Apwanne muhaalakhanya moopwacha irevista sa Mulipeleli a eyaakha yeela? Vano moone waakhanle wi munahaala owerya waakhula makoho anacharela:

Nnaphwanela waakhalihaka hai Akristu Oothanliwa ni munepa waweela?

Ninnathamalela ororomeleya waya; naamwi hiiha hinnaavaha ncicimiho moopwahaxa. Ninnasepa waavaha ncicimiho “moopwaha mphimo.” (Yuda 16) Hinnaakoha yaawo vooloca sa ewehereryo aya.—w20.01, epaax. 29.

Tiheeni enaphwanela woolekechaani nyuwo wi Yehova ohoosuwelaani?

Piipiliya onnooniherya wi Yehova, ahoosuwelaani muhaakumve oyariwa. Nave owo onnawiriyana mavekelo anyu. Owo onnasuwela mukhalelo munuupuwelaanyu ni yeeyo eri mmurimani mwanyu, nave meerelo anyu annamvolowela yoowo. (1 Math. 28:9; Masi. 27:11) Yehova onnawaacamelihaani wa yene.—w20.02, epaax. 12.

Sootakiherya taani inanikhaviherya osuwela elukuluku yooloca ni elukuluku ya Omaala?

Ninnasiveliwa oloca sa Yehova. Ninnaloca tho wakhala wi noomoona muchu apakaka echu yoohiphwanelela. Atokweene annaloca wi evahe ekano wakhala woochuneya. Hinnaloca wi ntharihe mookwakwaleya vooloca sa muteko ahu, mu ilapo seiho onakwatiihiwaayamo. Hannuupulula miyaha soovitheya.—w20.03, ipaax. 20-21.

Misope inalociwa mu Yoweli ekapitulu 2 inahiyana hai ni misope inalociwa mu Wupulula ekapitulu 9?

Yoweli 2:20-29 Onaloca wi Muluku onniikarela ocaiwene misope nave onnaroromeliha oliva seiho inanarinhaaya. Emanle weereya ela Muluku onnayeeherya munepa awe. Saweereya seiha, saakhwanenle vaavaa Apapulu yaamutolonxaaya Yerusalemu ni ohoolo waya. Wupulula 9:1-11 onnathariha sa misope seiho woonaru inaweemelela Akristu oothanliwa, yaawo analaleya othoriha wa Muluku ntakhara elapo yeela yoonanara, navetho muchaka aya onnawuukhula yaale anakhaviherya elapo yeela.—w20.04, ipaax.3-6.

Taani ori mwene oomokoni mmahiku ahu?

Rusiya ni akhaviheryi awe. Awo onnaavolowela moonanara achu a Muluku, ekhwatiihaka muteko ahu woolaleerya ni wooniherya wiica ntakhara Anamoona. Mwene oomokoni onnawanawana ni mwene oohico.—w20.05, epaax. 13.

Apwanne makhalelo analociwa mu Galasya 5:22, 23 tiyaaworu pahi anapaka makupa a “yawiima ya munepa”?

Hooye. Munepa waweela onnakhaviherya wunnuwiha makhalelo makina aphaama awaaceererya, ntoko wookololowa. (Éfe. 5:8, 9)—w20.06, epaax. 17.

Yawoopiha taani erivovo ya othomeya ichu sahu mu isaiti sa makhuuru?

Echu muthomenyaanyu mu esaiti enanwerya wooniherya wi mwa muchu awiirumiha ohiya awiiyeviha.—w20.07, ipaax.6-7.

Arummwa Eekristu tiheeni anaphwanelaaya ohuserya orweela wa mavyakelo a alipa oototha ihopa?

Awo annalapa mu nipuro nenlo anoonaaya wi annaphwanyawo ihopa. Awo anavyakihiwa wi ephariheleke ikaruma soophwanelela. Nave moolipa murima awo annalapa moohipwacha otorokeya wa mikhalelo. Nnanwerya weerano emohamoha mmuteko ahu woolaleerya.—w20.09, epaax.5.

Mmikhalelo taani mikina nneeraahu naakhaviherye oohuserya ahu a Piipiliya wunnuwiha osivela waya ntakhara Yehova?

Nnanwerya waaceenyerya yaawo wi emwaalakhanyeke Piipiliya nihiku ti nihiku ni wuupuwelela seiho aalakhannyaaya. Navetho nnanwerya waahusiha ovekela.—w20.11, epaax. 4.

Taani onaphitaanyeryiwa mmasu awi: “Mwa Kristu oothene anarwa evahiwa okumi”?—1 Kor. 15:22.

Murummwa Paulo haachuna oloca wi achu oothene enahaala oviihiwa mookhwani. Owo aawaaha Akristu oothanliwa yaawo ari aweelihiwa “mwa Kristu Yesu.” (1 Kor. 1:2; 15:18, BNM.)—w20.12, ipaax. 5-6.

Tiheeni oothanliwa ni munepa waweela anahaalaaya opaka yatatuxiwa “mu waaphila wa niitho, narumaru nipeca nookuchula”?—1 Kor. 15:51-53.

Awo anahaala okhala vamoha ni Kristu yaakukhulaka achu ni ekopo ya muthipo. (Wup. 2:26, 27)—w20.12, ipaax. 12-13.