No. Hooye. Yeeyo Tavite aarempeiye yaari eparipari.

Muthororye yeeyo owo orempeiye mu eversikulu yeela ni iversikulu soolikana: “Kinarwa kiipa kicicimihaka nsina nanyu okhala wookhala nave okhwaaniherya soolakana saka ni nyuwo mahiku oothene.” “Kinarwa koothamalaani, Apwiya, Muluku aka ni murima aka woothene, koocicimihaani okhala wookhala.” “Kinarwa kicicimiha nsina nanyu mahiku oothene.”—Sal. 61:8; 86:12; 145:1, 2, PMM.

Tavite haamutepano, nyenya owo aanasuwela wi nihiku naya aahaala okhwa. Aanasuwela wi achu oothene annakhwa wa nthowa na yoocheka, nave Tavite aaneemererya wi aari muchu oocheka. (Map. 3:3, 17-19; Sal. 51:4, 5) Owo aanasuwela wi ophiyerya alopwana oororomeleya ntoko Aaparahaamu, Isaki ni Yaakopo yaahikhwa. Nave Tavite aanasuwela wi nihiku naya aahaala okhwa. (Sal. 37:25; 39:4) Nyenya masu yaawo aarempeiye mu Salmu 61:8 ennooniherya nchuno ni yoolakelela Tavite aareiyeno ya omvuwiha Muluku okhala wookhala, naari wi mu okumi awe yoothene.—2 Sam. 7:12.

Ichu ikina seiho Tavite aarempeiye, sinnathariha saweereya seiho aahoolenleiye mu okumi awe. Ntoko yootakiherya, masu oopacerya anaphwanyeya mu Salmu 18, 51, ni 52. Mu Salmu 23, Tavite onnamuthariha Yehova ntoko mukukhula, yoowo onakhapelela ni ohoolela ipucepuche sawe. Tavite tho aari mukukhula nave aanachuna omurumeela Mukulu ‘mahiku oothene a okumi awe.’—Sal. 23:6, PMM.

Mwawiihiiha, ti waphaama wuupuwela wi soothene Tavite orempeiye aveereliwe ni Yehova. Mwa ichu seiho orempeiye, saahikhalavo sooloherya vooloca sa seiho saahaala weereya omwaahiyu. Ntoko yootakiherya, mu Salmu 110, Tavite aahiloca sa nihiku Pwiya awe aahaaleiye ‘okilaathi mmoono woolopwana’ wa Muluku a wirimu ni ovahiwa owerya. Owerya wa weera eheeni? Wi aavoothe amwiicani a Muluku ni ‘othoriha maloko’ a veelaponi. Tavite aari mmoha a nikholo na Mesiya yoowo aahaala olamulela wirimu ntoko “namukutxho wa mahiku òthene.” (Sal. 110:1-6, BNM) Yesu aahiloca wi yooloherya ya mu Salmu 110 yaaloca sa yoowo nave wi yaahaala waakhwaniheryeya omwaahiyu.—Mat. 22:41-45.

Yehova aahimveerela Tavite ohiya paahiru vooloca sa elukuluku awe, nyenya tho vooloca sa omwaahiyu, vaavaa onahaaleiye omviiha mookhwani ni opuha ohakalala wa omucicimiha Yehova okhala wookhala. Hiihaa, Salmu 37:10, 11, 29 aanaphariheleya mu elukuluku aarepiweiye ntakhara a Isarayeli a khalai nyenya tho muhoolo vaavaa Muluku onahaaleiye waakhwaniherya soororomeliha sawe.—Moone eparakrafo 8 wa mwaha “Onarwa Okhala ni Miyo Mparataiso” mu erevista yeela.

Masu a mu Salmu 61:8 ni iversikulu soolikana sinnooniherya mookwakwaleya wi Tavite aachuna omucicimiha Yehova mu okumi awe woothene. Nave masu yaala annooniherya mookwakwaleya yeeyo Tavite onahaaleiye weera muhoolo vaavaa Yehova onahaaleiye omviiha mookhwani.