni mwa nroromelo sa yeeyo nnaroromelaahu, neerihaka okhala makupa a ovaanela wahu, ti yawooneya wi awo anahaala oncicimihaka.”

18. Tiheeni munaphwanelaanyu opaka wi mphare muteko aya wa ovulusiwa wanyu?

¹⁸ Nohoona wi murici mutokweene ophara muteko aya wa ovulusiwa wanyu. Wi mweereno yeeyo, munaphwanela waalakhanya ni wuupuwelela Masu a Muluku, ovekela wa Yehova, ni wuupuwela mwawiiseela vooloca sa mikhalelo soothene ookhavihenreiyeni mukhatiinyu. Weerano ichu seiya sinahaala wookhaviheryaani ororomela vancipale wi Yehova ti Nthamwene anyu. Eyo enahaala oweerihaani ochuna oloca wa akina soororomela sanyu.​—Mwaalakhanye Salumu 73:28.

19. Ntakhara heeni wiilipixerya vyakala wa ophara muteko wa ovulusiwa wanyu oryaaya woophwanelela?

¹⁹ Yesu ooloca: “Arivo mutxhu onakhwela okitxhara, apatxerye wikhotxa mukhateiye, akuse [mwiri] awe ni akitxharekeno.” (Mateu 16:24) Mweeparipari, wi nimuchare Yesu, Mukristu ori oothene onaphwanela wiiveleela wa Yehova ni opatisiwa. Nyenya ala pahiru mapacereryo a mukhalelo wa okumi woohakalaliha hiihaano, nave enahaala woohoolaani ophwanya okumi woohimala mu elapo evyaani ya Muluku. Mwawiihiiha mpake soothene munaweryaanyu wi mutitelele ophara muteko aya wa ovulusiwa wanyu!