Vaavaa Yehova aalamulenleiye achu wi ‘esareye mu elapo yavathi ni elamuleleke elapo eyo,’ owo ooniherya wi elapo yoothene yamukhala parataiso. (Map. 1:28, PMM) Yaale anahaala opuha okumi okhala wookhala anaphwanela wiiwelela nlamulo nimohamoha. Elapo yavathi hekhala parataiso wuupaceryani woona wi emaca ya Eteni vano hekhanle. Emanle ekhoco ya Armaketo, nnahaala okhalano muteko mutokweene wa oreherya elapo yeeyo enanarihiwe. Owo chiryene onamukhala muteko mutokweene!

Eyo ennanuupuxerya muteko yoowo Aisarayeli yaaphwanelaaya opaka vaavaa yaakonkaaya o Paapulo. Haavo aakhanle mu elapo aya mu iyaakha 70. Nyenya Yesaya aahiloherya wi nnikhaviheryo na Yehova, awo yaanwerya weeriha elapo aya okhala yooreera wanaawiili. Masu a miririmu yaaloca wi: “Ntakhwa nawe anamutatusha okhala ntoko Eeteni, echaya awe yawuuma ekhale ntoko emaca ya Apwiya.” (Yes. 51:3, PMM) Aisarayeli yaahikhumelela phaama. Nave tho, ni mareeliho a Yehova,  yaale anahaala waakhela elapo yavathi anahaala okhumelela phaama mu weeriha elapo okhala parataiso ooreera. Nave naamwi hiihava munanwerya wooniherya wi munnachuna opaka makupa.

Mukhalelo mmoha wa weerano yeeyo ori moorweela wa opaka owetha wanyu wi empa anyu etitelele okhala yooreera ni yooreheryeya. Nyuwaano munanwerya weerano yeeyo naamwi amwaacamani anyu eheerakano. Nyuwaano tho munanwerya okhaviherya orehererya Empa ya Omwene ni Mapuro a Muthukumano wa Ekulucu. Wakhala wi mikhalelo sanyu sinnaweemereryaani, nyuwaano munanwerya wiivaha wi mukhaviherye emanle weereya epahu ya maphacuwelo. Eyo enahaala wooniherya wi munnachuna waakhaviherya anna ni arokora anyu wakhalavo othowa. Mwiikohe: ‘Apwanne kanwerya ohuserya miteko seiho kaahaalaaka opharihela wakhala wi Yehova ookeemererya waakhela elapo evyaani?’

Yesu amanle omviiha mookhwani mwaana amwaamuthiyana a Xairu, mwawaakuveya ahiloca wi emvahe yoolya wi alye. (Mar. 5:42, 43) Akhweya hiwaari woovila okhapelela soothowa sa nahano yoole aarino iyaakha 12. Nyenya muupuwele muteko mutokweene nnahaalaahu okhalano vaavaa Yesu onahaaleiye waakhwaniherya yoororomeliha awe yawi “oothene ari mmahiyeni anuupuweliwa eneeraaya yiiwe nsu nawe nave ekhumemo.” (Yoh. 5:28, 29) Naamwi Piipiliya ahivahereryaka sooleeliherya sincipale, nnanwerya waanyiherya wi yaawo anahaala oviihiwa mookhwani anahaala ochuna nikhaviheryo na ophwanya soolya, nipuro na okhala ni soowara. Ti mwawiihai munahaalaanyu wooniherya hiihaano wi muri ooreheryeya okhaviherya? Nookhalano makoho avakhaani wi nthokororye.

Vaavaa muniiwaanyu yoolokoha yawi ooweherya a ekulucu onarwa oxekurya muloko anyu, apwanne mwanwerya onwopa wi mulye vamoha? Vaavaa alapeli avameekhaaya a muteko wa elukuluku yoothene anathanliwaaya wi yaarumeele mmuloko anyu naari ooweherya a ekulucu muteko awe wa weeceeca onamalaaya, apwanne mwanwerya waakhaviherya wi ewerye ophwanya empa? Waakhala wi muthukumano wa muceche naari wavameekhaaya onahaala weereya mmukuma anyu, apwanne mwanwerya wiivaha wi mukhaviherye muteko  ohaakumve naari omanle muthukumano naari owaakhela yaawo anahaala ophiya va muthukumano?

Wa nthowa na yeeyo naalakhannyaahu mu Saweeriwa ti Arummwa 24:15, ninnawehererya wi apilyawu a achu anahaala oviihiwa mookhwani. Ancipale a yaawo hiyaarino ekari ya omusuwela Yehova khalai. Nyenya anahaala okhalano ekari yeeyo emanle oviihiwa mookhwani. a Moororomeleya, alapeli a Muluku anahaala okhaviherya mu waahusiha yaawo. (Yes. 11:9) Karlota, yoowo olalenrye o Europa, Amerika Oohico ni o Afrika, onnawehererya ni murima woothene weerano yeela. Owo moohakalala ooloca: “Kinnawehererya ni murima woothene waahusiha achu anahaala oviihiwa mookhwani. Vaavaa kinaalakhanyaaka vooloca sa muchu yoowo aakhanle mu elukuluku ya khalai, wiiliwiili kinnuupuwela: ‘Waakhanle wi muchu ola oomusuwela Yehova, okumi awe hiwi okhale mmukhalelo yoola.’ Kinnawehererya ni murima aka woothene waaleela achu anahaala oviihiwa mookhwani ichu seiho ayeleenlaaya.”

Ophiyerya wi alapeli oororomeleya yaawo yaakhanle Yesu ahaakumve orwa veelaponi yavathi onamuchuneya waahusiha sincipale. Muupuwele ohakalala ni ekari enahaala okhalavo omutharihela Taniyeli waakhwaniheryeya wa sooloherya seiho aarempeiye nyenya aahiiwixexeiye. (Tan. 12:8) Naari vooloca sa omukhaviherya Ruti ni Nowemi osuwela wi muyareriwo aya waanamphitaanyerya Mesiya. Nnahaala opuha waahusiha achu veelapo yoothene, ohirivo okhinyererya ni sawaakanyerya sa elapo yeela ya mutano!

Tiheeni munaphwanelaanyu weera hiihaano wi mukhale ooreheryeya wi mwaahusihe yaawo anahaala oviihiwa mookhwani? Mukhalelo mmoha ori moorweela wa opaka owetha wanyu wi mukhale muhusiha amavyakelo ni olaleerya moohihiyererya. (Mat. 24:14) Naamwi iyaakha sanyu naari mikhalelo mikina soohiihakaani opaka sincipale mu elukuluku yeela, wiilipixerya wanyu onahaala wooniherya waakhanle wi mooreheryeya waahusiha yaawo anahaala oviihiwa mookhwani.

Ti yaphaama wuupuwelela vooloca sa makoho ala oochuneya: Apwanne muri ooreheryeya waakhela elapo evyaani? Apwanne munnawehererya ni murima woothene weeriha elapo okhala parataiso, owaakhela ni waahusiha achu yaawo anahaala oviihiwa mookhwani? Munanwerya wooniherya wi muri ooreheryeya moorweela wa opaka makupa mmirici seiho siri soolikana ni seiho munahaalaanyu opaka mu elapo evyaani!