Wirimu, Yesu aahuserya mikhalelo seiho saamweerinhe owo okhala namalapa aphaama. Ohoolo waya, vaavaa aareiye veelaponi yavathi, owo aavaha yootakiherya yaphaama wa yaale yaalapa phaama ni akina. Nni niphure hai orweela wa yootakiherya ya Yesu? Moorweela wa othokororya yootakiherya awe nnanwerya ophwanya malakiheryo mararu yaawo anahaala onikhaviherya olapaka phaama ni akina. Malakiheryo yaala anahaala onikhaviherya okhala awiiwanana ni annihu.

Nthamwene aphaama oomutekoni tawiiyeviha. Owo onnawoona anamuteko akhwaawe okhala oochuneya nave haneererya wi awo emucicimiheke. Wiiyeviha yoola echu yeeyo Yesu aahusenryeiye wa Atiithi awe. Naamwi Yehova ori yooworu pahi onaphwanela wiichaniwa Mpatuxa, owo onachuna wi achu akina esuwele sa muteko woochuneya yoowo Mwanawe aapankeiye. Ninniiwexexa yeela wa yeeyo Muluku aalonceiye: “Nimpake muchu oolikana ni hiyo.” (Map. 1:26) Vaavaa Yehova aalonceiye masu yaala, Yesu aasuwela wi owo tawiiyevihaxa.—Sal. 18:35.

Vaavaa aareiye veelaponi yavathi, Yesu aahooniherya wiiyeviha woolikana. Vaavaa achu yaamucicimihaaya wa yeeyo aapakeiye, owo aamucicimiha Muluku. (Mar. 10:17, 18; Yoh. 7:15, 16) Yesu aaniilipixerya wi atikitherye murecele ni oohuserya awe nave aanawoona awo ntoko asinthamwene awe ohiya akapuro. (Yoh. 15:15) Ophiyerya wi owo aarapiha inaani saya wi aahusihe awo okhala awiiyeviha. (Yoh. 13:5, 12-14) Moolikana  ni yoowo, hiyaano tho nnaphwanela waacicimihaka asinthamwene ahu oomutekoni ohiya pahiru othokororya soochuna sahu. Nnanwerya opaka sincipale vaavaa ‘nnooniheryaahu ncicimiho mukina ni mukhwaawe’ nave ohiya wi ilukuluku soothene ncicimihiweke.—Aro. 12:10.

Muchu awiiyeviha tho onnasuwela wi ‘àveka atxhu miruku, miteko sawe inamulapeya.’ (Masi. 15:22, BNM) Moohipwacha miruku ni mavyakelo ahu, hiyaano nnaphwanela wuupuwela wi haavo muchu onasuwela ichu soothene. Ophiyerya tho Yesu aanasuwela wi sookhalavo ichu ikina owo aahaasuweleiye. (Mat. 24:36) Owo tho, aatikitheryeya wa yeeyo oohuserya awe oohiphaameya yaasuwelaaya naari yuupuwelaaya. (Mat. 16:13-16) Ti nthowa nene anamuteko akhwaawe yaaniisoona okhala ookhapeleleya ni yoowo! Moolikana, vaavaa nnakhalaahu awiiyeviha ni wuupuwela wi hinnasuwela ichu soothene, nave vaavaa nnawiriyanaahu miyoonelo sa akina, ninnatikitherya murecele nave miteko sahu ‘sinnalapeya.’

Xaxaxa ti woochuneya wa asitokweene omutakiherya Yesu vaavaa analapaaya vamoha. Awo anaphwanela wuupuwela wi munepa waweela onanwerya omvolowela mutokweene ori oothene a mu nikhuuru naya. Wakhala wi mmithukumano saya, anneeriha wi mmoha ti mmoha akhale ootaphuwa ovahererya moonelo awe, oothene anahaala opaka soolakelela seiho sinahaala okhaviherya muloko woothene.

Nthamwene oomutekoni aphaama tooleva vaavaa onalapeiye ni anamuteko akhwaawe. Owo toowetha ni awiiwelela. Yesu aakhalano ikari saphaama sa woona oleva wa Atiithi awe. Ntoko yootakiherya, Yehova aamurumiha owo wi awoopole achu orweela wa okhwa yoowo yaathoriheliwaaya.—Yoh. 3:16.

Yesu aaniiwelela wakhala woochuneya naari woophwanelela. Muupuwele mukhalelo owo aamukhavihenryeiye muthiyana o Kanani, naamwi owo arumihiwe wa nloko na Aisarayeli. (Mat. 15:22-28) Owo tho aari ooleva wa yeeyo owo aaweheryeiye wa oohuserya awe. Nthamwene awe avanikuthani Pedro amanle omukhooca owo vanlakani, Yesu aari ooreheryeya omukhurumuwela. Ohoolo waya, owo aamvaha Pedro mirici soochuneya. (Luka 22:32; Yoh. 21:17; Saw. 2:14; 8:14-17; 10:44, 45) Yootakiherya ya Yesu ennooniherya mookwakwaleya wi nnaphwanela weeriha wi achu ‘oothene esuwele wi hiyaano na achu ooleva’ moorweela wa wiiwelela.—Fil. 4:5.

Okhala ooleva onahaala tho onceenyerya wiikhoveleliha olapa mwa murecele ni achu a  mikhalelo soothene. Yesu aanaakhaliha phaama oothene yaawo yaamurukurenrye ophiyerya wi amwiicani awe yaamootherya owo wi aari “nthamwene a alipa a mushokho ni oocheka” yaawo yaawiriyana michaka sawe. (Mat. 11:19) Moolikana ni Yesu, apwanne nnanwerya olapa phaama ni akina yaawo ari oohiyana ni hiyaano? Louis, yoowo aalapa ni achu oohiyana mmuteko wa weeceeca ni muteko wa Opeteli, ooloca: “Olapa vamoha ni achu oohiphaameya ori ntoko oteka exiri ni maluku yaawo ari oohiyana mannuwelo. Woona wi maluku awo toohiyana onnachuneya wiilipixerya, nyenya exiri enanwerya okhala yawookowa. Kinniilipixerya opaka matorokelo wi kilapeke mwa murecele ni akina, eyo enneeriha wi muteko olapeye.” Ola mukhalelo waphaama chiryene!

Ikari taani nryaahuno sa wooniherya wi naachu ooleva ni oothene a mmulokoni? Nookhalano ekari ya weerano yeeyo vaavaa nnakhalaahu ni achu a mu nikhuuru nahu na muteko woolaleerya. Nnanwerya olapa ni alaleeryi yaawo arino mirici soohiyanahiyana veemusini opwaha seiho nryaahuno naari ari oohiyana iyaakha ni hiyaano. Hiyaano nnanwerya otoroka waakuva wahu naari okhala ooreheryeya olaleerya mmukhalelo mukina yoowo awo anachunaaya, mwawiihiiha awo anahaala ohakalala mmuteko woolaleerya.

Nthamwene oomutekoni ori ooreheryeya ‘wakawela akina.’ (1 Tim. 6:18, NN) Vaavaa aalapeiye ni Atiithi awe, Yesu aahoona wi Yehova haari ookhuwa. Vaavaa Yehova ‘aarehereryeiye erimu,’ Yesu ‘aakhalavo’ nave aahuserya orweela wa yoowo. (Masi. 8:27) Ohoolo waya, Yesu aakawana ni oohuserya awe ‘ichu soothene iiwaleiye’ wa Atiithi awe. (Yoh. 15:15) Ni yeela mmuupuweloni, hiyaano tho nnaphwanela okhala ooreheryeya okawana ni anamuteko akhwiihu masuwelelo ni mavyakelo ahu. Mweeparipari, nthamwene aphaama oomutekoni hanaavareryela akina moorweela wa ohaaleela yeeyo anaphwanelaaya weera naari yeeyo enahaala waakhaviherya. Owo onnasiveliwa waaleela akina ichu saphaama seiho ohusenryeiye.

Hiyaano tho nnanwerya okawana masu oolipiha ni anamuteko akhwiihu. Vaavaa muchu onooneiye wiilipixerya wahu ni wooniherya othamalela, apwanne eyo henatannya murima ahu? Yesu aanaavya elukuluku wi aaleele asinthamwene awe wi aanoona ichu saphaama wa yaawo. (Mulikanyihe ni Mateu 25:19-23; Luka 10:17-20.) Ophiyerya wi owo aahaaleela wi awo yaahaala ‘weerano miteko mitokwene opwaha’ sawawe. (Yoh. 14:12, BNM) Ohiyu ahaakumve okhwa, owo aahaathamalela arummwa awe oororomeleya, ariki: “Nyuwo muri yale yatitenle okhala ni miyo elukuluku yothene n’wehiwani mwaka.” (Luka 22:28, BNM) Mwaanyiherye mukhalelo masu awe yaatannyilaaya mirima saya ni waaceenyerya weeravo echu! Wakhala wi hiyaano ninnaavya elukuluku wi naathamalele anamalapa akhwiihu, awo chiryene anahaala ohakalala nave mwawooneya anahaala opaka sincipale.

Munna awiichaniwa Kayode, ooloca: “Nthamwene aphaama oomutekoni hanachuna wi akhale oophaameya, nyenya onnaweeriha akina okhala oohakalala nave onneeriha wi muteko okhale wookhweya ni yaale onalapeiyeno vamoha.” Nyuwaano mwa nthamwene oomutekoni a mukhalelo yoola? Akhweya munanwerya waaveka anna akina naari arokora wi yooleeleeni nthamwene a mukhalelo taani munaphwanelaanyu okhala. Wakhala wi awo annasiveliwa olapa ni nyuwaano, hiihaa ntoko oohuserya a Yesu yaasiveliwaaya olapa ni yoowo, nyuwaano munanwerya oloca hiihaa ntoko murummwa Paulo aalonceiye: “Nnalapa vamoha wi noohakalaliheeni.”—2 Kor. 1:24.