1. Ti mwawiihai Yehova wiiliwiili onaakhuleiye mavekelo a alapeli awe?

 APWANNE mwaanasuwela wi munanwerya ophariheliwa ni Yehova wi aakhule mavekelo oorweela vathi va murima wa akina? Munanwerya okhaviherya moohiphwacha waakhanle wi mwa mutokweene a mmuloko, murummwa oorumeela, piyoneero naari mulaleeryi a mmulokoni. Munanwerya tho okhaviherya moohiphwacha waakhanle wi mwa mmiravo naari awunnuwelavo naari moohiphwacha mwaari munna naari murokora. Vaavaa muchu yoowo onamusivela Yehova onamvekeiye yoowo nikhaviheryo, Muluku ahu wiiliwiili onnaapharihela atokweene a mmulokoni ni alapeli akina oororomeleya wi ekhale “ehime ya nihakararyo ntokweene” wa muchu yoowo. (Ako. 4:11) Ekari etokweene omurumeela Yehova ni annihu mmukhalelo yoowo! Nnanwerya waakhaviherya ni waalipiha annihu vaavaa enakhumelelaaya ereca yoomwaramwaxeya, ipahu sa maphacuwelo naari wiikariwa.

2. Ntakhara heeni onanwerya okhala woovila waakhaviherya akina variyari va ereca yoomwaramwaxeya?

² Ereca yoomwaramwaxeya enanwerya weeriha okhala woovila okhaviheryana mukina ni mukhwaawe. Ntoko yootakiherya, akhweya nnamuchuna waaxekurya asinthamwene ahu, nyenya ennakhala yawoopiha weerano yeeyo. Akhweya nnamuchuna waawopa yaawo eri oothoiwa wi elye vamoha ni hiyo, nyenya eyo tho tahi yooweryeya. Vakina vaya nnamuchuna waakhaviherya akina, nto ennakhala yoovila wakhala wi mmoha a veemusini vahu onnahooxeya. Naaamwi hiihaa, ninnachuna waakhaviherya anna ni arokora ahu, nave Yehova onnahakalala vaavaa onanooneiye nipakaka yeeyo nnaweryaahu ntakhara yaawo. (Mas. 3:27; 19:17) Tiheeni nnaphwanelaahu weera?

3. Tiheeni nnahuseryaahu orweela wa yootakiherya ya atokweene a muloko wa Tesi? (Yeremiya 23:4)

 ³ Tiheeni atokweene anaphwanelaaya weera? Waakhanle wi mwa mutokweene, musuwele phaama ipucepuche sanyu. (Mwaalakhanye Yeremiya 23:4, PMM.) Tesi, murokora yoowo oromoliwe mmwaha ovirale, ooloca: “Atokweene a mu nikhuuru naka noolaleerya khalai, ilukuluku soothene yaanalapa ni miyo ni akina muteko woolaleerya nave yaanakhala ni hiyaano vaavaa naapakaahu ichu ikina ntoko nikhuuru.” b Wiilipixerya wa akukhula yaale waaheeriha okhala wookhweya wa yaawo omukhaviherya Tesi variyari va epahu ya Koronaviru ni vaavaa akina a emusi awe yaakhwilaaya nthowa na ereca yeele.

4. Ntakhara heeni atokweene a mmuloko yaaryaaya ooreheryeya omukhaviherya Tesi, nave tiheeni nnahuseryaahuvo?

⁴ Tesi oothariha: “Woona wi kaanawoona atokweene a muloko ntoko asinthamwene aka, eyo yaaheeriha okhala wookweya wa miyo waaleela mukhalelo kiisoonaaka ni yeeyo kuupuwelaaka.” Tiheeni atokweene anahuseryaayavo? Mwaakukhule anna ni arokora ehaakumve epahu. Mukhale asinthamwene aya. Wakhala wi ereca yoomwaramwaxeya ennoohiihaani waaxekurya anna ni arokora moonanaka, mwaavyaavye mikhalelo mikina. Tesi ooloca: “Ilukuluku ikina, atokweene ancipale a mmuloko yaanakilikaarela naari okirumihela michaka mu nihiku nimohamoha. Soorepa seiho yaakaalakhanyenryaaya saakitannya murima, naamwi kaasuwenle phaama iversikulu seiho.”

5. Ti mwawiihai atokweene a mmuloko anahaalaaya osuwela yeeyo anna ni arokora anachunaaya ni waakhaviherya yaawo?

⁵ Mukhalelo mmoha wa osuwela yeeyo anna ni arokora ahu anachunaaya, ori moorweela wa waapakela makoho ahinahaala waahaleeliha. (Mas. 20:5) Apwanne nyuwaano mookhalano yoolya yawaakhwanela, murece naari echu ekina? Apwanne awo ari va yawoopiha ya oyeleela muteko, ophiyerya tho ipa saya? Apwanne annachuna nikhaviheryo nahu wi ewerye waakhela nikhaviheryo na kuvernu wakhala wooweryeya? Tesi aahaakhela nikhaviheryo noomwiilini orweela wa akhwaawe a munroromelo. Nyenya xaxaxa waari nikhaviheryo na mmuupuweloni ni noomunepani noorweela wa atokweene a muloko naamukhavihenrye ovilela ni makacamiho awe. Owo ooloca: “Atokweene a muloko yaanavekela ni miyaano. Naamwi kihuupuwelaka phaameene echu yaaloncaaya, kinnuupuwela mukhalelo kiisonnaaka. Ola waari mukhalelo wa Yehova oloca: ‘Weyaano hori mukhataa.’”—Yes. 41:10, 13.

6. Tiheeni ancipale mmulokoni anaphwanelaaya weera wi yaakhaviherye akina? (Moone eruku.)

 ⁶ Tiheeni akina anaphwanelaaya weera? Hiyaano ninnaweherya wi atokweene a mmuloko yaakhapeleleke anna ni arokora a mmulokoni. Nyenya Yehova onnaniwopa oothene ahu wi naalipiheke ni waakhaviherya akina. (Aka. 6:10) Naamwi nipanke echu ekhaani wi nimukhaviherye muchu yoowo oniiceliwa, eyo enanweerya omulipiha vancipale. Mwaana onanwerya orumiha ekaarata naari etesenyu wi amulipihe munna. Mmiravo onanwerya othuma echu omerkatu naari opaka echu ekina ntakhara murokora awunnuwelavo. Akina mmulokoni ananwerya opaka marehereryo wi yaapeye yoolya ntakhara muchu yoowo oniiceliwa ni omukerihela owannyawe. Mweeparipari, vaavaa enakhumelelaaya ereca yoomwaramwaxeya, achu oothene mmulokoni annachuna nlipiho. Akhweya nnanwerya omaliha elukuluku vakhaani imanle mithukumano wi naaxelihe anna ni arokora moohipwacha waari mwa wooneya naari mu ikhankoonya. Nave atokweene a mmulokoni annachuna tho nlipiho. Anamoona a Yehova akina annarumiha ikartau soothamalela wa atokweene, yaawo wiiliwiili anapaka sincipale wi yaakhaviherye anna ancipale variyari va ereca yoomwaramwaxeya. Ti yaphaamaxa vaavaa nnapakaahu makupa ahu wi ntitelele “olipihana mukina ni mukhwaawe ni otikitheryana mukina ni mukhwaawe”!—1 Ate. 5:11.

7. Makacamiho taani anakhumelela emanle weereya epahu ya maphacuwelo?

⁷ Epahu ya maphacuwelo enanwerya otoroka okumi ahu mmukhalelo wootutuxa ni woohiwehereryeya. Achu aphacuweliwe ananwerya oyeleela miteko saya, ipa saya, naari ophiyerya tho oosiveliwaaya. Saweereya seiha sawoopiha sinnaaphacuwela tho anna ni arokora ahu. Tiheeni nnaphwanelaahu weera wi naakhaviherye?

8. Tiheeni atokweene ni miru sa ichoko anaphwanelaaya weera ehaakumve weereya ipahu sa maphacuwelo?

⁸ Tiheeni atokweene anaphwanelaaya weera? Atokweene, mwaakhaviherye anninyu okhala ooreheryeya ehaakumve epahu ya maphacuwelo. Mpake owetha wanyu wi oothene mmulokoni esuwele yeeyo anaphwanelaaya weera wi ekhale ookhapeleleya ni owerya oloca ni nyuwaano variyari va epahu. Markareti, yoowo oromoliwe mmwaha ovirale, ooloca: “Atokweene ahu yaahiperekha mwaha wa soothowa sa muloko enleelaka wi epahu ya mooro nivano hiyaamaanle mmukuma ahu. Awo yaahiloca wi wakhala wi alamuleli aaloca wi nnaphwanela ohiya ipa sahu naari wakhala wi mooro onnatepa, naaphwanela ochawa mwawaakuveya.” Anna yaahinivaha sooleeliherya seihe mu elukuluku yoophwanelela, woona wi epahu ya mooro yawoopiha yaaheereya tho isumana thanu ohoolo waya. Variyari va malapelo a echoko, miru sa echoko inanwerya othokororya yeeyo mmoha ti mmoha a veechokoni onaphwaneleiye weera. Wakhala wi nyuwaano ni aniinyu mohiirehererya woosiilo, akhweya onamukhala wookhweya wa nyuwo otitelela okhala oomaaleleya yakhumelela epahu ya maphacuwelo.

9. Ti mwawiihai atokweene anapakaaya marehereryo ehaakumve ni emanle weereya epahu ya maphacuwelo?

⁹ Waakhanle wi mwa muhooleli a nikhuuru na muteko woolaleerya, mweererye osuwela waakhanle wi mookhalano manuumuru a achu oothene, nave mweereno yeeyo ehaakumve epahu ya maphacuwelo. Mpake elista nave elukuluku ti elukuluku mvareryeke wi moone waakhanle wi nivano annaphariheliwa. Variyari va epahu ya maphacuwelo, munahaala okhala ooreheryeya omulikaarela mmoha ti mmoha a alaleeryi wi musuwele soothowa saya. Mwawaakuveya, mmuleele muhooleli a nikhuuru na atokweene yoowo onahaala oloca ni ooweherya a ekulucu. Vaavaa anna yaala analapaaya vamoha, ananwerya ovaha nikhaviheryo noophwanelela. Emanle epahu, ooweherya a ekulucu a Markareti haakonne  mu iwora sawaakhwana 36. Owo aari ooweiwa arehereryaka muteko wa atokweene vaavaa awo yeereryaaya waalikaarela ni waakhapelela anna ni arokora awaakhwana 450 yaawo yaahin’ye ipa saya. (2 Ako. 11:27) Mwawiihiiha, oothene yaale yaachuna nipuro wi ekhale, yaahikhapeleliwa.

10. Ntakhara heeni atokweene anoonaaya okhala woochuneya muteko wookukhula? (Yoh. 21:15)

¹⁰ Atokweene aakhalano murici wa waalipiha anna empharihelaka Piipiliya ni waakhaviherya yaawo ari awuukhuwa. (1 Pet. 5:2) Vaavaa eneereyaaya epahu ya maphacuwelo, atokweene anaphwanela osuwela waakhanle wi anna ni arokora oothene ari phaama, aakhalano soolya, soowara nnipuro na okhala. Nyenya mu miyeeri mincipale emanle epahu ya maphacuwelo, anna yaawo akophonle anamuchuna nlipiho noorweela Mpiipiliyani ni nihakararyo. (Mwaalakhanye Yohani 21:15.) Harolt yoowo onarumeela mu Nikhuuru na Efiliyale nave aasuwenle anna ni arokora ancipale yaawo yaavoloweliwe ni epahu, ooloca: “Ennamaliha elukuluku wi ekhale phaama. Okumi aya akhweya onanwerya okookela okhala phaama nyenya owuupuwela oosiveliwaaya akhwile, miteko ayeleenlaaya ni mukhalelo wawoopiha ahoolenlaaya onanwerya otitelela. Muupuwelo seiho inanwerya waahooxa wanaawiili. Iwo tahi oyeleela nroromelo, nyenya mukhalelo wawunlaana achu aniisoonaaya.”

11. Soothowa taani sootitelela ichoko seiho iphacuweliwe anakhalaayano?

¹¹ Atokweene mphariheleke ekano yawi “mwinleke ni yaale aninla.” (Aro. 12:15) Atokweene anaphwanela woororomeliha yaale aphacuweliwe ni epahu wi Yehova, anna ni arokora nivano ennaasivela. Atokweene anaphwanela okhaviherya imusi wi etitelele okhapelela makupa aya oomunepani, ophitaanyerya ovekela, ohuserya, othukumana ni olaleerya. Nyuwaano tho munaphwanela waaceenyerya asitiithi wi yaakhaviheirye anaaya otikitheryeya mu ichu seiho ipahu sa maphacuwelo ihinaweryaaya otoloxa. Asitiithi, nwuupuxeryeke aniinyu wi Yehova ilukuluku soothene anamukhala nthamwene aya ni wi onamwaakhaviheryaka yaawo. Nave mwaaroromelihe wi ilukuluku soothene anamukhalano emusi ya elapo yoothene ya anna ni arokora yaawo ari ooreheryeya waakhaviherya yaawo.—1 Pet. 2:17.

12. Tiheeni akina anaphwanelaaya weera wi ekhaviherye mmuteko woorehererya? (Moone eruku.)

¹² Tiheeni akina anaphwanelaaya weera? Waakhanle wi epahu ya maphacuwelo yoheereya vakhiviru, mwaakohe atokweene mukhalelo wookhaviherya. Akhweya munanwerya waahayiha yaale aphacuweliwe naari yaale yiiveleenle wi ekhaviherye. Munanwerya okhala ooreheryeya wi mwaavahererye yoolya ni ichu ikina wa alaleeryi ari oothoiwa. Waakhanle wi epahu ya  maphacuwelo yeeren’ye woorakamawo, naamwi hiihaa, munanwerya okhaviherya. Mwawiihai? Moorweela wa waavekelela yaale aphacuweliwe. (2 Ako. 1:8-11) Nyuwaano munanwerya okhaviherya muteko woorehererya, moorweela wa opaka sooveleela ntakhara muteko wa elapo yoothene. (2 Ako. 8:2-5) Wakhala wi mooreheryeya wi mpake mukwaha wi muye weiwo epahu ya maphacuwelo yeeren’yaayawo, mwaakohe atokweene yeeyo munaphwanelaanyu weera. Wakhala wi moowompwa wi mwakhaviherye, munahaala waakhela ovyakiha yoowo munahaalaanyu opharihela weiwo ni vaavaa onahaalaaya okhala woochuneya omwaahiyu.

13. Makacamiho taani anna anahoolelaaya mu ilapo seiho muteko ahu owatiihiwaaya?

¹³ Mu ilapo seiho muteko ahu owatiihiwaaya, wiikariwa onnakacamiha vancipale ikumi sa anna ni arokora. Anna anakhala mu ilapo seiho annahoolela othoiwa wa ikhorowa, anniiceliwa nave annaayeleela oosiveliwa aya mookhwani. Nthowa na wiikariwa, atokweene hanawerya waaxekurya naari waalikaarela mootaphuwa anna yaawo anachuna nlipiho. Ti yeeyo yeeren’ye ni Antre, yoowo oromoliwe mmwaha ovirale. Murokora mmoha a mu nikhuuru nawe na muteko woolaleerya aanahoolela othoiwa wa ikhorowa. Voocharela, aahimpaka asitenti ni ekaaro. Nthowa na yeeyo, aaphwanela ompaka operasau mutokweene nave haawerya olapa. Naamwi yaahoolela wiikariwa ni epahu ya Koronaviru, anna yaahipaka yeeyo yaaweryaaya wi ekhaviherye nave Yehova aanoona.

14. Atokweene eni ewerye hai otikitherya yootakiherya yaphaama mu omuroromela Yehova?

¹⁴ Tiheeni atokweene anaphwanelaaya weera? Antre aanavekela nave aanapaka yeeyo aaweryeiye. Ti mwawiihai Yehova aakhunleiye? Owo aahaavahererya anna ni arokora yaarino otaphuwa wi ekhaviherye. Akina yaanamvaha murokora murece yoowo aaromoleliweiye. Akina yaanamvaha ikhorowa wi emukhaviherye. Yehova aahaaceenyerya opaka yeeyo yaaweryaaya, nave aahireeliha wiiwanana waya, owetha waya woolipiha. (Ahe. 13:16) Atokweene, vaavaa muteko onawatiihiwaaya, mwaavekeke akina wi ekhaviherye. (Yer. 36:5, 6) Opwaha soothene, mmuroromele Yehova. Owo onanwerya wookhaviheryaani okhapelela soothowa sa anna ni arokora anyu.

15. Ti mwawiihai nneeraahu nikhapelele wiiwanana wahu Weekristu vaavaa nniikariwaahu?

¹⁵ Tiheeni akina anaphwanelaaya weera? Vaavaa muteko onawatiihiwaaya, akhweya nnamuthukumanaka ni anna mmakhuuru makhaani. Eyo ti yoochuneyaxa wi nikhaleno murecele variyari  vahu. Muwaneke ni Satana, ohiya mukina ni mukhwaawe. Muhitikitheryeyeke mu soohesa sa anninyu, nave mweererye orehererya ohiiwanana mwawaakuveya. (Mas. 19:11; Aef. 4:26) Mukhale ooreheryeya okhaviheryana mukina ni mukhwaawe. (Titu 3:14) Nikhaviheryo anna akina emvanhaaya murokora oothoiwa, naahaavolowela mwaphaama achu a mu nikhuuru na muteko woolaleerya. Awo yaari awaacameleya ntoko emusi.—Sal. 133:1.

16. Mwawiiwanana ni Akolose 4:3, 18, nni niwerye hai waakhaviherya anna ni arokora ahu aniikariwa?

¹⁶ Machikwi ni machikweene a annihu ni arokora Eekristu annamurumeela Yehova naamwi ehiihiwaka ni alamuleli. Akina a yaawo aawaleliwa mukaripooso nthowa na nroromelo naya. Nnanwerya waavekelela yaawo, imusi saya, ni yaale anahela otaphuwa waya vayawoopiha wi yaavahererye anna ni arokora yaawo ichu soomunepani, soomwiilini ni owaakiha yaawo otripunale. c (Mwaalakhanye Akolose 4:3, 18.) Muhirwe mucuwale wi mavekelo anyu ananwerya waakhaviherya anna ni arokora oothene yaala!—2 Ate. 3:1, 2; 1 Tim. 2:1, 2.

17. Muni mwiirehererye hai hiihaano ntakhara wiikariwa?

¹⁷ Nyuwaano ni emusi anyu munanwerya wiirehererya hiihaano ntakhara wiikariwa. (Saw. 14:22) Muhererye waanyiherya ichu soothene soonanara sinahaala weereya. Ohiya yeeyo, mulipihe onthamwene anyu ni Yehova nave mwaakhaviherye aniinyu weerano emohamoha. Vaavaa munakhalaanyu awuukhuwa, muhule murima anyu wa Muluku. (Sal. 62:7, 8) Ntoko emusi, muthokororye mathowa oothene vooloca sa ntakhara heeni munaphwanelaanyu omuroromela yoowo. d Hiihaa ntoko wiirehererya ntakhara epahu ya maphacuwelo enaakhaviheryaaya aniinyu, wiirehererya wanyu tho ni omuroromela wanyu Yehova onahaala waakhaviherya aniinyu okhala oolipa murima ni oomaaleleya variyari va wiikariwa.

18. Omwaahiyu taani nnawehereryaahu?

¹⁸ Murecele wa Muluku onnanikhapelela. (Afi. 4:6, 7) Moorweela wa yoowo, Yehova onnakurumuxa murima ahu mu wiiceliwa, ipahu sa maphwacuwelo ni wiikariwa seiho nnahoolelaahu olelo. Owo onnapharihela muteko mutokweene wa atokweene wa onikukhula. Onnanivaha oothene ahu ekari ya okhaviheryana mukina ni mukhwaawe. Murecele nnapuhaahu hiihava onahaala onikhaviherya ohoolela makacamiho matokweene anoorwa ophiyerya tho “yoohooxa etokotoko.” (Mat. 24:21) Mu elukuluku yeeyo, onamuchuneya otitelela okhapelela murecele ahu ni waakhaviherya akina weerano emohamoha. Nyenya emanle yaweereya yeeyo, hinihoolela makacamiho ananeeriha okhala awuukhuwa. Nnahaala opuhaka yeeyo Yehova aachuneiye woopaceryani ntakhara hiyo—ophaameya ni murecele woohimala.—Yes. 26:3, 4.