Yehova aaloca wa Aisarayeli wi yaaphwanela okhala aweela. Nyenya wi aakhaviherye weerano yeeyo, owo aahaavaha malakiheryo anacharela: “Ohaaheleleke akhwaa; ohimootherye echu mukhwaa wi iiphiwe. Miyo ka Apwiya.”—Onam. 19:2, 16.

Masu awi “ohimootherye” otaphulela wookwakwaleya wa elocelo ya Ehepiri. Mano eyo enataphulela eheeni? Liivuru mmoha vooloca sa Onamukutxho ooloca: “Nikupa nenla na eversikulu . . . ti noovila wiiwexexa nthowa nawi ti woovila osuwela yeeyo enavolowelavo orweela wa masu a Ehepiri yaawo anataphulela ‘oheemela va, okhwipi naari vakhiviru.’”

Alipa oohuserya akina anuupuwela wi ela eniiwanana ni eversikulu 15, yeeyo eni: “Voothoriha muhihiye ekhayikhayi. Ohimweerele okhala oohaawa nari a muhakhu. Waathoriheke akhwaa mwawookololowa.” (Onam. 19:15) Waakhanle wi tihiiha, nlamulo nnaphwanyeya mu eversikulu 16 vooloca sa ‘ohimootherya muchu mukina’ yaahaala otaphulela opaka echu moohookololowa mmapuro oothoriha, mu anakoso, ni veemusini. Muisarayeli haaphwanela opaka echu moohookololowa wi iiphwanyerye echu naari ampuherye muchu mukina. Eparipari wi hannaphwanela weera ichu seiha, nyenya wookhalavo wiiwexexa wookwakwaleya mu masu a eversikulu 16. Moone wuupaceryani wa eversikulu 16.

Makupa yaala a eversikulu Yehova aaloca wi muchu haaphwanela oviraka variyari va achu amwaramwaxaka sawootha. Ti woochuneya wuupuwela wi wootha echu yawoopihaxa opwaha waaloca achu akina. (Masi. 10:19; Ekle. 10:12-14; 1 Tim. 5:11-15; Tiy. 3:6) Vaavaa muchu onootheiye owo oneerano mwaayiini wi ananarihe meecelo a muchu mukina. Mulipa awootha onanwerya oloca yeeyo ehiri yeeparipari vooloca sa muchu mukina. Naamwi owo asuwelaka wi eyo enanwerya omweeriha muchu owo wi iiphiwe. Yootakiherya ya yeeyo ti ya alopwana eeli yaawo yaamoothenrye Napoti nave eloca ichu seiho sahaari seeparipari. Anamoona yaale awootha yaaheeriha wi Napoti avonyiwe maluku ophiyerya okhwa. (1 Mam. 21:8-13) Ntoko enalociwaaya makupa anaawiili a Onamukutxho 19:16, mulipa awootha onnamwaramwasa sawootha wi muchu mukina iiphiwe.

Ohiya yeeyo, vaavaa muchu onamootheryeiye muchu mukina, eyo enooniherya wi owo onnamwiica yoowo. Mu 1 Yohani 3:15, ninnaalakhanya: “Muchu yoole onamwiica munnawe ori mulipa a wiipha nave moosuwela wi alipa a wiipha oothene hanakhalano okumi mwa yaawo.” Ti yawooneya wi Muluku amanle oloca wi ohimootheryeke mukhwaa, owo aaloca: “Ohimulupeke mukhwaa.”—Onam. 19:17.

Ti nthowa nene nlamulo nenla noohiyana ni Onamukutxho 19:16 nryaaya yoolopola wa Akristu. Nnaphwanela wiilipixerya wi nihikhaleno muupuwelo woohiphwanelela ophiyerya omootherya muchu mukina. Wakhala wi ‘noomootherya’ muchu mukina naari omulocela ichu soonanara nnahaala wooniherya wi ninnamwiica muchu yoowo mmurimani mwahu. Ntoko Akristu hiyaano hinnaphwanela weerano yeeyo.—Mat. 12:36, 37.